Yeməs 3 - Ȧŋlemrȧnɛ Ȧfu

¹ Aŋwɔnt a mi, naŋ agbȧthi, te nu səkinɛ akarmɔkɔ, ma nə tȧrȧ kəpa saŋ mə tha sɔthɔ məthɛkɛ məlel.

² kotȧy-e rə mȧtȧy mǝgbathi saŋ bɛ sə pənthbəla. Kɔnɔ ɔwe te pənthbəla ka ȧsim tɔŋ, ɔkin kati, wuni gbenthis wɔŋ, ɔwa ɔ gbəli wop mafela ma ȧŋdɛr bɛ.

³ Ɔwa bepi sə bot ȧtȧrȧfi ka tasəŋ ta təsɔy kȧmȧ aŋ təlȧ su-e, sə gbəli lȧfthi ȧŋdɛr ŋaŋ bɛ.

⁴ Kəli ba tabil sɔ, hali ma tə yi təbana-e, ɔwa ɛfef ɛbana ɛ kera ti, halisa, ȧkorȧ ȧlɔl aŋ tə lȧfthi ti dɛr o dɛr ro ɔkorȧ ɔ yema.

⁵ Yȧ pə yi sɔ rȧmer rə yi rəlɔl ka ȧŋdɛr, kɛrɛ rə tə gbək ayonka ta atȧy təbana. Kəli ko nȧnt nəthȧn nə gbəli lȧp ɛthɔk ɛgbȧthi-e?

⁶ Ɔwa rȧmer rə yi nȧnt, rə yi mɔ ȧdȧru rəkənȧ ka mȧdɛr ma su; ɔwa rə mə nɔkɔs ȧŋdɛr bɛ; rə mə bot nȧnt ka mȧyi məlolok, ɔwa rə sɔthɔ sɔ nȧnt kəwur ro yahanama.

⁷ Kotȧy-e a tə tɔl ɛsɛm tətəp bɛ, yi ɛbȧmp-o, yi ɛyɛt ɛwɔrkȧ-o, yi ɛyɛt ya ro baŋ; ɔwa wuni kəpet ɔ po tɔl ŋa thɔŋ.

⁸ Kɛrɛ wuni o wuni ɔ gbəli hɛ tɔl rȧmer, ɔwa rə yi rələs-o, rəkasi sanɛ-o, rə la yi atɔl adif.

⁹ Ka ramer sə ruba Kuru ɔKas; ka ramer sɔ sə raŋka wuni kəpet, ɔwe a bɛmpa ka mȧbȧlȧnɛ ma Kuru.

¹⁰ Ka kəsəŋ kin aruba yi ȧranka aŋ wur. Aŋwɔnt a mi, ȧtȧy ȧte aŋ yi hɛ naŋ tə kəyi.

¹¹ Rəfɔr ra mȧnt rə gbəli wur mȧnt məbɔthi yi mȧnt məroŋkəth ka ɔdɛr kin-i?

¹² Aŋwɔnt a mi, aŋənt ŋa agbɔnɔ gbɔnɔ aŋ gbəli kom məgboli-i, thalɔm rəlek rə gbəli kom məgbɔnɔ-i? Ya pə yi sɔ, rəfɔr ra mȧnt rə gbəli hɛ wur mȧnt məmɛr yi mȧnt məbɔthi.

¹³ Kanɛ yi utempi yi utara tȧy kətɔŋ ka nu-e? Ta ɔ tɔri ti ka ŋesəm alompi, yi ka məyɔs mətempi rə ȧmerȧ athoranɛ.

¹⁴ Kɛrɛ bepi nə ba kətut kəroŋkəth yi kəgbal ka ɛmerȧ ɛ nu-e, te kolonɛ, ɔwa te yemsa tȧteŋ.

¹⁵ Kɛrɛ kȧtemp ake kə yi hɛ kȧtemp ka rəbaki ȧke wur rokɔm, kə yi gbo ȧka ȧdȧru, kə taŋanɛ ɔləs, kə yi ka Sethani.

¹⁶ kotȧy-e ro kətut yi kəgbal kə yi-e, məsɔkanɛ yi tȧy tələs bɛ tə yi.

¹⁷ Kɛrɛ kȧtemp ka rəbaki ȧke wur rokɔm kətɔtɔkɔ bɛ kə yi kəfera, kədarəŋ kati kə yi kəthɔfəl, kərusəma finɔ, kətuy hɛ nɛmthɛnɛ, kəla ȧney, kəba məkomi məfinɔ, kəte ba agbȧy, kəte ba ayaŋfa.

¹⁸ Ɔwa ŋaŋ aŋa mə yɔ məthɔfəl-e, aŋ sak kərɔk ka məlompi yi məthɔfəl.