Mathiu 14 - Ȧŋlemrȧnɛ Ȧfu

¹ Ka ȧŋlɔkɔ ŋati Herodȧŋ ɔtɛtrark ɔ tǝl tȧgbuŋ ta Yisɔs.

² kɔ pa ka ɛbɔy yɔŋ, Ɔwe-e, Yɔnȧŋ ɔBaftays kɔnɔȧŋ. Ɔ po yokanɛ ka rafi, te ba ti mȧyɔs mǝkabanɛ ame mǝ tɔrinɛ ro ŋɔŋ.

³ Ȧtesoma-e Herodȧŋ ɔ po wop Yɔnȧŋ, ɔ sek kɔ, kɔ bot kɔ ka ȧŋseth ŋa tǝrǝŋka salata Herodias, ɔrani ka Filip ɔwɔnt kɔŋ.

⁴ Ȧtesoma-e Yɔn ɔ pa ro ŋɔŋ, Pǝ yi hɛ ɔlompi ta munɔ tǝ kǝba kɔ.

⁵ Ɔwa ma ɔ yema dif kɔ-e, ɔ nesa aŋfǝm, pǝkasifɛ aŋ nanɛ Yɔnȧŋ tǝ kǝyi unabi.

⁶ Kɛrɛ ka amet ma ȧŋrey aŋa a kom Hɛrɔdȧŋ-e, ɔwan ubɛra ka Hɛrɔdiyȧs ɔ thɔmɔ kǝtɔŋ ka ŋaŋ, ka pǝ bɔnɛ Hɛrɔdȧŋ.

⁷ Ta ȧŋsabu ŋati ɔ lahiri rǝ agbiŋ rokɔm tǝ kǝsɔŋ ɔbɔrkɔ koko ɔ thola.

⁸ Kɔnɔŋ, mɔ mǝ ɔya kɔŋ ɔ kanɛ kɔ-e, ɔ pa, Sɔŋ mi nɔ rǝ alɛfa rȧbomp ra Yɔn ɔBaftays.

⁹ Ka pǝ kɛtha ɔbȧy, kɛrɛ salata aŋgbiŋ ŋɔŋ-e, dɛ yi ŋaŋ aŋa yirȧ yi kɔn ka kǝdi-e, ɔ yamari tǝ kǝsɔŋ kɔ ri.

¹⁰ kɔ som kȧmȧ a gbetha rȧbomp ra Yɔn ka ȧŋseth ŋa tǝrǝŋka.

¹¹ Ka a kȧrȧ rȧbomp rɔŋ ka alɛfa, ɔwa a sɔŋ ri ka ɔwath bɛra, kɔ kera ri ka ɔkara kɔŋ.

¹² Ka aŋkarande ŋa Yɔn aŋ de gbasi kabel, kaŋ maŋk kɔ, kaŋ kɔ kanɛ ti ka Yisɔs.

¹³ Ma Yisɔsȧŋ ɔ tǝl ti-e, ɔ gbasi abil, kɔ kɔ rǝ dɛr ɔyeŋ. Ma aŋfǝm aŋ tǝl ti-e, aŋ tȧŋ kɔ ro gbaŋ kǝwur ka tapet.

¹⁴ kɔ wur ka ȧŋbil, ɔ nənk ȧruniya rǝbana, kɔ nǝŋka ŋa ȧney, ɔ damǝr aŋboma ŋaŋ.

¹⁵ Ɔwa ma rȧfɔy rǝ bek-e, aŋkarande ŋɔŋ aŋ der ro ŋɔŋ, aŋ pa, Ɔdɛr ɔwe ɔ yeŋ, ɔwa ȧŋlɔkɔ aŋ po thɔŋ thas. Ter aŋfǝm aŋ kɔnɛ, kȧmȧ aŋ kɔ ka tagbɔm, aŋ wayanɛ yɛt ɛdi.

¹⁶ Kɛrɛ Yisɔsȧŋ ɔ pa ro ŋaŋ, Aŋ ba hɛ tǝ kǝkɔ, sɔŋ ŋa nu yɛt ɛdi.

¹⁷ kaŋ pa ro ŋɔŋ, Sǝ ba gbo anɔ tǝbo tamath dɛ yi ɛlop ŋarǝŋ.

¹⁸ kɔ pa, Kara yi nɔ ro rɔmi.

