Mathiu 16 - Ȧŋlemrȧnɛ Ȧfu

¹ Ka aŋFarisi yi aŋSadusi aŋ der ro ŋɔŋ tǝ kǝmɛm kɔ, kaŋ yif kɔ tǝ kǝtɔri ŋa amisali kǝwur ro riyana.

² Kɛrɛ Yisɔsȧŋ ɔ lasi, ɔ pa ro ŋaŋ, Ma rȧfɔy rǝ bek-e, nǝ pa, Kǝsalaŋ kǝ tǝ yi ȧtesoma-e ȧkuru kǝ yim.

³ Ɔwa, ka rabǝth nǝ pa sɔ-e, Kǝnkǝl kǝ tǝ der thonɔŋ ȧtesoma-e ȧkuru kǝ kuluŋanɛ kǝyim-o yi kǝbiȧŋ. O naŋ amunafaki, nǝ tȧrȧ tǝ kǝgbaski ȧder ra akuru-e, kɛrɛ nǝ tɛ hɛ gbaski ɛmisali ya ɛlɔkɔ.

⁴ Rǝkomra rǝlǝs rǝrǝpi rǝ thɛns ɛmisali, kɛrɛ a ba hɛ kǝsɔŋ ri amisali thambe ȧŋmisali ŋa Yona. Kɔ tey ŋa ɔ kɔnɛ.

⁵ Ma aŋkarande aŋ fǝsi romɔri-e, aŋ pǝnɛ tǝ kǝbananɛ tǝbo.

⁶ Ka Yisɔs ɔ pa ro ŋaŋ, Botnɛ nu, ɔwa pɛndaf nu ɛgbith ya aŋFarisi yi aŋSadusi.

⁷ kaŋ fɔfǝranɛ, aŋ pa, Sǝ karanɛ hɛ tǝbo.

⁸ Ma Yisɔsȧŋ ɔ tȧrȧ ti-e, ɔ pa ro ŋaŋ, O naŋ nǝ ba kǝlanɛ kǝthan, to som mǝ nǝ fɔfǝranɛ ta ma nǝ te ba tǝbo-e?

⁹ Pǝ tha sɔk hɛ nu-i, ɔwa nǝ kala hɛ ɛmerȧ ta tabo tamath ta ɛwul tamath, yi amɔlɔ tǝbǝlai nǝ gbasi-i?

¹⁰ Thalɔm tabo tamthǝdɛrǝŋ ta ɛwul yanlɛ sɔ, yi amɔlɔ tǝbǝlai nǝ gbasi-i?

¹¹ To som nǝ te tȧrȧ kǝpa i fɔfȧnɛ hɛ nu ta tǝbo-e? Kɛrɛ pɛndaf nu ta ɛgbith ya aŋFarisi yi aŋSadusi.

¹² Ka pǝ sɔk ŋa kǝpa ɔ yamari hɛ ŋa tǝ kǝpɛndaf ɛgbith ya tǝbo, kɛrɛ ɔ yamari ŋa ta kathǝksa ka aŋFarisi yi aŋSadusi.

¹³ Ma Yisɔsȧŋ ɔ bek ka ȧŋgbȧp ŋa ro Sisaria Filipay-e, ɔ yif aŋkarande ŋɔŋ, ƆWan ka wuni, kanɛ aŋfǝm mǝ aŋ pa ɔ yi-e?

¹⁴ kaŋ pa, Alɔm aŋ pa Yɔnȧŋ ɔBaftays; alɔm Ilayaŋ, alɔm Yɛrimayaŋ, thalɔm ukin ka aŋnabi.

¹⁵ Ɔ pa ro ŋaŋ, Kɛrɛ naŋ, kanɛ nǝ pa minɛȧŋ i yi-e?

¹⁶ Ka Saymɔn Pitarȧŋ ɔ lasi, ɔ pa, Munɔ yi ɔKrayst, ɔWan ka ɔKuru ukǝli.

