Mark 12 - Ȧŋlemrȧnɛ Ȧfu

¹ kɔ təp kəfɔfanɛ ŋa rə ɛlomɔ. Uthem ukin ɔ tɛp kɔr ka yɛt ɛgbam, ɔ gbətɔr ki ȧkunk, ɔ bɛmpa dɛr ɔwɛkəs, ɔ raf ri aseth abɔli rəkɔm, kɔ sɔŋ ki rə abȧf, kɔ kɔnɛ rə athɔf alɔm.

² Ka ȧŋlɔkɔ ŋa mȧkomi kəbȧk, ɔ som ȧbɔy ka aŋbȧf kȧmȧ ɔ sɔthɔ məkomi məlɔm ka aŋbȧf.

³ kaŋ gbasi kɔ, aŋ sapəth kɔ aŋ ter kɔ ɔ kɔnɛ ɔ ba hɛ koko.

⁴ kɔ kȧl somər ŋa ȧbɔy ulɔm; ɔwa kɔnɔ, aŋ yɔ kɔ ɔbaŋ ro bomp, kaŋ pinthanɛ kɔ ɔləs.

⁵ kɔ kȧl som ulɔm, ɔwa kɔnɔ aŋ dif, yi agbȧthi sɔ, aŋ sapəth alɔm, aŋ dif alɔm.

⁶ Halisa, ɔ ba ras ɔwan kɔŋ uruni ukin ubɔthər. Kɔnɔ ɔ ləpsɔ som ro ŋaŋ, ɔ pa, Aŋ tə tȧrȧ ɔwan kȧmi rəka.

⁷ Kɛrɛ aŋbȧf ŋati aŋ fɔf kətɔŋ ka ŋaŋ, aŋ pa, Ɔbaki kɔnɔ ɔwe, der maŋ dif kɔ nu, ɔwa akɛŋ kə tə yi ȧke su.

⁸ kaŋ gbasi kɔ, aŋ dif kɔ, kaŋ fitha kɔ kəwur ka akɔr ka ɛyɛt ɛgbam.

⁹ Tiyȧŋ, to ɔkas ka akɔr ka ɛyɛt ɛgbam mɔ yɔ-e? Ɔ tə der dif aŋbȧf ɔ tə sɔŋ akɔr ka ɛyɛt ɛgbam ka afəm alɔm.

¹⁰ Nə la hɛ karaŋ mȧgbal ame-i? Aŋsar aŋa aŋsȧl aŋ pɛnsa-e, Ŋi gbeŋ a kȧl səki ŋi rȧbomp ra ȧŋkoŋ;

¹¹ Aŋe aŋ wur ka ɔMarki, Ɔwa tȧy təkabanɛ tȧŋ ka ɛfɔr ɛ su.

¹² kaŋ thɛns tə kəwop kɔ, kɛrɛ aŋ nesa aŋfəm, ȧtesoma-e aŋ tȧrȧ kəpa ɔ fɔf aŋlomɔ ta ȧtȧ ŋaŋ. Kaŋ tey kɔ, aŋ kɔnɛ.

¹³ kaŋ som ro ŋɔŋ aFaresi alɔm yi aHerodian alɔm, kȧmȧ aŋ gbipər kɔ naŋ ka mafɔf mɔŋ.

¹⁴ Maŋ bek-e, aŋ pa ro ŋɔŋ, Karmɔkɔ sə tȧrȧ kəpa munɔŋ mə yi təteŋ, mə nesa hɛ wuni o wuni, mə kəli hɛ wuni to ȧŋdɛr ŋɔŋ aŋ yi, mə thəksa aroŋ da Kuru ka tȧteŋ. Ɔlompi ti tə kəfaka Sisarȧŋ, thalɔm pə lomp hɛ-i?

¹⁵ Sə sɔŋ-i, thalɔm sə te sɔŋ-i? Kɛrɛ ma kɔnɔ ɔ tȧrȧ masɔth ma ŋaŋ-e, ɔ pa ro ŋaŋ, kɔyɛŋ mə nə gbɔns mi-e? Kara mi akɔpər abana ŋin kȧmȧ i kəli ŋi.

