1 TUNUNG RU BANSA' ISRAIL 6 - Tanou Moonsoi Timugon

Suang ru inggalan ru papag ru Tingganai maayo Imam

¹ I Liwi mokoondo' talu anak ungkuyon: Girson, Kigat am Mirari.

² I Kigat mokoondo' apat anak ungkuyon: Amram, Jijgar, Gibron am Ujiil.

³ I Amram mokoondo' ruo anak ungkuyon: Arun am Musa, am sangulun anak ruandu' ininggalanan ri Miriam. I Arun mokoondo' apat anak ungkuyon: Nadab, Abigu, Iliajar am Itamar.

⁴ Suang ru inggalan ru papag ri Iliajar koson ragitio: Pinigas, Abisua

⁵ Buki, Uji

⁶ Jiragya, Mirayot,

⁷ Amarya, Agitub,

⁸ Jadok, Agimaas,

⁹ Ajaria, Joganan.

¹⁰ Ajaria (mangandoi io giu' ra Baloi ru Tuhan ondo' binaal ru Raja' Salomo giu' ra Jirusalim),

¹¹ Amarya, Agitub,

¹² Jadok, Salum,

¹³ Ilkia, Ajaria,

¹⁴ Siraya, Jojadak.

¹⁵ Jojadak niayuk nakaaya' inaut nababaya' ra ulun ru Jiuda am mamagun ru Jirusalim ra bokon paat ra Tuhan namatir risilo giu' ra pagun ra bokon ondo' pinaumbaya' ra Raja' Nibukadnijar.

Papag ra bokon intor ri Liwi

¹⁶ I Liwi mokoondo' talu anak ungkuyon: Girson, Kigat am Mirari.

¹⁷ Ilo niayuk mokoondo' anak ungkuyon. I Libni am i Simi anak ri Girson.

¹⁸ I Amram, i Jijgar, i Gibron am i Ujiil anak ri Kigat.

¹⁹ I Magli am i Musi anak ri Mirari.

²⁰ Gitilo noyo suang ru papag ri Girson: Libni, Jagat, Jima,

²¹ Joa, Ido, Jirag, Jiatrai.

²² Gitilo noyo papag ri Kigat: Aminadab, Kora, Asir,

²³ Ilkana, Ibiasap, Asir,

²⁴ Tagat, Uriil, Ujia, Saul.

²⁵ I Ilkana mokoondo' ruo anak ungkuyon: Amasai am Agimot.

²⁶ Gitilo noyo suang ru papag ri Agimot: Ilkana, Jopai, Nagat,

²⁷ Iliab, Jirogam, Ilkana.

²⁸ I Samuil mokoondo' ruo anak ungkuyon: Joil ondo' katuaan am Abia ondo' pupusan.

²⁹ Gitilo noyo suang ru papag ri Mirari: Magli, Libni, Simii, Uja,

³⁰ Simia, Gagia, Asaya.

Ulun-ulun maririmbai giu' ra Baloi ru Tuhan

³¹ Raja' Daut nampili' ra kukula' ngaulun koson manalingapu ra rimbai pangamparan giu' ra intok sambayangan giu' ra Jirusalim, nalupus Kaban Nabantuan pinabanding ra giu' no.

³² Mampapalit ilo mangandoi giu' ra Kim ru Tuhan paat ra Raja' Salomo kalo poyo nambaal ra Baloi ru Tuhan.

³³ Suang ru ulun ondo' inanian ra kandoi raginio iono koson ragitio: Intor ra bansa' ri Kigat: Giman anak ri Joil iono tingganai ru pulalai maririmbai ondo' kasaa'. Suang ru inggalan no ondo' intor ra puun saboi ra untu, iono polos ri Jakub: Giman, Joil, Samuil

³⁴ Ilkana, Jirogam, Iliil, Toag,

³⁵ Jup, Ilkana, Magat, Amasai,

³⁶ Ilkana, Joil, Ajaria, Jipanya,

³⁷ Tagat, Asir, Ibiasap, Kora,

³⁸ Jijgar, Kigat, Liwi, Jakub.

³⁹ I Asap noyo tingganai ru pulalai maririmbai ondo' karuo. Suang ru papag nano ondo' intor ra puun polos ra untu, iono polos ri Liwi: Asap, Birikia, Simia,

⁴⁰ Maikol, Baasiya, Malkia,

⁴¹ Itai, Jirag, Adaya,

⁴² Itan, Jima, Simii,

⁴³ Jagat, Girson, Liwi.

⁴⁴ I Itan noyo tingganai ru pulalai maririmbai ondo' katalu; Itan intor ra bansa' ru Mirari. Suang ru papag nano intor ra puun polos ra untu, iono polos ri Liwi: Itan, Kisi, Abdi, Maluk,

⁴⁵ Gasabia, Amajia, Ilkia,

⁴⁶ Amji, Bani, Simir,

⁴⁷ Magli, Musi, Mirari, Liwi.

⁴⁸ Kandoi-kandoi ra bokon giu' ra intok sambayangan pinataak ra rangan-rangan nilo ra gino ngai' ru ulun ru Liwi.

