1 TUNUNG RU BANSA' ISRAIL 18 - Tanou Moonsoi Timugon

Kamanangan ru Raja' Daut ralalom pangayawan

¹ Kukula' buoi raiti, namulunsar Raja' Daut am nangala ra ulun ru Palistin, am niayuk nampagaau ra bandar Gat am niayuk ngaangai' pekan giu' ra liliut no.

² Raja' Daut niayuk nangala ra ulun ru Moab saboi ilo kinuasa' am nambayar riso ra cukai.

³ Kopongo raginio Raja' Daut nangala ra Raja' Gadadijir, namarinta giu' ra Joba mamaar ra wilayah Gamat giu' ra pagun Siria. Paat raginio Raja' Gadadijir mangkiralan koson manguasa' ra wilayah mamaar ra ralayo ru Sungoi Iprat.

⁴ Raja' Daut nampagaau ra 1,000 kurita' kuda, am namparakop ra 7,000 ngaulun saujor nangkuda am niayuk 20,000 ngaulun saujor nantana'. Pinandakan no ngaangai' kuda, ondo' ak am kukula' ngainan, ondo' inukop mamunduk ra 100 kurita' kuda.

⁵ Paat ra ulun ru Siria intor ra Damsyik nangator ra saujor koson mangindangan ra Raja' Gadadijir, Raja' Daut namulunsar ra saujor no am namatoi 20,000 ngaulun.

⁶ Raja' Daut pana nanirong boo ra pangkiman ru saujor giu' ra wilayah nilo, am ilo kinuasa' am nambayar ra cukai riso. Nangani' Tuhan ra kamanangan ra Raja' Daut ra ati ayuk io mangayou.

⁷ Raja' Daut nampagaau ra perisai-perisai mas ondo' pinakai ru pagawai-pagawai ru Raja' Gadadijir, am ngaangai' no inibit ra Jirusalim.

⁸ Suai raginio Raja' Daut niayuk nangalap ra masuang kaga' tambaga' intor ra Tibhat am Kun, bandar-bandar ondo' ragili kinuasa' ru Raja' Gadadijir. (Paat ra orou tauli, tambaga'-tambaga' pinakai ru Raja' Salomo koson nambaal ra tangki', lugu'-lugu', am kuliamos ru sambayang giu' ra Baloi ru Tuhan.)

⁹ Raja' Tou, ondo' namarinta ra pagun Gamat, nokorongog ra Raja' Daut nangala ra ngaangai' saujor ru Raja' Gadadijir.

¹⁰ Ginio ra Raja' Tou nanusub ri Joram, anak ungkuyon nano koson mampasaboi ra ragu kaansayan ra Raja' Daut am ragu paringkuanangan ra kamanangan nano ra Raja' Gadadijir. Raja' Tou galama' masalok noyo mangayou ra Raja' Gadadijir. Minuma' i Joram ra Raja' Daut am nagibit ra masuang tangguang intor ra mas, pirok am gangsa'.

¹¹ Pinataak ru Raja' Daut ngaangai' tangguang no ra Tuhan koson pakayon ralalom ru upacara sambayang. Koon niayuk ra ondo' binaal ru Raja' Daut am kuliamos pirok am mas ondo' inalap nano intor ra bansa'-bansa' ondo' kinala nano, iono bansa' ru Idom, Moab, Amon, Palistin am Amalik.

¹² I Abisai, (ina' nano ininggalanan ri Jiruya) nangala am namatoi ra 18,000 ngaulun ru Idom giu' ra Limayak Asin,

¹³ am nanirong ra pangkiman ru saujor giu' ra titikop pagun ru Idom. Ginio ra ulun ru Idom nakikuasa' ra Raja' Daut. Nangani' Tuhan ra kamanangan ra Raja' Daut ra ati ayuk io mangayou.

¹⁴ Raja' Daut namarinta ra titikop Israil am nanutun maa' raginio mamagun nano masalok matimpok am moonsoi pamakuan no.

^15-17 Gitilo noyo pagawai mangasawat ondo' linantik ru Raja' Daut: Panglima ru pulalai ru saujor: Joab, maayo ri Abisai Mamamatik ru pagun: Josapat anak ri Agilud Imam-imam: Jadok anak ri Agitub am i Agimilik anak ri Abiatar Mamamatik ru istana: Sausa Tingganai ru magagalung ayuk ra raja': Binaya anak ri Joyada Anak-anak ungkuyon ru Raja' Daut mokoondo' ra kandoi maatang ralalom ru pamarintaan nano.