¹⁶ kaŋ kȧrȧ ŋi. Kɔ pa ro ŋaŋ, Kanɛ ba mȧbȧlȧnɛ ame yi mȧgbal ame-e? kaŋ pa ro ŋɔŋ, Sisar.

¹⁷ Ka Yisɔsȧŋ ɔ pa ro ŋaŋ, Sɔŋ Sisar ɛyɛt ɛyɛ yi ta Sisar, yi ka Kuru ɛyɛt ɛyɛ yi ta Kuru. Ka aŋ kabanɛ kɔ ɔthasər.

¹⁸ Ka aŋSadusi aŋa pa kȧyokanɛ ka aŋfi kə yi hɛ-e, aŋ der ro ŋɔŋ aŋ pa,

¹⁹ Karmɔkɔ, Mosisȧŋ ɔ gbalər su, Bepi ɔwɔnt uruni ka wuni ɔ fi-e, ɔ tey urani, ɔ tey hɛ wan-e, kȧmȧ ɔwɔnt kɔŋ ɔ gbasi ɔrani kɔŋ, ɔ koməs awuth ta ɔwɔnt kɔŋ.

²⁰ Awɔnt tȧmthədɛrəŋ aŋ la yi ri; ɔtɔtɔkɔ ɔ gbasi urani, kɔ fi, ɔ tey hɛ awuth.

²¹ Ka ɔwe bekȧ ŋarəŋ ɔ gbasi kɔ, kɔ fi, ɔ tey hɛ awuth, ɔwa ɔwe bekȧ asas sɔ.

²² Ɔwa aŋtam-thədɛrəŋ bɛ aŋ gbasi kɔ kɛrɛ aŋ tey hɛ awuth, kaləpsɔ ka ɔbɔrkɔ ɔ fi sɔ.

²³ Ka kȧyokanɛ ka aŋfi-e, ɔrani ka kanɛ mɔ yi-e, ma aŋtamthədɛrəŋ aŋ po nȧntȧ kɔ-e?

²⁴ Ka Yisɔsȧŋ ɔ pa ro ŋaŋ, Ta ȧŋsabu aŋe-e, ti tha nə yɛtha-i, ma nə te tȧrȧ mȧgbal, thalɔm aŋfɔsɔ ŋa Kuru-i?

²⁵ kotȧy-e maŋ po yokanɛ ka aŋfi-e, aŋ nȧntȧ hɛ, a baləs hɛ ŋa, aŋ tə yi gbo mɔ aŋmȧleka aŋa yi ro riyana.

²⁶ Kɛrɛ salata aŋfi-e, kəpa aŋ tə kȧl yokanɛ; nə tha la hɛ karaŋ ka ȧkȧfȧ ka Mosisȧŋ ka ɔdɛr rə a gbal ta aŋgbɔfɔŋ, ma Kurɔŋ ɔ pa ro ŋɔŋ hɔ, Minɛ yi ɔKuru ka Ebraham, ɔKuru ka Aysak yi ɔKuru ka Yekɔb-i?

²⁷ Ɔ yi hɛ ɔKuru ka aŋfi, ɔ yi ɔKuru ka aŋkəli. Nə yɛthȧ kəyɛtha kəbana.

²⁸ Ukin ka aŋkarmɔkɔ ɔ der, kɔ təl maŋ yifəthanɛ-e, ɔwa ma ɔ tȧrȧ kəpa ɔ po gbakia ŋa finɔ-e, ɔ yif kɔ, Athɔ areke aŋ yi aŋtɔtɔkɔ ka ɛthɔ bɛ-e?

²⁹ Yisɔsȧŋ ɔ pa, Aŋtɔtɔkɔ aŋ yi, Təl O Isrɛl, ɔMarki ɔKuru kȧsu ɔ yi ɔMarki ukin gbo;

³⁰ ɔwa mə yi tə kəbatho ɔMarki ɔKuru ka mu yi aŋnanɛ a mu bɛ, yi aŋesəm a mu bɛ, yi ȧŋmerȧ a mu bɛ, yi aŋfɔsɔ a mu bɛ.