Papag ri Arun

⁴⁹ I Arun am papag nano pinangandoi monolob ra kaminyan, am mampataak ra taak simbalui ondo' solobon giu' ra rasawat ru altar. Ilo niayuk pinangandoi mampaugar ra ngaangai' upacara sambayang giu' ra Lamin Matulai Kaga' am mampataak ra taak-taak simbalui maa' raginio i Aki Kapuuno' mangampun ra tula ru ulun ru Israil. Ngaangai' ru kandoi no binaal nilo sumugut ra nanuluan ondo' tinaakan ri Musa, ulipon ri Aki Kapuuno'.

⁵⁰ Gitilo noyo suang ru papag ri Arun: Iliajar, Pinigas, Abisua,

⁵¹ Buki, Uji, Jiragya,

⁵² Mirayot, Amarya, Agitub,

⁵³ Jadok, Agimaas.

Intok inayanan ru ulun ru Liwi

⁵⁴ Gitio noyo intok inayanan ondo' tinaakan ra bansa' ri Kigat papag ri Arun. Nangapu ilo ra tayar kasaa' intor ra tana' ondo' inaru' tayar ra ulun ru Liwi.

⁵⁵ Tana' nilo nakasimpung bandar Gibron giu' ra wilayah Jiuda, am padang sakot giu' ra liliut no.

⁵⁶ Kaa' umo-umo am pekan-pekan giu' ra liliut ru bandar no tinaakan ri Kalib anak ri Jipuni.

^57-59 Papag ri Arun nakaalap ra bandar-bandar ragitio, nabaya' ra padang sakot giu' ra liliut ru bandar: Gibron, iono bandar Pangampinan, Jatir, pekan-pekan Libna, Istimoa, Gilin, Dibir, Asan, Bit-Simis.

⁶⁰ Giu' ra wilayah ru bansa' ru Binjamin nakaalap ilo ra bandar-bandar ragitio nabaya' ra padang sakot giu' ra liliut ru bandar: Giba, Alimit am Anatot. Suang ringai' no mopor am talu bandar koson ayanan ru sasambaloi nilo.

⁶¹ Ra nangundian, mopor bandar giu' ra wilayah ru bansa' ru Manasi Kalasaan tinayar-tayar ra sasambaloi ra bokon ralalom bansa' ru Kigat.

⁶² Sasambaloi ralalom bansa' ru Girson inanian ra mopor am talu bandar giu' ra wilayah Isakar, Asyir, Naptali am Manasi Sirangon giu' ra Basan.

⁶³ Ra nangundian niayuk, sasambaloi ru bansa' ru Mirari nakaalap ra mopor am ruo bandar giu' ra wilayah bansa' ru Rubin, Gad am Jibulon.

⁶⁴ Gini noyo ralan ru ulun ru Israil nangani' ra bandar-bandar am padang sakot giu' ra liliut ru bandar, koson ra intok ayanan ru ulun ru Liwi.

⁶⁵ Bandar-bandar giu' ra wilayah ru bansa' ru Jiuda, Simion am Binjamin ondo' sinabit no, niayuk tinayar ra nangundian.

⁶⁶ Giu' ra wilayah ru bansa' ru Ipraim, kukula' sasambaloi ralalom ru bansa' ru Kigat inanian ra bandar-bandar ragitio nabaya' ra padang sakot giu' ra liliut ru bandar:

⁶⁷ Sikgim, bandar pangampinan giu' ra kabuluran Ipraim, Gijir,

⁶⁸ Jokmiam, Bit-Oron,

⁶⁹ Ayalon am Gat-Rimon.

⁷⁰ Giu' ra wilayah ru bansa' ru Manasi Kalasaan, nangapu ilo ra bandar Anir am Biliam nabaya' ra padang sakot giu' ra liliut ru bandar.

⁷¹ Sasambaloi ralalom bansa' ru Girson inanian ra bandar-bandar ragitio nabaya' ra padang sakot giu' ra liliut ru bandar: Giu' ra wilayah ru bansa' ru Manasi Sirangon: Golan giu' ra Basan am Asytarot.

⁷² Giu' ra wilayah ru bansa' ru Isakar: Kidis, Dabirat,

⁷³ Ramot am Anim.

⁷⁴ Giu' ra wilayah ru bansa' ru Asyir: Masal, Abdon,

⁷⁵ Gukok am Rigob.

⁷⁶ Giu' ra wilayah ru bansa' ru Naptali: Kidis giu' ra Galilia, Gamon am Kiryataim.

⁷⁷ Sasambaloi ra bokon ralalom bansa' ru Mirari, inanian ra bandar-bandar ragitio nabaya' ra padang sakot giu' ra liliut ru bandar: Giu' ra wilayah ru bansa' ru Jibulon: Rimono am Tabor.

⁷⁸ Giu' ra wilayah ru bansa' ru Rubin, giu' ra tampilon sirangon ru Sungoi Jordan, mamaar ra Jiriko: Bijir giu' ra tana' marata' ra masawat, Jagas,

⁷⁹ Kidimot am Mipaat.

⁸⁰ Giu' ra wilayah ru bansa' ru Gad: Ramot giu' ra Giliad, Maganaim,

⁸¹ Gisybon am Jaijir.