Luk 8 - Ȧŋlemrȧnɛ Ȧfu

¹ Ka pə re yi kədarəŋ kati ɔthan-e, Yisɔs ɔ kɔnɛ ka tapet yi tagbɔm bɛ, ɔ taməs, ɔwa ɔ tɔri ȧkɛra kəfinɔ ka rȧbȧy ra Kuru, ka aŋkarande ŋɔŋ tɔfɔt ŋarəŋ aŋ paya kɔ,

² yi afəm abom alɔm aŋa a po ramər rə akərəfi aləs yi ka tətu; Meri ɔwe a bont Makdala, ka ɔwe akərəfi tȧmthədɛrəŋ aŋ wur,

³ Yoana ɔrani ka Kusa, ȧŋbɔy ŋa Hɛrɔd, yi Susana, yi agbȧthi alɔm sɔ, aŋa mar kɔ yi ɛyɛt yaŋ.

⁴ Ma afəm agbȧthi aŋ thoŋklanɛ rɔkin, aŋfəm ŋa kəpet o pet aŋ kɔ ka Yisɔsȧŋ, kɔ fɔf rə alomɔ, ɔ pa,

⁵ Usak ɔ wur tə kəsak mater mɔŋ; ma ɔ sak məlɔm mə fumpɔ ro roŋ, ka a nas ma, ɔwa ɛbȧmp ya aŋfena aŋ gbaməs ma.

⁶ Məlɔm mə fumpɔ rə agbalaŋ; ma mə lɔkɔ-e, ɔlɛmp wati mə wela, ȧtesoma-e mə ba hɛ mȧnt.

⁷ Ka məlɔm mə fumpɔ rə təbaŋk ratɔŋ; ɔwa tabaŋk tə lɔkɔ yi mȧterȧŋ, ɔwa tə tɔkər ma.

⁸ Məlɔm mə fumpɔ rə athɔf afinɔ, mə lɔkɔ, mə kom məkomi mɔlɔ ma kɛmɛ kin. Ma Yisɔs ɔ po fɔf mȧtȧy ame-e, ɔ ŋata ȧrim rɔŋ, kɔ pa, Ɔwe ba ɛləns ta ɔ təl.

⁹ Aŋkarande ŋɔŋ aŋ yif kɔ, To aŋlomɔ aŋe an yi-e?

¹⁰ kɔ pa, Ro rɔnu a sɔŋ ti tə kətara aŋgbundu ŋa rȧbȧy ra Kuru, kɛrɛ alɔm-e, a thəksa ŋa rə ɛlomɔ, kȧmȧ hali aŋ kəli aŋ nənk hɛ; hali aŋ təl-e, pə sɔk hɛ ŋa.

¹¹ Aŋlomɔ ŋi aŋe. Mater mə yi ȧrim ra Kuru.

¹² Ŋaŋ ka aroŋ ŋa yi ŋaŋ aŋa təl. Ȧŋlɔkɔ ŋati Sethani ɔ der, ɔ nɔy ȧrim ka ɛmerȧ yaŋ kȧmȧ aŋ te lanɛ, ɔwa aŋ te sɔthɔ kakisi.

¹³ Ŋaŋ ka aŋgbalaŋ, maŋ təl-e, aŋ malanɛ ȧrim yi məbɔnɛ, kɛrɛ maŋ te ba ɛthənk-e, aŋ lanɛ alɔkɔ agbut gbo; ma aŋgbɔnsanɛ aŋ bek-e, aŋ bȧrȧ kəmuth.

¹⁴ Ama fumpɔ rə tabaŋk ratɔŋ, mə yi ŋaŋ aŋa po təl. Ɔwa maŋ kɔnɛ ka asoŋ ta ŋaŋ-e, ɛsoli, yi rayola, yi mabɔthi ma ȧdȧru, ɛye bɛ ɛ thiŋkanɛ ŋa, ɔwa aŋ kom hɛ məkomi məgbenthis.

