Mathiu 11 - Ȧŋlemrȧnɛ Ȧfu

¹ Ka pǝ re yi ma Yisɔsȧŋ ɔ po yamari aŋkarande ŋɔŋ tɔfɔt ŋarǝŋ-e, ɔ wur ri tǝ kǝthǝksa dɛ yi tǝ kǝtam ka tapet taŋ.

² Ma Yɔnȧŋ ɔ tǝl ka ȧŋseth ŋa tȧrǝŋka mȧyɔs ma Kraist-e, ɔ som akarande ŋɔŋ ŋarǝŋ.

³ kaŋ pa ro ŋɔŋ, Munɔ yi kɔn ɔwe ba kǝder-i, thalɔm sǝ ba tǝ kǝkǝli ta ulɔm-i?

⁴ Ka Yisɔsȧŋ ɔ lasi ɔ pa ro ŋaŋ, Kɔnɛ nǝ tɔri Yɔn mȧtȧy ama nǝ tǝl dɛ yi ama nǝ nənk.

⁵ Aŋfith aŋ sɔthɔ kakǝli ka ŋaŋ, aŋtǝtkɛ aŋ kɔth, aŋa ba rǝlel-e, a fethǝr ŋa, aŋtȧŋȧ aŋ tǝl, a yokas aŋfi-e, ɔwa a tɔri ȧkɛra kǝfinɔ ka Kuru ka ȧŋmɔnɛ.

⁶ Ɔwa wuni ka aruba wɔŋ ɔwe te fir tȧy tǝpǝnthbǝla ro rɔmi.

⁷ Maŋ po kɔnɛ-e, Yisɔs ɔ tǝp kǝpa ka ȧsuniya ta salata Yɔn, Ko tȧy tȧŋ nǝ kɔ ro wula tǝ kǝkǝli-e? Kǝthȧŋkɛ ȧke aŋfef aŋ yinktha-i?

⁸ Kɛrɛ ko tȧy tȧŋ nǝ wur tǝ kǝkǝli-e? Wuni ɔwe lopra ɛlopra ɛnɔfthɔ-i? Kǝla, ŋaŋ aŋa wɔŋ ɛlopra ɛnɔfthɔ aŋ yi ka ɛseth ya aŋbȧy.

⁹ Kɛrɛ kɔyɛŋ gbeŋ nǝ wur-e? Tǝ kǝnǝŋk unabi-i? Aŋko i kanɛ nu-e, uthasi unabi.

¹⁰ Kɔn ɔwe ta ɔwe a gbal kǝpa, Kǝla i som ɔsom kȧmi roder ka mu kǝdi, Ɔwe mǝ bɛmpa aroŋ da mu rodi kȧmu.

¹¹ Tǝ tɛntɛnɛ i kanɛ nu, kǝtɔŋ ka ŋaŋ aŋa afǝm abom aŋ kom wuni ɔ tha yokanɛ hɛ ɔwe yi ubana uthasi Yɔnȧŋ ɔBaftays. Kɛrɛ ɔwe yi ɔlɔl thɔŋ bɛ ka rȧbȧy ra ro riyana ɔ yi ubana uthasi kɔ.

¹² Kǝtǝp ka mȧrey ma Yɔn ɔBaftays haŋ ka ȧŋlɔkɔ aŋe rȧbȧy ra ro riyana rǝ tǝlnɛ afɔsɔ-e, ɔwa aŋfǝm ŋa afɔsɔ aŋ gbasi ŋi rǝ afɔsɔ.

¹³ kotȧy-e aŋnabi yi aŋthɔ aŋ nȧbi haŋ ka kȧder ka Yɔn.

¹⁴ Ɔwa bepi nǝ selɔ tǝ kǝmalanɛ ti-e, Ilaya kɔn ɔwe, ɔwe ba tǝ kǝder.

¹⁵ Ɔwe ba ɛlǝns ta ɔ tǝl.

