Mark 6 - Ȧŋlemrȧnɛ Ȧfu

¹ kɔ wur ri, ɔ der ka ȧŋthɔf ŋɔŋ, ka aŋkarande ŋɔŋ aŋ tȧŋ kɔ.

² Ma ȧŋrey ŋa aŋsabath aŋ bek-e, ɔ təp kəthəksa ka ȧŋseth agbanɛ. Ɔwa ŋa agbȧthi aŋa təlȧ kɔ aŋ kabanɛ, aŋ pa, Reke ɔlaŋgba ɔwe ɔ sɔthɔ mȧtȧy ame-e? Ɔwa ko kətemp kaŋ a sɔŋ ɔlaŋgba ɔwe-e, kȧmȧ ɔ yɔ məyɔs məbana məwunɔŋ ka mȧta mɔŋ-e?

³ Ɔkamdɛr thahɔ ɔwe-i? Ɔwan uruni ka Meri, ɔwɔnt uruni ka Yeməs, Yoses, Yuda yi Saymɔnȧŋ-i? Ɔwa aŋwɔnt ŋɔŋ abɛra aŋ yi hɛ sɔ nɔ yi saŋ-i? kaŋ ba məbaŋ ta atɔŋ

⁴ Kɛrɛ Yisɔs ɔ pa ro ŋaŋ, Unabi ɔ paŋ hɛ yiki, thambe ka ȧŋthɔf ŋɔŋ, kətɔŋ ka aŋfəm ŋɔŋ, yi ka ȧŋseth ŋɔŋ gbeŋ.

⁵ Ɔwa ɔ gbəli hɛ yɔ məyɔs məbana ri, ɔ deŋ gbo mȧta mɔŋ rə aboma athȧn, ɔ yenkəs ŋa.

⁶ kɔ kabanɛ salata kate lanɛ ka ŋaŋ. Kɔ kɔnɛ kəthəksa ka tagbɔm bɛ.

⁷ kɔ tela aŋtɔfɔt ŋarəŋ ro ŋɔŋ, ɔ təp kəsom ŋa ŋarəŋ ŋarəŋ, kɔ sɔŋ ŋa afɔsɔ rokɔm ka aŋkərəfi aləs.

⁸ Ɔ yamari ŋa kȧmȧ aŋ te kera rəka o rəka ka ȧŋbiyas, thambe kətək, hali kəbo, agbaŋfa, hali akala ka ɛbuthu yaŋ.

⁹ Kɛrɛ ta aŋ wɔŋ ɛkɔftha, ɔwa ɔ kȧl pa, Te wɔŋ suma tərəŋ.

¹⁰ kɔ pa ro ŋaŋ, Rə aseth o seth nə wɔŋ-e, yi ri nu haŋ nə wur ɔdɛr wati.

¹¹ Ɔwa dɛr ro a te malanɛ nu-e thalɔm a te təlȧ nu-e, ma nə wur ri-e, koŋkoŋ kabof ȧke yi ka ȧtȧtək ta nu ratha tə kəseri ro ŋaŋ. Tɛntɛnɛ i pa ro nu, Pə tə yi fisa ta Sɔdɔm yi Kɔmɔra ka ȧŋrey ŋa kathoŋkas pəthasi kȧpet kati.

¹² kaŋ kɔnɛ, aŋ taməs kəpa afəm aŋ yi tə kəthupi.

¹³ kaŋ wurɔ akərəfi agbȧthi, kaŋ sop atuy agbȧthi mȧro, kaŋ yenkəs ŋa.

¹⁴ Ka ɔbȧy Hɛrɔdȧŋ ɔ təl ta atɔŋ, pəkasifɛ ȧŋes ŋɔŋ aŋ po gbanthɛnɛ dɛr o dɛr, kɔ pa, Yɔn ɔBaftays ɔ po yokanɛ ka rafi. Tiyȧŋ mȧyɔs məkabanɛ ame mə tɔrinɛ ro ŋɔŋ.

¹⁵ Alɔm aŋ pa, Ilaya, kɔnɔŋ. Ka aŋlɔm aŋ pa, Unabi wɔŋ mɔ aŋnabi abana.

¹⁶ Kɛrɛ ma Hɛrɔdȧŋ ɔ təl ti-e ɔ pa, Yɔnȧŋ ɔwe i gbetha rabomp-e, ɔ po yokanɛ.

¹⁷ Ȧtesoma-e Hɛrɔdȧŋ kɔn kɔnɔnɛ ɔ po som tə kəwop Yɔnȧŋ, ɔ sek kɔ ka ȧŋseth ŋa tərəŋka salata Herodias, ɔrani ka Filip ɔwɔnt kɔŋ uruni, kotȧy-e ɔ po nȧntȧ kɔ.

¹⁸ Ȧtesoma-e Yɔnȧŋ ɔ pa ka Hɛrɔd, Pə yi hɛ ɔlompi tə kənanta ɔrani ka ɔwɔnt mu.

