Luk 4 - Ȧŋlemrȧnɛ Ȧfu

¹ Ka Yisɔs ɔ la ɔYina məsəm, ɔ wur ro Yɔrdan, ɔwa ɔYina ɔ kera kɔ ro wula,

² Mərey təgba tərəŋ-e, Sethani ɔ gbɔns kɔ. Ka mȧrey mati ɔ di hɛ rəka o rəka, ɔwa ma mə poŋ-e, dor rə wop kɔ.

³ Ka Sethani ɔ pa ro ŋɔŋ, Bepi mə yi ɔWan ka Kuru-e, yamari aŋsar aŋe kȧmȧ aŋ səkɛ kəbo.

⁴ Ka Yisɔs ɔ wosȧnɛ kɔ, ɔ pa, A po gbal kəpa, Pə yi hɛ rə kəbo gbo son rə wuni kəpet mɔ ŋesəm-e, kɛrɛ rə rim o rim ra Kuru.

⁵ Ka Sethani ɔ gbepa kɔ ka kəteŋ kəbɔli rəkɔm, ɔ tɔri kɔ tabȧy bɛ ta ȧdȧru rə kəgbȧləp win.

⁶ kɔ pa ro ŋɔŋ, I ti sɔŋ mu aŋfɔsɔ aŋe bɛ yi aŋyiki ŋati, kotȧy-e a po laŋklia ŋi ro rɔmi; ɔwa i gbəli sɔŋ ŋi wuni o wuni ɔwe i yema.

⁷ Tiyȧŋ bepi mə bȧtho mi-e, i ti sɔŋ mu ŋi bɛ.

⁸ Ɔwa Yisɔs ɔ wosa ɔ pa, Sək mi rȧŋ Sethani. A po gbal kəpa, Mə tə bȧtho ɔMarki ɔKuru ka mu, ɔwa kɔn son kɔnɔ mə yi tə kəbȧtho.

⁹ Ka Sethani ɔ kera kɔ ro Yerusalɛm, ɔ təmər kɔ rə ȧgbȧp ŋin ɔbɔli rəkɔm ka ȧŋseth ŋa Kuru, kɔ pa ro ŋɔŋ, Bepi mə yi ɔWan ka Kuru-e təlpɛ roratha;

¹⁰ kotȧy-e a po gbal kəpa, Ɔ tə yamari aŋmȧleka ŋɔŋ ta ȧtȧ mu, tə kəbumər mu,

¹¹ ɔwa Ka mȧta maŋ aŋ tə kɛkər mu Kama mə te pəth rə ȧsar.

¹² Ɔwa Yisɔs ɔ wosa, ɔ pa ro ŋɔŋ, A po pa, Te mɛmər ɔMarki ɔKuru ka mu.

¹³ Ma Sethani ɔ poŋ ɛgbɔns bɛ-e, ɔ ter Yisɔs haŋ alɔkɔ alɔm.

¹⁴ Ka Yisɔs ɔ kȧlanɛ ro Kalili ka aŋfɔsɔ ŋa ɔYina məsəm, kɔ ba ŋes abana ka ȧŋthɔf ŋati bɛ.

¹⁵ kɔ thəksa aŋfəm ka ɛseth yaŋ ɛgbanɛ, ka ŋa bɛ aŋ yikis kɔ.

¹⁶ Ka Yisɔs ɔ der ro Nasarɛth rə a rusəm kɔ. Ɔwa mɔ mə matanɛ mɔŋ mə yi-e, ɔ wɔŋ ka ȧŋseth agbanɛ ka aŋsabath, kɔ təmȧ tə kəkaraŋ.

¹⁷ Ka a sɔŋ kɔ ȧkȧfȧ ka Isaya tə kəkaraŋ. Ɔ kanthi ki, kɔ bəp ɔdɛr rə a gbal kəpa,

¹⁸ ƆYina ka ɔMarki ɔ rensa mi, Pəkasifɛ ɔ po səməs mi tə kətɔri ȧkɛra kəfinɔ ka Kuru ka ȧŋmɔnɛ. Ɔ som mi tə kətaməs kasəli ka atɛndɛbira, Yi kakal kəli ka aŋfith, Tə kəsɔŋ rȧwankom ka aŋa a thiŋkər rə afɔsɔ rəkɔm.

¹⁹ Tə kətaməs karen kəfinɔ ka ɔMarki.

²⁰ kɔ kantha ȧkȧfȧ, ɔ kala ki ka ȧŋbɔy, kɔ yirȧ. Ɔwa ɛfɔr ya ŋa bɛ aŋa yi ka ȧŋseth agbanɛ ɛ tansa kɔ.

²¹ kɔ təp kəpa ro ŋaŋ, Thonɔŋ a po lasər mȧgbal ame ka katəl ka nu.

²² Ɔwa aŋfəm bɛ aŋa bəpər-e, aŋ fɔf finɔ ta atɔŋ, ɔwa aŋ kabanɛ ta ȧsim təfinɔ ȧte wur ka kȧsəŋ kɔŋ; aŋ yif, Ɔwan uruni ka Yosɛf kɔn thahɔ ɔwe-i?

