1 TUNUNG RU BANSA' ISRAIL 28 - Tanou Moonsoi Timugon

Nanuluan intor ra Raja' Daut intor ra Baloi ru Tuhan

¹ Raja' Daut nanusub ra ngaangai' tingganai ru Israil maa' raginio tumimung giu' ra Jirusalim. Ginio ra ngaangai' tingganai ru bansa', pagawai mangandoi ra upis ru pamarintaan, tingganai ru bansa', ulun manalingapu ra rapu' am bibiag tinambiag ru raja', am niayuk anak-anak ungkuyon ru raja' – ontoson ragu, ngaangai' tingganai maayo ru istana, panglima am ulun mangaatang – timinimung giu' ra Jirusalim.

² Bigor Raja' Daut giu' ra saang nilo am indagu, “Rongogo' mamagun ku ngai'! Nabuoi aku no makaguang koson mambaal ra rondo' baloi ondo' mantilayun koson ra Kaban Nabantuan, sanaran ru kalayam ru Tuhan, i Aki Kapuuno' takau. Inula' ku noyo koson mambaal ra rondo' baloi intok sumamba Riso.

³ Kaa' Tuhan kalo nangiou raki' mambaal raginio, sabap ra aku ti sangulun saujor am nampalayak ra raraa'.

⁴ Tuhan, i Aki Kapuuno' ondo' sambaan ru Israil nampili' raki' am papag kuno koson mamarinta ra Israil ra sabubuoi no. Nampili' Io ra bansa' ru Jiuda koson mampatampos ra sangulun tingganai, am intor ra bansa' raginio nampili' Io ra sasambaloi ru ama' kuno. Kopongo raginio intor ra sasambaloi ru ama' kuno, masaga' Io mampili' raki' am nampasauk raki' ra raja' ru titikop ru Israil.

⁵ Nangani' Io raki' ra masuang anak ungkuyon, am ra gino ngai' ru ilo nampili' Io ri Salomo koson mamarinta ra Israil, pamarintaan ru Tuhan.

⁶ “Kon ru Tuhan raki' koson ragitio, ‘I Salomo anak muno ondo' mambaal Raki' ra rondo' baloi. Pinili' Ku io masauk ra anak Kuno, am Aku masauk ra Ama' nano.

⁷ Amon ru totopot io gumagaya' ra ngaangai' ukum am susuban Kuno koson ra ondo' binaal nano raino, Aku pana mangikang ra pamarintaan nano ra sabubuoi no.’ ”

⁸ Kon poyo ru Raja' Daut, “Ginio ra akau mamagun kuno, giu' ra saang ri Aki Kapuuno' takau am giu' ra saang ru ngaangai' ulun ru Israil, ulun ru Tuhan ti, kitaakon ku toojo maa' raginio gumagaya' kau ra ngaangai' susuban ru Tuhan, i Aki Kapuuno' takau. Ra koon raginio ra akau totopot mokolonggom ra pagun moonsoi ti am patungkuson ginio ra papag min saboi ra sabubuoi no.”

⁹ Ri Salomo boo, indagu Raja' Daut, “Okou anak kuno, musiti' i Aki Kapuuno' ondo' sambaan ru ama' muti, iowon mu koson ri Aki Kapuuno' muno. Musiti' kau mangandoi ayuk Riso ra kabanisan ru guang am guang ra masaga' toojo, sabap ra Io nakapandai ra ngaangai' karaan am kasagaan ru guang takau. Amon ru maguyum kou Riso, moowot mu Io, kaa' amon ru iruanin mu Io, impayin No okou ra sabubuoi no.

¹⁰ Karaa' noyo toojo ra Tuhan nampili' rirun koson mambaal ra baloi ra rorondo' koson Riso. Ginio ra, raino baalo' noyo kandoi no ra guang mingkotog toojo.”

¹¹ Kopongo raginio nangani' Raja' Daut ri Salomo ra pelan ru Baloi ru Tuhan, am niayuk pelan ru gudang-gudang, lamin-lamin ra bokon, am niayuk Lamin Matulai Kaga', iono intok pangampunan ra tula.

¹² Nampataak Raja' Daut ri Salomo ra ngaangai' pelan ondo' ginuang nano, iono pelan ru liliut-liliut am lamin-lamin ra liliut nano, am pelan ru gudang-gudang ru kuliamos ru Baloi ru Tuhan, am niayuk pelan ru gudang-gudang pambulian ra ondo' pinataak ra Tuhan.

¹³ Raja' Daut niayuk nampataak ra inatangan pantayaran ra imam-imam am ulun-ulun ru Liwi, kandoi ondo' musiti' baalon nilo, iono mangandoi giu' ra Baloi ru Tuhan am magalung ra ngaangai' kuliamos ru sambayang.

¹⁴ Nangani' io ra panuluan intor ra masuang toojo pirok am mas ondo' musiti' pakayon koson mambaal ra kuliamos-kuliamos,

¹⁵ ra moonong lampung am tampakan ra lampung,

¹⁶ ra mija'-mija' ru pirok, am ra moonong mija' mas, intok ru ruti' ondo' pataakon ri Aki Kapuuno'.

¹⁷ Io niayuk nangani' ra panuluan intor ra masuang toojo mas kopoyo ondo' musiti' pakayon koson mambaal ra garapu', mangkuk am bisin, am intor ra kinasuang toojo ru pirok am niayuk mas koson mambaal ra pinggan mangkuk,

¹⁸ am intor ra masuang toojo mas kopoyo koson mambaal ra altar intok monolob ra kaminyan, am koson mambaal ra kurita' kuda ra kirub-kirub ondo' kawo nano nakabingkal giu' ra rasawat ru Kaban Nabantuan ru Tuhan.

¹⁹ Kopongo raginio Raja' Daut minindagu, “Ngaangai' no nakasuang ra ralalom ru inatangan ondo' tinulisan sumugut ra panuluan ondo' tinaakan ru Tuhan galama' raki' koson paugaron.”

²⁰ Kon poyo ru Raja' Daut ra anak nano, i Salomo, “Okou musiti' mangintopot am baani. Talimpuuni' noyo kandoi no am pai' kalaa' ra atan pana. Tuhan i Aki Kapuuno' ondo' sambaan kuno mangindangan rirun. Kalo mangiruan Io rirun, kaa' mabaya' Io rirun saboi ra ngaangai' no mopongo.

²¹ Pantayaran ra kandoi sambayang giu' ra ralalom Baloi ru Tuhan inaru' noyo ra imam-imam am ulun-ulun ru Liwi. Ulun mangngandoi ondo' mapandai kaga' ralalom ru napandayan ru sigagama' mangindangan rirun ra guang maansayan, am tingganai-tingganai mababaya' ra ngaangai' mamagun gumagaya' ra susuban muno.”