Mathiu 18 - Ȧŋlemrȧnɛ Ȧfu

¹ Ka ȧŋlɔkɔ ŋati aŋkarande aŋ der ka Yisɔs, ka aŋ pa, Kanɛ mǝ tha yi ubana bɛ ka rȧbȧy ra ro riana-e?

² kɔ tela uwath ulɔl ro ŋɔŋ, ɔ tǝmǝr kɔ kǝtɔŋ ka ŋaŋ,

³ kɔ pa, Tɛntɛnɛ i kanɛ nu, Thambe nǝ lȧfthi ɛmerȧ ɛ nu-e, nǝ sǝkɛ mɔ afɛth alɔl-e, nǝ gbǝli hɛ wɔŋ ka rȧbȧy ra ro riyana.

⁴ Tiyȧŋ wuni o wuni ɔwe mǝ sanɛ mɔ ɔwath ulɔl ɔwe-e, kɔnɔ tha yi ubana ka rȧbȧy ra ro riyana.

⁵ Ɔwa bepi wuni o wuni ɔ malanɛ uwath ulɔl ukin uwunɔŋ ka ȧŋes a mi-e, minɛ ɔ malanɛ.

⁶ Kɛrɛ bepi wuni o wuni ɔ yɔ ukin ka aŋlɔl aŋe aŋa lanɛ mi ɔ pǝnthbǝla-e, pǝ tǝ yi kɔ fisa bepi a gbak kɔ ȧsar ȧgbɔlȧ ȧbana ka kalim kɔŋ, a mɔtas kɔ ka ɔbɔlɔŋ wa kȧbȧŋ.

⁷ Mɔnɛ ka ȧdȧru ta mətȧy mǝpǝnthbǝla, kotȧy-e mȧtȧy mati mǝ ba kǝder; kɛrɛ mɔnɛ ka ɔwuni kati ɔwe mǝ kȧrȧ ma!

⁸ Tiyȧŋ bepi kȧta ka mu thalɔm akatǝk ka mu kǝ yɔ mu mǝ pǝnthbǝla-e, gbǝk ki, mǝ fitha ki kȧmȧ kǝ bɔlȧnɛ mu. Pǝ tǝ yi mu fisa bepi mǝ wɔŋ ka aŋesǝm mun lopȧnɛ thalɔm mun tǝtkɛ pǝthasi kǝba mǝta mȧrǝŋ thalɔm tatǝk tǝrǝŋ, ɔwa a fitha mu ka anant nǝthǝbana.

⁹ Ɔwa bepi rȧfɔr ra mu rǝ yɔ mu mǝ pǝnthbǝla-e, kothi ri, mǝ fitha ri kȧmȧ rǝ bɔlȧnɛ mu. Pǝ tǝ yi mu fisa bepi mǝ wɔŋ ka aŋesǝm yi rǝfɔr rin-e, pǝthasi kǝba ɛfɔr yɛrǝŋ ɔwa a fitha mu ka anant na ro yahanama.

¹⁰ Botnɛ nu kȧmȧ nǝ te sai ukin ka aŋlɔl aŋe, kotȧy-e, i kanɛ nu kǝpa ro riyana aŋmȧleka ŋaŋ aŋ kǝli lɔkɔ o lɔkɔ ȧder ra ɔKas kȧmi ɔwe yi ro riyana.

¹¹ Ȧtesoma-e ɔWan ka wuni ɔ der tǝ kǝkisis aŋa po dinɛ.

¹² To nǝ nanɛ-e? Bepi wuni ɔ ba tǝlɔmɛ kɛmɛ kin, ɔwa ukin ka ŋaŋ ɔ sɔkar-e, ɔ tey hɛ antǝgba tanlɛ tɔfɔt tamthǝrɛŋanlɛ, ɔ kɔnɛ ka tȧteŋ tǝ kǝthɛns ɔwe sɔkar-i?

¹³ Ɔwa bepi pǝ yi ɔ fir kɔ-e, i kanɛ nu tɛntɛnɛ ɔ tǝ selǝr kɔ mǝbɔnɛ pǝthasi ta antǝgba tanlɛ tɔfɔt tamthǝrɛŋanlɛ aŋa te sɔkar.

¹⁴ Ya pǝ yi sɔ-e, pǝ yi hɛ mȧselɔ ma ɔKas ka nu ɔwe yi ro riyana kȧmȧ ukin ka aŋlɔl aŋe ɔ dinɛ.

¹⁵ Ɔwa bepi ɔwɔnt mu ɔ yɔ mu ɔlǝs-e, kɔ tɔri kɔ ɔlǝs wɔŋ na ŋarǝŋ son; bepi ɔ sua mu ɛlǝns-e, mǝ po sɔthɔ ɔwɔnt mu,

¹⁶ kɛrɛ bepi ɔ sua hɛ mu ɛlǝns-e, banȧnɛ wuni kin thalɔm ŋarǝŋ kȧmȧ ka tasǝŋ ta mǝseri ŋarǝŋ thalɔm asas-e, rim o rim rǝ tǝma.

