Mark 1 - Ȧŋlemrȧnɛ Ȧfu

¹ Ɔtəpɛr wa ȧkɛra kəfinɔ ka Yisɔs Krayst, ɔWan ka Kuru.

² Mɔ mə a gbal ka ȧkȧfȧ ka ɔnȧbi Isaya kəpa, Kəla, i som ɔsom kȧmi rodi ka mu, Ɔwe mə bɛmpa aroŋ da mu.

³ Ȧrim ra wuni ro wula ara pa, Bɛmpa nu aroŋ da ɔMarki, Lompəs nu asoŋ tɔŋ.

⁴ Yɔnȧŋ ɔwe baftays aŋfəm ro wula, ɔ taməs ȧŋbaftisəm ŋa kathupi ta katerɔ ka ɛhakɛ.

⁵ Ka aŋfəm ŋa ȧŋthɔf ŋa ro Yuda bɛ, yi ŋaŋ aŋa ro Yerusalɛm, aŋ wur, kaŋ kɔ ro ŋɔŋ kȧmȧ ɔ baftays ŋa ka kȧbȧŋ ka Yɔrdan, kəgbithanɛ ɛhakɛ yaŋ.

⁶ Yɔnȧŋ ɔ wɔŋ ruma ra aŋfon ŋa ȧyɔkmɛ, ɔwa ɔ senɛ ȧthɛbɛŋ ŋa areka. Ɔ di ɛlama yi rəmai ra ro kanth.

⁷ kɔ tam kəpa, Ukin ɔ tə der kədarəŋ kȧmi, ɔ thasi mi afɔsɔ, ɔwa minɛ i bek hɛ sanɛ tə kəsəli rabeŋa ra ɛkɔftha yɔŋ.

⁸ Minɛŋ i baftays nu yi mȧnt, kɛrɛ kɔnɔ ɔ tə baftays nu yi ɔYina məsəm.

⁹ Ka pə re yi ka mȧrey mati-e, Yisɔsȧŋ ɔ wur ro Nasarɛth ake ro Kalili, ka Yɔnȧŋ ɔ baftays kɔ ka kȧbȧŋ ka Yɔrdan.

¹⁰ Ka ɔlɛmp wati ɔ wur ro mant-e, ɔ nənk ȧkȧriyana kə kanthɛ, ɔwa ɔYina mɔ kəpərəm ɔ thorər kɔ.

¹¹ Ka rim rə wur ka ȧkȧriyana, rə pa, Munɔ yi ɔWan kȧmi ubɔthər, ɔwe po thesis ȧŋmerȧ a mi.

¹² Ka ɔlɛmp wati ɔYina ɔ bȧl kɔ ro wula.

¹³ kɔ yi ro wula mərey təgba tərəŋ, ka Sethani ɔ gbɔns kɔ. Ɔ yi kətɔŋ ka ɛsɛm ya ro kanth, kɛrɛ aŋmȧleka aŋ yɔna kɔ.

¹⁴ Kədarəŋ ka mə a po bot Yɔnȧŋ ka ȧŋseth ŋa tərəŋka-e, Yisɔsȧŋ ɔ der ro Kalili, ɔ taməs ȧkɛra kəfinɔ ka Kuru,

¹⁵ kɔ pa, Ȧŋlɔkɔ aŋ lasər, ɔwa rȧbȧy ra Kuru rə po fat. Thupi nu, ɔwa lanɛ nu ȧkɛra kəfinɔ.

¹⁶ Ma ɔ bɔ thas ka kȧbȧŋ ka ro Kalili rayɛr-e, ɔ nənk Saymɔnȧŋ yi Andrɔŋ ɔwɔnt kɔŋ, aŋ fitha kəpɛl ro baŋ, kotȧy-e aŋ yi aləm.

¹⁷ Ka Yisɔsȧŋ ɔ pa ro ŋaŋ, Der nu tȧŋ mi, ɔwa i ti səki nu aləm afəm.

¹⁸ Ɔwa ka ɔlɛmp wati aŋ tey tapɛl taŋ, aŋ tȧŋ kɔ.

¹⁹ Ma ɔ thas rodi ɔthan-e, ɔ nənk Yeməsȧŋ yi ɔwɔnt kɔŋ Yɔnȧŋ, aŋwuth ŋa Sɛbidi, ɔwa ŋaŋ sɔ aŋ yi ro bil, aŋ bɛmpa bɛmpa tapɛl taŋ.

²⁰ Ka ɔlɛmp wati ɔ tela ŋa, kaŋ tey Sɛbidi-əŋ ɔkas ka ŋaŋ ro bil yi ɛbɔy ɛyamɔ, kaŋ tȧŋ kɔ.

²¹ kaŋ kɔ ro Kepaniyɔm. Ɔwa ka ɔlɛmp wati ka ȧŋrey ŋa aŋsabath ɔ wɔŋ ka ȧŋseth agbanɛ, ɔ thəksa.

²² kaŋ kabanɛ ta kathəksa kɔŋ, ȧtesoma-e ɔ thəksa ŋa mɔ wuni ɔwe ba afɔsɔ, pə yi hɛ mɔ aŋkarmɔkɔ.

