1 TUNUNG RU BANSA' ISRAIL 25 - Tanou Moonsoi Timugon

Ulun mangkuli ra miujik giu' ra Baloi ru Tuhan

¹ Koson maningganai ra upacara-upacara ru sambayang, Raja' Daut am tingganai ru ulun ru Liwi nampili' ra bansa'-bansa' intor ra bansa' ru Liwi ragitilo: I Asap, Giman am Jidutun. Ilo pinangandoi koson mampasaboi ra tanou intor ri Aki Kapuuno' am sumbayaan ra jitor, gambus am simbal. Koson maningganai ra sambayang am upacara nano, pinili' pulalai ragitilo:

² Apat anak ungkuyon ri Asap: I Jakur, Jusup, Nitania am Asarila. Tingganai nilo iono i Asap, ondo' mampasaboi ra tanou intor ri Aki Kapuuno', paat susubon ru raja'.

³ Onom anak ungkuyon ri Jidutun: Gidalia, Jiri, Jisaya, Simii, Gasabia am Matisa. Ralalom naningganayan ru ama' nilo, nampasaboi ilo ra tanou intor ri Aki Kapuuno' am sumbayaan ra jitor. Marimbai ilo ra rimbai pangamparan am rimbai paringkuanangan ra Tuhan.

⁴ Mopor am apat anak ungkuyon ri Giman: I Bukia, Matanya, Ujiil, Sibuil, Jirimot, Gananya, Ganani, Iliata, Gidalti, Romamti-Ijir, Josbikasa, Maloti, Gotir am Magajiot.

⁵ Giman iono nabi galama' ru raja'. Nangani' Tuhan ra mopor am apat anak ungkuyon no am talu anak ruandu' ri Giman sabap ra binantu' ru Tuhan koson mangani' ra intok moonsoi kaga' riso.

⁶ Ngaangai' anak ungkuyon ri Giman no mangkuli ra simbal, jitor am gambus ragana' ru naningganayan ru ama' nilo koson manumbaya' ra upacara ru sambayang ra ralalom Baloi ru Tuhan. I Asap, Jidutun am Giman nakaalap ra kandoi sumugut ra nanuluan intor ra raja'.

⁷ Ngaangai' 24 ngaulun ungkuyon no am pabukat-pabukat nilo iono ulun mangapandai kaga' mangkuli ra miujik. Suang nilo ngaangai' no 288 ngaulun.

⁸ Koson mangaru' ra paat mangandoi, ilo ngaangai' nangundi', ondo' mamulok am niayuk matutuo, ondo' mangapandai am niayuk ondo' bagu ayuk migila'.

^9-31 Ngaangai' ru 288 ngaulun no tinayar ra 24 ngampulalai sumugut ra sasambaloi ru sigagama'. Moonong pulalai mokoondo' 12 ngaulun tiningganai ru sangulun tingganai. Gitilo noyo inggalan nilo sumugut ra paat nilo mangandoi: 1. Jusup intor ra sasambaloi ri Asap 13. Subail 2. Gidalia 14. Matisa 3. Jakur 15. Jirimot 4. Jijri 16. Gananya 5. Nitania 17. Josbikasa 6. Bukia 18. Ganani 7. Jisarila 19. Maloti 8. Jisaya 20. Iliata 9. Matanya 21. Gotir 10. Simii 22. Gidalti 11. Ajariil 23. Magajiot 12. Gasabia 24. Romamti-Ijir.