1 TUNUNG RU BANSA' ISRAIL 12 - Tanou Moonsoi Timugon

Maamaya' ri Daut intor ra bansa' ru Binjamin

¹ Paat ri Daut nagiru' intor ra Raja' Saul, nagiru' i Daut ra Jiklag. Paat ri Daut soroi ra giu' no, masuang saujor ondo' giminagaya' am mangapandai minatong minamung riso.

² Ilo rondo' bansa' ra Raja' Saul, iono bansa' ru Binjamin. Saujor-saujor no mangapandai mamanah am mombobol ra batu, tampilon ra kalindu' ra pamiris am niayuk tampilon ra kalindu' ra kait.

^3-7 Tiningganai ilo ri Agiijir am Joas, anak-anak ri Simaa intor ra Gibia. Gitilo noyo saujor-saujor no: Jijiil am Pilit, anak-anak ri Ajmawit Biraka am Jigu intor ra Anatot Jismaya intor ra Gibion, sangulun saujor nauligan kaga' ondo' nasauk ra sangulun intor ra tingganai “Pulalai Talu Ngoopor” Jirimia, Jigajiil, Joganan am intor ra Gidira Ilujai, Jirimot, Bialia, Simarya am Sipatia intor ra Garup Ilkana, Jisia, Ajariil, Joijir am Jasobam intor ra bansa' ru Kora Joila am Jibaja, anak-anak ri Jirogam intor ra Gidor.

Maamaya' ri Daut intor ra bansa' ru Gad

⁸ Paat ri Daut soroi giu' ra kubu giu' rasawat ru tana' kaagisan, masuang saujor nauligan kaga' am mangapandai toojo intor ra bansa' ru Gad minatong amung riso. Mapandai ilo kaga' mamakai ra perisai am tutura'; ilain ra baani ilo koson ra singa' am maribok ilo koson ra tambang.

^9-13 Gitilo noyo inggalan nilo sumugut ra pangkat: Ijir, Obaja, Iliab, Mismana, Jirimia, Atai, Iliil, Joganan, Iljabad, Jirimia am Makbanai.

¹⁴ Kukula' ngaulun ra ulun ru Gad no iono pagawai masawat ondo' naningganai ra pulalai saribu ngaulun; kukula' ngaulun noyo pagawai magana' ondo' naningganai ra pulalai maatus ngaulun.

¹⁵ Paat ra sila' kasaa', paat ra Sungoi Jordan tatanga' nampaliur, saujor-saujor no liminaup ra sungoi am nampagiru' ra mamagun ru limayak, limayak tampilon ra sirangon am niayuk limayak tampilon ra kalasaan ru sungoi no.

Maamaya' ri Daut intor ra bansa' ru Binjamin am Jiuda

¹⁶ Rondo' paat ra santimungan ulun intor ra bansa' ru Binjamin am bansa' ru Jiuda minongoi ra kubu inayanan ri Daut.

¹⁷ Inuma' ilo ri Daut am indagu, “Amon ru matong kau koson ra rangan koson mangindangan raki', pagamung no raki'. Apuon mai akau ra guang maringkuanang. Kaa' amon ru masaga' kau manumbalik raki' am parakapin aku ra pantula', kabalu' pana kalo igondo' aku kalaat ramuyun, i Aki Kapuuno' ondo' sambaan ru kinamatuaan takali makapandai raginio am ukumin No akau.”

¹⁸ Sangulun intor risilo, iono i Amasai, ondo' tauli no nasauk ra tingganai ru pulalai ondo' sabiton ra “Pulalai Talu Ngoopor”, kinuasa' ru Ambiluo ri Aki Kapuuno'. I Amisai pana mindagu, “Daut anak ri Isai, akai ti maamaya' muno! Gama' ru okou am ilo ondo' mangindangan rirun makasugut! I Aki Kapuuno' manaung rirun!” Inuma' ilo ri Daut am linantik ilo nasauk ra pagawai ru saujor nano.

Maamaya' ri Daut intor ra bansa' ru Manasi

¹⁹ Kukula' ngaulun saujor intor ra bansa' ru Manasi nagamung ri Daut paat ri Daut nababaya' ra ulun ru Palistin minongoi pangayou ra Raja' Saul. Sotopot no, i Daut kalo nangindangan ra ulun ru Palistin, sabap ra raja'-raja' ru ulun ru Palistin malaa' ri Daut manumbalik risilo am manaung ra Raja' Saul, tuan nano ragili.

