Mathiu 5 - Ȧŋlemrȧnɛ Ȧfu

¹ Ma Yisɔsȧŋ ɔ nənk ȧsuniya-e, ɔ gbep ka kǝteŋ rokɔm. Ma ɔ po yira-e, aŋkarande ŋɔŋ aŋ fatǝr kɔ.

² kɔ tǝp kǝthǝksa ŋa, ɔ pa,

³ Aruba ŋaŋ aŋa yi amɔnɛ rǝ ȧmerȧ, kotȧy-e ŋa ba rȧbȧy ra ro riyana.

⁴ Aruba ŋaŋ aŋa saŋ amɔl, kotȧy-e a ba kǝthɔnthɔ ŋa.

⁵ Aruba ŋaŋ aŋa ba ɛmerȧ ɛthoranɛ, kotȧy-e aŋ tǝ ba ȧŋthɔf mɔ kɛŋ.

⁶ Aruba ŋaŋ aŋa ba afela ta mȧlompi mɔ dor, kotȧy-e aŋ ba kǝnȧmrȧ.

⁷ Aruba ŋaŋ aŋa ba ȧney, kotȧy-e a tǝ ba ŋa ȧney.

⁸ Aruba ŋaŋ aŋa ba ɛmerȧ ɛfera, kotȧy-e aŋ ba kǝnǝŋk Kuru.

⁹ Aruba ŋaŋ aŋa yi awom, kotȧy-e a tǝ bont ŋa aŋwuth ŋa Kuru.

¹⁰ Aruba ŋaŋ aŋa a po sɔmpa salata mȧlompi, kotȧy-e ŋa ba rȧbȧy ra ro riyana.

¹¹ Nǝ ba aruba bepi a sambos nu, ɔwa a sɔmpa nu, thalɔm a fɔf nu ɔlǝs rǝ rǝyem salata mi.

¹² Sel nu mǝbɔnɛ, ta pǝ bɔnɛ nu ɔthasǝr, kotȧy-e ȧŋram a nu aŋ yi ȧbana ro riyana; ȧtesoma-e ya a sɔmpa aŋnabi aŋa yi thǝpaŋ.

¹³ Naŋ nǝ yi amɛr ma ȧdȧru, kɛrɛ bepi amɛr mǝ dim mabɔthi mati-e, ko rǝka rǝ mǝ bɔthǝs ma sɔ-e? Mǝ thesa hɛ sɔ ta rǝka o rǝka thambe a fitha ma, ɔwa afǝm aŋ nas ma.

¹⁴ Naŋ nǝ yi ȧŋmothȧ ŋa ȧdȧru. Kȧpet ȧke yi ka kǝteŋ rokɔm-e kǝ gbǝli hɛ maŋknɛ.

¹⁵ Ɔwa afǝm aŋ moth hɛ kǝmulɛ tǝ kǝbot ki rǝ ȧthunthȧ roratha-e, thambe aŋ bot ki rǝ ɔtǝmǝr, kȧmȧ kǝ mothǝr ŋa bɛ ro seth.

¹⁶ Yɔ nu kȧmȧ ȧŋmothȧ a nu aŋ gbɛntha rodi ka aŋfǝm, kȧmȧ aŋ nənk mȧyɔs ma nu mǝfinɔ, ɔwa aŋ yikis ɔKas ka nu ɔwe yi ro riyana.

¹⁷ Te nu nanɛ kǝpa i der tǝ kǝlǝsǝr aŋthɔ, thalɔm tapa ta aŋnabi. I de hɛ tǝ kǝlǝsǝr, kɛrɛ tǝ kǝlasǝr.

¹⁸ Tɛntɛnɛ i pa ro rɔnu, Haŋ ȧkȧriyana yi ȧdȧru ɛ thas-e, hali tȧy tǝlɔl thalɔm agbal ŋin ŋa aŋthɔ aŋ gbǝli hɛ dinɛ haŋ a po lasǝr ŋi bɛ.

