1 TUNUNG RU BANSA' ISRAIL 11 - Tanou Moonsoi Timugon

Raja' Daut nasauk ra panguasa' ru Israil am Jiuda

¹ Ngaangai' ulun ru Israil minongoi ra Raja' Daut giu' ra Gibron am indagu, “Akai ngaangai' pabukat mu raja'.

² Intor ragili, am poyo paat ra Raja' Saul lakat poyo namarinta ramon, okou naningganai ra saujor ru Israil giu' ra intok pangayawan. Am poyo ra Tuhan i Aki Kapuuno' muno raja' nambantu' ra okou raja' naningganai ra ulun Nano am nasauk ra mamarinta risilo.”

³ Ginio ra ngaangai' tingganai ru ulun ru Israil minatong ra Raja' Daut giu' ra Gibron. Raja' Daut pana nambaal ra nabantuan ra tingganai-tingganai ru Israil no. Kopongo raginio pinasasar nilo umau jaitun ra ulu ru Raja' Daut koson mampalantik riso nasauk ra raja' ru Israil. Kasaukan ragitio nasauk koson ra ondo' binantu' ru Tuhan ondo' pinabala' galing ri Samuil.

⁴ Rondo' paat ra Raja' Daut nababaya' ra ngaangai' saujor ru Israil minongoi pamulunsar ra bandar Jirusalim. Paat raginio bandar no ininggalanan ra bandar Jibus am ulun ru Jibusi, mamagun toojo ru tana' raginio, lakat poyo minayan ra giu' no.

⁵ Ulun ru Jibusi nambala' ra Raja' Daut ra kalo lair makasubol ilo ra bandar nilo. Kaa' nakasugut Raja' Daut nampagaau ra kubu nilo ondo' ininggalanan ra Sion, am raino kubu no sabiton ra “Bandar Daut”.

⁶ Paat raginio, Raja' Daut mindagu, “Ulun ondo' kasaa' mamatoi ra sangulun Jibusi masauk ra panglima!” I Joab (ina' nano i Jiruya), naningganai ra pamulunsaran ondo' kasaa', ginio ra io nasauk ra panglima.

⁷ Raja' Daut minayan ra kubu no, ginio boo ra kubu no sabiton ra “Bandar Daut”.

⁸ Raja' Daut nambaal saguli' ra bandar no, inintaran ra intok ondo' kinasawat ra tana' giu' ra tampilon sirangon ru bulur, am i Joab namuna' ra tampilon ra bokon ru bandar no.

⁹ Giminaai ikang ru Raja' Daut sabap ra Tuhan Ondo' Maayo Kaga' Kuasa' mabaya' riso.

Saujor-saujor ru Raja' Daut ondo' nauligan kaga'

¹⁰ Gitilo noyo inggalan ru saujor ru Raja' Daut. Nababaya' ra ulun ru Israil ra bokon, mingkotog ilo maa' raginio Raja' Daut masauk ra raja' koson ondo' binantu' ru Tuhan, am sinungka' nilo pamarintaan nano.

¹¹ Ulun tutumula' ondo' kasaa' iono i Jasobam intor ra bansa' ru Gakmoni; io tingganai ru “Pulalai Talu”. Ralalom ru rondo' pamulunsaran, nakaili' io minanggal ra talu ngaatus ngaulun, am namatoi risilo ngaangai' ra tutura' nano.

¹² Ulun tutumula' karuo ralalom ru “Pulalai Talu” no iono i Iliajar anak ri Dodo intor ra bansa' Agogi.

¹³ Minaya' io ra Raja' Daut paat namulunsar ra ulun ru Palistin ralalom pamulunsaran giu' ra Pas-Damim. I Iliajar soroi giu' ra umo ru barli paat ra saujor ru Israil tumalimpuun magigiru',

¹⁴ kaa' io am ulun-ulun nano siminoroi ayuk giu' ra tatanga' ru umo no am minanggal ra ulun ru Palistin. Kopongo raginio nangani' Tuhan ra Israil ra kamanangan ondo' maayo paat ra orou raginio.

^15-16 Sangarawan raginio, talu ngaulun intor ra talu ngoopor ngaulun saujor ondo' nauligan kaga' minongoi tuum ra Raja' Daut giu' ra rondo' intok ondo' mokoondo' ra kubu giu' ra rondo' gunung batu, mamaar ra Luang Batu Adulam. Paat raginio ulun ru Palistin nangkim giu' ra Limayak Ripaim, am sampulalai nilo minayan ra Bitligim.