¹⁷ Ka Yisɔs ɔ pa ro ŋɔŋ, Munɔ mǝ ba aruba Saymɔn ɔwan ka Yona, pǝkasifɛ wuni kǝpet ɔ tɔri hɛ ti ro mu, kɛrɛ ɔKas kȧmi ɔwe yi ro riyana.

¹⁸ I kȧl sɔ pa ro rɔmu, Munɔ yi Pita, ɔwa rokɔm ka aŋgbalaŋ aŋe rǝ mǝ i tǝmǝr aŋchɔch a mi; ɔwa tadare ta ro kǝrǝfi tǝ ba hɛ kǝtham ŋi.

¹⁹ I ti sɔŋ mu mȧsapɔ ma rȧbȧy ra ro riyana, ɔwa koko ara mǝ sek ka ȧdȧru-e a tǝ sek ri ro riyana, dɛ yi koko ara mǝ sǝli ka ȧdȧru-e a tǝ sǝli ri ro riyana.

²⁰ kɔ yamari aŋkarande ŋɔŋ kȧmȧ aŋ te tɔri wuni o wuni kǝpa kɔnɔ yi ɔKrayst.

²¹ Ka ȧŋlɔkɔ ŋati Yisɔsȧŋ ɔ tǝp kǝtɔri aŋkarande ŋɔŋ kǝpa ɔ ba kǝkɔ ro Yerusalɛm tǝ kǝnȧkȧsi mətȧy mǝgbȧthi ka mȧta ma aŋbȧki yi aŋfode ȧbana yi aŋkarmɔkɔ, ɔwa aŋ tǝ dif kɔ, ɔwa ka ȧŋrey aŋa bekȧ mǝsas a tǝ kȧl yokas kɔ.

²² Kȧ Pita ɔ kera kɔ rayɛr, kɔ ŋal kɔ, ɔ pa, Ta pǝ bɔlȧnɛ mu Pa. Ȧte tǝ ba hɛ kǝyi mu.

²³ Kɛrɛ ɔ fǝlɛ, ɔ pa ka Pita, Tɔnɛ mi raŋ Sethani. Mǝ yi mi da rǝpǝnthbǝla ȧtesoma-e munɔ mǝ kǝli hɛ ta mȧtȧy ma Kuru, mǝ kǝli gbo ta mȧtȧy ma afǝm a kǝpet.

²⁴ Ka Yisɔsȧŋ ɔ pa ka aŋkarande ŋɔŋ, Bepi wuni ɔ wuni ɔ yema tȧŋ mi-e, ta ɔ pɛnsanɛ, ɔ gbasi akǝnt kɔŋ kǝpǝŋkinɛ, ɔ tȧŋ mi.

²⁵ kotȧy-e wuni o wuni ɔwe yema kisis aŋesǝm ŋɔŋ-e, ɔ tǝ dim ŋi; ɔwa wuni o wuni ɔwe mǝ dim aŋesǝm ŋɔŋ salata mi ɔ tǝ fir ŋi.

²⁶ To mǝ pǝ naŋfas wuni bepi ɔ sɔthɔ ȧdȧru bɛ, kɛrɛ ɔ dim aŋesǝm ŋɔŋ-e? Thalɔm ko wuni mǝ ɔ gbǝli sɔŋ tǝ kǝsinkar aŋesǝm ŋɔŋ-e?

²⁷ kotȧy-e ɔWan ka wuni ɔ tǝ der ka aŋyiki ŋa ɔKas kɔŋ yi aŋmȧleka ŋɔŋ. Ɔwa ka ȧŋlɔkɔ ŋati ɔ tǝ sɔŋ wuni o wuni amɔlɔ ma mȧyɔs mɔŋ mǝ yi.

²⁸ Tɛntɛnɛ i kanɛ nu, alɔm aŋ tǝma nɔ aŋa te ba kǝnǝŋk rǝfi, haŋ aŋ nənk ɔWan ka wuni ɔ der ka rȧbȧy rɔŋ.