Yeməs 1 - Ȧŋlemrȧnɛ Ȧfu

¹ Yeməs ȧbɔy ŋa Kuru yi ka ɔMarki Yisɔs Krayst ka ɛbɔnsɔŋ tɔfɔt yɛrəŋ aŋa po sakanɛ ka ȧdȧru bɛ; i kori nu sɛŋk.

² Aŋwɔnt a mi, ba ti nu məbɔnɛ bepi ɛmɛm ɛgbanthɛ tətəp ɛ bəp nu,

³ ma nə tȧrȧ kəpa kamɛmər ka kȧlanɛ ka nu kə tə sɔŋ nu kəmuyu.

⁴ Kɛrɛ yɔ nu kȧmȧ kȧmuyu kə yɔ mapanth məpons mati kȧmȧ naŋ sɔ nə yi agbenthis, alolok, dɛ yi kȧmȧ nə te paŋ rəka o rəka.

⁵ Kɛrɛ bepi ukin ka nu ɔ ba hɛ kətemp ka rəbaki-e, ta ɔ tholir Kuru ɔwe yi ufonsiri, ɔwe mə yer rə məthɛkɛ tha, ɔwa a tə sɔŋ kɔ ki.

⁶ Kɛrɛ ta ɔ yif rə kəlanɛ ȧke te ba asikɛ. Kotȧy-e ɔwe ba asikɛ ɔ yi mɔ amuŋkəl ŋa ro baŋ aŋa aŋfef maŋ gbasi, aŋ lȧfthi lȧfthi.

⁷ Ta ɔwuni wunɔŋ ɔ te bot ȧmerȧ kəpa ye ɔ tə sɔthɔ koko kəwur ka ɔMarki.

⁸ Ɔwuni ɔwe ba ȧmerȧ afəlɛ fəlɛ ɔ pəkpək ka mȧyɔs mɔŋ bɛ.

⁹ Ta pə bɔnɛ ɔwɔnt umɔnɛ bepi a ŋata kɔ,

¹⁰ kɛrɛ ɔyola, bepi a thora kɔ; pəkasifɛ ɔ tə thas mɔ malɛŋi ma akereŋ.

¹¹ Ȧtesoma-e ȧney nə bansȧ gbo-e, nə welas ȧkereŋ, yi malɛŋi mati mə tə fumpɔ, yi ɔbɔthi kəli wati ɔ tə dinɛ. Yaŋ hɔ sɔ ɔwuni yola mɔ thas ka asoŋ tɔŋ bɛ.

¹² Wuni ka aruba wɔŋ ɔwe mə muyu ɛgbɔnsanɛ, kotȧy-e bepi a po gbɔns kɔ-e, ɔ tə sɔthɔ ȧniyɔ ŋa aŋesəm, aŋa ɔMarki ɔ po lahiri ŋaŋ aŋa bɔthər kɔ.

¹³ Ta wuni o wuni ɔ te pa bepi a gbɔns kɔ-e, A gbɔns mi kəwur ka Kuru; kotȧy-e a gbəli hɛ gbɔns Kuru ka mȧləs, ɔwa kɔn kɔnɔnɛ ɔ gbɔns hɛ wuni o wuni;

¹⁴ kɛrɛ a gbɔns wuni o wuni ma mafela mɔŋ gbeŋ mə liŋanɛ kɔ, ɔwa mə sapəranɛ kɔ.

¹⁵ Ɔwa mȧfela-e, ma mə kora-e, mə tə kom ahakɛ; ɔwa ahakɛ-e, ma mə aŋ bȧk-e, aŋ tə kom rəfi.

¹⁶ Ta a te pəŋis nu, abɔthər.

¹⁷ Aboya o boya afinɔ, yi aboya o boya agbenthis aŋ wur rokɔm, aŋ thor kəwur ka ɔKas ka ȧŋmothȧ, ɔwe te ba məfəlɛ fəlɛ, thalɔm amumpəl ŋa kəsiŋkar.

¹⁸ Ka mȧselɔ mɔŋ gbeŋ ɔ kom su ka ȧrim ra tȧteŋ, kȧmȧ sə yi mȧkomi mətɔtɔkɔ ma mabɛmpa mɔŋ.

¹⁹ Tiyȧŋ awɔnt abɔthər, ta wuni o wuni ɔ yi tɛmp tɛmp tə kətəl, ta ɔ te yeŋk fɔf, ta ɔ te yeŋk bansȧ.

²⁰ kotȧy-e rabaŋ da wuni kəpet rə yɔ hɛ mȧlompi ma Kuru Məsaba.

²¹ Tiyȧŋ gbapɛ nu mȧnɔkɔ yi məthasərnɛ ma mələs bɛ, ɔwa rə ȧmerȧ athoranɛ malanɛ nu ȧrim ara a tɛpər nu-e, ara gbəli kisis rafəm ra nu.

²² Kɛrɛ yi nu ayɔ ȧrim, pə yi hɛ atəl gbo son aŋa pəŋisnɛ.

²³ kotȧy-e bepi wuni ɔ təl gbo, kɛrɛ ɔ yɔ hɛ, ɔ yi mɔ wuni ɔwe mə kəli ader rɔŋ ka amɛmnɛ.

²⁴ kotȧy-e ɔ nənɛ gbo-e, kɔ kȧlanɛ, ɔwa ka ɔlɛmp wati ɔ pənɛ to mȧbȧlȧnɛ mɔŋ mə yi.

²⁵ Kɛrɛ kɔn ɔwe mə kəli ka ȧŋthɔ ŋa rȧwankom rəgbenthis-e, ɔwa ɔ bȧkər ri-e, ɔwe-e, ma ɔ te yi utəl ɔwe mə pənɛ, kɛrɛ ɔ yi uyɔ ȧrim, ɔkati ɔ tə sɔthɔ aruba ka kayɔ kɔŋ.

²⁶ Bepi wuni o wuni kətɔŋ ka nu ɔ nanɛ kəpa ɔ yi ka aroŋ da Kuru, kɛrɛ ɔ wop hɛ ramer rɔŋ-e ɔ tɔns ȧŋmerȧ ŋɔŋ, ɔwa kakɔth kɔŋ ka aroŋ da Kuru kə yi kətiŋ.

²⁷ Kakɔth ka aroŋ da Kuru kətəteŋ ȧke te ba apora ro der kəri ka ɔKuru dɛ yi ɔKas kȧsu ki ake, tə kənanɛ ante ba kas yi ȧŋbora ka ȧŋsɔmpanɛ a ŋaŋ, yi tə kəbɛnɛ ȧŋmerȧ ŋɔŋ kəte ba apora ka ȧdȧru.