1 TUNUNG RU BANSA' ISRAIL 22 - Tanou Moonsoi Timugon

¹ Ginio ra indagu Raja' Daut, “Intok ragitio noyo Baloi ru Tuhan i Aki Kapuuno' musiti' baalon, am altar ragitio noyo ulun ru Israil musiti' mampataak ra taak simbalui koson mapabansuk ra guang ru Tuhan.”

Tampasan koson mambaal ra Baloi ru Tuhan

² Raja' Daut nanusub maa' raginio ngaangai' ulun ru bokon ondo' minayan giu' ra pagun ru Israil tumimung, io pana nanusub risilo mangandoi. Santayaran risilo namahat ra batu koson mambaal ra Baloi ru Tuhan.

³ Inula' ru Raja' Daut masuang kaga' basi' koson mambaal ra paku' am ingsil ru kulobon-kulobon garabang ra Baloi ru Tuhan. Inula' no niayuk masuang kaga' gangsa' saboi kalo maalap katimbang.

⁴ Nakitaak Raja' Daut ra masuang kaga' tataun sidar intor ra ulun ru Tirus am Sidon.

⁵ Nambaal Raja' Daut ra ngaangai' no sabap ra nangkara' io koson ragitio, “Musiti' aku magula' ra atan ondo' makapakuan koson mambaal ra Baloi ru Tuhan. I Salomo, anak ungkuyon kuno lakat poyo mamulok am kalo kukula' mapandai, ondo' Baloi ru Tuhan ra baalon no musiti' moonsoi kaga' am mauligan kaga' ra titikop ru tana' ti.” Ginio ra kalo poyo minatoi Raja' Daut, inula' no masuang kaga' kuliamos mambaal ra bangunan.

⁶ Piniau ru Raja' Daut anak nano i Salomo, am nanusub riso koson mambaal ra rondo' baloi tayar ru Tuhan i Aki Kapuuno' ondo' sambaan ru ulun ru Israil.

⁷ Indagu Raja' Daut ri Salomo, “Okou anak kuno, nabuoi noyo ginuang ku mambaal ra rondo' baloi koson mangurumat ra Tuhan i Aki Kapuuno' kuno.

⁸ Kaa' minindagu Tuhan ra aku ti masalok kaga' mangayou am namatoi ra masuang noyo ulun. Ginio ra kalo nangiou Io raki' mambaal Riso ra baloi.

⁹ Kabalu' pana raginio binantu' No noyo raki'. Ragu Nano, ‘Mokoondo' kou ra sangulun anak ungkuyon, am mamarinta io ra matanda' sabap ra mangindangan Aku riso saboi kolondo' pantula' ondo' mangayou riso. Inggalanin io ri Salomo, sabap paat ra pamarintaan nano, baalon Ku Israil ra moonsoi am mamimio.

¹⁰ Anak mu raginio mambaal Raki' ra baloi. Masauk io ra anak Kuno am masauk Aku ra Ama' nano. Panturungan ru pamarintaan ru Israil magulayun ra papag nano saboi ra sabubuoi no.’ ”

¹¹ Kon poyo ru Raja' Daut, “Ginio ra, okou anak kuno, gama' ru Tuhan, i Aki Kapuuno' muno masalok mabaya' rirun. Gama' ru makasugut kou mambaal ra baloi ru Tuhan koson ondo' binantu' Nano.

¹² Gama' ru Tuhan, i Aki Kapuuno' muno mangani' rirun ra pangaratian am kapintaran, maa' raginio makapamarinta kou ra Israil sumugut ra Taurat Nano.

¹³ Amon ru gumagaya' kou ra ngaangai' ru ukum ondo' tinaakan ru Tuhan ra Israil ondo' pinabala' galing ri Musa, makasugut kou. Musiti' kou mangintopot am baani. Pai' kalaa' manguma' ra atan ayuk pana.

¹⁴ Intor ra Baloi ru Tuhan no, piniratan ku noyo toojo koson nanimung nasailan intor ra 3,400 ngatan mas am nasailan intor ra 34,000 ngatan pirok. Suai raginio mokoondo' gangsa' am basi' ondo' kalo mauntob suang no. Tataun am batu pana tinampos ku noyo, kaa' musiti' mu ruangin poyo ginio.

¹⁵ Mokoondo' kou ra masuang ulun mangandoi. Mokoondo' ulun ondo' makapangandoi giu' ra kuari, mokoondo' ulun manukang ra tataun, ulun manukang ra batu, am masuang kaga' ulun manukang ra bokon

¹⁶ koson ra ulun manukang ra mas, ulun manukang ra pirok, ulun manukang ra gangsa' am ulun manukang ra basi'. Patalimpuuno' noyo kandoi no ra mataki'! Gama' ru Tuhan mabaya' rirun.”

¹⁷ Nanusub Raja' Daut ra ngaangai' tingganai ru Israil koson mangindangan ri Salomo.

¹⁸ Kon ru Raja' Daut, “Tuhan i Aki Kapuuno' muno nangindangan noyo ramuyun. Nangani' Io ramuyun ra kaansayan giu' ra titikop pagun. Nangiou Io raki' nangala ra ngaangai' bansa' ondo' ragili minayan giti ra pagun ti. Raino ilo kinuasa' min am Tuhan.

¹⁹ Ginio ra, akau mangandoi ayuk ra Tuhan i Aki Kapuuno' min ra sotopot ru guang am sotopot ru salibuor. Talimpuuni' noyo mambaal ra baloi koson ra Tuhan maa' raginio Kaban Nabantuan Nano am ngaangai' kuliamos ra bokon ondo' pakayon timpokon koson ra sambayang mabulian ra giu' no.”