1 KORINTUS 12 - Tanou Moonsoi Timugon

Taak intor ra Ambiluo ri Aki Kapuuno'

¹ Raino mambala' aku ati kulaan taak intor ra Ambiluo ri Aki Kapuuno'. Pabukat kau ngaangai', masaga' aku ra akau makatutun toojo ra atan sotopot no taak raginio.

² Karaa' min paat ra akau kalo poyo nakaulig ra Tuhan, nakalayau kau siminamba ra sinungkalalaing ondo' kolondo' painawo.

³ Musiti' kau makapandai ra ulun ondo' kinuasa' ru Ambiluo ri Aki Kapuuno' kalo makaindagu ra, “Kaluus i Jisus!” Koson niayuk ra kolondo' sangulun pana makaindagu ra, “I Jisus noyo Tuhan!” amon ru kalo kuasaan ulun no ru Ambiluo ri Aki Kapuuno'.

⁴ Mokoondo' nansalinut taak ru Ambiluo ri Aki Kapuuno', kaa' rondo' ayuk intor nilai no.

⁵ Mokoondo' nansalinut kondoyon koson mangandoi ra Tuhan, kaa' rondo' ayuk Tuhan pangandayan.

⁶ Mokoondo' nansalinut kapandayan takau koson mangandoi ra Tuhan, kaa' ondo' mampaikang ra moonong ulun am rondo' ayuk, ioginio i Aki Kapuuno'.

⁷ Sigagama' takau inintopot ra Ambiluo ri Aki Kapuuno' am ginio koson ra kaatangan takau ngaangai'.

⁸ Ambiluo no mangani' ra sangulun ra taak mindagu ra mapintar toojo. Ulun ra bokon inanian poyo ru Ambiluo raginio ra taak mambala' ra kapandayan intor ri Aki Kapuuno'.

⁹ Ambiluo raginio niayuk ondo' mangani' ra sangulun ra pangintapatan, am taak Nano ra ulun bokon poyo ioginio kuasa' mamabas ra ulun marualan.

¹⁰ Ambiluo raginio noyo mangani' ra sangulun ra kuasa' mambaal ra kaimuagan, am ulun ra bokon inanian no ra kapandayan mampasaboi ra bala' intor ri Aki Kapuuno'. Ulun ra bokon poyo inanian ru Ambiluo no ra kapandayan magilong ra ati ka rondo' intor ra Tuhan am ati sala'. Mokoondo' inanian ra kapandayan mindagu ra nansalinut ragu imuagan, am mokoondo' poyo inanian ra kapandayan mambala' ra arati' ru ragu imuagan no.

¹¹ Ngaangai' no saukon ru rondo' ayuk, ioginio Ambiluo ri Aki Kapuuno'. Io no ondo' mangani' ra ulun ra kapandayan sigagama' sumugut ra kasagaan Nano galama'.

Masuang tayar kaa' rondo' ayuk inan

¹² Itakau ondo' mangintopot ri Kristus mogondo' ra inan ru ulun; inan no rondo' ayuk, kaa' masuang tayar. Kabalu' pana masuang tayar, kaa' rondo' ayuk inan no.

¹³ Koson niayuk ritakau ngaangai': ulun ru Jaudi kapoam sala' ka Jaudi, ulipon kapoam sala' ka ulipon; riniu' takau ngaangai' masauk ra rondo' inan ri Kristus ralalom ru Ambiluo ri Aki Kapuuno'. Itakau ngaangai' inanian ra Ambiluo raginio ondo' rondo' ayuk.

¹⁴ Sabap ra inan toojo ru ulun sala' ka rondo' tayar ayuk, kaa' masuang tayar nano.

¹⁵ Amon ru mindagu kalayam ra, “Aku sala' ka kalindu', ginio boo ra aku sala' ka tayar ru inan,” ginio kalo noyo makaarati' ra kalayam no sala' ka tayar ru inan.

¹⁶ Amon ru mindagu talingo ra, “Aku sala' ka mato, ginio boo ra aku sala' ka tayar ru inan,” ginio kalo noyo makaarati' ra talingo no sala' ka tayar ru inan.

¹⁷ Amon ru ngaangai' inan no masauk ra mato, ati kulaan io mokorongog? Kapoam, amon ru ngaangai' inan no masauk ra talingo, ati kulaan io makapangalok?

¹⁸ Sotopot no koson ragitio; i Aki Kapuuno' nambaal ra moonong tayar ru inan nansasala', sumugut ra kasagaan Nano galama'.

¹⁹ Kalo noyo lair maukop inan ti amon ru ngaangai' tayar rondo' ayuk.

²⁰ Ginio ra motopot niayuk ra inan ti masuang tayar, kaa' rondo' ayuk inan.

²¹ Ginio boo ra mato mailo mindagu ra kalindu', “Kalo mokoonong kou raki'.” Kapoam ulu mailo mindagu ra kalayam, “Kalo mokoonong kou raki'.”

²² Mulu' poyo sotopot no tayar ru inan ondo' malawo toojo, mokoonong poyo toojo.

²³ Tayar ondo' ilain ayuk ra kalo mokoonong toojo, ginio boo karaan takau makaampos toojo. Am poyo tayar ru inan ondo' makauyuyu' ilain, ginio alungin takau toojo.

²⁴ Kaa' tayar ondo' moonsoi ilain no, kalo pana alungin toojo. Kaa' i Aki Kapuuno' noyo nangaru' ra inan takau, koson tayar ondo' makauyuyu' ilain, ginio alungin toojo.

²⁵ Koson raginio ra inan no kalo boo matatayar, kaa' moonong tayar no motogom am magalung ra rondo' am bokon.

²⁶ Amon ru rondo' tayar maimbolo', ngaangai' tayar ra bokon pana makaaya' kaimbolo'. Amon ru rondo' tayar omporon, ngaangai' tayar ra bokon no pana makaaya' pakaansuk.

²⁷ Akau ngaangai' ti inan ri Kristus am moonong akau niayuk tayar poyo ru inan Nano.

²⁸ Ralalom pasimpungan ulun Kristian, nangaru' i Aki Kapuuno' ritakau ra tayar sigagama'; kasaa' am rasul; karuo am nabi-nabi; katalu am mangingila'; am ilo ondo' mambaal ra kaimuagan, am niayuk ilo ondo' inanian ra kapandayan mamabas ra ulun, mangindangan ra ulun, maningganai ra ulun, kapoam mindagu ra nansalinut ragu imuagan.

²⁹ Sala' ka ngaangai' masauk ra rasul, nabi kapoam mangingila'. Pai' ru ngaangai' makakuasa' mambaal ra kaimuagan,

³⁰ kapoam mamabas ra ulun, kapoam mindagu ra ragu imuagan, kapoam mambala' ra arati' ru ragu imuagan no.

³¹ Ginio nai ra gogoto' min noyo toojo kapandayan ondo' maatang no. Kaa' ralan ondo' moonsoi toojo tiluon min am koson ra sumunu' ti.