Mathiu 26 - Ȧŋlemrȧnɛ Ȧfu

¹ Ka pǝ re yi ma Yisɔsȧŋ ɔ po gbanthi ȧsim ȧte bɛ-e, ɔ pa ka aŋkarande ŋɔŋ,

² Nǝ tȧrȧ kǝpa ka mǝrei marǝŋ kapainɛ kǝ bek, ɔwa a tǝ lȧnki ɔWan ka wuni kȧmȧ a tȧŋ kɔ ka akǝnt kǝpǝŋkinɛ.

³ Ȧŋlɔkɔ ŋati aŋkərbomp kǝtɔŋ ka aŋfode, aŋkarmɔkɔ yi aŋbȧki ŋa aŋfǝm aŋ thoŋklanɛ dɛr rɔkin ka ȧŋbare ŋa ɔfode ubana, ɔwe a bont Kayafas.

⁴ Ɔwa aŋ nǝŋkanɛ dɛr rɔkin kȧmȧ aŋ gbǝli wop Yisɔsȧŋ rǝ mǝsɔth tǝ kǝdif kɔ.

⁵ Kɛrɛ aŋ pa, Ta pǝ te yi ka amet, ta thani atotok aŋ yokanɛ kǝtɔŋ ka aŋfǝm.

⁶ Ɔwa ma Yisɔs ɔ yi ro Bɛthani ka ȧŋseth ŋa Saymɔn ɔwe ba arom-e,

⁷ wuni bom ɔ der ro ŋɔŋ, ɔ ba kǝbos ka mȧro mǝsopa mǝbaki mɔlɔ, kɔ lond ma ka rȧbomp rɔŋ ma ɔ yirȧ ka kǝdi.

⁸ Kɛrɛ ma aŋkarande aŋ nənk ti-e, pǝ bansȧnɛ ŋa, aŋ pa, Ko asabu mǝ a lǝsǝr ame-e?

⁹ kotȧy-e a gbǝli thila ame ta akala agbȧthi, ɔwa a sɔŋ ȧŋmɔnɛ.

¹⁰ Kɛrɛ ma Yisɔsȧŋ ɔ sɔthnɛ ti-e, ɔ pa ro ŋaŋ, kɔyɛŋ mǝ nǝ sɔmpa ɔbɔrkɔ-e? Ȧtesoma-e ɔ po yɔna mi apanth afinɔ.

¹¹ kotȧy-e nǝ ba ȧŋmɔnɛ yi naŋȧŋ lɔkɔ o lɔkɔ, kɛrɛ minɛ i yi hɛ yi naŋȧŋ lɔkɔ o lɔkɔ.

¹² Ma ɔ sop aŋdɛr a mi yi ȧmȧro mǝsopa ame-e, ɔ yɔ ti tǝ kǝmaŋk mi.

¹³ Tǝ tɛntɛnɛ i kanɛ nu dɛr o dɛr ro mǝ a tamǝs ȧkɛra kǝfinɔ ake ka ȧdȧru bɛ-e, ȧte ɔya ɔwe ɔ po yɔ a tǝ fɔf ti tǝ kǝnanɛ ta atɔŋ.

¹⁴ Ɔwa ukin ka aŋtɔfɔt ŋarǝŋ ɔwe a bont Yudas Iskariyɔt, ɔ kɔnɛ ka aŋkərbomp kǝtɔŋ ka aŋfode, ɔ pa,

¹⁵ Ko mǝ nǝ selɔ tǝ kǝsɔŋ mi kȧmȧ i lȧnki kɔ ro nu-e? kaŋ lɔma kɔ ɛbɛm ya akala ȧferȧ kǝgba tɔfɔt.

¹⁶ Kǝtǝp ka ȧŋlɔkɔ ŋati ɔ thɛns afɛrɛ tǝ kǝlaŋkli kɔ.

