Luk 23 - Ȧŋlemrȧnɛ Ȧfu

¹ Ȧruniya bɛ rə yokanɛ, rə kera kɔ ka Paylet.

² kaŋ təp kəgbanthir kɔ, aŋ pa, Sə bəp ɔwuni ɔwe ɔ yɛthəs ȧŋbona a su, ɔwa ɔ bɛnt aŋfəm tə kəsɔŋ ɛfȧk ka Sisar, kɔ pa kɔn kɔnɔnɛ ɔ yi ɔKrayst ɔbȧy.

³ Ka Paylet ɔ yif kɔ, ɔ pa, Munɔ yi ɔbȧy ka aŋYuda-i? kɔ wosȧnɛ kɔ ɔ pa, Mə po thɔ pa ti.

⁴ Paylet ɔ pa ka aŋfode abana yi ka aŋfəm, I fir hɛ athɛkɛ ka ɔlaŋgba ɔwe.

⁵ Kɛrɛ aŋ bȧsər gbanthir kɔ aŋ pa, Ɔ thayos aŋfəm mɔ mɔ thəksa ro Yudia bɛ, kətəp ro Kalili haŋ ka ɔdɛr ɔwe.

⁶ Ma Paylet ɔ təl ȧte-e, ɔ yif bepi ɔlaŋgba ɔ yi uKalili.

⁷ Ɔwa ma ɔ tȧrȧ kəpa ɔ yi ka aŋfɔsɔ ŋa Hɛrɔdȧŋ, ɔ somra kɔ ka Hɛrɔd, pəkasifɛ ɔ yi ro Yerusalɛm ka ȧŋlɔkɔ ŋati.

⁸ Ɔwa ma Hɛrɔd ɔ nənk Yisɔsȧŋ, pə bɔnɛ kɔ ɔthasər, kotȧy-e ɔwoni thɔŋ ɔ fela tə kənəŋk kɔ, pəkasifɛ ɔ po təl tȧy təgbȧthi ta atɔŋ. Ɔwa ɔ yema naŋ tə kənəŋk kɔ ɔ yɔ tȧy təkabanɛ.

⁹ kɔ yifəth kɔ ɛpa ɛgbathi, kɛrɛ ɔ lasianɛ hɛ kɔ.

¹⁰ Aŋfode abana yi aŋkarmɔkɔ aŋ təmȧ, aŋ gbanthir kɔ yi kagbəli ka ŋaŋ bɛ.

¹¹ Ka Hɛrɔd yi aŋtim ŋɔŋ aŋ sai kɔ, aŋ sel kɔ, ka aŋ wɔns kɔ ruma rəkabanɛ, kaŋ kala kɔ ka Paylet.

¹² Ɔwa ka ȧŋrey ŋati gbeŋ Paylet yi Hɛrɔdȧŋ aŋ manɛ, ȧtesoma-e məputhanɛ mə sa yi kətɔŋ ka ŋaŋ.

¹³ Ka Paylet ɔ thoŋkla aŋfode abana, yi aŋgbəka, yi aŋfəm dɛr rɔkin,

¹⁴ kɔ pa ro ŋaŋ, Nə po kȧrȧ mi ɔlaŋgba ɔwe mɔ wuni ɔwe yɛthəs aŋfəm; ɔwa kəla, ma i gbɛŋgbɛŋ kɔ rodi ka nu-e, i fir hɛ ro rɔŋɔŋ mȧtȧy məwunɔŋ ama nə gbanthir kɔ.

¹⁵ Hali ras Hɛrɔdȧŋ, ȧtesoma-e ɔ kȧl somra su kɔ. Ɔwa kəla, ɔ yɔ hɛ tȧy ȧtȧ mə bek tə kəsɔthɔ rəfi.

¹⁶ Tiyȧŋ i ti sap kɔ, ɔwa i ti ter kɔ.

¹⁷ (kotȧy-e ɔ ba tə kətera ŋa ukin ka amet.)

¹⁸ Kɛrɛ ŋa bɛ aŋ sɔŋkɔ yawin-əŋ, aŋ pa, Tɔŋa ɔlaŋgba ɔwe, ɔwa tera su Barabasȧŋ,

¹⁹ (ɔwe a bot ka ȧŋseth ŋa tərəŋka ta kafak atotok ka kȧpet, dɛ yi ta kadif wuni kəsias).

