1 TUNUNG RU BANSA' ISRAIL 20 - Tanou Moonsoi Timugon

Nampagaau Raja' Daut ra Raba

¹ Bulintok mambusak ra siminunu' no, paat ra raja'-raja' kaindalaman no mongoi pangayou, nanusub i Joab ra saujor nano am mamulunsar ra pagun ru Amon, kaa' Raja' Daut minayan ra Jirusalim. I Joab am saujor nano nagawang ra bandar Raba, am namulunsar am niayuk namuso ra bandar no.

² Kopongo raginio minatong Raja' Daut am nangalap ra masuang kaga' kuliamos ginaau intor ra bandar no. Kuliamos raginilo mokoondo' karaun ru raja' ru Amon. Karaun no ra bagat no olo'-olo' 34 ngakilogram am tinakinan ra sangunor intan. Inalap ru Raja' Daut intan no am patakino' no ra karaun nano galama'.

³ Kopongo raginio tinimung ru Raja' Daut mamagun ru bandar Raba am nampajajal risilo mangandoi mamakai ra gargaji, sangkul basi' am panaa'. Binaal ru Raja' Daut baal ra nogondo' ra bandar-bandar ru Amon ra bokon. Kopongo raginio Raja' Daut am ngaangai' ru saujor nano siminaguli' ra Jirusalim.

Pangayawan manggal ra maayo ulun ru Palistin

⁴ Kukula' buoi raginio, pangayawan nasauk poyo ra ulun ru Palistin giu' ra Gijir. Ralalom ru rondo' pangayawan, i Sibkai ulun ru Gusa namatoi ra sangulun maayo ulun ininggalanan ri Sipai, ulun ru Palistin pana kinala boo.

⁵ Ralalom ru pangayawan ra bokon ra ulun ru Palistin, i Ilganan anak ri Jair namatoi ri Lahmi, pabukat ri Goliat ulun ru Gat. Ulu ru tutura' ri Lahmi maayo koson ra tataun mambaal ra konoon.

⁶ Ralalom ru pangayawan ra bokon poyo giu' ra Gat, mokoondo' sangulun maayo ulun ondo' mokoondo' onom bubua' ru kalindu' ra moonong kalindu' am kalayam nano. Io papag ru maayo ulun ra galing i.

⁷ Nagasab io ra ulun ru Israil, ginio boo ra i Jonatan namatoi riso. I Jonatan anak ri Simia, maayo ru Raja' Daut.

⁸ Katatalu ngaulun ondo' pinatoi ru Raja' Daut am pulalai nano papag ru maayo ulun giu' ra Gat.