Mathiu 7 - Ȧŋlemrȧnɛ Ȧfu

¹ Te nu thonkas wuni, kȧmȧ a te thonkas nu.

² kotȧy-e kathoŋkas ȧke mǝ nǝ thoŋkas-e kǝ mǝ a thonkas nu; ɔwa aŋthuntha aŋa mǝ nǝ thunth-e, ŋǝ mǝ a kȧl thuntha nu.

³ Ko tȧy tȧŋ mǝ nənk ȧŋpol aŋa yi ka rafɔr ra ɔwɔnt mu kɛrɛ mǝ te nənk kagboŋ ȧke yi ka rafɔr ra mu gbeŋ-e?

⁴ Thalɔm to mǝ gbǝli pa ka ɔwɔnt mu, Yɔ kȧmȧ i wurɔ ȧŋpol ka rafɔr ra mu, ma mǝ ba kagboŋ ka rafɔr ra mu-e?

⁵ Mun wuni yɔr, mɔtha wurɔ kagboŋ ka rafɔr ra mu, ɔwa kǝdarǝŋ kati mǝ tǝ gbǝli nənk gbǝraŋ tǝ kǝwura ȧŋpol ka rafɔr ra ɔwɔnt mu.

⁶ Te nu sɔŋ rǝka rǝsǝm ka ɛtǝn, ɔwa te fitha mȧthǝni ma nu ka tǝsɔp, ta thani aŋ nas ma ka ȧtȧtək taŋ, ɔwa aŋ fǝlɛ aŋ gbarigbari nu.

⁷ Yif nu, a tǝ sɔŋ nu. Thɛns nu, ɔwa nǝ tǝ fir. Gbȧtgbȧt nu ka kȧdare, a tǝ kanthɛ nu;

⁸ kotȧy-e wuni o wuni ɔwe mǝ yif-e, ɔ tǝ sɔthɔ, ɔwe mǝ thɛns-e, ɔ tǝ fir, ɔwa ɔwe mǝ gbatgbat-e, a tǝ kanthɛ kɔ.

⁹ Wuni reke kǝtɔŋ ka nu-e, bepi ɔwan kɔŋ ɔ tholir kɔ kǝbo-e, mǝ ɔ sɔŋ kɔ asar-e?

¹⁰ Thalɔm bepi ɔ tholir kɔ kǝlop-e, mǝ ɔ sɔŋ kɔ abok-e?

¹¹ Bepi naŋ ma nǝ yi alǝs-e, nǝ tȧrȧ kǝsɔŋ ɛboya ɛfinɔ ka aŋwuth a nu-e, pǝ tha gbethi ɔKas ka nu ɔwe yi ro riyana mǝ ɔ sɔŋ hɛ ɛyɛt ɛfinɔ ka ŋaŋ aŋa mǝ tholir kɔ-i?

¹² Tiyȧŋ tȧy o tȧy ȧte nǝ yema kȧmȧ afǝm aŋ yɔ nu-e, ya nǝ yi tǝ kǝyɔ sɔ ro ŋaŋ; kotȧy-e ȧte tǝ yi aŋthɔ yi ɛmaŋ ya aŋnabi.

¹³ Wɔŋ nu ka kadare kǝthiŋkanɛ, kotȧy-e kadare kǝ yi kǝbana ɔwa aroŋ rǝ yi rǝbana ara lomanɛ ka kadinɛ, ɔwa ŋa agbȧthi aŋa wɔŋ ri.

¹⁴ Pǝkasifɛ kadare kǝ thiŋkanɛ ɔwa aroŋ rǝ lɔl ara lomanɛ ka aŋesǝm, ɔwa ŋa athȧn aŋa fir ri.

¹⁵ Botnɛ nu rǝ ȧmerȧ ta aŋnabi ayem aŋa mǝ der ro nu rǝ ɛlopra ya tǝlɔmɛ, kɛrɛ rokor aŋ yi tǝthɔlu alukǝs.