¹⁹ Tə Herodias ɔ bansȧ ta atɔŋ, ɔ yema naŋ tə kədif kɔ, kɛrɛ ɔ gbəli hɛ.

²⁰ Ȧtesoma-e Hɛrɔd ɔ nesa Yɔnȧŋ, ma ɔ tȧrȧ kəpa ɔ yi wuni lompi, ɔwa usəm-e. Kɔ bɛnɛ kɔ. Ma ɔ təlȧ kɔ-e, pə kɛtha kɔ rə ȧmerȧ, kɛrɛ pə bɔnɛ kɔ tə kətəla kɔ.

²¹ Ma ȧrey ȧfɔy tȧy aŋ bek-e, Hɛrɔdȧŋ ɔ fak met salata ȧŋrey aŋa a kom kɔ ta aŋyola-o, aŋkurgba-o, yi aŋfəm abana ŋa ro Kalili bɛ.

²² Ma ɔwan ubɛra ka Herodias gbeŋ ɔ wɔŋ ɔ thɔmɔ-e, pə bɔnɛ Herodȧŋ yi ŋaŋ aŋa yirȧ yi kɔnɔŋ-e. Kɔ pa ka ɔwan ubɛra, Koko mə tholir mi bɛ-e i ti sɔŋ mu ri.

²³ kɔ gbiŋ ka ɔwan ubɛra, Koko mə yif mi i ti sɔŋ mu, hali ras ȧŋthɔf a mi-e, i gbai ŋi ratɔŋ.

²⁴ Ka ɔwath ubɛra ɔ wur, ɔ yif ɔkara kɔŋ, Ko rəka raŋ mə i thola-e? Ka ɔkara kɔŋ ɔ pa, Rȧbomp ra Yɔn ɔBaftays.

²⁵ Ka ɔwath ubɛra ɔ timɔnɛ kəkɔ ka ɔbay-e, ɔ pa, I yema kȧmȧ mə sɔŋ mi thethe rə alɛfa rȧbomp ra Yɔn ɔBaftays.

²⁶ Ka ɔbȧy ɔ ba ɔnɔsinɛ ɔbana, kɛrɛ ta ɛgbiŋ yɔŋ-e, yi ta ŋaŋ aŋa yirȧ yi kɔnɔ-e, ɔ gbəli hɛ pɛnsanɛ kɔ.

²⁷ Ka ɔlɛmp wati ɔbȧy ɔ som utim ukin, ɔ yamari kɔ kȧmȧ ɔ kȧrȧ rȧbomp rɔŋ; kɔ kɔnɛ, ɔ gbetha rȧbomp rɔŋ ka ȧŋseth ŋa tərəŋka,

²⁸ kɔ kȧrȧ rȧbomp rɔŋ rə alɛfa, ɔ sɔŋ ŋi ka ɔwath ubɛra, ka ɔwath ubɛra ɔ sɔŋ ŋi ka ɔkara kɔŋ.

²⁹ Ma aŋkarande ŋɔŋ aŋ təl ti-e, aŋ der aŋ gbasi kabel kɔŋ, aŋ bot ki ka kȧboma.

³⁰ Ma aŋsom aŋ kȧl thoŋklanɛ dɛr rɔkin ka Yisɔsȧŋ, aŋ kanɛ kɔ tȧy o tȧy ȧte aŋ po yɔ, yi ȧte aŋ po thəksa.

³¹ kɔ pa, Der nu na son rə dɛr ɔyeŋ, kȧmȧ nə fothanɛ ɔthan. Ȧtesoma-e afəm agbȧthi aŋ der, aŋ kɔnɛ, ɔwa aŋ ba hɛ ras alɔkɔ tə kədi.

³² kaŋ bȧkȧ rə abil kaŋ kɔnɛ dɛr ɔyeŋ ŋa son.

³³ Ɔwa aŋfəm aŋ nənk ŋa maŋ kɔnɛ-e, ka agbȧthi aŋ tȧrȧ kɔ, ɔwa aŋ gbukɛ kəwur ka tapet bɛ-e, kaŋ mɔtha bek ri.

³⁴ Ma Yisɔsȧŋ ɔ wur ro bil-e, ɔ nənk runiya rəbana ka ȧney abana aŋ wop kɔ, pəkasifɛ aŋ yi mɔ təlɔmɛ aŋa te ba utɔl, kɔ təp kəthəksa ŋa mȧtȧy məgbathi.

³⁵ Ma aret rə yema wɔŋ-e, aŋkarande ŋɔŋ aŋ der ro ŋɔŋ, aŋ pa, Ɔdɛr ɔwe-e, dɛr ɔyeŋ wɔŋ, ɔwa aret rə yema wɔŋ.