³¹ Aŋa bekȧ mȧrəŋ, ŋi aŋe; mə yi tə kəbɔthər ɔfȧtȧnɛ ka mu mɔ mȧ mə bɔthərnɛ. Athɔ alɔm athasi ɛye aŋ yi hɛ.

³² Ka ɔkarmɔkɔ ɔ pa ro ŋɔŋ, Karmɔkɔ mə lɔm təteŋ kəpa ɔMarki ukin gbo ɔ yi, ulɔm ɔ yi hɛ sɔ pəthas kɔnɔŋ.

³³ Ɔwa tə kəbɔthər kɔ yi ȧŋmerȧ bɛ, yi aŋnanɛ bɛ, yi aŋesəm bɛ, yi aŋfɔsɔ bɛ, yi tə kəbɔthər ɔfatanɛ kɔŋ mɔ mɔ bɔthərnɛ, pə thasi sathka təlolok təthɔi yi ɛsathka bɛ.

³⁴ Ma Yisɔsȧŋ ɔ nənk kəpa ɔ gbaki yi kətemp-e kɔ pa ro ŋɔŋ, Mə bɔlȧnɛ hɛ rȧbȧy ra Kuru. Kədarəŋ kati wuni o wuni ɔ mintha hɛ sɔ yif kɔ tȧy o tȧy.

³⁵ Ma Yisɔsȧŋ ɔ thəksa ka ȧŋseth ŋa Kuru-e, ɔ pa, kɔyɛŋ aŋkarmɔkɔ aŋ pa kəpa Kraystȧŋ ɔ yi ɔwan ka Debid-a?

³⁶ Debid kɔn kɔnɔnɛ ɔ pa ka ɔYina məsəm, ƆMariki ɔ pa ka ɔMarki kȧmi, Yirȧ ka kȧdiyɔ kȧmi Haŋ i səki aŋtheranɛ a mu agbeth ŋa ȧtȧtək ta mu.

³⁷ Debidȧŋ kɔn kɔnɔnɛ ɔ bont kɔ Mariki; to pə təp kɔnɔ ɔ gbəli yi ɔwan kɔŋ-e? Ka ȧruniya rəbana rə təlȧ kɔ yi məbɔnɛ.

³⁸ Ɔwa ka kathəksa kɔŋ ɔ pa, Pɛndaf nu aŋkarmɔkɔ aŋa bɔthər kəkɔth aŋ wɔŋ suma təbɔli, aŋa bɔthər kəkori ŋa ka ɔdɛr ɔthila,

³⁹ yi ɔyira ɔtɔtɔkɔ ka ɛseth ɛgbanɛ yi ɔdɛr ɔtɔtɔkɔ ka ɛmet.

⁴⁰ Ŋaŋ aŋa mə ləsər ɛseth ya abora, ɔwa yi kəkɔnthɔsnɛ aŋ ramnɛ ɔwoni; aŋe gbeŋ aŋ tə sɔthɔ kətiyafu kəbana.

⁴¹ kɔ yirȧ ɔ lomanɛ ro a bɛnɛ aŋkala, ɔwa agbȧthi aŋa yi ayola aŋ fak ɔgbȧthi.

⁴² Ka ubora umɔnɛ ɔ der, kɔ fak afadin.

⁴³ kɔ tela aŋkarande ŋɔŋ, ɔ pa ro ŋaŋ, Tɛntɛnɛ i kanɛ nu kəpa, ɔbora ɔwe ɔ fak pəthasi ŋa bɛ aŋa fak ka ɔdɛr ro a bɛnɛ aŋkala;

⁴⁴ ȧtesoma-e ŋa bɛ aŋ sɔŋ ka kagbəli ka ŋaŋ kəbana, kɛrɛ ɔbora ka kapaŋ kɔŋ ɔ fak ɛyɛ ɔ ba bɛ, hali ara ɔ ba ta kadi kɔŋ.