²³ kɔ pa ro ŋaŋ, Tɛntɛnɛ nə tə tɔri mi aŋlomɔ aŋe, Bolomba, ramərnɛ; tȧy o tȧy ȧte sə təl mə po yɔ ro Kepaniyɔm-e, yɔ ti sɔ nɔ ka ȧŋthɔf a mu.

²⁴ kɔ pa ro ŋaŋ, Tɛntɛnɛ i kanɛ nu, a malanɛ hɛ unabi o nȧbi ka ȧŋthɔf ŋɔŋ.

²⁵ Kɛrɛ i kanɛ nu ka təteŋ kəpa, Abora agbȧthi aŋ yi ro Isrɛl ka mȧrey ma Ilaya, ma a kantha ȧkuru təren təsas yi yof tamthərukin, ka ȧŋlɔkɔ ma dor rəbana rə yi ka ȧŋthɔf bɛ.

²⁶ Kɛrɛ a som hɛ Ilaya ka ukin ka ŋaŋ thambe ka ubora ro Sarɛptha, ka ȧŋthɔf ŋa Sidon.

²⁷ Ɔwa afəm agbȧthi aŋa ba arom aŋ yi ro Isrɛl ka ȧŋlɔkɔ ŋa Ilasha ɔnȧbi, kɛrɛ a fethər hɛ ukin ka ŋaŋ thambe Nemɔn ɔSirian.

²⁸ Ka ŋaŋ bɛ aŋa yi ka ȧŋseth agbanɛ maŋ təl mȧtȧy ame aŋ bora bansȧ,

²⁹ aŋ yokanɛ aŋ bȧl kɔ ka kȧpet, aŋ kera kɔ ka ɔthalnɛ wa kateŋ ro a təmər kȧpet ka ŋaŋ, kȧmȧ a fitha kɔ roratha.

³⁰ Kɛrɛ Yisɔs ɔ thas ka kətɔŋ ka ŋaŋ ɔ kɔnɛ.

³¹ kɔ thor ro Kepaniyɔm, kəpet ka ro Kalili, kɔ thəksa ŋa ka aŋsabath.

³² kaŋ kabanɛ mathəksa mɔŋ, ȧtesoma-e ȧrim rɔŋ rə yi yi afɔsɔ.

³³ Ɔwa wuni ɔ yi ka ȧŋseth agbanɛ, ɔ ba ukərəfi uləs, ɔ sel ɛrɔŋ,

³⁴ ɔ pa, Ko tȧy tȧŋ sə ba yi munɔŋ-a? Munɔ Yisɔs ɔwe ro Nasarɛth! Mə der tə kələsər su-i? I tȧrȧ ɔwe mə yi-e, ɔSəm ka Kuru.

³⁵ Ka Yisɔs ɔ ŋal kɔ, ɔ pa, Taŋk, ɔwa wur ro ŋɔŋ. Ma ɔkərəfi ɔ po napanɛ kɔ kətɔŋ ka ŋaŋ-e, ɔ wur, ɔ yɔ hɛ kɔ ɔbaŋ.

³⁶ Ɔwa ŋa bɛ aŋ kabanɛ, aŋ fɔflanɛ aŋ pa, Ko rim raŋ are-e, kotȧy-e, rə afɔsɔ ɔ yamari aŋkərəfi aləs, ɔwa aŋ wur-e?

³⁷ Ka tȧgbuŋ tɔŋ tə gbanthɛnɛ dɛr o dɛr ka ȧŋthɔf ŋati.

³⁸ Ma Yisɔsȧŋ ɔ wur ka ȧŋseth agbanɛ-e, ɔ wɔŋ ka ȧŋseth ŋa Saymɔn. Ɔwa mədɛr məgbipanɛ məlel mə wop ɔniŋkara ka Saymɔn, ka aŋfəm aŋ nɛmthɛnɛ kɔ ta atɔŋ.

³⁹ kɔ bȧkər kɔ, ɔ ŋal ratu, ka rə ter kɔ. Ka ɔlɛmp wati ɔya ɔ yokanɛ ɔ yɔna ŋa.

⁴⁰ Ma aret rə yema wɔŋ-e, aŋfəm bɛ aŋa ba afəm atuy rə rətu o rətu, aŋ kȧrȧ ŋa ka Yisɔs; ɔ rend mȧta mɔŋ ka ŋa bɛ, ɔ yenkəs ŋa.

⁴¹ Ɔwa aŋkərəfi aləs sɔ aŋ wur rə afəm agbȧthi, aŋ woŋa, aŋ pa, Munɔ mə yi ɔWan ka Kuru; kɔ ŋal ŋa, ɔ selɔyɛ aŋ fɔf ȧtesoma-e aŋ tȧrȧ kəpa kɔnɔ yi ɔKrayst.

⁴² Ma pə sɔk-e, Yisɔs ɔ wur ɔ kɔnɛ dɛr ɔyeŋ. Ɔwa aŋfəm aŋ thɛns kɔ. Maŋ fir kɔ aŋ yema kali kɔ kəwur ro rɔŋaŋ.

⁴³ Kɛrɛ ɔ pa ro ŋaŋ, I ba tə kətɔri ȧkɛra kəfinɔ ka rȧbȧy ra Kuru ka tapet təlɔm sɔ, kotȧy-e ta ȧte tə a som mi.

⁴⁴ Ɔwa Yisɔsȧŋ ɔ taməs ka ɛseth ɛgbanɛ ro Kalili.