³⁶ Ter ŋa aŋ kɔnɛ kȧmȧ aŋ kɔ ka atɔr yi ka tagbɔm, aŋ wayanɛ yɛt ɛdi.

³⁷ Ka Yisɔsȧŋ ɔ pa, Sɔŋ ŋa nu yɛt ɛdi. Kaŋ pa ro ŋɔŋ, Sə kɔ wai təbo ta ɛsiliŋ tɛmɛ tərəŋ-i kȧmȧ sə sɔŋ ŋa aŋ di-i?

³⁸ kɔ yif ŋa, Mɔlɔ təbo nə ba-a? Kɔ kəli. Ma aŋ tara-e, aŋ pa, Tamath, yi ɛlop ŋarəŋ.

³⁹ kɔ yamari ŋa kȧmȧ aŋ yɔ aŋfəm aŋ yirȧ rə ɛniŋki ka akereŋ kəŋeseŋ.

⁴⁰ kaŋ yirȧ rə təkos rə tɛmɛ tɛmɛ yi rə təgba tərəŋ tɔfɔt təgba tərəŋ tɔfɔt.

⁴¹ Ma ɔ po gbasi tabo tamath yi ɛlop ŋarəŋ-e, ɔ lakthɛ ka Kuru, ɔ ruba, kɔ siməth tabo, ɔ sɔŋ ti aŋkarande tə kəbot rodi ka aŋfəm. Kɔ yerəs ɛlop ŋarəŋ ka ŋa bɛ.

⁴² Ka ŋa bɛ aŋ di, aŋ namra.

⁴³ kaŋ lasər təbəlai tɔfɔt tərəŋ yi ɛbɛm ya tabo yi ɛlopȧŋ.

⁴⁴ Ɔwa ŋa aŋa di tabo yi ɛlopȧŋ aŋ yi afəm aruni ɛwul tamath.

⁴⁵ Ka ɔlɛmp wati ɔ yɔ aŋkarande ŋɔŋ aŋ bȧkȧ ka ȧŋbil kȧmȧ aŋ təmȧ kədi kəkɔ romɔri ro Bɛthsayda, ma kɔnɔ ɔ tiyȧ yɔ ȧruniya rə sakanɛ.

⁴⁶ Ma ɔ po tiyȧ ŋa aŋ kɔnɛ-e, ɔ kɔnɛ ka kateŋ tə kəramnɛ.

⁴⁷ Ma rȧfɔy rə bek-e, ȧŋbil aŋ yi ka kȧbȧŋ ratɔŋ, ɔwa kɔn son ɔ yi ro gbaŋ.

⁴⁸ kɔ nənk kəpa aŋ sɔmpanɛ ɔthasər ka kəŋas-e, kotȧy-e aŋfef aŋ təmȧ ŋa rodi. Ɔwa ma rasɔk rə yema bek-e, ɔ der ro ŋaŋ, ɔ kɔth ka kȧbȧŋ rokɔm, ɔwa ɔ yema thas ŋa.

⁴⁹ Kɛrɛ maŋ nənk ɔ kɔth ka kȧbȧŋ rokɔm-e, aŋ nanɛ kəpa amɔmpila wɔŋ, kaŋ sel ɛrɔŋ,

⁵⁰ ȧtesoma-e ŋa bɛ aŋ nənk kɔ ɔwa pə kɛtha ŋa. Ka ɔlɛmp wati ɔ fɔfȧnɛ ŋa, ɔ pa, Bȧk nu təbuth, minɛŋ; te nu nesa.

⁵¹ kɔ wɔŋ ro ŋaŋ ro bil, ka aŋfef aŋ thɔfəla, kaŋ kabanɛ ɔthasər,

⁵² kotȧy-e pə sɔk hɛ ŋa ta amisali ŋa tabo kɛrɛ a bȧkəs tabuth taŋ.

⁵³ Maŋ po fəsi-e, aŋ bek ka aŋgbaŋ ro Kɛnɛsarɛt-e, kaŋ sɔ ro gbaŋ.

⁵⁴ Kɛrɛ maŋ po wur ka ȧŋbil-e, ka ɔlɛmp wati aŋfəm aŋ tȧrȧ kɔ,

⁵⁵ kaŋ gbukɛ gbukɛ ka ɔdɛr wati bɛ-e, aŋ təp kəkera ŋaŋ aŋa tu ka tafənt taŋ ro aŋ təl kəpa ɔ yi.

⁵⁶ Ɔwa dɛr o dɛr ro ɔ wɔŋ-e, rə təgbɔm-e, rə təpet-e, thalɔm ka aŋthɔf-e, aŋ bot aŋtui ka asoŋ, aŋ nɛmthɛnɛ kɔ kȧmȧ aŋ gbons gbo ɛlɛmpɛ ya aruma rɔŋ. Ɔwa ukin o kin ɔwe gboŋ kɔ ɔ sɔthɔ kəyeŋk mədɛr.