¹⁵ Kɛrɛ ama ka ȧŋthɔf afinɔ-e, mə yi ŋaŋ aŋa po təl ȧrim, ɔwa maŋ təl-e, aŋ wop ri ɔbaksər ka tȧteŋ dɛ yi ka ȧmerȧ ȧferȧ, kaŋ kom məkomi rə kəmuyu.

¹⁶ Bepi wuni ɔ moth kəmulɛ, ɔ gbəpər hɛ ki yi rəka, ɔwa ɔ bot hɛ ki ka kəfənt ratha, kɛrɛ ɔ tə bot ki ka ɔtəmər kȧmȧ ŋaŋ aŋa mə wɔŋ ro seth aŋ gbəli nənk ɔwaŋ wati.

¹⁷ kotȧy-e, tȧy təmaŋknɛ tə yi hɛ, ȧte mə a te ŋaibi; amurare aŋ yi hɛ aŋa mə a te tȧrȧ, ɔwa mə a te wurɔ gbəraŋ.

¹⁸ Tiyȧŋ bot nu ȧmerȧ ka mȧtəl ma nu, kotȧy-e wuni o wuni ɔwe ba, a tə bȧr sɔŋ kɔ; ɔwa wuni o wuni ɔwe te ba, a tə nɔy kɔ hali ara ɔ ba.

¹⁹ Ka ɔkara kɔŋ yi aŋwɔnt ŋɔŋ aŋ der ro ŋɔŋ, kɛrɛ aŋ gbəli hɛ fatər kɔ salata ȧruniya.

²⁰ Ɔwa a kanɛ kɔ kəpa, Ɔkara ka mu yi aŋwɔnt a mu aŋ təmȧ rokaŋ, aŋ yema nənk mu.

²¹ kɔ lasi ɔ pa ro ŋaŋ, Ɔkara kȧmi yi aŋwɔnt mi aŋ yi aŋa mə təl ȧrim ra Kuru-e, ɔwa aŋ wop ri.

²² Ka pə re yi ka ȧŋrey alɔm, Yisɔs yi aŋkarande ŋɔŋ aŋ bȧkȧ ka ȧŋbil, kɔ pa ro ŋaŋ, Maŋ fəsi nu ȧŋbonka. Kaŋ wur kəkɔ romɔri.

²³ Mɔ mə aŋ ŋas-e, mərey mə wop kɔ, ɔwa kəŋkəl kə thor ka ȧŋbonka. Ka ȧŋbil aŋ la mȧnt, kaŋ təmȧ ɔləs.

²⁴ Ɔwa aŋ der ro ŋɔŋ, aŋ thəmi kɔ, aŋ pa, Pa, Pa, sə dinɛ. Kɔ thəmɛ, ɔ ŋal aŋfef yi rabaŋ ra ȧmȧnt. Ka ɔlɛmp wati-e, pə thɔfəla.

²⁵ kɔ pa ro ŋaŋ, Kiya kȧlanɛ ka nu-a? Ɔwa rənes yi kəkabanɛ kə wop ŋa, aŋ pa kətɔŋ ka ŋaŋ, Kanɛ ɔwe mən, ma ɔ yamari hali aŋfef yi ȧmȧnt, ɔwa ɛ təlȧ kɔ-e?

²⁶ kaŋ bek ka ȧŋthɔf ŋa aŋKadarin aŋa lomanɛ ro Kalili.

²⁷ Ma Yisɔs ɔ wur ka ȧŋbil-e, ɔ bəp ulaŋgba ka ro pet ɔwe ba ukərəfi. Ɔwa ɔwoni thɔŋ ɔ yi gbo utiŋ, ɔ yi hɛ rə aseth, ɔ yi gbo ka taboma.

²⁸ Ma ɔ nənk Yisɔsȧŋ, ɔ sel ɛrɔŋ, kɔ fumpɔ rodi kɔŋ, ɔwa yi rim rəbana ɔ pa, Ko tȧy tȧŋ i ba tə kəyɔ yi munɔ-ə Yisɔs, munɔ ɔWan ka Kuru ɔBɔli rəkɔm-e? Ɔmari mu, te sɔmpa mi.

