1 KORINTUS 13 - Tanou Moonsoi Timugon

Togom

¹ Kabalu' pana mapandai aku mindagu ra nansalinut ragu ru ulun, am niayuk ragu ru malaikat, kaa' amon kalo motogom aku ra ulun bokon, ragu kuno nogondo' ayuk ra bolos ru agung kapoam lunsing ondo' makausoso.

² Kabalu' pana mapandai aku mampasaboi ra tanou intor ri Aki Kapuuno', kapoam makarati' ra katapatan ri Aki Kapuuno' ondo' kalo igondo' pinabala', am makapandai ra ngaangai' am poyo pangintapatan ku ri Aki Kapuuno' maikang kaga', saboi gunung no pana maalap ku pakabanding, kaa' amon kalo motogom aku ra ulun bokon, kolondo' noyo onong kuti.

³ Kabalu' pana pataakin ku ngaangai' atan ondo' raki' ra ulun musikin, am pataakin poyo inan kutu koson solobon, kaa' amon kalo motogom aku ra ulun bokon, ginio kolondo' ampos raki'.

⁴ Ulun ondo' motogom ra ulun bokon no mataan guang am maluoi makaasi'. Ulun no kalo maingot kapoam lumimbau, am poyo kalo masumbung.

⁵ Kalo makuliga' io, kalo maguyum ra kaatangan galama', kalo mataki' angitan am kalo malikokot io ra ulun.

⁶ Kalo kaansayin no kalaatan, kaa' maansayan io ra baal moonsoi.

⁷ Mataan io ra ngaangai' am masalok maguyum ra kaansayan ra ulun ra bokon. Ralalom ngaangai' baal kalo matatakan io ra kalansanan am magail mataan guang.

⁸ Ulun musiti' masalok monogom ra bokon. Raino ti mokoondo' ulun mapandai mampasaboi ra bala' intor ri Aki Kapuuno', kaa' ginio kalo mantilayun. Mokoondo' niayuk ulun inanian ra kapandayan mindagu ra ragu imuagan, kaa' ginio pana kalo mantilayun. Mokoondo' poyo ulun makapambala' ra kapandayan intor ri Aki Kapuuno', kaa' kapandayan nilono mapuso niayuk.

⁹ Sabap ra atan ondo' kapandayan am potonowon takau intor ri Aki Kapuuno' kalo maukop.

¹⁰ Kaa' paat i Aki Kapuuno' mangukop ra ngaangai' no, kapandayan ra kalo maukop raginio maliom boo.

¹¹ Paat aku lakat ayuk poyo lalaing, ragu kuno, pamalimanan kuno am pamaguangan kuno koson ra lalaing. Kaa' raino aku nasukor, paliso koson ra lalaing i linilianan ku boo.

¹² Atan ondo' kapandayan takau raino am koson ra asilan ru saramin ondo' kalo makito toojo. Kaa' tauli no makakito takau toojo. Raino ti kalo mapandayan ku ngaangai', kaa' tauli no mapandayan ku boo ngaangai', mogondo' ri Aki Kapuuno' ondo' makapandai ra ngaangai' baal ru kaayagan kuno.

¹³ Pupus no, ondo' pantilayunon am talu ringai': mangintopot ri Kristus, malansan ri Aki Kapuuno' am motogom ra ulun bokon. Ondo' maatang toojo intor ra katalu-talu, io no motogom ra ulun bokon.