Luk 22 - Ȧŋlemrȧnɛ Ȧfu

¹ Ɔwa amet ma kəbo kəpaŋi ɛgbith mə fat, ama a bont kapainɛ.

² Ka aŋfode abana yi aŋkarmɔkɔ aŋ thɛns roŋ kȧmȧ aŋ dif kɔ, kɛrɛ aŋ nesa aŋfəm.

³ Ka Sethani ɔ wɔŋ ka Yudas ɔwe a bont Iskariyɔt, ukin ka aŋtɔfɔt ŋarəŋ.

⁴ kɔ kɔnɛ, ɔ nəŋkanɛ yi aŋfode abana yi aŋkaptin kȧmȧ ɔ lȧnki kɔ ro ŋaŋ.

⁵ Ka pə bɔnɛ ŋa, ɔwa aŋ lahiri tə kəsɔŋ kɔ akala.

⁶ kɔ malanɛ, ɔwa ɔ thɛns roŋ tə kəlaŋkli kɔ ro rɔŋaŋ ma ȧruniya rə te bəpər.

⁷ Ka ȧŋrey ŋa kəbo kəpaŋi ɛgbith aŋ bek, ma a fai kalɔmɛ kəfɛth ka kapainɛ.

⁸ Ɔwa Yisɔsȧŋ ɔ som Pitaŋ yi Yɔnȧŋ, kɔ pa, Kɔnɛ nu nə bɛnɛnɛ ta ȧtȧ su amet ma kapainɛ, kȧmȧ sə di.

⁹ kaŋ pa ro rɔŋɔŋ, Reke mə yema kȧmȧ sə bɛnɛnɛ ti-e?

¹⁰ kɔ pa, Ma nə wɔŋ ka kapet-e nə tə gbanɛ ulaŋgba ɔwe sara akaro ka mȧnt. Tȧŋ kɔ ka ȧŋseth ro mɔ wɔŋ.

¹¹ Ɔwa pa ka ɔwe ba ȧŋseth, Ɔkarmɔkɔ ɔ pa ro mu, Ŋia ȧŋkonko ro mə i di amet ma kapainɛ yi aŋkarande a mi-i?

¹² Ɔwa ɔ tə tɔri nu ȧkonko abana rokɔm aŋa ba yɛt bɛ; rə mə nə bɛnɛnɛ.

¹³ Ɔwa aŋ kɔnɛ, aŋ bəp ti mɔ mɔ kanɛ ŋa, ka aŋ bɛnɛnɛ amet ma kapainɛ.

¹⁴ Ɔwa ma ȧŋlɔkɔ aŋ po bek-e, ɔ yirȧ yi aŋsom ŋɔŋ tɔfɔt ŋarəŋ tə kədi.

¹⁵ kɔ pa ro ŋaŋ, Tə tɛntɛnɛ i po ba afela abana tə kədi amet ma kapainɛ ame yi naŋ yeŋka i nakasi,

¹⁶ kotȧy-e i kanɛ nu i ba hɛ tə kədi ŋi sɔ haŋ a po lasər ŋi ka rȧbȧy ra Kuru.

¹⁷ kɔ nɔy ampɔthi, ɔwa ma ɔ po muti məmə-e, ɔ pa, Gbasi ame, nə yerəs ma kətɔŋ ka nu,

¹⁸ ȧtesoma-e i kanɛ nu, i ba hɛ sɔ kəmun ka mȧkomi ma ralek haŋ rȧbȧy ra Kuru rə bek.

¹⁹ kɔ gbasi kabo, ɔwa ma ɔ po muti məmə-e, ɔ sim ki, ɔ sɔŋ ŋa, kɔ pa, Ake kə yi aŋdɛr a mi aŋa a sɔŋ ta ȧtȧ nu. Yɔ ȧte rə kənanɛ mi.

²⁰ Maŋ po di-e ɔ gbasi ampɔthi, ɔ pa, Ampɔthi aŋe aŋ yi aŋlemranɛ afu ka mȧtir ma mi, ama a loŋ ta ȧtȧ nu.

