Mathiu 19 - Ȧŋlemrȧnɛ Ȧfu

¹ Ka pǝ re yi ma Yisɔsȧŋ ɔ gbanthi ȧsim ȧte-e, ɔ wur ro Kalili, ɔ der ka ȧŋgbȧp ŋa ro Yudia aŋa yi ro Yɔrdan mɔri.

² Ka suniya tǝbana tǝ tȧŋ kɔ, kɔ yeŋkǝs ŋa ri.

³ AŋFarisi sɔ aŋ der ro ŋɔŋ, kȧmȧ aŋ gbɔns kɔ, kaŋ pa, Pǝ yi ɔlompi ta wan duni tǝ kǝter ɔrani kɔŋ ta tȧy o tai-i?

⁴ kɔ wosa ɔ pa ro ŋaŋ, Nǝ tha karaŋ hɛ kǝpa kɔnɔ ɔwe bɛmpa ŋa kǝbi ka ɔtǝpɛr ɔ bɛmpa ŋa uruni dɛ yi ubɛra-i?

⁵ kɔ pa, Ta ȧŋsabu aŋe wan duni mǝ ɔ tey ɔkas kɔŋ yi ɔkara kɔŋ, ɔ gbapsa ɔrani kɔŋ; ɔwa ŋa ŋarǝŋȧŋ aŋ sǝkɛ adɛr ŋin-i?

⁶ Tiyȧŋ aŋ yi hɛ sɔ ŋarǝŋ kɛrɛ ukin. Ɔwa ȧrȧ Kuru ɔ po tɔsa der ɔkin-e, tȧ wuni ɔ te ri tɔsi.

⁷ kaŋ pa ro ŋɔŋ, kɔyɛŋ mǝn Mosis ɔ yamari tǝ kǝsɔŋ areka ŋa kǝsakanɛ dɛ yi tǝ kǝter kɔ-e?

⁸ kɔ pa ro rɔŋaŋ, Ta salata kabak ka nu ɛmerȧ Mosis ɔ selɔ nu tǝ kǝter aŋrani a nu, kɛrɛ ka katǝp pǝ yi hɛ yaŋ.

⁹ Ɔwa i kanɛ nu, wuni o wuni ɔwe mǝ ter ɔrani kɔŋ, thambe ta ȧŋsabu ŋa kǝrǝp, ɔ kȧl nȧntȧ ulɔm-e, ɔ yɔ kǝrǝp. Kɔnɔ sɔ ɔwe mǝ nȧntȧ ɔbɛra ɔwe a ter-e, ɔ yɔ kǝrǝp.

¹⁰ Ka aŋkarande ŋɔŋ aŋ pa ro ŋɔŋ, Bepi ya pǝ yi kǝtɔŋ ka ɔwan duni yi ɔrani kɔŋ-e, pǝ tǝ yi naŋ fisa tǝ kǝte nȧntȧ.

¹¹ kɔ pa ro ŋaŋ, Afǝm bɛ tha mǝ gbǝli malanɛ ȧŋpa aŋe, thambe ŋaŋ ka aŋa a sɔŋ ŋi.

¹² kotȧy-e afǝm agbȧy aŋ yi aŋa a kom yaŋ kǝbi ka ator ta aŋkara ŋaŋ; afǝm agbȧy alɔm aŋ yi aŋa afǝm a kǝpet aŋ gbai; ɔwa alɔm aŋ yi aŋa sǝkinɛ agbȧy salata rȧbȧy ra ro riyana. Kɔnɔ ɔwe gbǝli wop ti ta ɔ wop ti.

¹³ Ka a kȧrȧ afɛth ka Yisɔs kȧmȧ ɔ reŋ mȧta mɔŋ ro ŋaŋ, ɔ ramnɛ; kɛrɛ aŋkarande aŋ ŋal ŋa.

¹⁴ Kɛrɛ Yisɔsȧŋ ɔ pa, Ter aŋfɛth kȧmȧ aŋ der ro mi, te nu bɛnt ŋa, kotȧy-e, awunɔŋ ŋa ba rȧbȧy ra ro riyana.

¹⁵ kɔ reŋ ŋa mȧta mɔŋ, kɔ wur ri ɔ kɔnɛ.

¹⁶ Ɔwa kǝla, wuni kin ɔ der ro ŋɔŋ, kɔ pa, Karmɔkɔ, ko tȧy tǝfinɔ tǝ mǝ i yɔ kȧmȧ i sɔthɔ aŋesǝm thǝbana-e?

