1 JUANIS 3 - Tanou Moonsoi Timugon

Anak ri Aki Kapuuno'

¹ Ilai'! Mumpara' piboo gayo ru togom ri Ama' saboi piawon takau ra anak ri Aki Kapuuno'. Am sotopot no, itakau ti anak ri Aki Kapuuno'. Ginio sabap ra ulun ru tana' ti kalo makaulig ritakau, sabap ra kalo makaulig ilo ri Aki Kapuuno'.

² Pabukat kau ngaangai' ondo' tagamin ku! Itakau raino ti anak ri Aki Kapuuno'. Kaa' kalo poyo natutunan toojo atan masauk ritakau ra tauli no. Kaa' nakapandai takau, paat i Jisus Kristus matong saguli', masauk takau koson Riso, sabap ra itakau makakito ra baal ru inan Nano toojo.

³ Moonong ulun ondo' malansan ri Kristus, magalung io ra kapasawan ru kaayagan nano mogondo' koson ri Kristus mapasau.

⁴ Osoi ayuk mambaal ra tula, io no kalo sumugut ra susuban ri Aki Kapuuno'. Tula ti kalo sumugut ra susuban ri Aki Kapuuno'.

⁵ Nakapandai kano ra rinatangan ri Jisus Kristus ra tana' ti koson mamuso ra tula ru ulun. Am i Jisus galama' kolondo' tula.

⁶ Ngaangai' ulun ondo' maayag sumimpung ri Jisus Kristus, kalo marayus ilo mambaal ra tula. Ulun ondo' marayus mambaal ra tula, io ti kalo igondo' nakakito am nakaulig ri Jisus Kristus.

⁷ Pabukat kau ngaangai', pai' min polosoo' osoi ayuk pana mamparuung ramuyun. Ulun ondo' mambaal ra kasagaan ri Aki Kapuuno', io ti ulun motopot koson ri Jisus Kristus niayuk motopot.

⁸ Kaa' osoi ayuk marayus mambaal ra tula, io no anak ru Tingganai ru riwato. Sabap ra naintaran noyo ra talimpuun i, Tingganai ru riwato no makatula. Ginio ra Anak ri Aki Kapuuno' riminatong, mongoi pamuso ra kandoi ru Tingganai ru riwato no.

⁹ Ulun ondo' nasauk ra anak ri Aki Kapuuno' kalo marayus mambaal ra tula. Paliso ri Aki Kapuuno' soroi riso am ginio ra io ti kalo marayus mambaal ra tula.

¹⁰ Gitio ra kalo nogondo' anak ri Aki Kapuuno' am anak ru Tingganai ru riwato. Osoi kalo mambaal ra motopot, kapoam kalo motogom ra pabukat-pabukat nano, io ti sala' ka anak ri Aki Kapuuno'.

Kotogom no ra rondo' am bokon

¹¹ Naintaran noyo ra talimpuun i, pambalaan ragitio pinasaboi ramuyun. Musiti' motogom takau ra rondo' am bokon.

¹² Pai' takau tiluo' paliso ri Kain. Nakaaya' io ra Tingganai ru riwato am namatoi io ra boborok nano galama' ondo' ininggalanan ri Abil. Kua potoyo' ri Kain boborok nali? Sabap ra ondo' binaal nali kalo motopot kaa' ondo' binaal ru boborok nali motopot.

¹³ Ginio sabap ra pabukat kau ngaangai', pai' kau pangimuag amon ru ulun ru tana' ti masisang ramuyun.

¹⁴ Nakapandai takau no ra iniruanan takau noyo kapatayan am minanding takau no ra kaayagan mantilayun. Napandayan takau gitio sabap ra motogom takau ra rondo' am bokon. Osoi ayuk kalo motogom, io no lakat ayuk poyo inonggom ru kapatayan.

¹⁵ Osoi ayuk masisang ra rondo' am bokon, io no sangulun mamamatoi. Am maaru' kaayagan mantilayun kalo sumoroi ra sangulun mamamatoi.

¹⁶ Atan togom no? Koson ragitio itakau makaulig ra togom ri Aki Kapuuno' no, ra i Jisus Kristus nampataak ra painawo Nano ritakau. Itakau pana musiti' manaak ra painawo takau ra pabukat-pabukat takau no.

¹⁷ Amon ru sangulun langkaya' makakito ra pabukat musikin nano, kaa' maagat guang nano mangindangan, ati kulaan motogom io rokoon ri Aki Kapuuno'?

¹⁸ Pabukat kau ngaangai'! Togom mino sala' ka raragu ayuk. Itakau musiti' motogom intor ra guang mabanis, ondo' makito ru ulun ralalom baalon takau.

Makakau' takau ra saang ri Aki Kapuuno'

¹⁹ Gitio noyo ralan takau mangulig ra itakau ti anak ri Aki Kapuuno', saboi guang takau makakaansayan ra saang ri Aki Kapuuno'.

²⁰ Amon ru guang takau sumonsol ritakau, nakapandai takau ra i Aki Kapuuno' maayo guang Nano intor ra sonsol ru guang takau, am makapandai Io ra ngaangai' no.

²¹ Pabukat kau ngaangai' ondo' tagamin kuno! Amon ru guang takau kalo sumonsol ritakau, makakau' takau makiasi' ra saang ri Aki Kapuuno'.

²² Am atan ayuk kitaakon takau intor Riso makaapu takau, sabap ra gumagaya' takau ra susuban Nano am mambaal niayuk ra kaansukan ru guang Nano.

²³ Gitio noyo nanusuban Nali, musiti' takau mangintopot ra Anak Nano, i Jisus Kristus, am kotogom takau no ra rondo' am bokon koson ra nanusuban ri Jisus Kristus i ritakau.

²⁴ Ngaangai' ulun ondo' maya' ra susuban ri Aki Kapuuno', maayag sumimpung ri Aki Kapuuno', am i Aki Kapuuno' pana sumimpung risilo. Am nakapandai takau ra i Aki Kapuuno' maayag sumimpung ritakau, sabap ra nangani' Io ritakau ra Ambiluo Nano.