¹⁷ Moondom Raja' Daut ra namagunan nano am indagu, “Mapara' bonsoi no amon ru aniin aku ra timug inumon intor ra tulubong mamaar ra kulobon garabang giu' ra Bitligim!”

¹⁸ Pokorongog raginio talu ngaulun ra ulun tutumula' nano nanubol ra pangkiman ru ulun ru Palistin, nangalap ra timug intor ra tulubong no, am ibito' ginio ra Raja' Daut. Kaa' marara' Raja' Daut manginum ra timug no, sasari' no boo ginio koson ra taak ra Tuhan.

¹⁹ Indagu Raja' Daut, “Kalo lair inumon ku timug ti! Amon ru inumon ku, koson ayuk ra inumon ku raraa' ru ulun ondo' pinantuwo nilo painawo!” I Daut tojojo marara' manginum ra timug no. Koon raginio noyo kinabaani ru talu ngaulun saujor ondo' nauligan kaga' no.

²⁰ I Abisai, boborok ri Joab iono tingganai ru “Pulalai Talu Ngoopor”. Inanggal no talu ngaatus ngaulun am namatoi risilo ra tutura' nano. Ginio ra nasauk io ra nauligan kaga' ra gino ngai' ru “Pulalai Talu Ngoopor”.

²¹ Io noyo ondo' nauligan kaga' ra gino ngai' ru “Pulalai Talu Ngoopor” am nasauk ra tingganai nilo, kaa' io kalo nauligan kaga' koson ra “Pulalai Talu”.

²² I Binaya anak ri Joyada intor ra Kabjiil iono sangulun saujor ondo' mapanggol kaga'. Baani io kaga' am nakaili' namatoi ra ruo ngaulun tutumula' intor ra Moab. Paat ra rondo' orou, paat ra ais batu riminatu', siminubol io ra rondo' luang am namatoi ra sanginan singa'.

²³ Io niayuk namatoi ra sangulun Misir ondo' makainan ra maayo; ulun no ra sawat nasailan ruo ngamito, am nantutura' ra makalu kaga'. Binulunsar ri Binaya ulun ru Misir no ra lalamba', nampagaau ra tutura' intor ra kalindu' ru ulun no, am namatoi riso ra tutura' no.

²⁴ Koon raginio noyo kinabaani ri Binaya, sangulun intor ra “Pulalai Talu Ngoopor”.

²⁵ I Binaya nauligan kaga' ra gino ngai' ru “Pulalai Talu Ngoopor”, kaa' kalo nauligan io kaga' koson ra “Pulalai Talu”. Linantik io ru Raja' Daut nasauk ra tingganai ru magagalung nano galama'.

^26-47 Gitilo noyo saujor-saujor nauligan kaga' ra bokon: Asail, boborok ri Joab Ilganan anak ri Dodo intor ra Bitligim Samot intor ra Garod Gilis intor ra Pilon Ira anak ri Ikis intor ra Tikoa Abiijir intor ra Anatot Sibkai intor ra Gusa Ilai intor ra Agog Magarai intor ra Nitopa Gilid anak ri Baana intor ra Nitopa Itai anak ri Ribai intor ra Gibia giu' ra wilayah Binjamin Binaya intor ra Piraton Gurai intor ra limayak-limayak Gaas Abiil intor ra Araba Ajmawit intor ra Bagurim Ilyaba intor ra Saalbon Gasyim intor ra Gijon Jonatan anak ri Sagi intor ra Garar Agiam anak ri Sakar intor ra Garar Ilipal anak ri Ur Gipir intor ra Mikirat Agia intor ra Pilon Gijrai intor ra Karmil Naarai anak ri Ijbai Joil, pabukat ri Natan Mibar anak ri Agri Jilik intor ra Amon Nagarai intor ra Biirot, ulun magibit ra kinandoi ri Joab Ira am Garib intor ra Jatir Uria ulun ru Git Jabad anak ri Alai Adina anak ri Sija (sangulun ondo' nauligan kaga' intor ra bansa' ru Rubin ondo' mokoondo' ra pulalai 30 ngaulun) Ganan anak ri Maakga Josapat intor ra Mitni Ujia intor ra Asytarot Syama am Jiyil, anak-anak ri Gotam intor ra Aroir Jidiail am Joga, anak-anak ri Simri intor ra Tiij Iliil intor ra Magawim Jiribai am Josawya, anak-anak ri Ilnaam Jitma intor ra Moab Iliil, Obid am Jaasiil intor ra Mijobaya.