¹⁶ Ko rǝka raŋ mǝ i lomɔ rȧkomra are-e? Rǝ bȧlȧnɛ mɔ afɛth aŋa yirȧ ka ɔdɛr ɔthila, aŋ muti aŋkos ŋaŋ,

¹⁷ kaŋ pa, Sǝ fɛŋa nu tulɛŋ, nǝ thɔmɔ hɛ; sǝ leŋa nu mǝleŋ ma rǝbora, kɛrɛ nǝ bok hɛ.

¹⁸ kotȧy-e Yɔnȧŋ ɔ der hɛ rǝ kǝdi thalɔm rǝ kǝmun, kaŋ pa, Ɔ ba ukǝrǝfi.

¹⁹ ƆWan ka wuni ɔ der rǝ kǝdi dɛ yi rǝ kǝmun, ɔwa aŋ pa, Kǝli ulaŋgba uwɔnthi rɛ umun ubana-e, uyathki ka aŋthoŋkla ɛfȧk yi aŋfǝm ŋa ɛhakɛ. Kɛrɛ kǝtemp kǝ tǝ sɔthɔ mǝmari ka mȧyɔs mati.

²⁰ Ka ȧŋlɔkɔ ŋati ɔ tǝp kǝthɛkɛ tapet ro ɔ tha po yɔ mȧyɔs mɔŋ mǝkabanɛ, pǝkasifɛ aŋ thupi hɛ, kɔ pa,

²¹ Mɔnɛ ro mu Korasin! Mɔnɛ ro mu Bɛthsayda! kotȧy-e bepi mȧyɔs mǝkabanɛ ama a po yɔ kǝtɔŋ ka nu-e, a yɔ ma naŋ ro Tair dɛ yi ro Sidon-e, aŋ tǝ po naŋ thupi ɔwoni rǝ kotha kǝnɛthɛ dɛ yi rǝ ros.

²² Kɛrɛ i kanɛ nu, pǝ tǝ yi ɔfisa ta ro Tair yi ro Sidon ka ȧŋrey ŋa kǝthoŋkas pǝthasi nu.

²³ Ɔwa munɔ Kepaniyɔm, a tǝ ŋata mu ro riana-i? A tǝ thora mu ro kǝrǝfi! kotȧy-e bepi aŋ po naŋ yɔ mȧyɔs mǝkabanɛ ro Sɔdɔm ama a po yɔ ro mu-e, kǝ tǝ tǝma naŋ haŋ ka-ake.

²⁴ Kɛrɛ i kanɛ nu, pǝ tǝ yi ɔfisa ta ȧŋthɔf ŋa ro Sɔdɔm ka ȧŋrey ŋa kǝthoŋkas pǝthasi munɔ.

²⁵ Ka ȧŋlɔkɔ ŋati Yisɔsȧŋ ɔ pa, I mɔmɔ mu, ɔKas ɔMarki ka ro riyana yi ȧdȧru, pǝkasifɛ mǝ po maŋk mȧtȧy ame ka aŋtempi yi aŋtara tȧy, ɔwa mǝ ŋaibi ma ka tǝlɛnth.

²⁶ Aŋko, ɔKas, ȧtesoma-e ya pǝ yi ɔfinɔ ka kakǝli ka mu.

²⁷ ƆKas kȧmi ɔ po sɔŋ mi mətȧy bɛ, ɔwa wuni o wuni ɔ tɛ hɛ ɔWan thambe ɔKas; ɔwa wuni o wuni ɔ tɛ hɛ ɔKas thambe ɔWan dɛ yi ka ɔwe ɔWan ɔ yema tǝ kǝŋaibi kɔ.

²⁸ Der nu ro rɔmi, naŋ bɛ aŋa mǝ thɔrɔ dɛ yi aŋa ba tothe tǝlel, ɔwa i ti sɔŋ nu kǝfothanɛ.

²⁹ Gbasi kȧronke kȧmi nǝ rǝnȧ ki, kȧmȧ nǝ thǝkǝs ro rɔmi; kotȧy-e min thɔfǝl bɛm, i kȧl ba ȧmerȧ athoranɛ, ɔwa nǝ tǝ fir kǝfothanɛ ka ɛŋesǝm ɛ nu.

³⁰ kotȧy-e kȧronke kȧmi kǝ tui hɛ tȧy, ɔwa akothe kȧmi kǝ fǝŋf.