²⁰ Gitilo noyo saujor-saujor intor ra bansa' ru Manasi ondo' nagamung ri Daut paat ri Daut ralalom pangkiralanan muli' ra Jiklag: I Adnah, Jojabad, Jidiail, Maikol, Jojabad, Iligu am Jilitai. Ilo sigagama' naningganai ra pulalai saribu ngaulun.

²¹ Ilo saujor ondo' maikang kaga' am nangindangan ri Daut minanggal ra mantatakou. Paat ra orou tauli no, nasauk ilo ra pagawai ru saujor ralalom ru pulalai mangayou ru Israil.

²² Maar moonong orou mokoondo' ulun bagu ondo' magamung ri Daut, saboi kalo nabuoi raginio pulalai ri Daut nasauk ra maayo kaga'.

Suang ru saujor ri Daut

^23-37 Paat ri Daut soroi giu' ra Gibron, masuang saujor ondo' inila' nagamung riso. Nangindangan ilo riso nasauk ra raja' namalit ra Raja' Saul, koson ra binantu' ru Tuhan. Suang nilo koson ragitio: Intor ra bansa' ru Jiuda: 6,800 ngaulun, naukapan ra perisai am tutura'. Intor ra bansa' ru Simion: 7,100 ngaulun ondo' inila'. Intor ra bansa' ru Liwi: 4,600 ngaulun. Ulun-ulun maamaya' ri Joyada, sangulun papag ri Arun: 3,700 ngaulun. Pabukat-pabukat ri Jadok, sangulun saujor mamulok ondo' baani: 22 ngaulun nauligan kaga'. Intor ra bansa' ru Binjamin (bansa' ru Raja' Saul): 3,000 ngaulun (kasuangan ulun intor ra bansa' ru Binjamin giminagaya' ayuk ra Raja' Saul). Intor ra bansa' ru Ipraim: 20,800 ngaulun ondo' nauligan kaga' ralalom ru bansa' nilo galama'. Intor ra bansa' ru Manasi Kalasaan: 18,000 ngaulun pinili' koson mampasauk ri Daut ra raja'. Intor ra bansa' ri Isakar: 200 ngaulun tingganai, nababaya' ra ulun nilo; tingganai ragitilo mapandai mangaru' ra atan ondo' musiti' baalon ru mamagun ru Israil paat ra inaru' no. Intor ra bansa' ru Jibulon: 50,000 ngaulun ondo' gumagaya' am maintopot, am niayuk mapandai kaga' mamakai ra ngaangai' salinut ru kinandoi mangayou, am ondo' nakatampos mangayou. Intor ra bansa' ru Naptali: 1,000 ngaulun tingganai nababaya' ra 37,000 ngaulun ondo' naukapan ra perisai am tutura'. Intor ra bansa' ru Dan: 28,600 ngaulun ondo' inila'. Intor ra bansa' ru Asyir: 40,000 ngaulun ondo' nakatampos mangayou. Intor ra bansa'-bansa' giu' ra tampilon sirangon ru Jordan, iono bansa' ru Rubin, Gad am Manasi Sirangon: 120,000 ngaulun ondo' mapandai kaga' mamakai ra ngaangai' salinut ru kinandoi mangayou.

³⁸ Ngaangai' ru saujor no, ondo' nakatampos mangayou, minongoi ra Gibron. Inaru' nilo toojo koson mampalantik ri Daut masauk ra raja' ru titikop ru Israil. Ngaangai' ulun ru Israil ra bokon pana rondo' guang koson mambaal raginio.

³⁹ Minayan ilo ra giu' no nababaya' ri Daut buoi talu ngoorou. Nambaal ilo ra bunsag maayo ra nangakan am nanginum ondo' tinampos koson risilo ru ulun ru Israil ra bokon.

⁴⁰ Intor ra bansa' ru Isakar, Jibulon am Naptali, ondo' maalur giu' ra ralayo pana mokoondo' ulun minatong nagibit ra kaladai, unta, baghal am sapi' ondo' nagibit ra akanon: tapung, kawa' ru ara, kismis, wain am umau jaitun. Ilo niayuk nagibit ra sapi' am domba koson simbaluyon am akanon. Ngaangai' no nampakito ra naansukan mamagun giu' ra titikop ru pagun.