²¹ Kɛrɛ kəla, kȧta ka kɔnɔ ɔwe mə sɔnd mi kə yi ro mi ka aŋthebəl.

²² Tɛntɛnɛ ɔWan ka wuni ɔ kɔnɛ mɔ mə a po gbək ti, kɛrɛ mɔnɛ ka ɔwuni kati ɔwe mə sɔnd kɔ!

²³ kaŋ təp kəyifəthanɛ kətɔŋ ka ŋaŋ, Kanɛ ba kəre yɔ ȧtȧy ȧte-e?

²⁴ Ɔwa agbal sɔ aŋ yi kətɔŋ ka ŋaŋ ta ɔwe mə yi ɔbana thɔŋ bɛ.

²⁵ kɔ pa ro rɔŋaŋ, aŋbȧy ŋa tȧbona təlɔm aŋ tə gbəka ŋa, ɔwa ŋaŋ aŋa mə gbəka ŋa a bont ŋa afəm ayɔ ɔfinɔ.

²⁶ Kɛrɛ te nu yi yaŋ. Kɔnɔ ɔwe mə yi ubana kətɔŋ ka nu-e, ta ɔ yi mɔ ufɛth; ɔwa kɔnɔ ɔwe yi rȧbomp, ta ɔ yi mɔ ɔwe mə yɔna.

²⁷ kotȧy-e, kanɛ tha yi ubana-e, kɔnɔ ɔwe mə yirȧ tə kədi-e, thalɔm kɔnɔ ɔwe mə yɔna kɔ-e? Pə yi hɛ kɔnɔ ɔwe yirȧ tə kədi-e? Kɛrɛ minɛ i yi kətɔŋ ka nu mɔ ɔwe mə yɔna.

²⁸ Kɛrɛ naŋ nə yi ŋaŋ aŋ tiyȧ yi minɛ ka ɛgbɔnsanɛ ɛ mi,

²⁹ ɔwa i ti sɔŋ nu rȧbȧy mɔ mə ɔKas kȧmi ɔ sɔŋ mi,

³⁰ kȧmȧ nə gbəli di, ɔwa nə mun ka aŋthebəl a mi ka rȧbȧy ra mi. Ɔwa nə tə yirȧ rə tawaŋ ta rəbȧy, nə tə thonkas ɛbɔnsɔŋ tɔfɔt yɛrəŋ ya Isrɛl.

³¹ Saymɔn, Saymɔn, Sethani ɔ yema ba mu kȧmȧ ɔ fɛk mu mɔ pəla,

³² kɛrɛ i po ramnɛ ta ȧtȧ mu kȧmȧ kȧlanɛ ka mu kə te ranta. Ɔwa ma mə po lafthɛ-e, bȧksər aŋwɔnt a mu.

³³ kɔ pa ro rɔŋɔŋ, Pa, i po bɛnɛnɛ tə kəpaya mu ka ȧŋseth ŋa tərəŋka yi ka rəfi.

³⁴ kɔ pa, Pita, i kanɛ mu, katəpi ɔ tam hɛ thonɔŋ haŋ mə po pɛnsa məsas kəpa mə tɛ hɛ mi.

³⁵ kɔ pa ro ŋaŋ, Ma i som nu nə te ba abuthu, thalɔm agbaŋfa, thalɔm ɛkɔftha-e, nə paŋ rəka-i? Ka aŋ lasi, Hali.

³⁶ kɔ pa ro ŋaŋ, Kɛrɛ ka-ake, kɔnɔ ɔwe ba abuthu, ta ɔ kera ŋi, yi agbaŋfa sɔ; ɔwa kɔnɔ ɔwe te ba agbathɔ, ta ɔ thila aruma rɔŋ, kȧmȧ ɔ wai ŋin.

