1 TUNUNG RU BANSA' ISRAIL 4 - Tanou Moonsoi Timugon

Papag ri Jiuda

¹ Gitilo noyo santayaran ra papag ri Jiuda: Piris, Gijron, Karmi, Gur am Siobal.

² I Siobal ama' ri Riaya, Riaya ama' ri Jagat. I Jagat mokoondo' ruo anak ungkuyon, i Agumai am i Lagad. Ilo kinamatuaan ru mamagun ru bandar Jora.

^3-4 I Gur anak ungkuyon katuaan ri Kalib am andu' nano i Iprat. Papag ri Gur iono ondo' nambaal ra bandar Bitligim. I Itam, i Pinuil am i Ijir iono anak ungkuyon ri Gur. I Itam mokoondo' talu anak ungkuyon: Jijriil, Isma am Idbas, am niayuk sangulun anak ruandu' ininggalanan ri Gajililponi. I Pinuil nambaal ra bandar Gidor am i Ijir nambaal ra bandar Gusa.

⁵ I Asygur, ondo' nambaal ra bandar Tikoa, mokoondo' ruo ngaulun andu', i Ila am i Naara.

⁶ I Asygur am i Naara mokoondo' apat anak ungkuyon: Agujam, Gipir, Timini am Agastari.

⁷ I Asygur am i Ila mokoondo' talu anak ungkuyon: Jirit, Jijogar am Itnan.

⁸ I Kos ama' ri Anub am i Gajobiba, am kinamatuaan ru bansa'-bansa' ru papag ri Agargil anak ri Garum.

⁹ Mokoondo' sangulun ungkuyon ininggalanan ri Jabis, ondo' urumaton kaga' ra ilo sangkaaka'. Ininggalanan io ri Jabis ru ina' nano sabap ra ina' nano marualan kaga' paat naganak riso.

¹⁰ Kaa' nakiasi' i Jabis ri Aki Kapuuno' ru ulun ru Israil, kono, “Iou Aki Kapuuno', barakato' aku no, am anii' aku ra tana' ondo' malangka'. Bayaa' aku no am painggaluro' aku no intor ra kalaatan ondo' mangkinibit ra aku marualan.” I Aki Kapuuno' pana nangiou boo ra kinitaak nano.

Suang ru inggalan ru sasambaloi ra bokon

¹¹ I Kilub, pabukat ri Suga, mokoondo' anak ungkuyon ininggalanan ri Migir. I Migir ama' ri Iston,

¹² am i Iston mokoondo' talu anak ungkuyon: Bit-Rapa, Pasia am Tigina. I Tigina iono ondo' nambaal ra bandar Nagas. Papag ru ngaangai' ulun raginilo minayan giu' ra bandar Rika.

¹³ I Kinas mokoondo' ruo anak ungkuyon ininggalanan ri Otniil am i Siraya. I Otniil niayuk mokoondo' ruo anak ungkuyon, i Gatat am i Mionotai.

¹⁴ I Mionotai ama' ri Opra. I Siraya ama' ri Joab. I Joab iono nambaal ra Limayak ru ulun Manukang, am ngaangai' ru ulun ra giu' no manukang ondo' mapandai kaga'.

¹⁵ I Kalib anak ri Jipuni mokoondo' talu anak ungkuyon: Iru, Ila am Naam. I Ila ama' ri Kinas.

¹⁶ I Jigalilil mokoondo' apat anak ungkuyon: Jiip, Jiipa, Tiria am Asaril.

^17-18 I Ijra mokoondo' apat anak ungkuyon: Jitir, Mirid, Ipir am Jalon. I Mirid nagandu' ri Bitia, anak ruandu' ru raja' ru Misir. Mokoondo' ilo sangulun anak ruandu' ininggalanan ri Miriam, am ruo anak ungkuyon ininggalanan ri Samai am Jisba. I Jisba iono ondo' nambaal ra bandar Istimoa. I Mirid niayuk nagandu' ra sangulun ruandu' intor ra bansa' ru Jiuda; mokoondo' ilo talu anak ungkuyon: Jirid ondo' nambaal ra bandar Gidor; Gibir ondo' nambaal ra bandar Sokgo; am Jikutiil ondo' nambaal ra bandar Janoa.

¹⁹ I Godia nagandu' ra pabukat ruandu' ri Nagam. Papag nilo noyo kinamatuaan ru bansa' Garmi am Maakga. Bansa' Garmi minayan giu' ra bandar Kigila, am bansa' Maakga minayan giu' ra bandar Istimoa.