¹⁷ Ɔwa ka ȧŋrey ȧtɔtɔkɔ ŋa kǝbo kǝpaŋi ɛgbith-e, aŋkarande aŋ der ka Yisɔsȧŋ, aŋ pa ro ŋɔŋ, Reke mǝ yema sǝ bɛnɛnɛ ta ȧtȧ mu tǝ kǝdi kapainɛ-e?

¹⁸ kɔ pa, Kɔnɛ nu ro pet ka wuni wunɔŋ, nǝ pa ro ŋɔŋ, ƆKarmɔkɔ ɔ pa, Ȧŋlɔkɔ a mi aŋ fat. I ti wop amet ma kapainɛ ro seth ka mu yi aŋkarande a mi.

¹⁹ Ka aŋkarande aŋ yɔ mɔ mǝ Yisɔs ɔ kanɛ ŋa, ka aŋ bɛnɛnɛ amet ma kapainɛ.

²⁰ Ma rȧfɔy rǝ bek-e, ɔ yirȧ ka kǝdi yi aŋtɔfɔt ŋarǝŋ.

²¹ Ɔwa ma mǝ aŋ di-e, ɔ pa, Tɛntɛnɛ i kanɛ nu kǝpa ukin ka nu ɔ tǝ sɔnd mi.

²² Ka animisa aŋ wop ŋa, aŋ tǝp kǝyif kɔ ukin o kin, Pa, minɛŋ-i?

²³ kɔ wosa ɔ pa ro ŋaŋ, Ɔwe tɔka kȧta kɔŋ ka ȧŋbɔl yi minɛȧŋ, kɔnɔ gbeŋ ɔ tǝ sɔnd mi.

²⁴ ƆWan ka wuni ɔ kɔ mɔ mǝ a gbal ta atɔŋ, kɛrɛ mɔnɛ ka ɔwuni kati ɔwe mǝ sɔnd ɔWan ka wuni. Pǝ tǝ yi ɔfinɔ naŋ ta ɔwuni kati bepi a kom hɛ kɔ naŋ.

²⁵ Ka Yudasȧŋ ɔwe sɔnd kɔ ɔ yif, Minɛ-i Karmɔkɔ? kɔ pa ro ŋɔŋ, Munɔ pa yi.

²⁶ Ɔwa mɔ mǝ aŋ di-e, Yisɔsȧŋ ɔ gbasi kǝbo, ɔ ruba ki kɔ sim ki, ɔ sɔŋ ki ka aŋkarande, ɔ pa, Gbasi nu, nǝ di. Ake-e, kǝ yi aŋdɛr a mi.

²⁷ kɔ gbasi ampɔthi, ɔ muti mɔmɔ, ɔ sɔŋ ŋa, kɔ pa, Mun ri nu bɛ.

²⁸ kotȧy-e ame mǝ yi mȧtir ma mi ma aŋlemranɛ afu, ama a loŋ ta agbȧthi ta katerɔ ka ɛhakɛ.

²⁹ I kanɛ nu, i mun hɛ sɔ mȧkomi ame ma ɛyɛt ɛgbam, haŋ ka ȧŋrey aŋa mǝ i mun ma ɔfu yi naŋ ka rȧbȧy ra ɔKas kȧmi.

³⁰ Ɔwa maŋ po leŋ aleŋ-e, aŋ wur, aŋ kɔ ka kateŋ ka Ɔlif.

³¹ Ka Yisɔsȧŋ ɔ pa ro ŋaŋ, Naŋ bɛ nǝ tǝ pǝnthbǝla ta ȧtȧ mi thonɔŋ tȧtȧk. Kotȧy-e a po gbal kǝpa, A tǝ gbantha ɔtɔl, ɔwa talɔmɛ ŋa akuthi aŋ tǝ sakanɛ.

³² Kɛrɛ kǝdarǝŋ ka kȧyokanɛ ka mi-e, i ti tǝma nu kǝdi ro Kalili.

³³ Kɛrɛ Pitarȧŋ ɔ wosa ɔ pa ro ŋɔŋ, Hali afǝm bɛ aŋ pǝnthbǝla ta ȧtȧ mu-e, minɛȧŋ i gbǝli hɛ pǝnthbǝla thǝbana.

