Taytɔs 3 - Ȧŋlemrȧnɛ Ȧfu

¹ Yɔ kȧmȧ aŋfəm aŋ sanɛ ka aŋbȧy dɛ yi aŋgbəka rokɔm ka ŋaŋ, dɛ yi kȧmȧ aŋ yi abɛnɛnɛ ta məpanth o məpanth məfinɔ.

² Ta aŋ te fofiya wuni o wuni, ta aŋ te gbal, ta aŋ yi athɔfəl, dɛ yi ta aŋ yi athoranɛ ka wuni o wuni,

³ kotȧy-e alɔkɔ alɔm saŋ sɔ sə sa yi apənk, ȧthȧnthonɛ, atɔns, atar ŋa məfela o məfela mələs-e; sə sa yirȧ gbo ka mȧbaŋ dɛ yi kȧtut. Sə gbɛŋa afəm, ɔwa sə kȧl gbɛŋanɛ.

⁴ Kɛrɛ ma mafinɔ ma Kuru ɔKisis kȧsu dɛ yi mabɔthər mɔŋ ta afəm a kəpet mə tɔrinɛ-e,

⁵ ɔ kisis su, pə yi hɛ salata mȧyɔs məlompi ama sə poŋ yɔ, kɛrɛ ɔ kisis su asabu ŋa ȧŋney ŋɔŋ, ka kafethər ȧke kȧl kom ɔfu, dɛ yi ka kafusəs ka ɔYina məsəm,

⁶ ɔwe ɔ lond do rɔsu ɔgbȧthi kətȧŋȧnɛ ka Yisɔs Krayst ɔKisis kȧsu;

⁷ kȧmȧ ma sə po sɔthɔ məmari ka ȧŋboŋa ŋɔŋ-e, sə tə səkɛ aŋa mə ba akɛŋ kətȧŋȧnɛ ka kȧgbȧk ȧmerȧ ka aŋesəm thəbana.

⁸ Ȧrim are rə yi tȧteŋ, ɔwa i yema kȧmȧ mə thiŋkər mȧtȧy ame katkat kȧmȧ ŋaŋ aŋa po lanɛ Kuru-e aŋ gbəli yi afəm asɔbɛ tə kəyɔ məyɔs məfinɔ. Mȧtȧy ame mə yi məfinɔ, ɔwa mə mar sɔ afəm bɛ.

⁹ Kɛrɛ gbȧpɛ ɛbȧrki ɛpəŋk yi təpa təkur, yi ɛgbal, yi ɛthonka thonka salata ȧŋthɔ, pəkasifɛ ɛ mar hɛ, ɛ yi gbo fu fa fu.

¹⁰ Maŋ ɔwuni thayoŋ mȧrəŋ gbo; kədarəŋ kati, pɛnsa kɔ.

¹¹ Pəkasifɛ mə tȧrȧ kəpa wuni wunɔŋ ɔ po yɛthȧ kəwur ka tȧteŋ, ɔwa ɔ yɔ ahakɛ, kɔ sɔnɛ mətheri.

¹² Ma i somra Artimɔs thalɔm Tikikɔs ro rɔmu-e, mɛm tə kəder ro rɔmi ro Nikapɔlis, kotȧy-e i po botəs tə kəyira ri ka ȧŋlɔkɔ ŋa ɔtaŋk.

¹³ Bȧsər tə kəmar Sinas ɔlɔya, dɛ yi Apɔlɔs ka ȧŋbiyas ŋaŋ kȧmȧ aŋ te paŋ koko.

¹⁴ Ɔwa yɔ kȧmȧ aŋfəm a su aŋ thəkəs tə kəyɔ məpanth məfinɔ ta ɛgbɛthɛŋ yaŋ kȧmȧ aŋ te yi akoŋfereŋ.

¹⁵ Ŋa bɛ aŋa yi yi minɛŋ aŋ kori mu. Kori ŋaŋ aŋa bɔthər su ka kȧlanɛ. Ta aboŋa aŋ yi do rɔnu bɛ. Amina.