Taytɔs 2 - Ȧŋlemrȧnɛ Ȧfu

¹ Kɛrɛ munɔ mə yi tə kətaməs mȧtȧy ama mar kathəksa ka tȧteŋ.

² Yɔ kȧmȧ mȧthem aŋ yi agbɛt, atempi, akəthɛgbɛ rə ȧmerȧ, abȧki mədɛr ka kȧlanɛ yi ka mȧbɔthər dɛ yi ka kȧmuyu.

³ Ya pəyi sɔ yi ŋaŋȧŋ, kȧmȧ mȧyɔs maŋ mə yi mɔ afəm asəm, kȧmȧ aŋ te yi afəm anafiki-e, ɔwa aŋ yi hɛ tə kəmun məber məgbathi, kɛrɛ ta aŋ thəksa mȧtȧy məfinɔ,

⁴ kȧmȧ aŋ gbəli sɔ thəksȧ ȧŋbɔrkɔ tə kəyi agbɛt, tə kəbɔthər aŋwos dɛ yi aŋwuth ŋaŋ;

⁵ tə kəyi afəm asobinɛ, athɔth rə ȧmerȧ, tə kəbɛnɛ ɛseth yaŋ nəknək, athɔfəl, dɛ yi tə kəsanɛ ka aŋwos ŋaŋ kȧmȧ a te gbəli fɔf kəŋamnɛ ȧrim ra Kuru.

⁶ Maŋ sɔ aŋlaŋgba kȧmȧ aŋ yi afəm akəthɛgbɛ.

⁷ Rə tȧy o tȧy tɔri amɔl ŋa məyɔs məfinɔ; thəksa rə ȧmerȧ ȧferȧ yi rim rəsɔbɛ, dɛ yi tȧteŋ,

⁸ dɛ yi sim təbeki lanɛ ȧtȧ wuni o wuni ɔ gbəli hɛ thɛkɛ; kȧmȧ kɔn ɔwe təmȧ kəŋamnɛ-e, ɔ tə lap mɔ mɔ te ba tȧy tələs tə kəfofiya mu.

⁹ Maŋ atar kȧmȧ aŋ wop ȧrim ra aŋa ba ŋa, tə kəthesanɛ ŋa finɔ rə tȧy o tȧy; ɔwa aŋ yi hɛ tə kəpɛnsanɛ,

¹⁰ thalɔm keya, kɛrɛ ta aŋ yi abɔthi lanɛ rə ȧmerȧ ȧferȧ, kȧmȧ rə tȧy o tȧy aŋ gbəli sɔŋ aseri afinɔ ta mathəksa ma Kuru ɔKisis kȧsu.

¹¹ kotȧy-e ȧŋboŋa ŋa Kuru aŋ ŋaibinɛ salata kakisi ka afəm bɛ,

¹² aŋa rusəm su tə kəpɛnsa tȧy o tȧy ȧtȧ ŋamnɛ Kuru-e, dɛ yi mafela ma ȧdȧru, kȧmȧ sə yi atempi, alompi dɛ yi asəm ka ȧdȧru are;

¹³ ma sə kar ta kagbak ȧmerȧ ka aruba, pə yi mɔ-e katɔrinɛ ka aŋyiki ŋa ɔKuru ubana yi ɔKisis kȧsu Yisɔs Kraystȧŋ;

¹⁴ Ɔwe sɔndnɛ ta ȧtȧ su kȧmȧ ɔ gbəli bani su kəwur ka mȧkənȧ bɛ-e, dɛ yi tə kəfethər aŋfəm ŋɔŋ gbeŋ aŋa yi ayasyas tə kəyɔ məyɔs məfinɔ.

¹⁵ Tɔri mȧtȧy ame-e, ɔwa maŋ dɛ yi ŋal rə afɔsɔ bɛ. Te selɔ wuni o wuni ɔ farki mu.