Mathiu 2 - Ȧŋlemrȧnɛ Ȧfu

¹ Ɔwa ma a kom Yisɔsȧŋ ro Bɛthlihɛm ȧke ro Yudia ka mȧrey ma Hɛrɔd ɔbay-e, kǝla, afǝm atempi aŋ der ro Yerusalɛm kǝyɛfȧ ro thɔrɔŋ,

² kaŋ pa, Kɔn-a ɔwe a kom ubȧy ka aŋYuda-a? kotȧy-e sǝ po nənk akɔs kɔŋ ro thɔrɔŋ, ɔwa sǝ der tǝ kǝbatho kɔ.

³ Ma Herodȧŋ ɔbȧy ɔ tǝl ti-e, pǝ sɔmpa kɔ yi aŋfǝm bɛ ro Yerusalɛm.

⁴ kɔ thoŋkla aŋfode ȧbana yi aŋkarmɔkɔ ŋa aŋfǝme, ɔ yifǝth ŋa ta ro a yi tǝ kǝkom ɔKrayst.

⁵ kaŋ pa ro ŋɔŋ, Ro Bɛthlihɛm ȧke ka ȧŋthɔf ŋa ro Yudia; kotȧy-e yaŋ ɔnȧbi ɔ gbal kǝpa,

⁶ Munɔ Bɛthlihɛm, ka ȧŋthɔf ŋa Yuda, Mǝ yi hɛ ulɔl pǝthas aŋkərbomp ŋa aŋ Yuda; kotȧy-e ugbǝkȧ ɔ tǝwur ro mu Ɔwe mǝ yi ɔbumǝr ka aŋfǝm a mi aŋIsrɛl.

⁷ Ka Herodȧŋ ɔ tela aŋfǝm atempi sɔy, kɔ yifǝth ŋa finɔ ta ȧŋlɔkɔ aŋa akɔs kǝ tɔrinɛ.

⁸ kɔ som ŋa ro Bɛthlihɛm, kɔ pa, Kɔnɛ nu, thɛns ɔfinɔ ta ɔwath. Bepi nǝ po fir kɔ-e, de nu tɔri mi, kȧmȧ minɛ sɔ i gbǝli kɔ bȧtho kɔ.

⁹ Maŋ po tǝla ɔbay-e, aŋ kɔnɛ ro Bɛthlihɛm, ka akɔs ȧke aŋ nənk ro thɔrɔŋ kǝ tǝma ŋa kǝdi haŋ kǝ re tǝma rokɔm ka ɔdɛr ro ɔwath ɔ yi.

¹⁰ Maŋ nənk akɔs-e, aŋ selanɛ mǝbɔnɛ mǝbana.

¹¹ Maŋ po wɔŋ ka ȧŋseth-e, aŋ nənk ɔwath yi ɔkara kɔŋ Meriȧŋ, kaŋ gbǝpsa, aŋ bȧtho kɔ. Ɔwa maŋ po kanthi ɛbɛnɛnɛ yaŋ-e, aŋ sɔŋ kɔ ɛboya; mǝbɔŋɔ-o, agboŋgbo-o yi aŋma.

¹² Ɔwa, ma Kuruȧŋ ɔ maŋ ŋa rǝ mǝrei kȧmȧ aŋ te kȧlanɛ ka Herod-e, aŋ kȧlanɛ ka ȧŋthɔf ŋaŋ rǝ roŋ dǝlɔm.

¹³ Ɔwa maŋ po kɔnɛ-e, kǝla, umȧleka ka ɔMarki ɔ tɔrinɛ ka Yosɛf rǝ mǝrei, ɔ pa, Yokanɛ mǝ gbasi ɔwath yi ɔkara kɔŋ, mǝ gbukɛ mǝ kɔ ro Iyipt, kȧmȧ mǝ yi ri haŋ i kanɛ mu; kotȧy-e Herodȧŋ ɔ tǝ thɛns tǝ kǝdif ɔwath.

¹⁴ kɔ yokanɛ, ɔ gbasi ɔwath yi ɔkara kɔŋ ka tȧtȧk, ɔ kɔnɛ ro Iyipt.

¹⁵ kɔ yi ri haŋ rafi ra Hɛrɔd; kȧmȧ ȧrim ra ɔMarki rǝ lasǝr ara ɔ pa ka kasǝŋ ka ɔnȧbi, I po tela ɔwan kȧmi tǝ kǝwur ro Iyipt.

¹⁶ Herodȧŋ, ma ɔ nənk kǝpa aŋfǝm atempi aŋ po pǝŋis kɔ-e, ɔ bansȧ haŋ, kɔ som afǝm tǝ kǝdifǝth aŋfɛth aruni bɛ ro Bɛthlihɛm yi ka mȧgbȧp mati bɛ, aŋfɛth aŋa bȧk tǝren tǝrǝŋ yi aŋa te tha bekȧ yi-e, mɔ mǝ ȧŋlɔkɔ aŋ yi aŋa ɔ gbɛlɛŋ aŋfǝm atempi.

¹⁷ Ka ȧŋlɔkɔ ŋati ȧrim ra Yɛrimaya ɔnȧbi rǝ lasǝr, ara pa,

¹⁸ A tǝla rim ro Rama, Kǝbok yi rǝbora rǝbana. Retɛl ɔ bok ta aŋwuth ŋɔŋ; Ɔ selɔ hɛ a thɔnthɔ kɔ, pǝkasifɛ aŋ yi hɛ sɔ.

¹⁹ Kɛrɛ ma Herodȧŋ ɔ fi-e, umalek ka ɔMarki ɔ tɔrinɛ ka Yosɛf ro Iyipt rǝ mǝrey,

²⁰ kɔ pa, Yokanɛ mǝ gbasi ɔwath yi ɔkara kɔŋ, mǝ kȧlanɛ ka ȧŋthɔf ŋa Isrɛl, kotȧy-e aŋfǝm aŋa thɛns tǝ kǝdif ɔwath-e aŋ po fi thɔŋ.

²¹ Kɔ yokanɛ ɔ gbasi ɔwath yi ɔkara kɔŋ-e, kɔ der ka ȧŋthɔf ŋa Isrɛl.

²² Kɛrɛ ma ɔ tǝl kǝpa Arkiliyɔsȧŋ ɔ sara ka aŋni ŋa ɔkas kɔŋ Herod-e, ɔ nesa tǝ kǝkɔ ri. Ɔwa ma Kuru ɔ maŋ kɔ rǝ mǝrey-e, ɔ kɔnɛ ka mȧgbȧp ma ro Kalili.

²³ kɔ der, ɔ yirȧ ka kȧpet ȧke ma tela Nasarɛth; kȧmȧ ȧrim ra ɔnȧbi rǝ lasǝr ara pa, A ba kǝbont kɔ uNasarɛth.