1 TUNUNG RU BANSA' ISRAIL 13 - Tanou Moonsoi Timugon

Kaban Nabantuan pinabanding intor ra Kiryat-Jiarim

¹ Nansusunur Raja' Daut am ngaangai' pagawai nano ondo' naningganai ra pulalai saribu ngaulun am pulalai maatus ngaulun.

² Kopongo raginio pinatanou no baal ragitio ra ngaangai' ulun no, “Amon ru mangiou kau, am amon ru kasagaan ru Tuhan, i Aki Kapuuno' takau, moonsoi mangator takau ra ulun sinusub mongoi ra imam-imam am niayuk ulun-ulun ru Liwi giu' ra bandar-bandar nilo, am ra ngaangai' ru bansa' takau. Ulun-ulun sinusub no manusub risilo matong tumimung mababaya' ritakau ragiti.

³ Kopongo raginio mongoi takau pangalap ra Kaban Nabantuan ri Aki Kapuuno', ondo' inimpayan buoi ra pamarintaan ru Raja' Saul.”

⁴ Ngaangai' ulun ru Israil ondo' natimung no masaga' ra inatang no, am nangiou ilo raginio.

⁵ Ginio ra Raja' Daut nanimung ra mamagun ru Israil intor ra titikop pagun, intor ra balitan ru pagun ru Misir giu' ra rabugus saboi ra Ginting Gamat giu' ra ralayo, koson mangalap ra Kaban Nabantuan intor ra Kiryat-Jiarim am pabandingon ra Jirusalim.

⁶ Kopongo raginio Raja' Daut am ngaangai' mamagun ru Israil minongoi ra bandar Baala, iono Kiryat-Jiarim, giu' ra wilayah ru Jiuda koson mangalap ra Kaban Nabantuan ri Aki Kapuuno'. Kaban no ininggalanan ra “Tuhan ondo' nanturung ra rasawat ru Kirub”.

⁷ Paat ilo nakasaboi giu' ra Baala, inalap nilo Kaban Nabantuan no intor ra baloi ri Abinadab, am pinatampak ginio ra rasawat ru kurita' kuda ondo' bagu. I Uja am i Agio minaya' ra kurita' kuda no,

⁸ liliwa' Raja' Daut am ngaangai' ulun ru Israil nansasayau ra naansukan koson mangurumat ri Aki Kapuuno'. Naririmbai ilo liliwa' nangkuli ra kuliamos ru miujik – jitor, gambus, tamburing, simbal am bujung.

⁹ Paat ra ilo nakasaboi giu' ra intok mangagik ra gandum longgom ri Kidon, sapi'-sapi' ondo' namunduk ra kurita' no nakasaru. I Uja pana nampatutui ra kalindu' am nampaguut ra Kaban Nabantuan no maa' raginio kalo maratu'.

¹⁰ Paat raginio niayuk Tuhan siminangit ri Uja am namatoi riso, sabap ra ginuut no Kaban. I Uja minatoi ra giu' no, ra saang ri Aki Kapuuno'.

¹¹ Intor raginio intok no ininggalanan ra Piris-Uja. Siminangit Raja' Daut sabap ra Tuhan namuso ri Uja.

¹² Kaa' Raja' Daut malaa' niayuk ri Aki Kapuuno' am indagu, “Raino ati kulaan kia boo ibiton ku Kaban Nabantuan no?”

¹³ Ginio ra kalo inibit ru Raja' Daut Kaban no ra Jirusalim. Binulian no Kaban no giu' ra baloi ri Obid-Idom, sangulun intor ra bandar Gat.

¹⁴ Soroi Kaban no ra giu' no talu ngansila' buoi no, am nambarakat Tuhan ra sasambaloi ri Obid-Idom am niayuk ngaangai' ru linonggom nano.