Mathiu 3 - Ȧŋlemrȧnɛ Ȧfu

¹ Ka mȧrey mati Yɔnȧŋ ɔBaftays ɔ wur gbafǝth, kɔ tamǝs ka aŋwula ŋa ro Yudia, ɔ pa,

² Thupi nu, kotȧy-e rȧbȧy ra ro riyana rǝ po fat.

³ kotȧy-e ta ɔwe ɔnȧbi Aysayaŋ ɔ fɔf ma ɔ pa, Ȧrim ra ukin ɔwe gbelegbele ro wula, ɔ pa, Bɛnɛnɛ nu aroŋ da ɔMarki, Lompǝs nu asoŋ tɔŋ.

⁴ Yɔnȧŋ ɔ wɔŋ ruma ra aŋfon ŋa ȧyɔkmɛ, ɔwa ɔ senɛ ȧthɛbɛŋ ŋa areka. Ɛdi yɔŋ ɛ yi ɛlama yi rǝmai.

⁵ Ȧŋlɔkɔ ŋati afǝm agbȧthi aŋ kɔ ro ŋɔŋ kǝwur ro Yerusalɛm yi ro Yudia bɛ, yi ka aŋgbaŋ bɛ aŋa fatǝr ro Yɔrdan.

⁶ kɔ baftays ŋa ro Yɔrdan maŋ gbithanɛ ɛhakɛ yaŋ.

⁷ Kɛrɛ ma ɔ nənk aFaresi yi aSadusi agbȧthi aŋ der kȧmȧ ɔ baftays ŋa, ɔ pa ro ŋaŋ, Naŋ, na rȧkomra ra ɛgbɔrɔ, kanɛ maŋ nu tǝ kǝgbukɛ rabaŋ ara mǝ der-e?

⁸ Tiyȧŋ kȧrȧ nu mǝkomi mǝbeki ta kǝthupi.

⁹ Ɔwa te nu nanɛ ka ɛmerȧ ɛ nu kǝpa, Sǝ ba Ebraham ta ɔkas kȧsu; kotȧy-e i kanɛ nu Kuruȧŋ ɔ gbǝli yokas awuth ta Ebraham ka masar ame.

¹⁰ Ɔwa ka-ake a po thɔ bot kabap ka aŋthǝŋk ŋa ɛyint. Tiyȧŋ, ŋǝnt o ŋǝnt aŋa mǝ te wur mǝkomi mǝfinɔ-e, a tǝ tap ŋi, a tǝ fitha ŋi ro nȧnt.

¹¹ Minɛŋ yathi, i baftays nu yi mȧnt ka kǝthupi, kɛrɛ ɔwe mǝ der kǝdarǝŋ kȧmi kɔnɔ thasi mi afɔsɔ. I bek hɛ tǝ kǝwop ɛkɔftha yɔŋ. Ɔ tǝ baftays nu yi ɔYina mǝsǝm yi nȧnt.

¹² Aŋfuŋa ŋɔŋ aŋ yi ka kȧta kɔŋ, ɔ tǝ gbǝl aŋgbethe ŋɔŋ gbǝraŋ, ɔwa ɔ tǝ thoŋkla apǝla pɔŋ ro fuŋk, kɛrɛ ɛfuk-e, ɔ tǝ thɔi yi rǝ nȧnt nǝte dimsɛ.

¹³ Ȧŋlɔkɔ ŋati Yisɔsȧŋ ɔ wur ro Kalili, ɔ der ro Yɔrdan ka Yɔn, kȧmȧ ɔ baftays kɔ.

¹⁴ Kɛrɛ Yɔnȧŋ ɔ yema bɛnt kɔ, ɔ pa, Pǝ mar munɔ mǝ baftays mi, kɛrɛ mǝ der ro mi-i?

¹⁵ Ka Yisɔsȧŋ ɔ pa ro ŋɔŋ, Ta pǝ yi yaŋ ka-ake, kotȧy-e ya pǝ mar sǝ lasǝr mȧlompi bɛ. Kɔ selɔ ɔ baftays kɔ.

¹⁶ Ma a po baftays Yisɔs-e, ɔlɛmp wati ɔ wur ro mȧnt; ka ȧkȧriyana kǝ kanthɛ, kɔ nənk ɔYina ka Kuru ɔ thor mɔ kǝpǝrǝm ɔ thorǝr kɔ,

¹⁷ ka rim rǝ wur ka Kuru, rǝ pa, Ɔwe-e, kɔnɔ yi ɔWan kȧmi ubɔthǝr, ka ɔwe i ba mǝbɔnɛ.