²⁰ Ɔwa Paylet ɔ fɔfȧnɛ ŋa sɔ pəkasifɛ ɔ fela tə kəter Yisɔsȧŋ.

²¹ Kɛrɛ aŋ bȧr sɔŋkɔ aŋ pa, Tȧŋ tȧŋ kɔ ka akənt kəpəŋkinɛ.

²² kɔ pa ro rɔŋaŋ ȧŋlɔkɔ aŋa bekȧ məsas, kɔyɛŋ, ko mələs ɔlaŋgba ɔwe mɔ yɔ-e? I fir hɛ akolo abeki dif kɔ; tiyȧŋ i ti sap kɔ, ɔwa i ti ter kɔ.

²³ Kɛrɛ aŋ kat kənapi yi sim təbɔli rəkɔm aŋ yif kȧmȧ a tȧŋ kɔ ka akənt kəpəŋkinɛ. Ɔwa tapa taŋ tə wopnɛ.

²⁴ Ka Paylet ɔ yamari kȧmȧ aŋ yɔ mɔ mə aŋ yema.

²⁵ kɔ ter kɔnɔ ɔwe a bot ka ȧŋseth ŋa tərəŋka salata kafak atotok yi kadif wuni kəsias, ɔwe aŋ yema; kɛrɛ ɔ lȧnki Yisɔs ka mayema maŋ.

²⁶ Ɔwa maŋ wurɔ kɔ-e, aŋ wop wuni, Saymɔnȧŋ ka ro Sirini, ɔ bɔ wur ro gbaŋ, kaŋ deŋ kɔ akənt kəpəŋkinɛ kȧmȧ ɔ gbanɛ ki rodarəŋ ka Yisɔs.

²⁷ Ɔwa, runiya rəbana rə tȧŋ kɔ yi aŋfəm abom aŋa bok ta atɔŋ.

²⁸ Kɛrɛ Yisɔsȧŋ ɔ fəlɛ ro ŋaŋ, ɔ pa, Awuth abɛra ŋa Yerusalɛm, te nu bok ta ȧtȧ mi, bok nu ta ȧtȧ nu yi aŋwuth a nu.

²⁹ kotȧy-e mȧrey mə tə der ma a tə pa-e, Aŋkoŋfereŋ aŋ yi aruba, yi ator ȧtȧ te kom, yi ȧmȧsȧ ȧme te mȧsər awuth.

³⁰ Ȧŋlɔkɔ ŋati aŋ tə təp kəpa ka tȧteŋ təbana, Fumpər su; yi ka tȧteŋ təlɔl, Gbəpsər su.

³¹ Ȧtesoma-e bepi aŋ yɔ mȧtȧy ame ka aŋənt akəli-e, to mə pə yi ka aŋənt awosi-e?

³² Aŋ ba sɔ afəm aləs ŋarəŋ aŋa a kera tə kədif yi kɔnɔ.

³³ Ɔwa maŋ bek ka ɔdɛr ro a bont aŋgbɛŋkət-e, rə a tȧŋ kɔ ka akənt kəpəŋkinɛ, ɔwa aŋfəm aləs ŋarəŋ, ukin ka kȧdiyɔ, ɔlɔm ka kȧmɛrɔ.

³⁴ Ka Yisɔsȧŋ ɔ pa, ƆKas kȧmi, tera ŋa ȧtesoma-e aŋ tɛ hɛ ȧte mə aŋ yɔ. Kaŋ fak məthəŋ ta ȧsuma tɔŋ.

³⁵ Aŋfəm aŋ təmȧ aŋ tə kəli. Ɔwa aŋgbəka sɔ aŋ sel kɔ, aŋ pa, Ɔ kisis afəm alɔm; ta ɔ kisisnɛ bepi kɔnɔ yi ɔKrayst ka Kuru-e, ɔthith kɔŋ.

³⁶ Antim sɔ aŋ sel kɔ; maŋ der ro ŋɔŋ aŋ yema sɔŋ kɔ afinika,

³⁷ aŋ pa, Bepi mə yi ɔbȧy kaŋ Yuda-e, kisisnɛ.

