1 KORINTUS 14 - Tanou Moonsoi Timugon

Pambalaan poyo ra taak intor ra Ambiluo ri Aki Kapuuno'

¹ Pirot kano motogom ra ulun bokon. Gogoto' min niayuk taak intor ra Ambiluo ri Aki Kapuuno', mulu' poyo ra kasagaan koson mampasaboi ra bala' intor ri Aki Kapuuno'.

² Ulun ondo' inanian ra kapandayan mindagu ra ragu imuagan, kalo makimansunur ra ulun bokon, kaa' ri Aki Kapuuno', sabap ra ulun kalo makarati' ra ragu raginio. Mindagu io ralalom kuasa' ru Ambiluo ri Aki Kapuuno' intor ra baal ondo' kalo igondo' pinabala'.

³ Kaa' ulun ondo' mampasaboi ra bala' intor ri Aki Kapuuno', potonowon no ginio ra ulun koson mampasingkot, mampaikang am mampabansuk risilo.

⁴ Ulun ondo' inanian ra kapandayan mindagu ra ragu imuagan, migikang io galama' ayuk, kaa' ulun ondo' mampasaboi ra bala' intor ri Aki Kapuuno', mampaikang ra pasimpungan ulun Kristian.

⁵ Mapara' bonsoi no ru akau ngaangai' makakapandayan mindagu ra ragu imuagan no. Kaa' mulu' poyo bonsoi no amon ru makapampasaboi kau ra bala' intor ri Aki Kapuuno'. Sabap ra ulun ondo' mampasaboi raginio, makaampos toojo ka ulun ondo' inanian ra kapandayan mindagu ra ragu imuagan. Kaa' ondo' ayuk am amon ru ulun no makapambala' ra arati' ru rinagu nano, maa' raginio pasimpungan ulun Kristian maindangan no.

⁶ Pabukat kau ngaangai', amon ru mongoi aku ramuyun am mindagu ra ragu imuagan, atan onong no ramuyun? Kolondo' toojo onong, ondo' ayuk am amon ru mambala' aku ondo' pinakito ri Aki Kapuuno', kapoam mantunung intor Riso, kapoam mampasaboi ra bala' intor ri Aki Kapuuno' kapoam mangila' ramuyun.

⁷ Mogondo' ayuk ra kakamot ru miujik ondo' kalo maayag, koson ra suling am jitor; amon ru kulion am lalayuk no kalo matanda', ati kulaan ulun makapandai ra rimbai no?

⁸ Kapoam tarumpit, amon ru bonyowon ayuk samput no, osoi saujor tumampos mongoi ra pangayawan?

⁹ Koson niayuk ra ati kulaan ulun mangarati' atan raguon min amon ru mindagu kau ra ragu imuagan? Ragu mino raginio lumiot, koson masiab ru angin.

¹⁰ Giti ra tana' ti nansalinut ragu, kaa' moonong rondo' ragu mokoondo' arati'.

¹¹ Ginio ra amon ru kalo makarati' aku ra ragu ru sasangulun, pangkaraan ku io ulun bansa' ru bokon; am mogondo' niayuk pangkaraan nano intor raki'.

¹² Makapandai aku ra mompogogot kau ra kapandayan intor ra Ambiluo ri Aki Kapuuno' no. Kaa' ondo' maatang toojo, musiti' mompogogot kau ra kapandayan ondo' mampaikang ra pasimpungan ulun Kristian.

¹³ Sabap raginio nai, ulun ondo' inanian ra kapandayan mindagu ra ragu imuagan, moonsoi makitaak io ri Aki Kapuuno' ra kapandayan mambala' ra arati' ru ragu raginio.

¹⁴ Sabap ra amon ru makiasi' aku mabaya' ra ragu imuagan, motopot Ambiluo ri Aki Kapuuno' makiasi' ralalom kuno, kaa' pangkaraan kuno kalo makapabaya'.

¹⁵ Ginio poyo, atan baalon kuno? Koson ragitio; makiasi' Ambiluo ri Aki Kapuuno' ralalom kuno, kaa' makiasi' aku niayuk mabaya' ra pangkaraan kuno. Marimbai Ambiluo ri Aki Kapuuno' ralalom kuno, kaa' marimbai aku niayuk mabaya' ra pangkaraan kuno.

¹⁶ Paat ra akau maringkuanang ri Aki Kapuuno' mabaya' ra ragu tinaakan ru Ambiluo no, ati kulaan ulun ra bokon ondo' kolondo' kapandayan raginio mindagu ra “Amin” ra kiasi' mino? Kalo makarati' io ra kiasi' mini.

¹⁷ Kabalu' pana kiasi' paringkuanangan mino moonsoi toojo, kaa' ginio kolondo' onong ra ulun bokon.

¹⁸ Maringkuanang aku ri Aki Kapuuno' sabap ra aku poyo mapandai makiasi' ra ragu imuagan ka akau ngai'.

¹⁹ Kaa' paat ra aku mangila' ra pasimpungan ulun Kristian, moonsoi poyo ru mindagu aku limo ragu ayuk pana ondo' maratian ru ulun intor ra kukula' ngaribu ragu ralalom ragu imuagan.

²⁰ Pabukat kau ngaangai', pai' kau pangkara' koson ra lalaing, kaa' musiti' kau makapaliso koson ra ulun nasukor, ondo' ayuk am ralalom baal kalaatan, tilu kano ra lalagang.

