1 TUNUNG RU BANSA' ISRAIL 15 - Tanou Moonsoi Timugon

Tumampos koson mapabanding ra Kaban Nabantuan

¹ Nambaal Raja' Daut ra kukula' baloi giu' ra Bandar Daut koson riso. Nanampos io ra intok ru Kaban Nabantuan ri Aki Kapuuno' am napatirong ra kim intok ru Kaban no.

² Kopongo raginio indagu Raja' Daut, “Ulun ru Liwi ayuk ondo' iowon mansaan ra Kaban Nabantuan ri Aki Kapuuno', sabap ra ilo pinili' ru Tuhan koson mansaan ra Kaban Nabantuan ru Tuhan am koson mangandoi ayuk Riso ra sabubuoi no.”

³ Ginio ra nampiau Raja' Daut ra ngaangai' ulun ru Israil matong ra Jirusalim koson mapabanding ra Kaban Nabantuan ru Tuhan ra intok ondo' tinampos nano.

⁴ Kopongo raginio nanusub Raja' Daut ra papag ri Arun am ulun ru Liwi tumimung.

⁵ I Uriil, intor ra bansa' ru Kigat ralalom bansa' ru Liwi, naningganai ra 120 ngaulun intor ra bansa' nano.

⁶ I Asaya, intor ra bansa' ru Mirari, naningganai ra 220 ngaulun intor ra bansa' nano.

⁷ I Joil, intor ra bansa' ru Girson, naningganai ra 130 ngaulun intor ra bansa' nano.

⁸ I Simaya, intor ra bansa' ru Ilsapan, naningganai ra 200 ngaulun intor ra bansa' nano.

⁹ I Iliil, intor ra bansa' ru Gibron, naningganai ra 80 ngaulun intor ra bansa' nano.

¹⁰ I Aminadab, intor ra bansa' ri Ujiil, naningganai ra 112 ngaulun intor ra bansa' nano.

¹¹ Kopongo raginio nampiau Raja' Daut ra Imam Jadok am Imam Abiatar, am niayuk onom ngaulun Liwi: I Uriil, Asaya, Joil, Simaya, Iliil am Aminadab.

¹² Indagu Raja' Daut risilo, “Akau tingganai ru bansa'-bansa' ralalom bansa' ru Liwi. Ginio ra, akau am ulun ru Liwi ra bokon musiti' mamasau ra inan maa' raginio maalap min pakabanding Kaban Nabantuan ru Tuhan, i Aki Kapuuno' ru Israil, ra intok ondo' tinampos ku noyo.

¹³ Paat ra Kaban no pinabanding ra kainsaa' i, kalio kau ra giu' koson mansaan raginio. Ginio ra Tuhan, i Aki Kapuuno' takau, nangukum ritakau sabap ra kalo nakitulu' takau intor Riso.”

¹⁴ Ginio ra, imam-imam am ulun ru Liwi namasau ra inan maa' raginio makapamanding ra Kaban Nabantuan ru Tuhan, i Aki Kapuuno' ru Israil.

¹⁵ Paat nampabanding ra Kaban, ulun ru Liwi nansaan ra Kaban no ra ruo ngantaun bandasan ondo' tinaakan ru Tuhan pinaumbaya' ri Musa.

¹⁶ Nanusub niayuk Raja' Daut ra tingganai-tingganai ru ulun ru Liwi maa' raginio manusub ra kukula' ngaulun intor ra bansa' nilo koson marimbai am mangkuli ra rimbai-rimbai kaansukan ra jitor am simbal.

^17-21 Intor ra bansa'-bansa' ru maririmbai, nampili' ilo ra ulun ragitilo koson mangkuli ra simbal tambaga' masilou: I Giman anak ri Joil, pabukat nano ondo' ininggalanan ri Asap anak ri Birikia, am niayuk i Itan anak ri Kusaya intor ra bansa' ru Mirari. Koson mamaya' risilo am niayuk mangkuli ra jitor ondo' mokobolos ra masawat, ulun ru Liwi ragitilo pinili': I Jakaria, Jaajiil, Simiramot, Jiwil, Uni, Iliab, Maasiya am Binaya. Koson mangkuli ra jitor ondo' mokobolos ra magana', ulun ru Liwi ragitilo pinili': I Matisa, Ilipili, Mikniya, Ajajya am Obid-Idom am Jiyil, ruo ngaulun ondo' nagalung ra intok ru Kaban Nabantuan.

²² I Kinanya pinili' koson naningganai ra ulun-ulun mangkuli ra miujik intor ra bansa' ru Liwi, sabap ra io mangkuli ra miujik ondo' mapandai kaga'.

^23-24 I Birikia am i Ilkana, nababaya' ri Obid-Idom am Jigia pinili' nasauk ra magalung ra Kaban Nabantuan ri Aki Kapuuno'. Imam-imam, iono Sibania, Josapat, Nitaniil, Amasai, Jakaria, Binaya am Iliijir pinili' koson manamput ra bujung giu' ra saang ru Kaban Nabantuan.

Kaban Nabantuan pinabanding ra Jirusalim

²⁵ Ginio ra Raja' Daut nababaya' ra tingganai-tingganai ru Israil, am niayuk panglima-panglima minongoi ra baloi ri Obid-Idom koson mangalap ra Kaban Nabantuan, am nambaal ra pangiantakan maayo.

²⁶ Tulu' ngainan sapi' gawayan am tulu' ngainan domba pinataak ri Aki Kapuuno' sabap ra nangindangan Io ra ulun ru Liwi ondo' nansaan ra Kaban Nabantuan no.

²⁷ Paat raginio Raja' Daut nansukub intor ra konoon linon malumis. Koon raginio niayuk ra bayang ru ulun mangkukuli ra miujik am i Kinanya, tingganai nilo, am niayuk ngaangai' ulun ru Liwi ondo' nangkayang ra Kaban no. Raja' Daut niayuk nambayang ra efod intor ra konoon linon.

²⁸ Ngaangai' mamagun ru Israil namaya' ra Kaban Nabantuan saboi ra Jirusalim ra nagilakup ra naansukan, am niayuk bolos ru bujung, nafiri, simbal am jitor.

²⁹ Paat ra Kaban no inibit minumpos ra ralalom ru bandar, i Mikgal, anak ruandu' ru Raja' Saul, nagimpal intor ra gigimpalan am nakakito ra Raja' Daut nansasayau am nagititindak ra naansukan. I Mikgal pana mataman magilong ra Raja' Daut.