¹⁹ Tiyȧŋ wuni o wuni ɔwe mǝ sim ȧgbȧp alɔl ŋin ŋa ɛthɔ ɛye, ama ɔ thǝksa afǝm yaŋ-e, a tǝ bont kɔ ulɔl ka rȧbȧy ra ro riyana; kɛrɛ ɔwe mǝ wop ama ɔ thǝksa yi-e, a tǝ bont kɔ ubana ka rȧbȧy ra ro riyana.

²⁰ Tiyȧŋ i pa ro rɔnu, Thambe mȧlompi ma nu mǝ thas mȧlompi ma aŋkarmɔkɔ yi aŋFarisi-e, rǝ roŋ o roŋ nǝ gbǝli hɛ wɔŋ ka rȧbȧy ra ro riyana.

²¹ Nǝ po tǝl kǝpa a pa ka aŋbȧki thǝpaŋ, Te dif wuni. Wuni o wuni ɔwe mǝ dif wuni kǝsias-e, ɔ beki kȧmȧ ɔ sɔthɔ ȧthȧlǝr ka aŋthonkas.

²² Kɛrɛ minɛŋ i pa ro rɔnu, Wuni o wuni ɔwe ba mǝbaŋ ta ɔwɔnt kɔŋ-e, ɔ tǝ fumpɔ kasi ro bare; ɔwa wuni o wuni ɔwe mǝ farki ɔwɔnt kɔŋ-e, ɔ tǝ fumpɔ kasi ka aŋSanhedrin; kɛrɛ wuni o wuni ɔwe mǝ pa, Mun pǝŋk, ɔ tǝ fumpɔ kasi ro yahanama.

²³ Tiyȧŋ bepi mǝ kȧrȧ ȧŋboya a mu ka ȧŋbɛsɛ-e, ɔwa mǝ kala ȧmerȧ kǝpa ɔwɔnt mu ɔ ba mǝbaŋ ta ȧtȧ mu-e;

²⁴ tey ri ȧŋboya a mu, kɔnɛ mǝ mɔtha kȧl manɛ yi ɔwɔnt mu, kǝdarǝŋ kati mǝ der, mǝ sɔŋ ȧŋboya a mu.

²⁵ Manɛ yi ɔtheranɛ ka mu ka ȧŋlɔkɔ na mǝ taŋanɛ ro roŋ yi kɔn; ta thani ɔtheranɛ ka mu ɔ lȧnki mu ka ɔthoŋkas, ɔwa ɔthoŋkas ɔ lȧnki mu ka ȧŋbɔy, ɔwa a tand mu ka ȧŋseth ŋa tǝrǝŋka.

²⁶ Tɛntɛnɛ i kanɛ mu, mǝ ba hɛ kǝwur ri rǝ roŋ o roŋ haŋ mǝ poŋ ram aŋwankɔpɔ alǝpsɔ.

²⁷ Nǝ po tǝl kǝpa a pa, Te yɔ kǝrǝp.

²⁸ Kɛrɛ minɛȧŋ i pa ro rɔnu, Wuni o wuni ɔwe mǝ kǝli wuni bom tǝ kǝfela kɔ-e, ɔ po yɔ kǝrǝp ka ȧŋmerȧ ŋɔŋ.

²⁹ Bepi rafɔr ra mu rǝdiɔ rǝ yɔ mu mǝ pǝnthbǝla-e, kothi ri, fitha ri, kotȧy-e pǝ tǝ fisa mu bepi abɛm ŋin ŋa aŋdɛr a mu aŋ lǝsȧ-e, pǝthasi kǝfitha aŋdɛr a mu alolok ro yahanama.

³⁰ Ɔwa bepi kȧta ka mu kǝdiyɔ kǝ yɔ mu mǝ pǝnthbǝla-e, gbǝk ki, fitha ki, kotȧy-e pǝ tǝ fisa mu bepi abɛm ŋin ŋa aŋdɛr a mu aŋ lǝsǝ pǝthasi kǝfitha aŋdɛr a mu alolok ro yahanama.