²⁹ Ȧtesoma-e ɔ po yamari ɔkərəfi uləs tə kəwur ka ɔlaŋgba. Kotȧy-e ɔ la gbip kɔ katkat; ka a tand kɔ yi tɔrɛntha yi ɛgbete, kɛrɛ ɔ piməs atɔrɛntha, ɔwa ɔkərəfi ɔ bȧlər kɔ ro wula.

³⁰ Ka Yisɔs ɔ yif kɔ, Aŋes a mu-a? kɔ pa, Runia, ȧtesoma-e akərəfi agbȧthi aŋ wɔŋ kɔ.

³¹ kaŋ nɛmthɛnɛ kɔ kȧmȧ ɔ te yamari ŋa tə kəkɔ ka ȧŋbi aŋa te ba ɔthȧlnɛ.

³² Ȧŋlɔkɔ ŋati kuthi ka təsɔp təgbȧthi kə bɔ wɔnth ri ka kateŋ, kaŋ nɛmthɛnɛ kɔ kȧmȧ ɔ ter ŋa kȧmȧ aŋ wɔŋ ŋa. Kɔ selɔ.

³³ Ka aŋkərəfi aŋ wur ka ɔlaŋgba aŋ wɔŋ ka tasɔp; ka akuthi kə gbuŋ kətəlpɛ aŋtəmp ŋa ro bonka, kaŋ mɔta.

³⁴ Ma aŋfəm aŋa bumər ŋa aŋ ŋəŋk ti-e, aŋ gbukɛ, aŋ kanɛ ti ro pet, yi ka ȧŋthɔf.

³⁵ Ɔwa aŋfəm aŋ wur kȧmȧ aŋ nənk ȧtȧ po yɔnɛ, ka aŋ der ka Yisɔsȧŋ, aŋ bəp ɔlaŋgba ɔwe aŋkərəfi aŋ po wur-e, ulopra, utempi, ɔ yirȧ ka ȧtȧtək ta Yisɔs. Kaŋ nesa.

³⁶ Ɔwa, ŋaŋ aŋa nənk ti-e, aŋ tɔri aŋlɔm mɔ ɔ yɔ ɔ yenkəs kɔnɔ ɔwe la ba akərəfi.

³⁷ Maŋ təl ti-e, aŋfəm ka ȧŋthɔf bɛ aŋ nɛmthɛnɛ Yisɔs kȧmȧ ɔ wur ro ŋaŋ, pəkasifɛ rənes rəbana rə wop ŋa; kɔ bȧkȧ ka ȧŋbil ɔ kȧlanɛ.

³⁸ Ɔwa, ɔlaŋgba ɔwe la ba aŋkərəfi ɔ nɛmthɛnɛ Yisɔs kȧmȧ ɔ yi ro ŋɔŋ, kɛrɛ ɔ som kɔ, ɔ pa,

³⁹ Kȧlanɛ ro seth ka mu, ɔwa tɔri ŋa ko mȧtȧy məbana ama Kuru ɔ po yɔna mu. Kɔ kɔnɛ, ɔ taməs ka kȧpet bɛ mȧtȧy məbana ama Yisɔs ɔ po yɔna kɔ.

⁴⁰ Ma Yisɔsȧŋ ɔ kalanɛ-e, aŋfəm bɛ aŋ binya kɔ; ȧtesoma-e ŋa bɛ aŋ bɔ kar kɔ.

⁴¹ Ɔwa kəla, ulaŋgba ɔwe yi rȧbomp ka ȧŋseth agbanɛ, ɔ ba ȧŋes ŋa Yairɔs, ɔ der, kɔ fumpɔ ka ȧtȧtək ta Yisɔs, ɔ nɛmthɛnɛ kɔ kȧmȧ ɔ wɔŋ ka ȧŋseth ŋɔŋ,

⁴² kotȧy-e ɔ ba wan ubɛra ukin gbo, ɔ bȧk mɔlɔ ma təren tɔfɔt tərəŋ, ɔ fənthȧ tə kəfi. Kɛrɛ mɔ mɔ kɔ-e, ȧsuniya tə thiŋkanɛ kɔ.