³⁴ Ka Yisɔsȧŋ ɔ pa ro ŋɔŋ, Tɛntɛnɛ i kanɛ mu, Rȧrɔy are gbeŋ, yeŋk katǝpi ɔ tam-e, mǝ tǝ pɛnsanɛ mi mǝsas.

³⁵ Ka Pitarȧŋ ɔ pa ro ŋɔŋ, Hali i ba kǝfi yi munɔŋ-e, i gbǝli hɛ pɛnsanɛ mu. Yaŋ aŋkarande sɔ bɛ aŋ pa.

³⁶ Ka Yisɔsȧŋ ɔ der yi ŋaŋ ka ɔdɛr a bont Kɛthsɛmanɛ, kɔ pa ka aŋkarande ŋɔŋ, Yirȧ nu nɔ, ma mǝ i kɔ ro tǝ kǝramnɛ.

³⁷ kɔ banȧnɛ Pitarȧŋ yi aŋwuth aruni ŋarǝŋ ŋa Sɛbidi, kɔ tǝp kǝsaŋ amɔl, ɔwa, ȧŋmerȧ ŋɔŋ aŋ lela kɔ.

³⁸ kɔ pa ro ŋaŋ, Ȧŋmerȧ mi aŋ ba ɔnɔsinɛ ɔthasǝr haŋ ka rǝfi. Kar nu nɔ, nǝ kǝlɛnɛ yi minɛȧŋ.

³⁹ kɔ kɔ rodi ɔthan, ka ɔgbǝps a ro thɔf, ɔ ramnɛ, ɔ pa, O Pa kȧmi, bepi pǝ fɔi tȧy yɔ ampɔthi aŋe aŋ painɛ mi; kɛrɛ ta pǝ te yi mȧselɔ ma mi-e, ta pǝ yi gbo mȧselɔ ma mu.

⁴⁰ kɔ der ka aŋkarande, ɔ bǝp ŋa aŋ dirȧ, kɔ pa ka Pitarȧŋ, kɔyɛŋ nǝ te gbǝli kǝlɛnɛ yi minɛ ahawa ŋin-e?

⁴¹ Kǝlɛnɛ nu, ɔwa ramnɛ nu kȧmȧ nǝ te wɔŋ rǝ tȧy tǝgbɔns; ȧŋmerȧ aŋ selɔ tɛntɛnɛ, kɛrɛ aŋdɛr a rant.

⁴² kɔ kȧl kɔnɛ kǝbeka marǝŋ, ɔ ramnɛ, ɔ pa, O Pa kȧmi, bepi aŋe aŋ gbǝli hɛ painɛ mi thambe i mun ŋi-e, ta mȧselɔ ma mu mǝ yɔnɛ.

⁴³ Ma ɔ kȧl der-e, ɔ bǝp ŋa aŋ dirȧ sɔ kotȧy-e ɛfɔr yaŋ ɛ lel.

⁴⁴ kɔ tey ŋa, ɔ kɔnɛ sɔ, ɔ ramnɛ kǝbeka mǝsas, ɔ kȧl pa ȧsim tin tati.

⁴⁵ Ɔ kȧl der ka aŋkarande ŋɔŋ, ɔ pa ro ŋaŋ, Dirȧ nu ka-ake, ɔwa fothanɛ nu. Kǝla, ȧŋlɔkɔ aŋ bek, ɔwa a sɔŋ ɔWan ka wuni ka mȧta ma afǝm ŋa ɛhakɛ.

⁴⁶ Yokanɛ nu, maŋ kɔnɛ; kǝlo, kɔnɔ ɔwe sɔnd mi ɔ fat.