¹⁷ Ka Yisɔsȧŋ ɔ pa, kɔyɛŋ mǝ mǝ bont mi ufinɔ-e? Ukin gbo kɔnɔ yi ufinɔ, kɔnɔ yi mɔ Kuruȧŋ. Kɛrɛ bepi mǝ yema wɔŋ ka aŋesǝm, wop ɛthɔ.

¹⁸ kɔ yif kɔ, Ɛreke-e? Ka Yisɔsȧŋ ɔ pa, Te dif, te yɔ kǝrǝp, te keya, te sɔŋ mǝseri ma rǝyem.

¹⁹ Yikis ɔkas ka mu yi ɔkara ka mu, ɔwa mǝ yi tǝ kǝbɔthǝr ɔfatanɛ ka mu mɔ mǝ bɔthǝrnɛ.

²⁰ Ka ɔlaŋgba ɔ pa ro ŋɔŋ, Mȧtȧy ame bɛ i po wop kǝbi ka rafɛth ra mi. Ko i paŋ ras-e?

²¹ Ka Yisɔsȧŋ ɔ pa ro ŋɔŋ, Bepi mǝ yema yi ugbenthis-e, kɔnɛ mǝ thila ara mǝ ba, ɔwa mǝ sɔŋ ȧŋmɔnɛ. Mǝ tǝ ba kɛŋ ro riyana, ɔwa der, mǝ tȧŋ mi.

²² Kɛrɛ ma ɔlaŋgba ɔ tǝl ȧsim ȧte ɔ kɔnɛ yi ɔnɔsinɛ, ȧtesoma-e ɔ ba yɛt ɛgbathi.

²³ Ka Yisɔs ɔ pa ka aŋkarande ŋɔŋ, Tɛntɛnɛ i kanɛ nu, tȧy tǝbaki mǝdɛr tȧŋ ta uyola tǝ kǝwɔŋ ka rȧbȧy ra ro riyana.

²⁴ I kanɛ nu sɔ, tȧy tǝyai tȧŋ ta ȧyɔkmɛ tǝ kǝsɔnthɔs rafɔr ra ȧŋsɛni, pǝthasi uyola tǝ kǝwɔŋ ka rȧbȧy ra Kuru.

²⁵ Ma aŋkarande ŋɔŋ aŋ tǝl ti-e, aŋ kabanɛ ɔthasǝr, kaŋ pa, Kanɛ thɔŋ mǝ gbǝli kisi-e?

²⁶ Ka Yisɔsȧŋ ɔ kǝli ŋa tǝŋ, kɔ pa, Ka afǝm aŋfɔsɔ ŋati aŋ yi hɛ, kɛrɛ ka Kuru aŋfɔsɔ ŋati bɛ aŋ yi.

²⁷ Ka Pitarȧŋ ɔ pa ro ŋɔŋ, Kǝla, saŋ sǝ po tey bɛ kȧmȧ sǝ tȧŋ mu; tiyȧŋ ko ȧrȧm ŋaŋ mǝ sǝ sɔthɔ-e?

²⁸ Ka Yisɔsȧŋ ɔ pa, Tǝ tɛntɛnɛ i kanɛ nu-e, ka ȧdȧru rǝfu ma ɔWan ka wuni mǝ ɔ yirȧ ka kawaŋ ka rȧbȧy ka aŋyiki ŋɔŋ-e, naŋ aŋa po tȧŋ mi, naŋ sɔ nǝ tǝ yirȧ ka tǝwaŋ ta rȧbȧy tɔfɔt tǝrǝŋ, nǝ tǝ thonkas ɛbɔnsɔŋ tɔfɔt yɛrǝŋ ya aŋIsrɛl,

²⁹ Ɔwa wuni o wuni ɔwe po tey ɛseth, thalɔm awɔnt aruni, thalɔm awɔnt abɛra, thalɔm ukas, thalɔm ukara, thalɔm urani, thalɔm awuth, thalɔm tǝthɔf salata ȧŋes a mi-e, ɔ tǝ bȧr sɔthɔ mɔlɔ ma kǝtǝma kɛmɛ kin, ɔwa ɔ tǝ sɔthɔ sɔ aŋesǝm thǝbana.

³⁰ Kɛrɛ agbȧthi aŋa yi ȧtɔtɔkɔ aŋ tǝ yi alǝpsɔ. Ɔwa aŋa yi alǝpsɔ aŋ tǝ yi ȧtɔtɔkɔ.