Luk 20 - Ȧŋlemrȧnɛ Ȧfu

¹ Ka pə re yi ka ȧrey ŋin mɔ mɔ thəksa aŋfəm ka ȧŋseth ŋa Kuru, ɔ tɔri ŋa sɔ ȧkɛra kəfinɔ ka Kuru-e, aŋfode-o, aŋkarmɔkɔ-o yi aŋbȧki aŋ der ro ŋɔŋ,

² kaŋ pa ro ŋɔŋ, Tɔri su afɔsɔ areke mȧ mə yɔ mȧtȧy ame, thalɔm kanɛ yi kɔn ɔwe sɔŋ mu aŋfɔsɔ aŋe-e?

³ kɔ lasi ɔ pa ro ŋaŋ, Minɛŋ sɔ i ti yif nu apa ŋin, ɔwa gbakia mi nu.

⁴ Ȧŋbaftisəm ŋa Yɔn aŋ wur ro riyana thalɔm ka afəm-i?

⁵ kaŋ fɔflanɛ aŋ pa, Bepi sə pa, Ka ȧriyana-e, ɔ tə pa, To som mən nə te kɔ lanɛ-e?

⁶ Kɛrɛ bepi sə pa, Ka afəm-e, aŋfəm bɛ aŋ tə ləməs su məsar, ȧtesoma-e aŋ lanɛ kəpa Yɔnȧŋ ɔ yi unabi.

⁷ kaŋ lasi kəpa aŋ tɛ hɛ ro aŋ wur.

⁸ Ka Yisɔsȧŋ ɔ pa, Minɛ sɔ i tɔri hɛ nu ko afɔsɔ mə i yɔ mȧtȧy ame.

⁹ kɔ təp tə kəfɔf aŋlomɔ aŋe ka aŋfəm. Wuni lɔm ɔ tɛp yɛt ɛgbam rə kɔr, kɔ tey akɔr kati rə abȧf, kɔ kɔnɛ ka athɔf alɔm ta alɔkɔ awoni.

¹⁰ Ɔwa ka ȧŋlɔkɔ ŋa kapim məkomi ɔ som ȧbɔy ka aŋbȧf kȧmȧ aŋ yer kɔ mȧkomi məlɔm ma akɔr kati; kɛrɛ aŋbȧf aŋ sap kɔ, aŋ ter kɔ ɔ kȧlanɛ kəte ba koko.

¹¹ kɔ kȧl som ȧbɔy alɔm; kɔnɔ sɔ aŋ sap kɔ, aŋ sambos kɔ, aŋ ter kɔ ɔ kȧlanɛ kəte ba koko.

¹² kɔ kȧl som ɔwe bekȧ asas, kaŋ yɔ kɔ ɔbaŋ, aŋ wurɔ kɔ.

¹³ Ɔmariki ka akɔr ka ɛyɛt ɛgbam ɔ pa, To mə i yɔ-e? I ti som ɔwan uruni kȧmi ubɔthər; sɔthlɔm aŋ tə wop kɔ yiki.

¹⁴ Kɛrɛ ma aŋbȧf aŋ nənk kɔ-e, aŋ kɔ nəŋkanɛ, aŋ pa, Ɔwe mə re ba akɔr-e, kɔnɔ ɔwe, maŋ dif kɔ nu, kȧmȧ sə sɔthɔ akɛŋ.

¹⁵ Ɔwa aŋ wurɔ kɔ ka akɔr ka ɛyɛt ɛgbam, kaŋ dif kɔ. To ɔmarki ka akɔr ka ɛyɛt ɛgbam mɔ yɔ ŋa-e?

¹⁶ Ɔ tə der, ɔ tə dim aŋbȧf aŋe, ɔ tə sɔŋ akɔr ka ɛyɛt ɛgbam rə afəm alɔm. Maŋ təl ti-e aŋ pa, Saki ti Kuru.

¹⁷ kɔ kəli ŋa ɔ pa, Ko yi ȧte mən ȧtȧ a gbal kəpa, Aŋsar aŋa aŋsȧl aŋ pɛnsa, Ŋi gbeŋ, a kȧl səki ŋi rȧbomp ra aŋkoŋ-e?

¹⁸ Wuni o wuni ɔwe mə fumpɔ ka aŋsar ŋati, ɔ tə simətha, kɛrɛ wuni o wuni ɔwe mə aŋ fumpər-e, aŋ tə gbəm kɔ sər mɔ kəbof.

¹⁹ Ɔwa aŋfode abana yi aŋkarmɔkɔ aŋ thɛns tə kəwop kɔ ka ȧŋlɔkɔ ŋati gbeŋ, kɛrɛ aŋ nesa aŋfəm kotȧy-e aŋ sɔthnɛ kəpa ɔ fɔf aŋlomɔ aŋe ta ȧtȧ ŋaŋ.

²⁰ kaŋ səth kɔ, ɔwa aŋ som atombəla aŋa yɔ mɔ afəm alompi kȧmȧ aŋ gbəli gbip tapa tɔŋ, kȧmȧ aŋ lȧnki kɔ ka aŋfɔsɔ ŋa ɔgbəka.

²¹ kaŋ yif kɔ aŋ pa, Karmɔkɔ, sə tȧrȧ ti kəpa mə fɔf ɔwa mə thəksa ɔlompi, mə yɔ hɛ agbȧy ka wuni o wuni, kɛrɛ mə thəksa aroŋ ra Kuru təteŋ.