³⁸ Ɔwa a gbak məgbal rokɔm kɔŋ kəpa, ƆWE Ɔ YI ƆBȦY KA AŊYUDA.

³⁹ Ɔwa ukin ka aŋləs ŋarəŋ aŋa a gbak ɔ nal kɔ, ɔ pa, Bepi mə yi ɔKraist-e, kisisnɛ dɛ yi saŋ sɔ.

⁴⁰ Kɛrɛ ɔlɔm ɔ ŋal kɔ, ɔ pa, Mə nesa hɛ Kuru-i, ma mə nənk kəpa mə yi ka mathɛkɛ mati gbeŋ-i?

⁴¹ Ɔwa pə yi ɔlompi tə kəthalər su ȧtesoma-e saŋ sə sɔthɔ ȧŋrȧm ŋa mȧyɔs ma su, kɛrɛ ɔlaŋgba ɔwe ɔ yɔ hɛ tȧy o tȧy tələs.

⁴² kɔ pa, Yisɔs, Nanɛ mi ma mə bek ka rȧbȧy ra mu.

⁴³ kɔ pa ro ŋɔŋ, Tɛntɛnɛ i kanɛ mu, thonɔŋ mə tə yi yi minɛŋ ka ɔdɛr ɔthɔfəl wa Kuru.

⁴⁴ Ɔwa pə yi mɔlɔ ma kagbat tamthərukin ka aŋgbeleŋ, ka asum abana aŋ thor ka ȧŋthɔf bɛ haŋ ka ȧŋlɔkɔ ŋa kagbat tȧmthərɛŋanlɛ ka aŋgbeleŋ.

⁴⁵ Aret rə biyȧ, ka ȧŋkunkla ŋa ȧŋseth ŋa Kuru aŋ gbaya ratɔŋ.

⁴⁶ Ka Yisɔsȧŋ ɔ sel ɛrɔŋ yi rim rəbɔli rəkɔm, ɔ pa, Kas ka mi-e, ka mȧta ma mu i lȧnki aŋesəm a mi. Ma ɔ po pa ȧte-e, ɔ ternɛ.

⁴⁷ Ɔwa ma ɔkaptin ɔ nənk ȧte po yɔnɛ-e, ɔ thɔkəs Kuru, ɔ pa, Tɛntɛnɛ ɔwe-e, wuni lompi wɔŋ.

⁴⁸ Ka ȧsuniya bɛ ȧtȧ thoŋklanɛ tə kənəŋk ȧte-e ma aŋ nənk mȧtȧy ama po yɔnɛ-ɛ, aŋ kȧlanɛ yi kətuŋ ɛkəpət yaŋ.

⁴⁹ Aŋyathki ŋɔŋ bɛ yi aŋfəm abom aŋa tȧŋ kɔ kəwur ro Kalili, aŋ təmȧ ɔbɔli poŋ, aŋ kəli mȧtȧy ame.

⁵⁰ Ɔwa kəla, ulaŋgba a bont Yosɛf-əŋ, ukin ka aŋgbonli, wuni finɔ wɔŋ, ɔwa ulompi,

⁵¹ (kɔnɔŋ ɔ kasa hɛ ka ȧŋpa yi mayɔ maŋȧŋ), wuni ka ro Arimathia, kəpet ka ro Yuda, ɔwe mə kar rȧbȧy ra Kuru.

⁵² Ɔthem ɔwe ɔ kɔnɛ ka Payletȧŋ, ɔ thola kabel ka Yisɔs.

⁵³ kɔ thora kɔ, ɔ rapər kɔ rə kotha kəfera, ɔ bot kɔ rə apali aŋa a lol rə ȧsar ro a te tha la bot wuni.

⁵⁴ Ka pə yi ȧŋrey ŋa kabɛnɛnɛ, ɔwa aŋsabath aŋ fat.

⁵⁵ Aŋfəm abom aŋa paya kɔ kəwur ro Kalili-e, aŋ tȧŋ rodarəŋ, aŋ kəli ȧŋpali, yi to a bot kabel kɔŋ.

⁵⁶ kaŋ kȧlanɛ, aŋ bɛnɛnɛ ɛyɛt ɛfɔlfɔl yi mȧro məsopa. Ɔwa ka aŋsabath-e aŋ fothanɛ mɔ mə aŋyamari aŋ pa.