²⁰ I Simon mokoondo' apat anak ungkuyon: Amnon, Rina, Binganan am Tilon. I Jisii mokoondo' ruo anak ungkuyon: Joit am Bin-Joit.

Papag ri Sila

²¹ I Sila sangulun intor ra anak ungkuyon ri Jiuda. Papag nano nakaaya' i Ir ondo' nambaal ra bandar Likga; i Lada ondo' nambaal ra bandar Marisa; bansa' ondo' nambaal ra konoon linon, ondo' minayan giu' ra bandar Bit-Asybia;

²² i Jokim am mamagun ru bandar Kojiba; i Joas am i Sarap, ruo ngaulun ungkuyon ondo' natagandu' ra ruandu'-ruandu' ru Moab, am namagun giu' ra Bitligim. (Suang ru inggalan raginio noowot intor ra tinulisan ondo' nakalair noyo kaga'.)

²³ Ilo noyo ondo' nambaal ra pagangan am nangandoi ra raja'; minayan ilo giu' ra bandar Nitaim am Gidira.

Papag ri Simion

²⁴ I Simion mokoondo' limo anak ungkuyon: Nimuil, Jamin, Jarib, Jirag am Saul.

²⁵ Anak ungkuyon ri Saul iono i Salum, akupu nano i Mibsam, am akupu kainduo nano i Misma.

²⁶ Intor ri Misma, suang ru inggalan ru papag linimbangan ri Gamuil, am i Jakur, am tauli no i Simii.

²⁷ I Simii mokoondo' mopor am onom ngaulun anak ungkuyon am onom anak ruandu', kaa' pabukat-pabukat ri Simii kalo kukula' masuang anak. Bansa' ri Simion kalo masuang koson ra bansa' ri Jiuda.

²⁸ Saboi ra paat ru Raja' Daut, papag ri Simion minayan giu' ra bandar ragitilo: Birsyiba, Molada, Gajar-Sual,

²⁹ Bilga, Ijim, Tolad,

³⁰ Bituil, Orma, Jiklag,

³¹ Bit-Markabot, Gajar-Susim, Bit-Biri am Saaraim.

³² Ilo niayuk minayan giu' ra limo intok ra bokon: Itam, Ain, Rimon, Tokin, Asan,

³³ am giu' ra ngaangai' pekan ra liliut no, saboi ra kinaalur ru bandar Baal giu' ra tampilon kalasaan rabugus. Ginilo noyo tinulisan ondo' binulian ru papag ri Simion intor ra suang ru inggalan am intok inayanan nilo.

^34-38 Gitilo noyo tingganai ru bansa' ru Simion: Misobab, Jamlik, Josa anak ri Amajia, Joil, Jigu anak ri Josibya, (Josibya anak ri Siraya, akupu ri Asiil) Ilyoinai, Jaakoba, Jisogaya, Asaya, Adiil, Jisimiil, Binaya, Jija anak ri Sipii (Sipii anak ri Alon, i Alon papag ri Jidaya, Simri am Simaya). Sabap ra sasambaloi nilo narayus riminuang,

³⁹ nakasaboi ilo ra kalasaan saboi maar makasuku' ra bandar Gidor. Domba nilo nongkotop giu' ra tampilon sirangon ru limayak, intok no giu' ra bandar Gidor.

⁴⁰ Giu' no nakatuum ilo ra padang ru sakot ondo' malabung am malangka', am niayuk mororo' am mamimio. Ragili libung no inayanan ru ulun Gam.

⁴¹ Paat ra Raja' Gijkia intor ra Jiuda, papag ri Simion namulunsar ra Gidor. Linunsai nilo kim-kim am kalukub-kalukub ondo' inayanan ru ulun ra giu' no. Pinagiru' nilo mamagun ra giu' no, am pamagun ilo ra giu' no sabap ra padang ru sakot ra giu' no malangka' tayar ra domba nilo.

⁴² Limo ngaatus ngaulun intor ra bansa' ru Simion minongoi ra Idom, giu' ra tampilon sirangon. Tiningganai ilo ru anak-anak ungkuyon ri Jisii: Pilatia, Niarya, Ripaya am Ujiil.

⁴³ Giu' no, pinatoi nilo ulun ru Amalik ondo' lakat poyo naayag, am namagun ilo ra giu' no intor ra paat raginio.