Mark 13 - Ȧŋlemrȧnɛ Ȧfu

¹ Ɔwa ma ɔ wur ka ȧŋseth ŋa Kuru-e, ukin ka aŋkarande ŋɔŋ ɔ pa ro ŋɔŋ, Karmɔkɔ, kəli, ko məsar ɔwa ko ɛseth yeye!

² Ka Yisɔs ɔ pa ro ŋɔŋ, Mə nənk ɛseth ɛbana ɛye-i? A ba hɛ kəte yȧsar ŋin rokɔm ka alɔm aŋa mə a te fak.

³ Ma ɔ yirȧ ka kateŋ ka Ɔlif ɔ lomanɛ ȧŋseth ŋa Kuru, ka Pitaŋ, Yeməsȧŋ, Yɔnȧŋ yi Andrɔŋ aŋ yif kɔ sɔ-e,

⁴ Kanɛ su ȧŋlɔkɔ mȧtȧy ame mə ba kəyi, ɔwa ko yi amisali aŋa mə yi bepi mȧtȧy ame mə yɔnɛ-e?

⁵ Ka Yisɔsȧŋ ɔ təp kəpa ro ŋaŋ, Botnɛ nu rə ȧmerȧ kȧmȧ wuni o wuni ɔ te nu tɔns.

⁶ Agbathi aŋ tə der ka ȧŋes a mi, aŋ tə pa, Minɛ yi kɔnɔ; ɔwa aŋ tə tɔns agbȧthi.

⁷ Ma nə təl ta səfa yi təgbuŋ ta səfa-e, te nu nesa. Mȧtȧy ame mə ba kəyɔnɛ, kɛrɛ ɔthalnɛ ɔ tha bek hɛ.

⁸ kotȧy-e abona aŋ tə fumpɔ abona, ɔwa rəbȧy rə tə fumpɔ rəbȧy; kəyɛr ka ȧŋthɔf kə tə yi dɛr ɔgbȧthi. Dor rəbana rə tə yi. Mȧtȧy ame mə tə yi ɔtəpɛr wa kasɔmpanɛ.

⁹ Kɛrɛ botnɛ nu rə ȧmerȧ, ȧtesoma-e a tə lȧnki nu ka ɛbare ya rəbȧy; a tə sapəth nu ka ɛseth ɛgbanɛ; a tə kȧrȧ nu rodi ka aŋbȧy salata mi, tə kəseri ro ŋaŋ ta ȧtȧ mi.

¹⁰ Kɛrɛ a ba kəmɔtha taməs ȧkɛra kəfinɔ ka Kuru ka tȧbona bɛ yeŋka ɔthalnɛ ɔ bek.

¹¹ Maŋ kera nu tə kəlaŋkli nu-e, te nu ba asoli ta ȧtȧ mə nə fɔf, kɛrɛ tȧy o tȧy ȧtȧ a sɔŋ nu ka ȧŋlɔkɔ ŋati-e, tə mə nə fɔf, kotȧy-e, pə yi hɛ naŋ nə mə fɔf, kɛrɛ ɔ Yina məsəm kɔnɔ mə fɔf.

¹² Ɔwa uwɔnt ɔ tə lȧnki uwɔnt tə kəfi, ɔwa ɔkas ɔwan kɔŋ; ɔwa aŋwuth aŋ tə fumpər aŋa koməs ŋa, aŋ tə yɔ a dif ŋa.

¹³ Aŋfəm bɛ aŋ tə gbɛŋa nu salata ȧŋes a mi; kɛrɛ kɔnɔ ɔwe mə muyu haŋ ka ɔthalnɛ-e, mə kisi.

¹⁴ Kɛrɛ ma nə nənk ɔtheranɛ ka kədinɛ ta ɔwe ɔnȧbi Danɛl ɔ fɔf-e ɔ təmȧ ro ɔ te mar təmȧ, (ta ɔwe mə karaŋ ɔ sɔthnɛ) ɔwa ta ŋaŋ aŋa yi ro Yuda aŋ gbukɛ aŋ kɔ ka tȧteŋ;

¹⁵ ɔwa kɔnɔ ɔwe yi ka ȧŋseth rokɔm ta ɔ te thor, thalɔm ɔ te wɔŋ ro seth tə kəwura rəka o rəka.

¹⁶ Ɔwa kɔnɔ ɔwe yi ro kɔr ta ɔ te kȧlanɛ tə kəgbasi aruma rɔŋ.

¹⁷ Mɔnɛ ro ŋaŋ aŋa yi ator yi ŋaŋ aŋa masər ka mȧrey mati!