⁴⁷ Mɔ mǝ ɔ bɔ fɔf-e, kǝla, Yudasȧŋ, ukin ka aŋtɔfɔt ŋarǝŋ ɔ der, yi runiya rǝbana, aŋ ba ɛgbathɔ yi tǝgbeŋgbeŋ, aŋ wur ka aŋkərbomp kǝtɔŋ ka aŋfode yi aŋbȧki ŋa aŋfǝm.

⁴⁸ Ɔwa, kɔnɔ ɔwe mǝ sɔnd kɔ ɔ po sɔŋ ŋa alomar, ɔ pa, Ɔwe mǝ i mumǝl-e, kɔnɔȧŋ. Wop kɔ nu.

⁴⁹ Ka ɔlɛmp wati ɔ der ka Yisɔsȧŋ, ɔ pa, Kori mu Karmɔkɔ! kɔ mumǝl kɔ.

⁵⁰ Ka Yisɔsȧŋ ɔ pa, Yathki, yɔ ȧte mǝ der tǝ kǝyɔ. Kaŋ der aŋ wop Yisɔsȧŋ, kaŋ kera kɔ.

⁵¹ Ɔwa kǝla, ukin ka ŋaŋ aŋa yi yi Yisɔsȧŋ, ɔ thanthi kȧta kɔŋ, ɔ tali aŋgbathɔ ŋɔŋ, ɔ tap ȧŋbɔy ŋa ɔfode ubana, ɔ gbǝk aŋlǝns ŋɔŋ.

⁵² Ka Yisɔsȧŋ ɔ pa ro ŋɔŋ, Kala aŋgbathɔ a mu ka aŋbom, kotȧy-e ŋa bɛ aŋa mǝ gbasi aŋgbathɔ-e, aŋ ba kǝdinɛ rǝ aŋgbathɔ.

⁵³ Thalɔm mǝ nanɛ kǝpa i gbǝli hɛ nɛmthɛnɛ ɔKas kȧmi, ɔwa ɔ tǝ som mi ka-ake amȧleka athasi ɛsǝfȧ tɔfɔt yɛrǝŋ-i?

⁵⁴ Kɛrɛ to mȧgbal mǝ gbǝli lasǝr, kǝpa ya pǝ ba kǝyi-e?

⁵⁵ Ka ȧŋlɔkɔ ŋati Yisɔs ɔ pa ka ȧsuniya, Nǝ der ro mi yi ɛgbathɔ dɛ yi tǝgbeŋgbeŋ tǝ kǝwop mi mɔ ukey-i? I yirȧ ȧrey o rei ka ȧŋseth ŋa Kuru tǝ kǝthǝksa, ɔwa nǝ wop hɛ mi.

⁵⁶ Kɛrɛ ȧte bɛ tǝ yɔnɛ kȧmȧ mȧgbal ma aŋnabi mǝ lasǝr. Ȧŋlɔkɔ ŋati aŋkarande ŋɔŋ bɛ aŋ tey kɔ aŋ gbukɛ.

⁵⁷ Ɔwa, aŋa po gbip Yisɔsȧŋ aŋ kera kɔ ka Kayafas ɔfode ubana, ro aŋkarmɔkɔ yi aŋbȧki aŋ po thoŋklanɛ.

⁵⁸ Ɔwa Pitarȧŋ ɔ tȧŋ kɔ ɔbɔli poŋ, kǝkɔ ka ȧŋbare ŋa ɔfode ubana, kɔ wɔŋ, ɔ yirȧ yi aŋkurgba tǝ kǝnǝŋk ɔthalnɛ.

⁵⁹ Ŋatǝbomp kǝtɔŋ ka aŋfode yi aŋbȧki ŋa aŋfǝm, yi aŋSanhedrin bɛ aŋ thɛns mǝseri ma rǝyem ta Yisɔsȧŋ, kȧmȧ aŋ dif kɔ,

⁶⁰ kɛrɛ aŋ thamrɔ, hali ma mǝseri ma rǝyem agbȧthi aŋ der. Kǝdarǝŋ kati ŋarǝŋ aŋ der,

⁶¹ aŋ pa, Ɔlaŋgba ɔwe ɔ pa, Minɛ i gbǝli lǝsǝr ȧŋseth ŋa Kuru, ɔwa, i kȧl tǝmǝr ŋi rǝ mǝrei mǝsas.