²² Pə yi ɔlompi ta ȧtȧ su tə kəsɔŋ ɛfȧk ka Sisar-i, thalɔm pə lomp hɛ-i?

²³ Kɛrɛ ma ɔ tȧrȧ masɔth ma ŋaŋ-e, ɔ pa ro ŋaŋ, To som nə gbɔns mi-e?

²⁴ Tɔri mi nu akɔpɔ abana ŋin. Ko mȧbȧlȧnɛ-e, yi mȧgbal ma kanɛ aŋ ba-e? kaŋ pa, Ama Sisar.

²⁵ kɔ pa ro ŋaŋ, Tiyȧŋ sɔŋ Sisarȧŋ ɛyɛt ɛyɛ yi ɛya Sisar, ɔwa ka Kuru ɛyɛt ɛyɛ yi ɛya Kuru.

²⁶ Aŋ gbəli hɛ wop mapa mɔŋ rodi ka aŋfəm, kaŋ kabanɛ aŋgbaki ŋɔŋ, kaŋ taŋk.

²⁷ ASadusi alɔm aŋ der ka Yisɔs, aŋa pɛnsa kəpa kȧyokanɛ kə yi hɛ. Kaŋ yif kɔ,

²⁸ Karmɔkɔ, Mosis ɔ gbal ta ȧtȧ su, Bepi uwɔnt ka wuni ɔ fi-e, ɔ ba ubɛra kɛrɛ ɔ ba hɛ wan, ta ɔwɔnt kɔŋ ɔ nȧntȧ ɔrani kati, kȧmȧ ɔ koməs awuth ta ɔwɔnt kɔŋ.

²⁹ Ɔwa aŋ la yi awɔnt tȧmthədɛrəŋ. Ɔtɔtɔkɔ ɔ nȧntȧ, kɔ fi kəte ba awuth.

³⁰ Ɔwa bekȧ ŋarəŋ sɔ;

³¹ ka ɔwe bekȧ asas-e ɔ nȧntȧ kɔ; ya pə taŋanɛ, ŋa tȧmthədɛrəŋȧŋ aŋ fi aŋ tey hɛ awuth.

³² Kədarəŋ kati ɔbɛra sɔ ɔ fi.

³³ Tiyȧŋ ka kȧyokanɛ ka aŋfi-e, ɔrani ka kanɛ mɔ yi-e? Ȧtesoma-e ŋa tȧmthədɛrəŋ aŋ nȧntȧ kɔ.

³⁴ Ka Yisɔsȧŋ ɔ pa ro ŋaŋ, Aŋwuth ŋa ȧdȧru are aŋ nȧntȧ, ɔwa a baləs ŋa;

³⁵ kɛrɛ aŋfəm aŋa yi abeki tə kəsɔthɔ ȧdȧru araŋ yi kȧyokanɛ ka aŋfi-e, aŋ nȧntȧ hɛ, ɔwa a baləs hɛ ŋa;

³⁶ ȧtesoma-e aŋ gbəli hɛ sɔ fi, aŋ yi mɔ aŋmȧleka; aŋ yi awuth ŋa Kuru, maŋ yi aŋwuth ŋa kȧyokanɛ ka rafi.

³⁷ Kɛrɛ hali Mosisȧŋ ɔ tɔri ta kȧyokanɛ ka aŋfi ka ɔdɛr ka aŋgbɔfɔŋ, ma ɔ tela ɔMarki ɔKuru ka Ebraham, ɔKuru ka Aysakȧŋ yi ɔKuru ka Yekɔb.

³⁸ Ɔwa kɔnɔ ɔ yi hɛ ɔKuru ka aŋfi, kɛrɛ ɔka aŋkəli, ȧtesoma-e aŋfəm bɛ aŋ ŋesəm ro rɔŋɔŋ.

³⁹ Ka aŋkarmɔkɔ alɔm aŋ lasi kɔ aŋ pa, Karmɔkɔ, mə po fɔf ɔfinɔ.

⁴⁰ Kədarəŋ kati aŋ mintha hɛ sɔ yif kɔ tȧy o tȧy.

⁴¹ kɔ pa ro ŋaŋ, To som aŋfəm aŋ pa ɔKrayst ɔ yi ɔWan ka Debid-e?

⁴² Debidȧŋ kɔŋ kɔnɔnɛ ɔ pa ka ȧŋSams, ƆMariki ɔ pa ka ɔMarki kȧmi, Yirȧ ka kȧta kȧmi kədiɔ,

⁴³ Haŋ i yɔ aŋtheranɛ a mu aŋgbeth ŋa ȧtȧtək ta mu.

⁴⁴ Debidȧŋ ɔ bont kɔ Mariki. Ɔwa to mɔ kȧl yi ɔwan kɔŋ-e?

⁴⁵ Ɔwa ka katəl ka aŋfəm bɛ, ɔ pa ka aŋkarande ŋɔŋ,

⁴⁶ Pɛndaf nu aŋkarmɔkɔ aŋa fela tə kəkɔth rə suma təbɔli, ɔwa aŋa bɔthər ɛkori ka ɔdɛr ɔthila, yi tawaŋ tətɔtɔkɔ ka ɛseth ɛgbanɛ, yi ɔdɛr ɔtɔtɔkɔ ka ɛmet.

⁴⁷ Aŋ ləsər ɛseth ya ȧŋbora, ɔwa rə kəkɔnthɔsnɛ aŋ ramnɛ ɔwoni. Aŋe aŋ tə tha sɔthɔ mətheri məbana.