³⁷ kotȧy-e i kanɛ nu kəpa, ȧte ȧtȧ a gbal-e, a ba kəlasər ti ro rɔmi kəpa, Ɔwa, a kuluŋ kɔ yi aŋfəm aləs; kotȧy-e ȧte a po pa ta ȧtȧ mi-e, tə ba kəgbenthis.

³⁸ kaŋ pa, Pa, kəla, ɛgbathɔ yɛrəŋ ɛ yi nɔ. Kɔ pa, Ɔwa ɔbeki.

³⁹ kɔ wur, ɔ kɔnɛ ka kateŋ ka Ɔlif mɔ mɔ sa yɔ, ka aŋkarande ŋɔŋ aŋ paya kɔ.

⁴⁰ Ɔwa ma ɔ bek ka ɔdɛr-e, ɔ pa ro rɔŋaŋ, Ramnɛ kȧmȧ nə te wɔŋ rə tȧy təgbɔns.

⁴¹ kɔ bɔlȧnɛ ŋa mɔlɔ ma kəlɔm ȧsar, ɔ sɔ təwu, ɔ ramnɛ,

⁴² ɔ pa, Pa, bepi mə selɔ-e, tɔŋa ampɔthi aŋe ro mi, kɛrɛ ta pə te yi mȧselɔ ma mi, kɛrɛ ama mu mə yɔnɛ.

⁴³ Ɔwa wurɔ kəwur ro riyana ɔ der ro rɔŋɔŋ, ɔ bȧkəs kɔ mədɛr.

⁴⁴ Ɔwa ma ɔ yi ka anakasi abana-e ɔ ramnɛ thuŋ, ɔwa mȧranɛ mɔŋ mə path mɔ ɛbȧlək ya mȧtir mə fumpɔ ro thɔf.

⁴⁵ Ma ɔ yokanɛ ka karamnɛ kɔŋ-e, ɔ kɔ ka aŋkarande ŋɔŋ, kɔ bəp ŋa aŋ dirȧ ta ɔnɔsinɛ.

⁴⁶ kɔ pa ro ŋaŋ, kɔyɛŋ nə dirȧ-e? Yokanɛ nu nə ramnɛ kȧmȧ nə te wɔŋ rə tȧy ta məgbɔns.

⁴⁷ Mɔ mɔ fɔf ras-e, kəla, runiya rə der, ɔwa, ɔwe a bont Yudasȧŋ, ukin ka aŋtɔfɔt ŋarəŋ ɔ təmȧ ŋa kədi, kɔ fatər Yisɔsȧŋ tə kəmuməl kɔ.

⁴⁸ Kɛrɛ Yisɔsȧŋ ɔ pa ro ŋɔŋ, Yudas, mə sɔnd ɔWan ka wuni yi kəmuməl-i?

⁴⁹ Ma aŋkarande ŋɔŋ aŋ nənk ȧte mə yɔnɛ-e, aŋ pa ro ŋɔŋ, Pa, sə tapa aŋgbathɔ-i?

⁵⁰ Ka ukin ka ŋaŋ ɔ tap ȧŋbɔy ŋa ɔfode ubana, kɔ gbək aŋləns ŋɔŋ ȧdiyɔ.

⁵¹ Ka Yisɔsȧŋ ɔ pa, Ɔbeki thɔŋ. Kɔ gboŋ aŋləns ŋɔŋ, ɔ yenkəs kɔ.

⁵² Ka Yisɔsȧŋ ɔ pa ka aŋkərbomp ta aŋfode yi aŋkaptin ka ȧŋseth ŋa Kuru, yi aŋbȧki aŋa der ro ŋɔŋ, Nə der mɔ nə re tȧŋ ukei, yi ɛgbathɔ yi təgbeŋgbeŋ-i?

⁵³ Ma i yi ro rɔnu ȧrey o rei ka ȧŋseth ŋa Kuru-e, nə thanthi hɛ mȧta ma nu tə kəwop mi. Kɛrɛ ȧŋlɔkɔ a nu ŋi aŋe yi aŋfɔsɔ ŋa ȧŋsum.