⁴³ Ka wuni bom ɔwe mətir mə wur təren tɔfɔt tərəŋ-e, ɔ po sɔŋ ara ɔ ba bɛ ka aŋbolomba, kɛrɛ hali ukin ɔ gbəli hɛ ramər kɔ,

⁴⁴ ɔ der rodarəŋ kɔŋ, kɔ gboŋ amɛsɛ ma aruma rɔŋ. Ɔlɛmp wati mȧtir mɔŋ mə tey kəwur.

⁴⁵ Ka Yisɔs ɔ yif, Kanɛ gboŋ mi-e? Ma ŋaŋ bɛ aŋ pɛnsa-e, Pita yi ŋaŋ aŋa yi yi kɔnɔ aŋ pa, Pa, ȧsuniya tə thiŋkanɛ mu, mə kȧl yif kanɛ gboŋ mu-e?

⁴⁶ Yisɔs ɔ pa, Wuni lɔm ɔ gboŋ mi, ȧtesoma-e i təlnɛ afɔsɔ aŋ po wur mi.

⁴⁷ Ma ɔya ɔ nənk kəpa ɔ gbəli hɛ maŋknɛ-e, ɔ der yi kəyɛr, ɔ sanɛ rodi kɔŋ, ɔ kanɛ ka kabəpər ka aŋfəm bɛ ȧŋsabu aŋa yɔ ɔ gboŋ kɔ, ɔwa to ɔ sɔthɔ kəyeŋk mədɛr ka ɔlɛmp wati.

⁴⁸ Ɔwa ɔ pa ka ɔya, Wan kȧmi ubɛra, kȧlanɛ ka mu kə po mu yenkəs. Kɔ yi məthɔfəl.

⁴⁹ Ma Yisɔs ɔ yi ras ka kəfɔf-e, wuni ɔ der, ɔ wur ka ȧŋseth ŋa ɔwe yi rȧbomp ka ȧŋseth agbanɛ, ɔ pa ro ŋɔŋ, Ɔwan ka mu bɛra ɔ po fi. Te sɔ kira ɔkarmɔkɔ.

⁵⁰ Kɛrɛ Yisɔsȧŋ ma ɔ təl ti-e, ɔ pa, Te nesa, lanɛ gbo. Ɔwa ɔ tə kȧl sɔthɔ ŋesəm.

⁵¹ Ɔwa ma ɔ bek ka ȧŋseth-e, ɔ selɔ hɛ wuni ɔ wɔŋ yi kɔnɔ thambe Pitaŋ, Yɔnȧŋ, Yeməsȧŋ, ɔkas ka ɔwath ubɛra yi ɔkara kɔŋ.

⁵² Aŋfəm bɛ aŋ bok, aŋ kulɔ ta atɔŋ, kɛrɛ kɔnɔ ɔ pa, Te bok, ɔwath ɔ fi hɛ, ɔ dirȧ gbo.

⁵³ kaŋ sel kɔ finɔ maŋ tȧrȧ kəpa ɔ po fi.

⁵⁴ Kɛrɛ ɔ wurɔ ŋa bɛ, ɔ gbasi kȧta ka ɔwath, ɔ tela, Wath bɛra, yokanɛ.

⁵⁵ Ka aŋesəm ŋɔŋ aŋ kȧlanɛ, ka ɔlɛmp wati ɔ yokanɛ; ɔwa Yisɔs ɔ yamari ŋa tə kəsɔŋ kɔ ra rədi.

⁵⁶ Ka ŋaŋ aŋa kom kɔ aŋ kabanɛ, kɛrɛ Yisɔsȧŋ ɔ yamari ŋa kȧmȧ aŋ te kanɛ wuni o wuni ȧte ɔ po yɔ.