Yud 1 - Ȧŋlemrȧnɛ Ȧfu

¹ Yud, ȧŋbɔy ŋa Yisɔs Krayst, yi ɔwɔnt ka Yeməs, ka ŋaŋ aŋa a muti, ȧŋbɔthər ŋa Kuru ɔKas, yi aŋa a bɛnɛ ta Yisɔs Krayst;

² ta ȧney, məthɔfəl, yi məbɔthər mə bȧrnɛ ro nu.

³ Ambɔthər a mi, ma i bot ȧŋmerȧ a mi tə kəgbalər nu ta kakisi kȧsu bɛ, ȧŋmerȧ a mi aŋ yagba mi tə kəgbalər nu yi kəmaŋ nu kȧmȧ nə bumər ɔfinɔ kȧlanɛ ȧke a po lȧnki win haŋ thəbana ka aŋfəm asəm.

⁴ kotȧy-e afəm alɔm aŋ po wɔŋ sɔy, aŋfəm aŋa a po gbəka matheri maŋ ɔwoni thɔŋ, afəm aŋa te tȧrȧ Kuru aŋa lȧfthi ȧŋboŋa ŋa ɔKuru kȧsu ka mafela maŋ maləs, ɔwa aŋ pɛnsanɛ Yisɔs Krayst ɔMarki kȧsu gbo son.

⁵ Ka-ake, hali ma nə la po tȧrȧ mȧtȧy bɛ, i yema gbukthis nu kəpa, ɔMarki ma ɔ po kisis aŋfəm kəwur ka ȧŋthɔf ŋa ro Iyipt, ɔ kȧl dim ŋaŋ aŋa te lanɛ.

⁶ Ɔwa aŋmȧleka aŋa te bɛnɛ mayi maŋ thəpaŋ, kɛrɛ aŋ tey mayira maŋ məlompi, ɔ bɛnɛ ŋa rə tɔrɛntha ka ȧŋsum abana haŋ ka kathoŋkas ka ȧŋrey abana.

⁷ Hali ro Sɔdɔm yi Kɔmɔra, yi tapet ȧtȧ fatər ri, maŋ po sɔndnɛ rə kəyɔ kərəp, yi tȧy tələs bɛ, a təmər ŋa ta amɔl, a thalər ŋa yi ansɔmpanɛ ka anant na thȧnkȧŋ thəbana.

⁸ Halisa yaŋ afəm aləs aŋe aŋ nɔkɔs madɛr, aŋ farki ɛfɔsɔ, aŋ sambos ɛyiki.

⁹ Kɛrɛ Maikɛl ɔmaleka ubana, maŋ pɛnsanɛ yi Sethani ta kabel ka Mosis ɔ mintha hɛ fəŋfsər kɔ, kɛrɛ ɔ pa, Ta ɔMarki ɔ ŋal mu.

¹⁰ Kɛrɛ aŋfəm aŋe aŋ fəŋfsər ȧtȧ aŋ te tȧrȧ: ɔwa ka ȧtȧ aŋ tȧrȧ ka kȧtemp ȧke a koma ŋa, mɔ ɛsɛm apənk, ka mȧtȧy ame rə aŋ ləsərnɛ.

¹¹ Mɔnɛ ro rɔŋaŋ! kotȧy-e aŋ po tȧŋ ka aroŋ ra Ken, ɔwa ta məkanya aŋ bȧrnɛ ka maləs ma Belam kaŋ dinɛ ka kȧthȧnthonɛ ka Kɔra.

¹² Aŋe ŋə yi ɛpora ka amet ma nu ma məbɔthər, ma aŋ di yi ŋaŋ aŋ wɔnthnɛ kəte ba rənes: aŋ yi mɔ ȧkuru kȧbi ȧke te ba kɔm, ȧke aŋfef mə aŋ kera; aŋ yi mɔ yint ɛte ba ɛbɔpər thalɔm məkomi, ɛ fi mȧrəŋ, a po tusi yi.

¹³ Aŋ yi mɔ ɛmunkəl ɛbaŋ ya ro baŋ, ɛ wurɔ kafoth ka mȧlap maŋ: aŋ yi mɔ atɔs təkɔthnɛ, ta aŋa a bɛnɛ rabi ra ȧŋsum thȧnkȧŋ thəbana.

¹⁴ Inɔk sɔ, ɔwe bekȧ tȧmthədɛrəŋ ka rȧlek ra Adȧm, ɔ nȧbi ta aŋfəm aŋe, ɔ pa, Kəla, ɔMarki ɔ der yi aŋfəm ŋɔŋ asəm ɛwul ɛwul,

¹⁵ tə kəthoŋkas aŋfəm bɛ, yi tə kəŋap ŋa bɛ aŋa te nesa Kuru ta mȧyɔs maŋ ama aŋ po yɔ bɛ rə kəte nesa Kuru, yi ta ȧsim tələs ȧtȧ aŋfəm aləs aŋ po fɔf tə kəŋamnɛ kɔ.

¹⁶ Aŋe ŋə yi aŋfɔfəthanɛ, antompnɛ, aŋ kɔth ka mafela ma ɛmerȧ yaŋ: tasəŋ taŋ tə gbək ɛyoŋka, aŋ yikis afəm kȧmȧ aŋ ba kəsɔthɔ.

¹⁷ Kɛrɛ ȧŋbɔthər a mi, tȧmtȧmnɛ nu tafɔf ȧtȧ aŋsom ŋa ɔMarki kȧsu Yisɔs Krayst aŋ pa thəpaŋ.

¹⁸ Maŋ po tɔri nu kəpa ka ȧŋlɔkɔ aləpsɔ afəm asel tȧy aŋ tə der, aŋa mə kɔth ka mafela mələs ma ɛmerȧ yaŋ.

¹⁹ Aŋe ŋa mə kȧrȧ məpeskinɛ, ŋa yi afəm ŋa ȧdȧru, aŋ ba hɛ ɔYina məsəm.

²⁰ Kɛrɛ naŋ, ȧŋbɔthər a mi, bȧkəsnɛ nu ka kȧlanɛ ka nu kəsəm, ɔwa ramnɛ nu ka ɔYina məsəm.

²¹ bȧkər nu ka mabɔthər ma Kuru, nə kəlianɛ ȧŋney ŋa ɔMarki kȧsu Yisɔs Krayst aŋa mə sɔŋ su aŋesəm thəbana.

²² Ɔwa ba ȧney ka aŋa ba asikɛ:

²³ aŋlɔm nə kisis, nə tafi ŋa ka anant; ba ȧney ka aŋlɔm yi rənes, hali ma nə gbɛŋa ȧsuma tȧŋ ta ɛpɔra ȧtȧ ȧŋdɛr aŋ po nɔkɔs.

²⁴ Ɔwa ɔwe gbəli bɛnɛ nu kəte yɛthȧ, ɔwa ɔ təmər nu kəte ba apora rodi ka ayiki ŋɔŋ yi məbɔnɛ məbana;

²⁵ ta kɔnɔ ɔKuru son ɔKisis kȧsu ɔ sɔthɔ ayiki, kəthɔkəs, rȧbȧy yi ɛfɔsɔ kətȧŋȧnɛ ka Yisɔs Krayst ɔMarki kȧsu katəp yeŋka ɛlɔkɔ ɛ yi dɛ ka-ake dɛ haŋ thȧnkȧŋ thəbana. Amina.