⁵⁴ kaŋ wop kɔ, aŋ kera kɔ ka ȧŋseth ŋa ɔfode ubana, kɛrɛ Pitaŋ ɔ tȧŋ kɔ ɔbɔli poŋ.

⁵⁵ Ɔwa maŋ po tɔlər nȧnt rokaŋ ratɔŋ-e, ŋa bɛ aŋ yirȧ ri, ɔwa Pita ɔ yirȧ kətɔŋ ka ŋaŋ.

⁵⁶ Ka ȧbɔy ubɛra ulɔm ɔ nənk kɔ mɔ mɔ yirȧ ka anant rayɛr, ɔ kəli kɔ təŋ, kɔ pa, Ɔlaŋgba ɔwe sɔ ɔ la yi yi kɔnɔ.

⁵⁷ Pitaŋ ɔ pɛnsa ɔ pa, Wath bɛra i tɛ hɛ kɔ.

⁵⁸ Ɔwa pə won hɛ ulɔm ɔ kȧl nənk kɔ, ɔ pa, Munɔ sɔ mə yi ukin ka ŋaŋ. Pitaŋ ɔ pa, Wan, min thahɔ.

⁵⁹ Kədarəŋ kati pə təp gbo won ɔthan-e, ulɔm ɔ bȧksər ti, ɔ pa, Ka təteŋ ɔlaŋgba ɔwe sɔ ɔ la yi yi kɔnɔ, kotȧy-e uKalili wɔŋ.

⁶⁰ Ɔwa Pitaŋ ɔ pa, Mbɔ, i tɛ hɛ ȧte mə pa. Ka ɔlɛmp wati mɔ mɔ fɔf-e, katəpi ɔ tam.

⁶¹ Ka ɔMarki ɔ fəlɛ, ɔ kəli Pitaŋ. Ɔwa Pita ɔ kala ȧmerȧ ka ȧrim ra ɔMarki ma ɔ pa ro rɔŋɔŋ, Yeŋka katəpi ɔ tam thonɔŋ mə tə pɛnsa mi məsas.

⁶² kɔ wur, ɔ bok ɔbaŋ.

⁶³ Ka aŋlaŋgba aŋa wop Yisɔsȧŋ aŋ sel kɔ, ɔwa aŋ gbantha kɔ.

⁶⁴ Ɔwa maŋ po gbəpər ɛfɔr yɔŋ-e, aŋ gbantha kɔ ro der, aŋ pa, Tɔri su ba, kanɛ gbantha mu-e?

⁶⁵ Ɔwa tȧy təgbȧthi təlɔm tə aŋ fɔf ta atɔŋ tə kəsambos kɔ.

⁶⁶ Ɔwa ma pə sɔk-e, aŋgbanɛ ŋa aŋbȧki ŋa aŋfəm aŋ thoŋklanɛ rɔkin, aŋfode abana-o yi aŋkarmɔkɔ, ka aŋ kera kɔ ka aŋnəŋkanɛ ŋaŋ, aŋ pa,

⁶⁷ Bepi munɔ mə yi ɔKraist-e, kanɛ su. Kɛrɛ kɔnɔ ɔ pa ro ŋaŋ, Bepi i kanɛ nu-e nə lanɛ hɛ.

⁶⁸ Ɔwa bepi i yif nu-e, nə selɔ hɛ tə kəgbakia mi.

⁶⁹ Kɛrɛ kətəp ka ȧŋlɔkɔ aŋe ɔWan ka wuni ɔ tə yirȧ ka kȧta kədiɔ ka aŋfɔsɔ ŋa Kuru.

⁷⁰ Ka ŋa bɛ aŋ pa, Mə yi hɔ ɔWan ka Kuru-i? kɔ pa ro rɔŋaŋ, Pə yi mɔ mə nə pa-e, minɛŋ.

⁷¹ kaŋ pa, Ko məseri məlɔm sɔ mə sə yema-e? Ȧtesoma-e saŋ sə po təl ka kȧsəŋ kɔŋ gbeŋ.