1 TUNUNG RU BANSA' ISRAIL 9 - Tanou Moonsoi Timugon

Ulun ondo' siminaguli' intor ra namatiran

¹ Ngaangai' ulun ru Israil tinulisan inggalan sumugut ra sasambaloi ru sigagama'. Suang ru ginio tinulisan ralalom Kitab ru Raja'-Raja' ru Israil. Mamagun ru Jiuda pinatiran ra Babil koson ra ukuman ru tula nilo.

² Intor risilo ondo' siminaguli' galing ra tana' longgom nilo giu' ra bandar-bandar iono ulun nasuangan, imam-imam, ulun ru Liwi am ulun-ulun mangngandoi ra Baloi ru Tuhan.

³ Santayaran intor ra bansa' ru Jiuda, Binjamin, Ipraim am Manasi siminaguli' am minayan giu' ra Jirusalim.

^4-6 Ngaangai' no mokoondo' 690 ngambaloi intor ra bansa' ru Jiuda ondo' minayan giu' ra Jirusalim, nakaaya' papag ru anak ri Jiuda ondo' ininggalanan ri Piris, Syila am Jirag. Papag ri Piris tiningganai ri Utai. Suang ru papag ri Utai ondo' intor ra puun polos ra untu iono i Utai, Amigud, Omri, Imri am Bani. Papag ri Syila tiningganai ri Asaya. Io noyo tingganai ru sasambaloi. Papag ri Jirag tiningganai ri Jiwil.

^7-9 Ulun ru bansa' ru Binjamin ondo' minayan giu' ra Jirusalim suang no 956 ngambaloi. Gitilo noyo tingganai ru sasambaloi nilo: Salu anak ri Misulam, akupu ri Godawya; Godawya anak ri Gasinua Jibnia anak ri Jirogam Ila anak ri Uji, akupu ri Mikri Misulam anak ri Sipatia, akupu ri Riguil; i Riguil anak ri Jibnia.

Imam-imam ondo' minayan giu' ra Jirusalim

^10-12 Imam ragitilo minayan giu' ra Jirusalim: Jidaya, Joyarib am Jakgin Ajaria anak ri Ilkia, kinamatuaan nano iono i Misulam, Jadok, Mirayot am Agitub. (I Ajaria iono tingganai ru pagawai giu' ra Baloi ru Tuhan.) Adaya anak ri Jirogam; kinamatuaan nano iono i Pasyur am Malkia. I Masai anak ri Adiil; kinamatuaan nano iono i Jajira, Misulam, Misilimit am Imir.

¹³ Imam-imam ondo' nasauk ra tingganai ru sasambaloi ra suang no 1,760 ngaulun. Mapandai ilo kaga' mambaal ra ngaangai' salinut ru kandoi giu' ra Baloi ru Tuhan.

Ulun ru Liwi ondo' minayan giu' ra Jirusalim

^14-16 Ulun ru Liwi ragitilo minayan giu' ra Jirusalim: Simaya anak ri Gasub; kinamatuaan nano nakaaya' i Ajrikam am Gasabia, intor ra bansa' ru Mirari Bakbakar, Giris am Galal Matanya anak ri Mika; kinamatuaan nano nakaaya' i Jikri am Asap Obaja anak ri Simaya; kinamatuaan nano nakaaya' i Galal am Jidutun Birikia anak ri Asa, akupu ri Ilkana; minayan io giu' ra tampilon ru bandar Nitopa.

Ulun-ulun magalung ra Baloi ru Tuhan ondo' minayan giu' ra Jirusalim

¹⁷ Ulun magalung ra Baloi ru Tuhan ondo' minayan giu' ra Jirusalim nababaya' ra pabukat-pabukat nilo iono i Salum, Akub, Talmon am Agiman. I Salum noyo tingganai ru ulun magalung.

¹⁸ Saboi orou raiti', ulun intor ra bansa' nilo pinangandoi koson magalung ra Kulobon Garabang Raja' giu' ra tampilon sirangon. Kalo poyo raginio nagalung ilo ra kulobon-kulobon garabang ondo' sumuku' ra pangkiman ru ulun ru Liwi.

¹⁹ I Salum anak ri Kori, akupu ri Ibiasap, mababaya' ra kukula' ngaulun ra bokon intor ra bansa' ru Kora, iono bansa' nano, pinangandoi koson magalung ra kulobon mumpos ra Kim ru Tuhan. Ragili kinamatuaan nilo pana nambaal ra kandoi no paat ilo nangandoi giu' ra pangkiman ru Tuhan.

²⁰ I Pinigas anak ungkuyon ri Iliajar nakaili' naningganai risilo. Gama' ru Tuhan mabaya' riso!