²¹ Mokoondo' tinulisan ra Buuk Kitab, “Tuhan mindagu, ‘Mumbaya' ra ulun ondo' makaindagu ra ragu ondo' kalo maratian, pabalaan Ku ra ulun Kuno. Am mumbaya' ra bansa' ra bokon, mindagu Aku risilo, kaa' kabalu' pana raginio, kalo masaga' ilo mangkirongog ra ragu Kutu.’ ”

²² Ginio boo ra kapandayan mindagu ra ragu imuagan, ginio rondo' tatandu' intor ri Aki Kapuuno' ra ulun ondo' kalo mangintopot no, am sala' ka ra ulun mangintopot ri Kristus. Kaa' kapandayan mampasaboi ra bala' intor ri Aki Kapuuno', io no tatandu' ra ulun mangintopot ri Kristus, sala' ka risilo no ondo' kalo mangintopot.

²³ Amon ru paat ra pasimpungan ulun Kristian, ngaangai' makiasi' mindagu ra ragu imuagan, am ratong boo kukula' ngaulun ra bokon kapoam ulun ondo' sala' ka Kristian, maaru' ulun raginilo mindagu ra akau ngaangai' ti mantuyang.

²⁴ Kaa' amon ru ngaangai' min mampasaboi ra bala' intor ri Aki Kapuuno', am ratong boo sangulun ra bokon kapoam ulun ondo' sala' ka Kristian, ondo' pinabala' mino niayuk ngaangai' mampakito ra tula ru ulun no am mapatutun riso ra tula nano.

²⁵ Ginio boo ra atan ondo' soroi ra guang nano makasalula', saboi sumamba io ri Aki Kapuuno' mabaya' ra guang minggana' am mangiou ra, “I Aki Kapuuno' topot-topot soroi ramuyun.”

Pampaugaran ru sambayang

²⁶ Pabukat kau ngaangai', kon kutu am paat ra akau tumimung sumambayang, mokoondo' marimbai, mokoondo' mangila' am niayuk mampasaboi ra bala' intor ri Aki Kapuuno'. Mokoondo' poyo mindagu ra ragu imuagan am mokoondo' mambala' ra arati' ru ragu raginio. Kaa' ngaangai' ti musiti' mangindangan ra pasimpungan ulun Kristian.

²⁷ Amon ru mokoondo' ulun masaga' mindagu ra ragu imuagan, moonsoi ruo kapoam talu ngaulun ayuk am mampapalit ilo, am musiti' mokoondo' ulun mapandai mambala' ra arati' ru ragu raginio.

²⁸ Amon ru kolondo' makapandai mambala' ra arati' no, ulun ondo' mindagu ra ragu imuagan musiti' mongkoror ayuk paat ra sambayang no. Polosoo' ilo ayuk mindagu ralalom ru guang nilai no ri Aki Kapuuno'.

²⁹ Koson niayuk ra ilo ondo' mampasaboi ra bala' intor ri Aki Kapuuno', moonsoi ru ruo kapoam talu ngaulun ayuk mampasaboi liliwa' bokon no mampaguang toojo ra atan ondo' raguon nilo.

³⁰ Kaa' paat ra sambayang, amon ru mokoondo' bala' intor ri Aki Kapuuno' aniin ra ulun bokon, ulun ondo' lakat ayuk poyo mampasaboi no, musiti' lumonggo'.

³¹ Akau ngaangai' makapampapalit ra rondo' am bokon mampasaboi ra bala' intor ri Aki Kapuuno'; maa' raginio ngaangai' min makaapu ra pangilaan am paikangon pangintapatan min.

³² Kapandayan intor ra Ambiluo ri Aki Kapuuno' mampasaboi ra bala' intor ri Aki Kapuuno', musiti' makuasa' ru ulun ondo' inanian.

³³ Sabap ra i Aki Kapuuno' marara' ra jajajou, kaa' masaga' Io ritakau matanda' am makakaansayan. Koson ra kaindalaman ru ngaangai' pasimpungan ulun Kristian,

³⁴ ruandu'-ruandu' musiti' mongkoror paat ra pampaugaran ru sambayang no. Pai' polosoo' ilo mansusunur; maya' ra susuban ru Ukum ri Musa, kalo moonsoi ilo maningganai.

³⁵ Amon ru masaga' ilo makapandai ra kalo naratian nilo, musiti' ilo mangkuot ra ralaki nilo giu' ra baloi. Sabap ra makauyuyu' toojo amon ru ruandu' mansusunur paat ra pampaugaran ru sambayang.

³⁶ Intor ramuyun kia bala' ri Aki Kapuuno'? Kapoam akau ayuk kia inanian ra bala' no?

³⁷ Osoi ayuk mangkara' ra io no sinusub ri Aki Kapuuno', kapoam mokoondo' ra kapandayan ra bokon intor ra Ambiluo ri Aki Kapuuno', ulun no musiti' makatutun ra atan ondo' tinulisan kuni, io no susuban ru Tuhan.

³⁸ Kaa' amon ru kalo mampalio io ragitio, io pana pai' min lioo'.

³⁹ Pabukat kau ngaangai', gogoto' min noyo mampasaboi ra bala' intor ri Aki Kapuuno', am pai' min inggalari' ulun ondo' masaga' mindagu ra ragu imuagan.

⁴⁰ Kaa' ngaangai' no musiti' paugaron ra moonsoi am matanda'.