1 TUNUNG RU BANSA' ISRAIL 16 - Tanou Moonsoi Timugon

¹ Pinabanta' nilo Kaban Nabantuan no giu' ra ralalom ru kim ondo' tinampos noyo ru Raja' Daut. Kopongo raginio nampataak ilo ra taak-taak simbalui koson mapabansuk ra guang ru Tuhan am taak-taak simbalui koson makibarakat Riso.

² Kopongo Raja' Daut nampataak ra taak-taak simbalui raginio, nambarakat io ra ulun ru Israil ralalom inggalan ru Tuhan,

³ am nantatayar ra akanon risilo ngaangai'. Moonong ulun ondo' soroi ra giu' no, ungkuyon am ruandu' inanian rondo' ruti', sampila' kual pinanggang, am rondo' kuui kismis.

⁴ Raja' Daut nampalantik ra kukula' ngaulun Liwi koson maningganai ra upacara sambayang ra Tuhan, i Aki Kapuuno' ru Israil, giu' ra saang ru Kaban Nabantuan. Narimbai ilo ra rimbai paringkuanangan am pangamparan ra Tuhan.

⁵ I Asap linantik koson ra tingganai am i Jakaria mangindangan nano. I Jiyil, i Simiramot, i Jiwil, i Matisa, i Iliab, i Binaya, i Obid-Idom am i Jiyil sinusub koson mangkuli ra jitor. I Asap sinusub koson mangkuli ra simbal,

⁶ am ruo ngaulun imam, iono i Binaya am i Jagajiil, sinusub mapatanduus koson manamput ra bujung giu' ra saang ru Kaban Nabantuan.

⁷ Ginio noyo ondo' kainsaa' ru Raja' Daut nanusub ri Asap am rangan-rangan nano ra gino ngai' ulun ru Liwi koson marimbai ra rimbai pangamparan ra Tuhan.

Rimbai pangamparan

⁸ Paringkuanang no ra Tuhan, potonowo' katulayan Nano. Tunungo' binaal Nano ra bansa'-bansa'.

⁹ Rimbayo' noyo rimbai pangamparan ra Tuhan, tunungo' noyo ngaangai' binaal Nano ondo' makaimuag.

¹⁰ Io noyo Tuhan Ondo' Rondo' ayuk, pakaansuk no, sabap ra itakau longgom Nano; ngaangai' ondo' sumamba Riso polosoon maansukan!

¹¹ Pakiindangan no ra Tuhan; samba no Riso ra masalok.

^12-13 Akau papag ri Jakub, ulipon ri Aki Kapuuno', akau papag ru Israil, ulun pinili' ri Aki Kapuuno', karaa' noyo kaimuagan ondo' binaal ri Aki Kapuuno', pai' liliani' kapatasan ondo' tinaakan Nano.

¹⁴ Tuhan noyo i Aki Kapuuno' takau; susuban Nano koson ra titikop ru tana' ti.

¹⁵ Pai' liliani' nabantuan Nano ondo' nasauk koson ra sabubuoi no,

¹⁶ nabantuan ondo' binaal Nano ri Abragam, am bantu' Nano ri Isak,

¹⁷ am pinatanduus ri Jakub, nasauk ra nabantuan mantilayun ra ulun ru Israil.

¹⁸ Indagu Io, “Akau aniin Ku ra pagun Kanaan, koson masauk ra longgom tungkuson min.”

¹⁹ Ragili ulun ri Aki Kapuuno' kalo masuang, naayag ilo koson ra ulun bansa' ru bokon giu' ra pagun Kanaan.

²⁰ Timinanggau ilo intor ra pagun mongoi ra pagun, intor ra rondo' pamarintaan mongoi ra rondo' pamarintaan.

²¹ Kaa' i Aki Kapuuno' kalo mompoloso ra osoi pana mangimbolo' risilo, sabap ilo, nampakara' Io ra raja'-raja'.

²² Indagu Io, “Pai' ulisoo' ulipon-ulipon pinili' Kuno; pai' jamari' nabi-nabi Kuno!”

²³ Rimbayi' Tuhan ra rimbai, akau titikop ru tana' ti! Paat ra moonong orou potonowo' tanou moonsoi ra namayag Io noyo ritakau.