¹⁸ Ɔwa ramnɛ nu kȧmȧ kagbukɛ ka nu kə te yi ka ȧdȧrəŋ.

¹⁹ Ȧtesoma-e ka mȧrey mati kəsɔmpanɛ kə tə yi, kəwunɔŋ ȧke te tha yi kȧbi ȧdȧru rə təpɛ ara Kuru ɔ təpi haŋ ka-ake, ɔwa kə ba hɛ sɔ kəyi.

²⁰ Ɔwa, thambe ɔMarki ɔ gbəŋki mȧrey mati, wuni o wuni ɔ ba hɛ naŋ tə kəkisi; kɛrɛ salata aŋthith aŋa ɔ po thithəs-e, ɔ tə gbəŋki ma.

²¹ Ka ȧŋlɔkɔ ŋati bepi wuni o wuni ɔ pa, Kəli, ɔKrayst ɔ yi nɔ; thalɔm ɔ yi ro. Te nu lanɛ ti,

²² kotȧy-e aKrayst ayem yi anȧbi ayem aŋ tə yokanɛ, aŋ tə yɔ ɛmisali yi tȧy təkabanɛ, kȧmȧ bepi pə gbəli yi-e, aŋ tə yɛthəs aŋthith.

²³ Kɛrɛ botnɛ nu rə ȧmerȧ. Kəla i po mɔtha kanɛ nu mȧtȧy bɛ.

²⁴ Ka mərey mati, kədarəŋ ka kasɔmpanɛ kati, aret rə tə biyȧ, ɔwa aŋof aŋ ba hɛ kəsɔŋ ɔwaŋ wati.

²⁵ Ɔwa atɔs ka ȧkuru tə tə fumpɔ ɔwa aŋfɔsɔ aŋa yi ka ȧkuru aŋ tə yiŋkthanɛ.

²⁶ Ɔwa ȧŋlɔkɔ ŋati aŋ tə nənk ɔWan ka wuni ɔ tə der ka aturu rə afɔsɔ yi ayiki abana.

²⁷ Ɔwa ȧŋlɔkɔ ŋati ɔ tə som aŋmȧleka, ɔ tə thoŋkla dɛr rɔkin aŋthith ŋɔŋ kəwur ka ɛgbap yanlɛ ya ȧdȧru, kəwur ka ɔthalnɛ wa ȧdȧru kəkɔ ka ɔthalnɛ wa ȧkuru.

²⁸ Thəkəs nu alomɔ ŋa aŋənt ŋa aŋgbɔnɔ; bepi mara məfɛth mati mɛ wur ɛbɔpər ɛfu-e, nə tȧrȧ ti kəpa rawok rə fat.

²⁹ Ya pə yi sɔ naŋ, bepi nə nənk mȧtȧy ame mə yɔnɛ-e, tȧrȧ nu kəpa ɔ po fat, hali ka tadare ta nu.

³⁰ Tɛntɛnɛ i kanɛ nu, rȧkomra are rə ba hɛ kəthas haŋ mȧtȧy ame bɛ mə gbenthis.

³¹ Ȧkuru yi ȧdȧru ɛ ba kəthas; kɛrɛ ȧsim ta mi tə ba hɛ kəthas.

³² Kɛrɛ ȧŋrey ŋati yi ȧŋlɔkɔ ŋati-e wuni o wuni ɔ ba hɛ kətara, hali aŋmȧleka ro riyana thalɔm ɔWan, kɛrɛ ɔKas gbo son.

³³ Botnɛ nu rə ȧmerȧ, bumər ɔwa ramnɛ, ȧtesoma-e nə tɛ hɛ ȧŋlɔkɔ ŋati.

³⁴ Pə yi mɔ wuni ɔwe kɔ rə ȧbiyas abɔli ɔ tey ȧŋseth ŋɔŋ, ɔwa ɔ sɔŋ afɔsɔ ka ɛbɔy yɔŋ, ukin o kin ɔ ba mapanth mɔŋ, kɔ yamari ɔbumər tə kəbum.

³⁵ Tiyȧŋ bumər nu, ȧtesoma-e nə tɛ hɛ ȧŋlɔkɔ aŋa ɔkas ka ȧŋseth mɔ der, pə yi rəfɔy-e, kəren datɔŋ-e, ka ȧŋlɔkɔ kətəpi mɔ tam-e, thalɔm rəbəth;

³⁶ ta thani ɔ der kəthɛna ɔ bəp nu nə dirȧ.

³⁷ Ɔwa ȧte i pa ro nu, i pa ka aŋfəm bɛ. Bumnɛ nu.