1 TUNUNG RU BANSA' ISRAIL 27 - Tanou Moonsoi Timugon

Pagawai-pagawai ru saujor am ilo tingganai maayo ra bokon

^1-15 Tingganai-tingganai ru sasambaloi, ilo tingganai ru bansa', am ilo pagawai ru saujor nampaugar ra kandoi ru upis ru pamarintaan ru Israil. Moonong bilor ra buoi no sansila', mokoondo' rondo' pulalai ondo' mangandoi ra mampapalit ondo' tingganayon ru sangulun tingganai. Moonong pulalai mokoondo' 24,000 ngaulun. Gitilo noyo inggalan ru tingganai ru pulalai ondo' mangandoi koson moonong sila': Sila' kasaa': Jasobam anak ri Jabdiil (io intor ra bansa' ru Piris, santayaran intor ra bansa' ru Jiuda). Sila' karuo: Dodai, papag ri Agogi. Miklot noyo uakil nano. Sila' katalu: Binaya anak ru Imam Joyada; io noyo tingganai ru Pulalai Talu Ngoopor (Amijabad, anak nano noyo uakil nano). Sila' kaapat: Asail, pabukat ri Joab (namalit riso i Jibaja, anak nano). Sila' kalimo: Samgut, papag ri Jijra. Sila' koonom: Ira anak ri Ikis intor ra bandar Tikoa. Sila katulu': Gilis, papag ri Ipraim intor ra bandar Piloni. Sila' kabalu': Sibkai intor ra bandar Gusa (io intor ra bansa' ru Jirag, santayaran intor ra bansa' ru Jiuda). Sila' kasiam: Abiijir intor ra bandar Anatot giu' ra wilayah ru bansa' ru Binjamin. Sila' Koopor: Magarai, papag ri Jirag intor ra bandar Nitopa. Sila' Koopor am rondo': Binaya intor ra bandar Piraton giu' ra wilayah ru bansa' ru Ipraim. Sila' koopor am ruo: Gildai papag ri Otniil intor ra bandar Nitopa.

Tingganai-tingganai ru bansa' ralalom ru bansa' ru Israil

^16-22 Gitilo noyo suang ru inggalan ru tingganai ru bansa' ralalom bansa' ru Israil: Bansa' Tingganai Rubin Iliijir anak ri Jikri Simion Sipatia anak ri Maakga Liwi Gasabia anak ri Kimuil Arun Jadok Jiuda Iligu sangulun intor ra pabukat ru Raja' Daut Isakar Omri anak ri Maikol Jibulon Jismaya anak ri Obaja Naptali Jirimot anak ri Ajriil Ipraim Gosia anak ri Ajajya Manasi Kalasaan Joil anak ri Pidaya Manasi Sirangon Jido anak ri Jakaria Binjamin Jaasiil anak ri Abnir Dan Ajariil anak ri Jirogam.

Bansa' Tingganai

²³ Raja' Daut kalo nanguntob ra ulun ondo' umur no mamulok intor ra ruo ngoopor ngambilor sabap ra Tuhan nambantu' ra mampasauk ra ulun ru Israil koson ra kinasuang ru butitin giu' ra limbowon.

²⁴ I Joab anak ri Jiruya nanalimpuun ra panguntaban, kaa' kalo pinongo no, sabap ra i Aki Kapuuno' nangukum ra Israil sabap ru panguntaban no. Ginio sabap ra suang nilo kalo tinulisan giu' ra ralalom ru buuk ru Raja' Daut.

Ulun manalingapu ra rapu' longgom ru raja'

^25-31 Gitilo noyo suang ru inggalan ru ulun ondo' manalingapu ra rapu' longgom ru raja': Gudang-gudang giu' ra istana am giu' ra Jirusalim: Ajmawit anak ri Adiil. Gudang-gudang giu' ra liwar ru Jirusalim: Jonatan anak ri Ujia. Ulun-ulun mangngandoi ra umo: Ijri anak ri Kilub. Umo-umo ru anggur: Simii intor ra bandar Rama. Intok-intok pambulian ra wain: Jabdi intor ra bandar Syipmi. Puun ru jaitun am puun ru ara (lonson toojo ru kagunungan tampilon ra kalasaan): Baal-Ganan intor ra bandar Gidir. Intok-intok pambulian ra umau jaitun: Joas. Bibiag tinambiag giu' ra Padang Saron: Sitrai intor ra bandar Saron. Bibiag tinambiag giu' ra limayak-limayak: Sapat anak ri Adlai. Unta: Obil papag ri Ismail. Kaladai: Jigdiya intor ra bandar Mironot. Domba am kambing: Jajis, ulun ru Gagri.

Ulun-ulun maminson galama' ru Raja' Daut

³² I Jonatan, kamaman ru Raja' Daut, iono sangulun maminson ondo' mapintar am mapandai kaga'. Io am i Jiwil anak ri Gakmoni inanian ra kandoi mangila' ra anak-anak ungkuyon ru raja'.

³³ I Agitopil iono maminson ra raja', am i Gusai ulun ru Arki iono maminson am rangan toojo ru raja'.

³⁴ Kopongo i Agitopil minatoi, i Abiatar am i Joyada anak ri Binaya minalit riso koson ra maminson. I Joab iono panglima ru pulalai ru saujor ru pamarintaan.