¹⁶ Nǝ tǝ tȧrȧ ŋa ka mȧkomi maŋ. Afǝm aŋ gbǝli pim mǝtiti rǝ tǝbȧnk-i, thalɔm mǝgbɔnɔ rǝ tǝsenduku-i?

¹⁷ Ya pǝ yi sɔ-e, ŋǝnt o ŋǝnt afinɔ aŋ kom mǝkomi mǝfinɔ, kɛrɛ ŋǝnt alǝs aŋ kom mǝkomi mǝlǝs.

¹⁸ Ŋǝnt afinɔ aŋ gbǝli hɛ kom mǝkomi mǝlǝs, ya pǝ yi sɔ, ŋǝnt alǝs aŋ gbǝli hɛ kom mǝkomi mǝfinɔ.

¹⁹ Ŋǝnt o ŋǝnt aŋa te kom mǝkomi mǝfinɔ-e, a tǝ tap ŋi, ɔwa a tǝ fitha ŋi ro nȧnt.

²⁰ Tiyȧŋ nǝ tǝ tȧrȧ ŋa ka mȧkomi maŋ.

²¹ Pǝ yi hɛ wuni o wuni ɔwe mǝ pa ro mi, Pa, Pa, kɔnɔ mǝ wɔŋ ka rȧbȧy ra ro riyana, kɛrɛ ŋaŋ gbo son aŋa mǝ yɔ mȧselɔ ma ɔKas kȧmi ɔwe yi ro riyana.

²² Agbȧthi aŋ tǝ pa ro rɔmi ka ȧŋrey ŋati, Pa, Pa, saŋ-e, sǝ la hɛ nȧbi ka ȧŋes a mu-i? Sǝ la hɛ wurɔ akǝrǝfi-i, sǝ la hɛ yɔ mǝyɔs mǝkabanɛ mǝgbathi ka ȧŋes a mu-i?

²³ Ka ȧŋlɔkɔ ŋati i ti kanɛ ŋa gbafǝth kǝpa, Thȧnkȧŋ i tɛ hɛ nu. Wur nu ro rɔmi, naŋ aŋa yɔ mǝyɔs mǝlǝs.

²⁴ Tiyȧŋ wuni o wuni ɔwe tǝl ȧsim ta mi-e, ɔwa ɔ wop ti-e, ɔ bȧlȧnɛ mɔ wuni tempi ɔwe tǝmǝr ȧŋseth ŋɔŋ ka aŋgbalaŋ rokɔm.

²⁵ Ka akɔm kǝ thuf, ɔwa ȧmȧnt mǝfɔl mǝ der, ka aŋfef aŋ sɔŋ aŋ sapǝth ȧŋseth ŋati; kɛrɛ aŋ fumpɔ hɛ, ȧtesoma-e a tǝmǝr ŋi ka aŋgbalaŋ rokɔm.

²⁶ Kɛrɛ wuni o wuni ɔwe mǝ tǝl ȧsim ta mi ȧte, ɔwa ɔ wop hɛ ti-e, ɔ bȧlȧnɛ mɔ wuni pǝŋk ɔwe tǝmǝr ȧŋseth ŋɔŋ ka kȧsǝnt.

²⁷ Ka akɔm kǝ thuf, ɔwa ȧmȧnt mǝfɔl mǝ der, ka aŋfef aŋ sɔŋ, aŋ sȧpǝth ȧŋseth ŋati. Kaŋ fumpɔ, ɔwa kȧfumpɔ kati kǝ yi kǝbana.

²⁸ Ka pǝ re yi ma Yisɔs ɔ gbanthi ȧsim ȧte, aŋfǝm aŋ kabanɛ ta kathǝksa kɔŋ,

²⁹ kotȧy-e ɔ thǝksa ŋa mɔ wuni ɔwe ba afɔsɔ, pǝ yi hɛ mɔ aŋkarmɔkɔ aŋ yɔ.