²³ Ɔwa wuni ɔ yi ka ȧŋseth ŋaŋ agbanɛ, ɔ ba ukərəfi uləs.

²⁴ Ɔ woŋa, ɔ pa, Tey su, ko sə ba yi munɔŋ-a, munɔ Yisɔs ɔwe ro Nasarɛth-e? Mə der tə kədim su-i? I tȧrȧ ɔwe mə yi-e, ɔSəm ka Kuru.

²⁵ Kɛrɛ Yisɔs ɔ ŋal kɔ, ɔ pa, Taŋk, wur ro ŋɔŋ.

²⁶ Ɔwa ɔkərəfi uləs ma ɔ po yɔ kɔ ɔbaŋ-e, ɔ woŋa rə rim rəbɔli rəkɔm, kɔ wur.

²⁷ Aŋfəm bɛ aŋ kabanɛ haŋ aŋ yifthanɛ, aŋ pa, Ko tȧy te-e? Ko kəthəksa kəfu ka-ake-e? kotȧy-e rə afɔsɔ ɔ yamari aŋkərəfi aləs, kaŋ təlȧ kɔ.

²⁸ Ɔwa ka ɔlɛmp wati tȧgbuŋ tɔŋ tə gbanthɛnɛ dɛr o dɛr ka ȧŋthɔf bɛ ro Kalili.

²⁹ Maŋ wur ka ȧŋseth agbanɛ-e, aŋ wɔŋ ka ȧŋseth ŋa Saymɔn yi Andrɔŋ, yi Yeməsȧŋ dɛ yi Yɔnȧŋ.

³⁰ Kɛrɛ ɔniŋkara ka Saymɔn ɔ fənthȧ ɔ tu mədɛr məgbipanɛ. Ka ɔlɛmp wati aŋ kanɛ Yisɔsȧŋ ta atɔŋ.

³¹ kɔ der ɔ wop kɔ ka kȧta, ɔ yɔ kɔ ɔ yokanɛ. Ka mədɛr məgbipanɛ mə ter kɔ, kɔ yokanɛ, ɔ yɔna ŋa.

³² Ka rȧfɔy-e, ma aret rə po wɔŋ-e, aŋ kȧrȧ ro ŋɔŋ afəm atuy bɛ-e, yi aŋa ba akərəfi.

³³ Ɔwa aŋfəm ŋa kȧpet bɛ aŋ thoŋklanɛ ka kadare.

³⁴ kɔ yenkəs afəm agbȧthi aŋa ba tətu tətəp tətəp, ɔ wurɔ akərəfi agbȧthi. Ɔ selɔ hɛ aŋkərəfi aŋ fɔf, kotȧy-e aŋ tȧrȧ kɔ.

³⁵ Ka bəth, ma pə te tha sɔk-e, Yisɔsȧŋ ɔ yokanɛ ɔ wur, ɔ kɔnɛ rə dɛr ɔyeŋ, ɔ ramnɛ.

³⁶ Ka Saymɔnȧŋ yi ŋaŋ aŋa la yi kɔnɔŋ aŋ tȧŋ kɔ.

³⁷ Maŋ fir kɔ-e, aŋ pa ro ŋɔŋ, Aŋfəm bɛ aŋ thɛns mu.

³⁸ kɔ pa ro ŋaŋ, Maŋ kɔnɛ nu dɛr ulɔm ka tapet təlɔm, kȧmȧ i taməs ri sɔ, ȧtesoma-e ta ȧte tə i der.

³⁹ Ɔwa ɔ taməs ka ɛseth yaŋ ɛgbanɛ ro Kalili bɛ, kɔ wurɔ akərəfi.

⁴⁰ Ka wuni ɔwe ba arom ɔ der ro ŋɔŋ, ɔ nɛmthɛnɛ kɔ, ɔ sɔna kɔ təwu, ɔ pa ro ŋɔŋ, Bepi mə selɔ-e, mə gbəli fethər mi.

⁴¹ Ma ȧney aŋ wop Yisɔsȧŋ-e, ɔ thanthi kȧta kɔŋ, ɔ gboŋ kɔ, kɔ pa ro rɔŋɔŋ, I selɔ. Yi ugbəraŋ.

⁴² Ka ɔlɛmp wati arom aŋ gbapɛ kɔ, kɔ yi ugbəraŋ.

⁴³ Ka Yisɔsȧŋ ɔ maŋ kɔ kiriŋ kiriŋ kəpa,

⁴⁴ Botnɛ kȧmȧ mə te lɔm ti rə wuni o wuni, kɛrɛ kɔnɛ mə tɔrinɛ ka ɔfode, ɔwa mə sɔŋ mayɛt ama Mosisȧŋ ɔ yamari ta kagbili, tə kəseri ro ŋaŋ.

⁴⁵ Kɛrɛ ma ɔ wur-e, ɔ təp kətaməs ti ɔgbathi, ɔ gbanthɛnɛ ȧŋpa haŋ Yisɔsȧŋ ɔ gbəli hɛ sɔ wɔŋ ro pet gbafəth, kɛrɛ ɔ yi gbo dɛr ɔyeŋ. Rə aŋfəm aŋ kȧl bəp kɔ kəwur dɛr o dɛr.