Mathiu 22 - Ȧŋlemrȧnɛ Ȧfu

¹ Ka Yisɔsȧŋ ɔ wosa, ɔ fɔf ro ŋaŋ rǝ ɛlomɔ, kǝpa ye,

² Rȧbȧy ra ro riyana rǝ yi mɔ ubȧy ulɔm ɔwe bɛmpa met ma kanantǝ ta ɔwan kɔŋ uruni,

³ kɔ som ɛbɔy yɔŋ tǝ kǝtela ŋaŋ aŋa a muti ka amet ma kanantǝ. Kɛrɛ aŋ selɔ hɛ der.

⁴ kɔ kȧl som ɛbɔy alɔm, ɔ pa, Kanɛ ŋaŋ aŋa a muti kǝpa ye, Kǝla, i po bɛnɛnɛ aŋfantha a mi. A po fai tana ta mi yi ɛsɛm ɛ mi ɛboy, ɔwa ɛyɛt bɛ ɛ po bɛnɛnɛ. Der nu ka amet ma kanantǝ.

⁵ Kɛrɛ aŋ sai ti, aŋ kɔnɛ ka ȧtȧy taŋ, ukin ka akɔr kɔŋ, ulɔm ka mȧsǝkinɛ mɔŋ.

⁶ Ɔwa aŋa tia-e, aŋ lɛsa ɛbɔy yɔŋ, kaŋ sambos ŋa, aŋ difǝth ŋa.

⁷ Ma ɔbȧy ɔ tǝl ti-e, ɔ bansȧ, ɔ somra asǝfȧ tɔŋ, kɔ dim aŋfǝm aŋa difǝth ɛbɔy yɔŋ, kɔ thɔi kȧpet ka ŋaŋ.

⁸ Kǝdarǝŋ kati ɔ pa ka ɛbɔy yɔŋ. A po bɛnɛnɛ aŋfantha ta kanantǝ, kɛrɛ aŋa a muti-e, aŋ yi hɛ amari ti.

⁹ Tiyȧŋ kɔ nu ka asoŋ tǝsakanɛ kȧmȧ nǝ muti ŋaŋ bɛ aŋa mǝ nǝ bǝp ri ka amet ma kanantǝ.

¹⁰ Ɛbɔy ŋati aŋ kɔnɛ ka asoŋ tǝsakanɛ, kaŋ thoŋkla aŋa aŋ bǝp ri bɛ, aŋlǝs-o, aŋfinɔ-o; ka ȧŋseth ro amet ma kanantǝ mǝ yi aŋ la yi afǝm.

¹¹ Ma ɔbȧy ɔ wɔŋ tǝ kǝkǝli aŋa a muti-e, ɔ nənk ri wuni ɔwe te wɔŋ ruma ra kanantǝ.

¹² kɔ pa ro ŋɔŋ, Yathki, kɔyɛŋ mǝ mǝ wɔŋ nɔ, mǝ te wɔŋ ruma ra kȧnȧntȧ-e? kɔ taŋk thǝm.

¹³ Ka ɔbȧy ɔ pa ka ɛbɔy yɔŋ, Sek kɔ nu mȧta yi ȧtȧtək, kȧmȧ nǝ fitha kɔ rokaŋ ka ȧŋsum, ro kǝkulɔ yi kǝŋȧkŋȧk ɛsek kǝ yi.

¹⁴ kotȧy-e a muti agbȧthi kɛrɛ a thith athȧn.

¹⁵ Ka aŋFarisi aŋ kɔnɛ aŋ nǝŋkanɛ to mǝ aŋ gbǝli sapǝs kɔ ka kafɔf kɔŋ.

¹⁶ kaŋ som aŋkarande ŋaŋ yi aŋHerodian ro ŋɔŋ, aŋ pa, Karmɔkɔ sǝ tȧrȧ kǝpa mǝ yi utǝteŋ, ɔwa mǝ thǝksa aroŋ da Kuru tǝteŋ. Mǝ ba hɛ agbȧy kotȧy-e mǝ kǝli hɛ ȧder ra wuni.

¹⁷ Tiyȧŋ kanɛ su ba ȧte mǝ nanɛ. Pǝ yi ɔlompi tǝ kǝsɔŋ ɛfȧk ka Sisar-i, thalɔm pǝ lomp hɛ ti-i?

¹⁸ Kɛrɛ Yisɔsȧŋ ɔ nənk mȧlǝs maŋ, kɔ pa, kɔyɛŋ mǝ nǝ gbɔns mi naŋ amunafaki-i?

¹⁹ Tɔri mi nu aŋkala ŋa ɛfȧk. Kaŋ kȧrȧ kɔ akɔpǝr ŋin.

²⁰ kɔ pa ro ŋaŋ, Kanɛ ba mȧbȧlȧnɛ yi mȧgbal ame-e?

²¹ kaŋ pa ro ŋɔŋ, Sisarȧŋ. Kɔ pa ro ŋaŋ, Ɔwa sɔŋ nu Sisarȧŋ mȧtȧy ma Sisar, ɔwa sɔŋ nu Kuru mȧtȧy ma Kuru.

²² Maŋ tǝl ȧte-e, aŋ kabanɛ, kaŋ tey kɔ, aŋ kɔnɛ.