³¹ A po pa sɔ, Bepi wuni o wuni ɔ ter ɔrani kɔŋ-e, ta ɔ sɔŋ kɔ areka ŋa kasakanɛ;

³² kɛrɛ minɛȧŋ i pa ro rɔnu, Wuni o wuni ɔwe mǝ ter ɔrani kɔŋ pǝ yi hɛ tȧ kǝrǝp-e, ɔ yɔ ɔbɛra ɔ sǝkɛ urǝpi, ɔwa wuni o wuni ɔwe mǝ nȧntȧ kɔ ɔwe a po ter-e, ɔ yɔ kǝrǝp.

³³ Nǝ po tǝl kǝpa a pa ka aŋbȧki thǝpaŋ, Te gbiŋ kǝgbiŋ ka rǝyem, kɛrɛ lasǝr ɛgbiŋ ɛ nu ka ɔMarki.

³⁴ Kɛrɛ minɛȧŋ i pa ro rɔnu, Te gbiŋ hali, pǝ yi hɛ ka ȧkȧriyana, kotȧy-e kǝ yi kawaŋ ka rȧbȧy ra Kuru Mǝsaba,

³⁵ pǝ yi hɛ ka ȧdȧru, kotȧy-e kǝ yi kȧpet ka ɔBȧy ubana.

³⁶ Te gbiŋ ka rȧbomp ra mu, pǝkasifɛ mǝ gbǝli hɛ sǝki rafon ra mu rin rǝfera thalɔm rǝbi.

³⁷ Kɛrɛ ta mapa ma mu mǝ yi Yao, Yao, thalɔm Yi thahɔ, Yi thahɔ; kotȧy-e tȧy o tȧy ȧte thas ȧte tǝ wur ka ɔlǝs.

³⁸ Nǝ po tǝl kǝpa a pa, Rǝfɔr ta rǝfɔr, rǝsek ta rǝsek;

³⁹ kɛrɛ minɛȧŋ i pa ro rɔnu, Te kasi mǝlǝs. Bepi wuni o wuni ɔ gbantha mu ka aŋkos ȧdiyɔ-e, lȧfthɛ kɔ aŋlɔm sɔ.

⁴⁰ Ɔwa bepi wuni o wuni ɔ kera mu ro bare-e, ɔwa ɔ nɔy mu aruma ra mu-e, yɔ kȧmȧ ɔ ba sɔ kafɔl ka mu.

⁴¹ Bepi wuni o wuni ɔ kithinɛ mu tǝ kǝpȧyȧ kɔ ȧmayl ŋin-e, pȧyȧ kɔ yɛrǝŋ.

⁴² Sɔŋ ka ɔwe mǝ tholir mu, te pɛnsa ɔwuni ɔwe yema bɔr mu.

⁴³ Nǝ po tǝl kǝpa a pa, Bɔthǝr ɔfatanɛ ka mu, ɔwa gbɛŋa ɔtheranɛ ka mu.

⁴⁴ Kɛrɛ minɛȧŋ i pa ro nu, Bɔthǝr aŋtheranɛ a nu, ɔwa ramnɛ nu ta ȧtȧ ŋaŋ aŋa sɔmpa nu,

⁴⁵ kȧmȧ nǝ yi aŋwuth ŋa ɔKas ka nu ɔwe yi ro riyana. Kotȧy-e ɔ yɔ aret rɔŋ rǝ putǝr ka aŋlǝs yi ka aŋfinɔ, ɔ somra akɔm ka aŋlompi yi ka aŋkǝnȧ.

⁴⁶ Ȧtesoma-e bepi nǝ bɔthǝr gbo aŋa bɔthǝr nu-e, ko ȧrȧm naŋ mǝ nǝ sɔthɔ-e? Yaŋ tha aŋthoŋkla ɛfȧk aŋ yɔ sɔ-e?

⁴⁷ Bepi nǝ kori aŋwɔnt nu gbo-e, ko tȧy tǝfinɔ tȧŋ nǝ yɔ pǝthas alɔm-e? Yaŋ tha tȧbona tǝlɔm mǝ aŋ yɔ sɔ-e?

⁴⁸ Tiyȧŋ yi nu agbenthis mɔ mǝ ɔKas ka nu ɔwe yi ro riyana ɔ yi ugbenthis.