Yeməs 2 - Ȧŋlemrȧnɛ Ȧfu

¹ Aŋwɔnt a mi, te nu wop kȧlanɛ ka ɔMarki kȧsu Yisɔs Kraystȧŋ, ɔMarki ka ayiki, yi kəbot agbȧy kətɔŋ ka afəm.

² kotȧy-e bepi wuni ɔ wɔŋ ka aŋgbanɛ a nu ɔwe lopra finɔ-e, ɔwe ba asu ŋa məbɔŋɔ, ɔwa wuni mɔnɛ sɔ ɔ wɔŋ rə ruma rənɛthɛ,

³ ka nə yikis ɔwe ba suma təfinɔ, nə pa ro rɔŋɔŋ, Pa, yirȧ nɔ ka ɔdɛr ɔfinɔ, kɛrɛ ka ɔmɔnɛ nə pa, Təmȧ ri, thalɔm yirȧ ka ȧtȧtək ta mi ratha;

⁴ nə ba hɛ agbȧy kətɔŋ ka nu ma nə po səkɛ ȧthonkas ka mənanɛ mələs-i?

⁵ Su aləns aŋwɔnt a mi abɔthər, ŋaŋ aŋa ȧdȧru rə bont amɔnɛ-e, Kuru ɔ thith hɛ ŋa tə kəyi ayola ka kȧlanɛ-i, yi tə kəsɔthɔ rȧbȧy ara ɔ po lahiri ŋaŋ aŋa bɔthər kɔ-i?

⁶ Kɛrɛ nə po say ɔmɔnɛ. Aŋyola tha mə thiŋkər nu-i, ŋa tha mə kera nu ro bare-i?

⁷ Ŋa tha mə fɔf ɔləs ta ȧŋes asəm ŋati rə a tela nu-i?

⁸ Bepi nə wop ȧŋthɔ ŋa rȧbȧy mɔlɔ ma ȧkȧfȧ kə pa-e, Mə yi tə kəbɔthər ɔfatanɛ ka mu mɔ mȧ mə bɔthərnɛ-e, nə yɔ finɔ,

⁹ kɛrɛ bepi nə bot agbȧy ka afəm-e, nə yɔ ahakɛ, ɔwa ȧŋthɔ aŋ tə ŋap nu kəyi nə sim ȧŋsiraŋ.

¹⁰ Tiyȧŋ bepi wuni ɔ wop ȧŋthɔ bɛ, kɛrɛ ɔ pɔnthnɛ ŋin-e, ɔ po ba mətheri ka ȧŋthɔ alolok,

¹¹ kotȧy-e kɔn ɔwe pa, Te yɔ kərəp, ɔ pa sɔ, Te dif. Ɔwa bepi munɔ mə yɔ hɛ kərəp-e, kɛrɛ mə dif-e, mə po səkɛ usim ȧŋthɔ.

¹² Fɔf nu, ɔwa yɔ nu mɔ ŋaŋ aŋa mə a ba kəthoŋkas kətȧŋȧnɛ ka ȧŋthɔ ŋa rȧwankom.

¹³ kotȧy-e ɔwe mə te tɔri ȧney ɔ tə sɔthɔ mətheri ama te ba ȧney; kɛrɛ ȧney aŋ tə tham kəthoŋkas.

¹⁴ Ko kə naŋfas-e, aŋwɔnt a mi, bepi wuni ɔ pa ɔ ba kəlanɛ, kɛrɛ mȧyɔs mɔŋ mə tɔri hɛ ki-e? Kȧlanɛ kati kə tə gbəli kisis kɔ-i?

¹⁵ Bepi ɔwɔnt uruni thalɔm ɔwɔnt ubɛra ɔwe lanɛ ɔ təmȧ kətiŋ-e, ɔwa ɔ ba hɛ da rədi,

¹⁶ ɔwa bepi ukin ka nu ɔ kanɛ ŋa, Kɔnɛ yi məbɔnɛ kȧmȧ a lonsir nu, kȧmȧ a namsir nu, rodarəŋ kati ɔ sɔŋ hɛ ŋa koko ara aŋ paŋ-e, ko kə naŋfas-e?

¹⁷ Ya pə yi sɔ-e, kəlanɛ, bepi kə tɔri hɛ məyɔs, kə yi kəfi.

¹⁸ Yao, wuni lɔm ɔ tə pa, Munɔ mə ba kəlanɛ, ɔwa minɛ i ba məyɔs; tɔri mi kȧlanɛ ka mu ȧke te ba məyɔs, ɔwa minɛ i ti tɔri nu kȧlanɛ kȧmi kətaŋ ka mȧyɔs ma mi.

¹⁹ Munɔ mə lanɛ kəpa Kuru ukin kɔnɔ yi; mə yɔ finɔ, aŋkərəfi sɔ aŋ lanɛ ti, ɔwa aŋ yɛrnɛ.

²⁰ Kɛrɛ ɔwuni yay, mə yi tə kətara kəpa kəlanɛ ȧke te ba məyɔs kə yi kəfi.

²¹ A sɔŋ hɛ Ebraham, ɔkas kȧsu, məmari salata mȧyɔs mɔŋ, ma ɔ sɔŋ Aysak ɔwan kɔŋ ka ȧŋbɛsɛ-i?

²² Mə nənk hɛ to kȧlanɛ kɔŋ yi mȧyɔs mɔŋ mə pantnɛ rɔkin, ɔwa kətȧŋȧnɛ ka mȧyɔs mɔŋ-e, kȧlanɛ kɔŋ kə po gbenthis-e?

²³ Ka mȧgbal məsəm mə lasər ama pa, Ka Ebraham ɔ lanɛ Kuru-e, ɔwa a lɔma kɔ ti məlompi. Ka a bont kɔ, Ɔyathki ka Kuru.

²⁴ Nə nənk thɔŋ kəpa a tə sɔŋ wuni məmari kətȧŋȧnɛ ka məyɔs, pə yi hɛ gbo kətȧŋȧnɛ ka kȧlanɛ son.

²⁵ Yi tha pə yi sɔ-e, Rehab ɔbɛra urəpi ɔ sɔthɔ hɛ məmari kətȧŋȧnɛ ka mȧyɔs mɔŋ ma ɔ malanɛ aŋtombəla-i, kɔ somra ŋa rə roŋ dəlɔm-i?

²⁶ kotȧy-e mɔ mə ȧŋdɛr aŋ fi bepi aŋ ba hɛ ŋesəm-e, ya pə yi sɔ kəlanɛ kə fi bepi kə ba hɛ məyɔs.