²³ Ka ȧŋrey ŋati gbeŋ, aŋSadusi aŋa pa kǝyokanɛ kǝ yi hɛ, aŋ der, kaŋ pa ro ŋɔŋ,

²⁴ Karmɔkɔ, Mosis ɔ pa, Bepi wuni ɔ fi ɔ ba hɛ awuth-e, ɔwɔnt kɔŋ uruni ɔ ba tǝ kǝnantǝ ɔrani kɔŋ kȧmȧ ɔ komǝs awuth ta ɔwɔnt kɔŋ.

²⁵ Ɔwa sǝ sa ba awɔnt aruni tamthǝdɛrǝŋ. Ka ɔtɔtɔkɔ ma ɔ nȧntȧ-e, ɔ fi, ɔwa ma ɔ te ba awuth-e, ɔ tey ɔrani kɔŋ ka ɔwɔnt kɔŋ.

²⁶ Ya pǝ yi sɔ ɔwe bekȧ ŋarǝŋ, yi ɔwe bekȧ asas, haŋ kǝbek ka ɔwe bekȧ tamthǝdɛrǝŋ.

²⁷ Ɔwa ɔbɛra ɔ fi kǝdarǝŋ ka ŋaŋ bɛ.

²⁸ Tiyȧŋ, ka kȧyokanɛ, ureke kǝtɔŋ ka aŋtamthǝdɛrǝŋ mǝ ba ɔbɛra-e, ma pǝ yi ŋaŋ bɛ aŋ la po ba kɔ-e?

²⁹ Kɛrɛ Yisɔsȧŋ ɔ wosa ɔ pa ro ŋaŋ, Nǝ yɛthȧ ma nǝ te tȧrȧ mȧgbal thalɔm aŋfɔsɔ ŋa Kuru.

³⁰ kotȧy-e ka kȧyokanɛ aŋ nȧntȧ hɛ, ɔwa a sɔŋ hɛ kǝnantǝ, kɛrɛ aŋ yi gbo mɔ aŋmȧleka ro riyana.

³¹ Kɛrɛ ta kȧyokanɛ ka aŋfi-e, nǝ karaŋ hɛ ȧte Kuru ɔ pa ro nu mǝ ɔ pa,

³² Minɛ yi ɔKuru ka Ebraham, ɔKuru ka Aysak yi ɔKuru ka Yekɔb-i? Kuruȧŋ ɔ yi hɛ ɔKuru ka aŋfi kɛrɛ ɔka aŋkǝli.

³³ Ma ȧsuniya tǝ tǝl ȧte-e, aŋ kabanɛ ta kathǝksa kɔŋ.

³⁴ Ma aŋFarisi aŋ tǝl kǝpa Yisɔsȧŋ ɔ po yɔ aŋSadusi aŋ taŋk-e, aŋ thoŋklanɛ dɛr rɔkin.

³⁵ Ka ukin ka ŋaŋ ɔwe tȧrȧ aŋthɔ ɔ yif kɔ ȧyif kȧmȧ ɔ mɛm kɔ, ɔ pa,

³⁶ Karmɔkɔ, areke yi aŋyamari ȧbana thɔŋ bɛ ka aŋthɔ-e?

³⁷ Ka Yisɔsȧŋ ɔ pa ro ŋɔŋ, Mǝ yi tǝ kǝbɔthǝr ɔMarki ɔKuru ka mu yi ȧŋmerȧ a mu bɛ, dɛ yi aŋesǝm a mu bɛ, dɛ yi ananɛ a mu bɛ.

³⁸ Aŋe, ŋǝ yi aŋyamari ȧbana ȧtɔtɔkɔ ŋa aŋthɔ.

³⁹ Ɔwa, aŋa bekȧ yɛrǝŋ-e aŋ bȧlȧnɛ ŋi, ŋi aŋe, Mǝ yi tǝ kǝbɔthǝr ɔfatanɛ ka mu mɔ mǝ mǝ bɔthǝrnɛ.

⁴⁰ Ka ɛyamari yɛrǝŋ ɛye rǝ aŋthɔ yi ȧsim ta aŋnabi bɛ tǝ gbasa.

⁴¹ Ma aŋFarisi aŋ po thoŋklanɛ dɛr rɔkin-e, Yisɔs ɔ yif ŋa,

⁴² kɔ pa, To nǝ nanɛ ta Kraist-e? Wan uruni ka kanɛ-e? kaŋ pa ro ŋɔŋ, Ɔwan ka Debid.

⁴³ kɔ pa ro ŋaŋ, To som Debidȧŋ, ka aŋfɔsɔ ŋa ɔYina ɔ tela kɔ Mariki ma ɔ pa,

⁴⁴ ƆMariki ɔ pa ka ɔmarki kȧmi, Yirȧ ka kȧta kȧmi kǝdiyɔ Haŋ i bot aŋtheranɛ a mu roratha ka ȧtȧtək ta mu-e?

⁴⁵ Bepi Debidȧŋ ɔ bont kɔ Mariki, to ɔ gbǝli yi ɔwan kɔŋ-e?

⁴⁶ Ɔwa wuni o wuni ɔ gbǝli hɛ sɔ gbakia kɔ dim din. Ɔwa kǝtǝp ka ȧŋrey ŋati wuni o wuni ɔ mintha hɛ sɔ yif kɔ ȧyif o yif.