Mathiu 6 - Ȧŋlemrȧnɛ Ȧfu

¹ Botnɛ nu kȧmȧ nǝ te yɔ mȧlompi ma nu rodi ka aŋfǝm kȧmȧ aŋ nənk nu. Bepi pǝ yi yaŋ-e, nǝ sɔthɔ hɛ ȧrȧm kǝwur ka ɔKas ka nu ɔwe yi ro riyana.

² Tiyȧŋ ma mǝ nǝ sɔŋ ɛboya-e, te nu fɛŋ kǝthɛma rodi ka nu mɔ mǝ ȧŋmunafȧki mǝ aŋ yɔ ka ɛseth ɛgbanɛ yi ka asoŋ-e, kȧmȧ aŋ sɔthɔ ayiki ka aŋfǝm. Tǝ tɛntɛnɛ i kanɛ nu, aŋ po sɔthɔ ȧŋrȧm ŋaŋ.

³ Kɛrɛ ma mǝ mǝ sɔŋ ɛboya-e, te selɔ kȧta ka mu kǝmɛrɔ kǝ tȧrȧ ȧte kȧta ka mu kǝdiyɔ kǝ yɔ;

⁴ kȧmȧ ɛboya ɛ nu ɛ yi rǝ agbundu, ɔwa ɔKas ka nu ɔwe nənk rǝ agbundu ɔ tǝ ram nu gbafǝth.

⁵ Ɔwa ma nǝ ramnɛ-e, te nu yi mɔ ȧŋmunafȧki, kotȧy-e aŋ bɔther kǝtǝma ka ɛseth ɛgbanɛ yi ka asoŋ tǝsakanɛ kȧmȧ aŋfǝm aŋ nənk ŋa. Tɛntɛnɛ i kanɛ nu, aŋ po sɔthɔ ȧŋrȧm ŋaŋ.

⁶ Kɛrɛ munɔŋ, bepi mǝ ramnɛ-e, wɔŋ ka ȧŋkonko a mu, ɔwa ma mǝ po kantha kadare ka mu-e, ramnɛ ka ɔKas ka mu ɔwe yi rǝ ɔmaŋknɛ, ɔwa ɔKas ka mu ɔwe nənk rǝ ɔmaŋknɛ ɔ tǝ ram mu gbafǝth.

⁷ Kɛrɛ ma nǝ ramnɛ-e, te nu fɔf sim tǝgbathi tǝyai, mɔ mǝ tȧbona tǝlɔm mǝ tǝ yɔ; kotȧy-e aŋ nanɛ kǝpa a tǝ tǝla ŋa ta tafɔf taŋ tǝgbathi.

⁸ Tiyȧŋ te nu yi mɔ ŋaŋ, ȧtesoma-e ɔKas ka nu ɔ tȧrȧ ɛyɛt ɛyɛ nǝ yema yeŋka nǝ yif kɔ.

⁹ Tiyȧŋ ramnɛ nu yaŋ; ƆKas kȧsu ɔwe yi ro riyana, kanka ȧŋes a mu aŋ yi ȧsǝm.

¹⁰ Kaŋkɔ rȧbȧy ra mu rǝ bek. Kaŋkɔ mȧselɔ ma mu mǝ yɔnɛ nɔru mɔ mǝ mǝ yɔnɛ ro riyana.

¹¹ Yer su thonɔŋ ɛyɛt ɛdi ɛbeki su.

¹² Tera su mȧtȧy ma su mǝlǝs, mɔ saŋ mǝ sǝ tera ŋaŋ aŋa yɔ su ɔlǝs.

¹³ Te su wɔŋȧ rǝ tȧy tǝgbɔns kɛrɛ wurɔ su ka mətȧy mǝlǝs; ȧtesoma-e munɔ ba rȧbȧy yi aŋfɔsɔ yi aŋyiki thȧnkȧŋ thǝbana, Amina.

¹⁴ kotȧy-e, bepi nǝ tera afǝm mȧtȧy maŋ mǝlǝs-e, ɔKas ka nu ro riyana ɔ tǝ tera nu sɔ,

¹⁵ kɛrɛ bepi nǝ tera hɛ afǝm mȧtȧy maŋ mǝlǝs-e, ɔKas ka nu ɔ ba hɛ kǝtera nu mȧtȧy ma nu mǝlǝs.

¹⁶ Ɔwa ma pǝ thas ri-e, bepi nǝ wop asum-e, te nu suma mɔ aŋyɔr; kotȧy-e aŋ lǝsǝr aser taŋ kȧmȧ aŋfǝm aŋ nənk kǝpa aŋ wop asum. Tǝ tɛntɛnɛ i kanɛ nu kǝpa aŋ po sɔthɔ ȧŋrȧm ŋaŋ.

