Yeməs 5 - Ȧŋlemrȧnɛ Ȧfu

¹ Ɔwa, naŋ ayola, bok nu, ɔwa sel ɛrɔŋ salata masibo ma nu ama mə derər nu.

² Rayola ra nu rə poŋ they, yi mȧgbak mə po sɔm sɔm ȧsuma tȧ nu.

³ Mȧbɔŋɔ yi aŋkala a nu ȧferȧ aŋ po wɔŋ məgbak; ɔwa mȧgbak mati mə seri tə kəsɔŋ nu mətheri, ɔwa mə tə sɔm madɛr ma nu mɔ nȧnt. Nə po thoŋkla akɛŋ ka nu ka marey mələpsɔ.

⁴ Kəli ba ȧŋrȧm ŋa ɛkump ɛ nu ɛyɛ naŋ nə po kansoŋ, aŋ kulɔ; ɔwa kakulɔ kati kə po wɔŋ ka ɛləns ya ɔMarki ka ɛsəfə.

⁵ Nə po yirȧ ka məbɔnɛ nɔru, nə po yɔ ȧtȧ nə yema, nə po namsir ɛmerȧ ɛ nu ka ȧŋrey ŋa kəfai.

⁶ Nə po sɔŋ mətheri ka nə po dif ɔlompi; kɛrɛ ɔ kasi hɛ nu.

⁷ Tiyȧŋ naŋ awɔnt, muyu nu haŋ ka kȧder ka ɔMarki. Kəla, ɔbaf ɔ kar haŋ ȧŋlɔkɔ aŋ bek tə kərɔk mȧkomi məbaki ma ȧŋthɔf, ɔ muyu haŋ mɔ sɔthɔ akɔm kətɔtɔkɔ yi kȧləpsɔ.

⁸ Naŋ sɔ muyu nu; bȧk nu təbuth, kotȧy-e kȧder ka ɔMarki kə po fat.

⁹ Awɔnt, te nu fɔfəthanɛ ukin dɛ yi ulɔm, ta thani naŋ sɔ nə sɔthɔ mətheri. Kəla ɔThoŋkas ɔ təmȧ ka kadare.

¹⁰ Aŋwɔnt a mi gbasi nu ȧŋmɔl ŋa kanakasi yi kamuyu ka Aŋnȧbi aŋa po fɔf ka ȧŋes ŋa ɔMarki.

¹¹ Kəla sə bont ŋa aruba aŋa muyu. Nə po təl ta kamuyu ka Yob, yi ȧte ɔMarki ɔ yɔna kɔ; kotȧy-e ɔMarki ɔ yi ɔla məthɔth yi ȧney.

¹² Kɛrɛ pəthas tȧy o tȧy, aŋwɔnt a mi, te nu gbiŋ, pə yi ka kȧriyana, thalɔm ka ȧdȧru, thalɔm rə agbiŋ o gbiŋ; bepi nə pa, Yao, ta pə yi gbo Yao; bepi Ade, ta pə yi gbo Ade; kȧmȧ nə te ba mətheri.

¹³ Bepi ukin kətɔŋ ka nu ɔ nakasi-e, ta ɔ ramnɛ. Bepi ukin ɔ ba məbɔnɛ, ta ɔ lensir Kuru.

¹⁴ Bepi ukin kətɔŋ ka nu ɔ tu-e, ta ɔ muti aŋbȧki ŋa aŋchɔch, ɔwa kȧmȧ aŋ ramnɛ ta atɔŋ, aŋ sop kɔ mȧro ka ȧŋes ŋa ɔMarki.

¹⁵ Ɔwa karamnɛ ka kȧlanɛ kə tə kisis ɔboma, yi ɔMarki ɔ tə yokas kɔ; ɔwa bepi ɔ po yɔ ɛhakɛ-e, a tə tera kɔ yi.

¹⁶ Gbithanɛ nu ɛhakɛ ɛ nu, ukin ka ulɔm, ɔwa ramnɛ nu ukin ta ulɔm, kȧmȧ a damər nu. Kȧramnɛ kəfey fey ka wuni lompi kə gbəli tȧy.

¹⁷ Ilaya ɔ yi wuni kəpet mɔ saŋ, kɔ ramnɛ ɔlel kȧmȧ kɔm kə te thuf; ɔwa ta təren təsas yi yof tamthərukin, kɔm kə thuf hɛ.

¹⁸ Ɔwa ɔ ramnɛ sɔ, ka ȧkuru kə sɔŋ atɔm yi ɛyɛt ɛtɛp ɛ kȧl lɔkɔ.

¹⁹ Aŋwɔnt a mi bepi ukin ka nu ɔ yɛthȧ kəwur ka tȧteŋ, ɔwa ukin ɔ lȧfthi kɔ-e,

²⁰ ta ɔ tȧrȧ kəpa ɔwe mə lȧfthi uwuni ka ahakɛ kəwur ka makənȧ ma aroŋ dɔŋ, ɔ tə kisis ɔwuni kəwur ka rȧfi, ɔwa ɔ tə gbəpər ɛhakɛ ɛgbȧthi.