¹⁷ Ɔwa bepi ɔ kasi kǝsuwa ŋa ɛlǝns-e, kanɛ ti ka aŋchɔch. Bepi ɔ selɔ hɛ sua ɛlǝns ka aŋchɔch-e, ta ɔ yi ro mu mɔ wuni tel dɛ yi ugbasi ɛfȧk.

¹⁸ Tǝ tɛntɛnɛ i kanɛ nu, rǝka o rǝka ara mǝ nǝ sek nɔru rǝ tǝ yi rǝsek ro riyana, ɔwa rǝka o rǝka ara mǝ nǝ sǝli ka ȧdȧru-e rǝ tǝ yi rǝsǝli ro riyana.

¹⁹ I kanɛ nu sɔ, bepi ŋarǝŋ kǝtɔŋ ka nu aŋ ba dim din ka ȧdȧru ta tȧy o tȧy ȧtȧ mǝ nǝ yif-e, ɔKas kȧmi ɔwe yi ro riyana ɔ tǝ yɔna nu ti.

²⁰ kotȧy-e, ro ŋarǝŋ thalɔm asas-e mǝ aŋ gbanɛ dɛr rɔkin ka ȧŋes a mi-e, rǝ i yi kǝtɔŋ ka ŋaŋ.

²¹ Ka Pitarȧŋ ɔ der ɔ pa ro ŋɔŋ, Mariki, amɔlɔ ɔwɔnt mi mǝ ɔ yɔ mi ɔlǝs, ɔwa i tera kɔ-a? Haŋ kǝtǝma tamthǝdɛrǝŋ-a?

²² Ka Yisɔsȧŋ ɔ wosa ɔ pa ro ŋɔŋ, I pa hɛ ro mu haŋ tamthǝdɛrǝŋ, kɛrɛ haŋ ɛlɔkɔ tǝgba tǝsas tɔfɔt kǝtǝma tamthǝdɛrǝŋ.

²³ Tiyȧŋ rȧbȧy ra ro riyana rǝ bȧlȧnɛ mɔ ubȧy ulɔm ɔwe yema lɔmǝsnɛ yi ɛbɔy yɔŋ.

²⁴ Ma ɔ tǝp kǝlɔmǝs-e, a kȧrȧ ukin ro ŋɔŋ ɔwe ba kǝram kɔ ɛtalent ɛwul tɔfɔt.

²⁵ Kɛrɛ ma ɔ te ba rǝka tǝ kǝrȧm-e, ɔmarki kɔŋ ɔ yamari kȧmȧ a thila kɔ, ɔrani kɔŋ-o, aŋwuth ŋɔŋ-o yi ara ɔ ba bɛ kȧmȧ ȧŋrȧm aŋ wur.

²⁶ Tiyȧŋ ȧŋbɔy ɔ gbǝpsa, kɔ nɛmthɛnɛ kɔ, ɔ pa, Pa, muyu mi ɔwa i ti po ram mu bɛ.

²⁷ Ka ȧney aŋ wop ɔmarki ka ȧŋbɔy ŋati, kɔ ter kɔ, ɔ tera kɔ sɔ rabei.

²⁸ Kɛrɛ ȧŋbɔy ukin kati ɔ wur, kɔ fir ɔkos kɔŋ ȧbɔy ɔwe ba kǝram kɔ ɛsiliŋ kɛmɛ kin. Kɔ wop kɔ, ɔ tɔker kɔ ro bolo, ɔ pa, Ram mi ara mǝ ba kǝram mi.

²⁹ Ka ɔkos kɔŋ ȧbɔy ɔ gbǝpsa ɔ nɛmthɛnɛ, kɔ pa, Muyu mi, ɔwa i ti ram mu.

³⁰ Kɛrɛ ɔ selɔ hɛ, ɔ kɔ bot kɔ ka ȧŋseth ŋa tǝrǝŋka haŋ ɔ ram rabei rɔŋ.

³¹ Ma aŋkos ŋɔŋ ɛbɔy aŋ nənk ȧte po yɔnɛ-e, ȧney ȧbana aŋ wop ŋa, kaŋ der aŋ der aŋ tɔri ɔmarki ka ŋaŋ ȧte yɔnɛ bɛ.

³² Ka ɔmarki kɔŋ ɔ tela kɔ ro ŋɔŋ, ɔ pa, Munɔ, mun ȧbɔy ulǝs, i tera mu rȧbȧy araŋ bɛ, pǝkasifɛ mɔ nɛmthɛnɛ mi.

³³ Munɔ, mǝ gbǝli hɛ sɔ ba ȧney ta ɔkos mu ȧbɔy-i, mɔ minɛȧŋ i ba mu ȧney-i?

³⁴ Ka ɔmarki kɔŋ ɔ bansȧ, kɔ lȧnki kɔ kia aŋa mǝ thalǝr afǝm haŋ ɔ po ram bɛ ara ɔ ba tǝ kǝram.

³⁵ Ya ɔKas kȧmi ro riyana mǝ ɔ yɔ nu sɔ bepi naŋ bɛ nǝ tera hɛ wuni o wuni ɔwɔnt kɔŋ ka ɛmerȧ ɛ nu.