⁶² Ka ɔfode ubana ɔ tǝma, ɔ pa ro ŋɔŋ, Mǝ ba hɛ ȧte maŋ gbaki-i? Ko tȧy tȧŋ ȧte aŋe aŋ seri ta ȧtȧ mu-e?

⁶³ Kɛrɛ Yisɔsȧŋ ɔ tȧnk thǝm. Ka ɔfode ubana ɔ pa ro ŋɔŋ, I yema mu mǝ gbiŋ ka ɔKuru ukǝli kȧmȧ mǝ kanɛ su bepi mǝ yi ɔKrayst ɔWan ka Kuru.

⁶⁴ Ka Yisɔsȧŋ ɔ pa ro ŋɔŋ, Mǝ po pa ti, kɛrɛ i kanɛ nu, alɔkɔ alɔm nǝ ba kǝnǝnk ɔWan ka wuni ɔ yirȧ ka kȧta kȧdiyɔ ka afɔsɔ, ɔ tǝ der ka tǝrǝnt tǝfera ka ȧkuru.

⁶⁵ Ka ɔfode ubana ɔ gbari ȧsuma tɔŋ, ɔ pa, Ɔ po ŋamnɛ Kuru! Ko mǝseri mǝlɔm mǝ sǝ yema sɔ-e? Kǝla, naŋ nǝ po tǝl mɔ ɔ ŋamnɛ Kuruȧŋ ɔlǝs.

⁶⁶ To naŋ nǝ nanɛ-e? Aŋ wosa aŋ pa, Ubek tǝ kǝdif!

⁶⁷ kaŋ thufǝr kɔ ro der, aŋ tuns kɔ ɛbɔfthar, alɔm aŋ gbantha kɔ yi mȧta maŋ,

⁶⁸ kaŋ pa, Munɔ ɔKrayst, tɔri su ba; Kanɛ gbantha mu-e?

⁶⁹ Ȧŋlɔkɔ ŋati Pitarȧŋ ɔ yirȧ rokaŋ ro bare, ka ȧŋbɔy ubɛra ɔ der ro ŋɔŋ, ɔ pa, Munɔ sɔ mǝ sa yi yi Yisɔs ɔKalilian.

⁷⁰ Kɛrɛ ɔ pɛnsa rodi ka ŋaŋ bɛ-e, ɔ pa, i tɛ hɛ ȧtȧ mǝ pa.

⁷¹ Ɔwa ma ɔ wur ɔ kɔ ro gbǝnthǝŋ-e, ȧbɔy ubɛra ulɔm ɔ nənk kɔ, kɔ pa ka ŋaŋ aŋa yi ri-e, Ɔlaŋgba ɔwe sɔ ɔ la yi yi Yisɔs ɔwe ro Nasarɛth.

⁷² kɔ pɛnsa sɔ ɔwa ɔ gbiŋ kǝpa, I tɛ hɛ ɔlaŋgba.

⁷³ Ɔwa pǝ won hɛ ɔthasǝr-e, aŋfǝm aŋa tǝma ri aŋ der aŋ pa ka Pita, Ka tǝteŋ, munɔ sɔ mǝ yi ukin ka ŋaŋ, mafɔf ma mu mǝ ŋaibi mu.

⁷⁴ kɔ tǝp kǝnal yi kǝgbiŋ, ɔ pa, I tɛ hɛ ɔlaŋgba. Ka ɔlɛmp wati katǝpi ɔ tam.

⁷⁵ Ka Pitarȧŋ ɔ kala ȧmerȧ ka tapa ȧte Yisɔsȧŋ ɔ pa, Yeŋka katǝpi ɔ tam-e, mǝ tǝ pɛnsanɛ mi mǝsas. Kɔ wur, ɔ bok ɔbaŋ.