²¹ I Jakaria anak ri Misilimya niayuk magagalung ra kulobon mongoi ra Kim ru Tuhan.

²² Ngaangai' ulun ondo' pinili' koson magalung ra kulobon-kulobon garabang ra suang no 212 ngaulun. Ilo tinulisan inggalan sumugut ra pekan ondo' nasauk ra intok inayanan nilo. Kinamatuaan nilo inanian ra kandoi ru Raja' Daut am Nabi Samuil.

²³ Intor raginio ilo am papag nilo linayun nasauk ra ulun magalung ra kulobon garabang ru Baloi ru Tuhan.

²⁴ Mokoondo' apat kulobon: rondo' giu' ralayo, rondo' giu' ra rabugus, rondo' giu' ra sirangon, am rondo' giu' ra kalasaan. Moonong kulobon mokoondo' sangulun tingganai ru magalung.

²⁵ Ulun-ulun magalung no inindangan ru pabukat nilo ondo' minayan giu' ra ngaangai' pekan. Mampapalit ilo mangandoi buoi tulu' ngoorou paat ra moonong igondo' mampalit.

²⁶ Kaapat-apat tingganai ru magalung no ulun ru Liwi, am ilo nangandoi ra nasisir. Ilo pinalansan manalingapu ra lamin-lamin giu' ra Baloi ru Tuhan am kuliamos ondo' binulian ra giu' no.

²⁷ Minayan ilo mamaar ra Baloi ru Tuhan, sabap ra musiti' ilo magalung ra Baloi ru Tuhan am mangukab ra kulobon-kulobon ra moonong susuab ti.

Ulun ru Liwi ra bokon

²⁸ Ulun ru Liwi ra bokon pinalansanan manalingapu ra kuliamos ondo' pinakai koson sambayang. Untobon nilo kuliamos no paat ra ingkualon am buliin saguli'.

²⁹ Ulun ru Liwi ra bokon no poyo pinalansanan manalingapu ra parabut-parabut ru sambayang am niayuk tapung, timug, wain, umau jaitun, kaminyan am niayuk apa' pampagamis ra akanon.

³⁰ Kaa' ondo' pinalansan koson mampalatok ra apa' pampagamis ra akanon no iono imam-imam.

³¹ Ulun ondo' pinalansan mambaal ra kuui malilis iono sangulun Liwi ininggalanan ri Matisa, anak katuaan ri Salum intor ra bansa' ru Kora.

³² Ulun intor ra bansa' ru Kigat ondo' pinalansan manampos ra kuui pataakon paat ra moonong orou Sabat.

³³ Kukula' ngambaloi intor ra ulun ru Liwi nangandoi koson ra maririmbai giu' ra Baloi ru Tuhan. Tingganai-tingganai ru sasambaloi nilo minayan giu' ra kukula' baloi giu' ra Baloi ru Tuhan. Kalo inanian ilo ra kandoi ra bokon sabap mangandoi ilo paat ra matawang am rondom.

³⁴ Ngaangai' ulun ondo' sinabit giu' ra rasawat ni noyo tingganai-tingganai ru sasambaloi ru Liwi sumugut ra suang ru papag nilo. Ilo niayuk tingganai-tingganai ondo' minayan giu' ra Jirusalim.

Kinamatuaan am papag ru Raja' Saul

³⁵ I Jiyil nambaal ra bandar Gibion am ayan ra giu' no. Andu' nano ininggalanan ri Maakga.

³⁶ Anak katuaan ri Jiyil ininggalanan ri Abdon, am anak-anak ungkuyon no ra bokon iono i Jur, Kis, Baal, Nir, Nadab,

³⁷ Gidor, Agio, Jakaria am Miklot,

³⁸ ama' ri Simia. Papag nilo minayan giu' ra Jirusalim nababaya' ra sasambaloi ra bokon intor ra nogondo' bansa'.

³⁹ Ama' ru Raja' Saul ininggalanan ri Kis am aki nano ininggalanan ri Nir. Raja' Saul mokoondo' apat anak ungkuyon: I Jonatan, Malkisua, Abinadab am Isybaal.

⁴⁰ I Jonatan mokoondo' anak ungkuyon ininggalanan ri Miribaal, ama' ri Mika.

⁴¹ I Mika mokoondo' apat anak ungkuyon: Piton, Milik, Taria am Agas.

⁴² Anak ri Agas ininggalanan ri Jaira, ondo' mokoondo' talu anak ungkuyon: Alimit, Ajmawit am Jimri. Gitilo noyo suang ru papag ri Jimri: I Moja,

⁴³ Bina, Rapa, Ilasa am Ajil.

⁴⁴ I Ajil mokoondo' onom anak ungkuyon: I Ajrikam, Bokru, Ismail, Siaria, Obaja am Ganan.