¹⁷ Kɛrɛ munɔŋ, bepi mǝ wop asum, sop rȧbomp ra mu yi mȧro, ɔwa yak ȧder a mu,

¹⁸ kȧmȧ afǝm aŋ te nənk kǝpa mǝ wop asum-e, kɛrɛ ɔKas ka mu ɔwe yi rǝ ɔmaŋknɛ. Ɔwa ɔKas ka mu ɔwe nənk rǝ agbundu ɔ tǝ ram mu.

¹⁹ Te nu thoŋklanɛ tɛŋ ka ȧdȧru ro amɔrka yi magbak mȧ mǝ sɔm ti, dɛ yi akey mǝ aŋ bɛs tǝ kǝkeya.

²⁰ Thoŋklanɛ nu gbo tɛŋ ro riyana, ro amɔrka yi mǝgbak mǝ gbǝli hɛ sɔm ti, ɔwa ro akey aŋ te bɛs, aŋ keya.

²¹ Ȧtesoma-e ro atɛŋ ta nu tǝ yi-e, rǝ ɛmerȧ ɛ nu ɛ tǝ yi sɔ.

²² ȧŋmothȧ ŋa aŋdɛr aŋ yi rafɔr. Tiyȧŋ bepi rafɔr ra mu rǝ yi rǝtempi-e, rǝ tǝ mothǝr aŋdɛr a mu bɛ.

²³ Kɛrɛ bepi rafɔr ra mu rǝ yi rǝlǝs-e, aŋdɛr a mu bɛ aŋ tǝ la asum. Tiyȧŋ bepi ȧŋmothȧ aŋa yi mu aŋ yi asum-e, ȧŋsum ŋati a bana!

²⁴ Wuni o wuni ɔ gbǝli hɛ bȧtho amarki ŋarǝŋ, kotȧy-e ɔ tǝ gbɛŋa ɔkin ɔwa ɔ tǝ bɔthǝr ɔlɔm; thalɔm ɔ tǝ gbapsa ɔkin, ɔwa ɔ tǝ sai ɔlɔm. Nǝ gbǝli hɛ bȧtho Kuru dɛ yi mǝbɔŋɔ.

²⁵ Tiyȧŋ i kanɛ nu, te nu ba asoli ta ɛŋesǝm ɛ nu, ta ara mǝ nǝ di-e, thalɔm ta ara mǝ nǝ mun-e, ta a pa ras ta aŋdɛr a nu ta ara mǝ nǝ wɔŋ. Aŋesǝm aŋ thas hɛ yɛt ɛdi-i, ɔwa aŋdɛr aŋ thas hɛ ɛloprȧ-i?

²⁶ Kǝli ɛbȧmp rokɔm-a, aŋ sak hɛ, aŋ rɔk hɛ, aŋ thonkla hɛ rǝ tǝfunk: kɛrɛ ɔKas ka nu ro riyana ɔ wɔnthǝr ŋa. Naŋ-e, nǝ thas hɛ ŋa mȧrǝŋ mȧrǝŋ-i?

²⁷ Wuni reke kǝtɔŋ kȧnu mǝ gbǝli bȧr alonk ŋin ka kasaŋa kɔŋ, hali ɔ ba ti afela-e?

²⁸ Ɔwa kɔyɛŋ nǝ ba asoli ta yɛt ɛloprȧ-e? Tȧmtȧmnɛ tȧyaba ta ro lal ma mǝ tǝ lɔkɔ; tǝ yɔ hɛ mǝpanth, tǝ sǝrǝm hɛ,

²⁹ kɛrɛ i kanɛ nu-e, hali Sɔlɔmɔn ka aŋyiki ŋɔŋ bɛ ɔ lopra hɛ mɔ malɛŋi mati ame.

³⁰ Ɔwa bepi Kuruȧŋ ɔ lonsǝr akereŋ ka ro lal yaŋ-e, ȧke yi thonɔŋ, ɔwa ninaŋ a fitha ki rǝ nȧnt nǝbana; thamsinɛ naŋ-e, nia afǝm ŋa kǝlanɛ kǝthan.

³¹ Tiyȧŋ te nu soli kǝpa, Ko mǝ sǝ di-e, thalɔm ko mǝ sǝ mun-e, ta a pa ras ko mǝ sǝ wɔŋ-e?

³² kotȧy-e ɛyɛt ɛye bɛ-e, yɛ tȧbona tǝlɔm mǝ tǝ thɛns, kɛrɛ ɔKas ka nu ro riyana ɔ tȧrȧ kǝpa nǝ yema ɛyɛt ɛye bɛ.

³³ Kɛrɛ mɔtha nu thɛns rȧbȧy ra Kuru, dɛ yi mȧlompi mɔŋ, ɔwa ɔ tǝ bȧrȧ nu ɛyɛt ɛye bɛ.

³⁴ Tiyȧŋ te nu ba asoli ta ninaŋ, ȧtesoma-e rasɔk ra ninaŋ rǝ tǝ ba aŋsoli ŋati. Mȧlǝs ma ȧŋrey mǝ beki ta ȧŋrey ŋati.