²⁴ Potonowo' noyo katulayan Nano ra bansa'-bansa', am binaal Nano ondo' makaimuag ra ulun.

²⁵ Tuhan no matulai, am musiti' omporon toojo; musiti' Io urumaton masailan poyo intor ra ngaangai' dewa.

²⁶ Dewa-dewa ru bansa' ra bokon sinungkalalaing ayuk, kaa' Tuhan nambaal ra limbowon.

²⁷ Katulayan am kinaayo nampalibung Riso, intok inayanan Nano napanu' ra kuasa' am kaansukan.

²⁸ Akau ngaangai' ulun ra tana' ti, omporo' noyo Tuhan! Omporo' noyo katulayan am kaikangan Nano.

²⁹ Omporo' noyo inggalan ru Tuhan ondo' matulai; ibito' noyo taak am umpos no ra intok inayanan Nano. Kuku' samba ra saang ru Tuhan paat ra Io mingkual;

³⁰ ponontol no ra saang Nano, akau titikop ru tana' ti! Tana' ti piniot am kalo maalap ra uyog.

³¹ Pakaansuk kano, tana' ti am limbowon! Balai' bansa'-bansa' ra Tuhan no Raja'.

³² Pompongoos no, okou raat, am ngaangai' ru suang muno! Pakaansuk no, akau umo-umo, am ngaangai' ru tinanom min!

³³ Puun-puun tataun giu' ra kataunan magilakup ra maansukan, paat ra Tuhan matong koson mamarinta ra tana' ti.

³⁴ Paringkuanangan no ra Tuhan, sabap ra Io moonsoi; togom Nano mantilayun.

³⁵ Ragui' Io, “Iou Aki Kapuuno', Mamamayag ramon, bayago' akai intor ra kuasa' ru bansa'-bansa'. Timungo' akai no maa' raginio makaparingkuanang akai am mongompor ra inggalan Muno ondo' matulai!”

³⁶ Omporo' noyo Tuhan, i Aki Kapuuno' ru Israil! Omporo' noyo Io raino am sabubuoi no! Kopongo raginio ngaangai' ulun ru Israil mindagu, “Amin”, am mongompor ilo ra Tuhan.

Sambayang giu' ra Jirusalim am giu' ra Gibion

³⁷ Raja' Daut nampalantik ri Asap am gino ngai' ru ulun nano maa' raginio mangandoi ilo ayuk ralalom ru panalingapuan ra baal-baal ondo' makakulawit ra sambayang giu' ra intok napabantaan ra Kaban Nabantuan ru Tuhan. Moonong orou musiti' ilo mangandoi ra giu' no,

³⁸ am inindangan ri Obid-Idom anak ri Jidutun am 68 ngaulun ra bokon intor ra bansa' nano. I Gosa am i Obid-Idom iono ulun magalung ra kulobon garabang.

³⁹ Imam Jadok am imam-imam ra bokon pinangandoi koson manalingapu ra sambayang ra Tuhan giu' ra intok sambayangan giu' ra Gibion.

⁴⁰ Moonong susuab ti am mamai' ti musiti' ilo mampataak ra taak simbalui koson mapabansuk ra guang ru Tuhan, giu' ra rasawat ru altar, sumugut ra Taurat ondo' tinaakan ru Tuhan ra ulun ru Israil.

⁴¹ Imam Jadok am imam-imam inindangan ri Giman am Jidutun am niayuk kukula' ngaulun ondo' pinili' koson marimbai ayuk ra rimbai pangamparan ra Tuhan sabap ra togom Nano ondo' mantilayun.

⁴² I Giman am i Jidutun niayuk manalingapu ra bujung, simbal am niayuk kuliamos miujik ra bokon ondo' pinakai koson kulion paiison ra rimbai-rimbai pangamparan. Ulun-ulun ru bansa' ri Jidutun pinangandoi koson magalung ra kulobon-kulobon garabang.

⁴³ Kopongo raginio ngaangai' ulun minuli' ra baloi ru sigagama'. Raja' Daut niayuk minuli' koson mababaya' ra sasambaloi nano.