¹⁹ kɔ yamari aŋfǝm kȧmȧ aŋ yirȧ ka akereŋ, kɔ gbasi tabo tamath yi ɛlop ŋarǝŋ, ɔwa ɔ kǝli rokɔm ka ȧkȧriyana, ɔ ruba yi, kɔ simǝth tabo, ɔ sɔŋ ti aŋkarande ŋɔŋ, ka aŋkarande aŋ sɔŋ aŋfǝm.

²⁰ Ka ŋa bɛ aŋ di, aŋ namra. Kaŋ gbas ɛbɛm ɛtianɛ aŋ lasǝr tǝbǝlai tɔfɔt tǝrǝŋ.

²¹ Ɔwa ŋaŋ aŋa di-e, aŋ yi mɔlɔ ma afǝm aruni ɛwul tamath kǝte lɔmanɛ bom-ŋaŋ dɛ yi afɛth.

²² Ka ɔlɛmp wati Yisɔsȧŋ ɔ tɔri aŋkarande ŋɔŋ tǝ kǝbaka ka ȧŋbil kȧmȧ aŋ tǝma kɔ kǝdi romɔri, haŋ ɔ po ter aŋfǝm aŋ kɔnɛ.

²³ Ma ɔ po ter aŋfǝm-e, ɔ gbep ka kateŋ, kɔn son tǝ kǝramnɛ. Ɔwa ma rȧfɔy rǝ bek-e, ɔ yirȧ ri kɔn son.

²⁴ Kɛrɛ ȧŋbil aŋ yi thɔŋ ro baŋ ratɔŋ, ka ɛmuŋkǝl ɛ sɔmpa ŋi, kotȧy-e aŋfef aŋ wurǝr ŋa rodi.

²⁵ Ma pǝ yema sɔk-e, Yisɔsȧŋ ɔ der ro ŋaŋ, ɔ kɔth ka kȧbȧŋ rokɔm.

²⁶ Ma aŋkarande aŋ nənk kɔ mɔ mǝ ɔ kɔth ka kȧbȧŋ rokɔm-e, aŋ nesa, kaŋ pa, Ayina ŋaŋ. Kaŋ sel ɛrɔŋ yi rǝnes.

²⁷ Ka ɔlɛmp wati Yisɔsȧŋ ɔ pa ro ŋaŋ, Bȧk nu tǝbuth; minɛȧŋ. Te nu nesa.

²⁸ Ka Pitarȧŋ ɔ pa, Pa, bepi munɔȧŋ-e, yamari mi i der ro rɔmu ka ȧmȧnt rokɔm.

²⁹ kɔ pa, Der. Ka Pitarȧŋ ɔ wur ro bil, ɔ kɔth ka ȧmȧnt rokɔm tǝ kǝder ka Yisɔs.

³⁰ Kɛrɛ ma ɔ nənk aŋfef abȧki-e, ɔ nesa. Ɔ tǝp kǝmɔta, kɔ sel ɛrɔŋ ɔ pa, Pa, kisis mi.

³¹ Ka ɔlɛmp wati Yisɔsȧŋ ɔ thanthi kȧta kɔŋ, ɔ wop kɔ, ɔ pa ro ŋɔŋ, Munɔ, mun ba kǝlanɛ kǝthan, kɔyɛŋ mǝ sikɛ-e?

³² Ɔwa maŋ po wɔŋ ka ȧŋbil-e, aŋfef aŋ thɔfɔla.

³³ Ka ŋaŋ aŋa yi ro bil aŋ bȧtho kɔ, aŋ pa, Tɛntɛnɛ munɔ yi ɔWan ka Kuru.

³⁴ Maŋ po fǝsi romɔri-e, aŋ bek ka aŋgbaŋ ŋa ro Kɛnɛsarɛt.

³⁵ Ma aŋfǝm ŋa ɔdɛr wati aŋ tȧrȧ kɔ-e, aŋ som ka ȧŋthɔf ŋati bɛ, aŋ kȧrȧ ro ŋɔŋ aŋfǝm bɛ aŋa yi atuy.

³⁶ kaŋ nɛmthɛnɛ kɔ kȧmȧ aŋ gboŋ hali gbo amɛsɛ ma aruma rɔŋ. Ɔwa ŋaŋ bɛ aŋa gboŋ kɔ-e, aŋ sɔthɔ kǝyeŋk mǝdɛr.