Luk 2 - Ȧŋlemrȧnɛ Ȧfu

¹ Ka pə re yi ka mȧrey mati Sisar Akɔstɔs-əŋ ɔ tam kəpa a ba tə kəgbal ames ma aŋfəm ka ȧdȧru bɛ.

² Kagbal ames ma aŋfəm ake kə yi kətɔtɔkɔ bɛ ka kasara ka Siriniyɔs ro Siriya.

³ Ɔwa wuni o wuni ɔ kɔnɛ ka kȧpet kɔŋ, kȧmȧ a gbal ȧŋes ŋɔŋ.

⁴ Yosɛfȧŋ sɔ ɔ wur ro Nasarɛth ka ȧŋthɔf ŋa ro Kalili, ɔ kɔ ro Yudiya ka kȧpet ka Debid ȧke a bont Bɛthlihɛm, ȧtesoma-e ɔ yi ka ȧŋseth yi ȧŋbɔnshɔ ŋa Debid,

⁵ kȧmȧ a gbal ȧŋes ŋɔŋ yi Meri ɔwe ɔ fath; ɔwa ɔ ba kor kəbaki.

⁶ Kɛrɛ maŋ yi ri-e, mȧrey ma Meri mə lasər ta kȧkom kɔŋ.

⁷ Ɔwa ɔ kom ɔwan kɔŋ utɔtɔkɔ uruni, kɔ rapər kɔ totha təbɔli, ɔ bot kɔ dɛr ro mə a bot ɛdi ya ɛsɛm, ma aseth ayiyanɛ alɔm aŋ te sɔ yi ta ȧtȧ ŋaŋ-e.

⁸ Ka afəm atɔl təlɔmɛ aŋ yi ka ȧŋthɔf ŋati, aŋ bȧkər ro lal tə kəbumər akuthi ka ŋaŋ tȧtȧk.

⁹ Ɔwa ɔmaleka ka Kuru ɔ wurər ŋa pus, ka aŋyiki ŋa Kuru aŋ gbɛnthar ŋa, kaŋ nesa.

¹⁰ Ka ɔmaleka ɔ pa ro ŋaŋ, Te nu nesa, ȧtesoma-e i kȧrȧ nu kɛra kəfinɔ ka məbɔnɛ məbana, ama mə yi ta afəm bɛ.

¹¹ kotȧy-e a po koma nu thonɔŋ ka kȧpet ka Debid uKisis ɔwe yi Krayst ɔMarki.

¹² Ɔwa aŋe aŋ tə yi alomar ro rɔnu; nə tə bəp kalɛnth a rapər kɔ totha təbɔli, ɔ fənthȧ dɛr ro mə a bot ɛdi ya ɛsɛm.

¹³ Ka ɔlɛmp wati runiya ra aŋyama ŋa ro riyana rə yi yi ɔmaleka, rə thɔkəs Kuru, rə pa,

¹⁴ Ta Kuru ɔwe yi rokɔm ɔ ba ayiki, Ta məthɔfəl mə yi nɔru ka aŋfəm aŋa mə thesis kɔ.

¹⁵ Ma aŋmȧleka aŋ wur ro ŋaŋ aŋ kȧlanɛ ro riana-e, aŋtɔl ɛsɛm aŋ pa kətɔŋ ka ŋaŋ, Maŋ kɔ nu ro Bɛthlihɛm kȧmȧ sə nənk ȧtȧy ȧte ȧtȧ po yɔnɛ, ȧte ɔMarki ɔ po tɔri su.

¹⁶ kaŋ kɔnɛ ri yi kəgbukɛ, aŋ bəp Merɛŋ yi Yosɛf-əŋ, ɔwa kalɛnth ɔ fənthȧ ka ɔdɛr ro mə a bot ɛdi ya ɛsɛm.

¹⁷ Ɔwa maŋ nənk ɔwath-e, aŋ tɔri ȧŋpa aŋa a kanɛ ŋa ta ɔwath ɔwe.

¹⁸ Ka aŋfəm bɛ aŋa təl ti-e aŋ kabanɛ ta mȧtȧy ama aŋtɔl aŋ kanɛ ŋa.

¹⁹ Kɛrɛ Merɛŋ ɔ bɛnɛ mȧtȧy ame bɛ-e, ɔ tȧmtȧmnɛ ma ka ȧŋmerȧ ŋɔŋ.

²⁰ Ɔwa aŋtɔl ɛsɛm aŋ kȧlanɛ rə kəyikis yi rə kəthɔkəs Kuru ta mȧtȧy bɛ ama aŋ po təl yi ama aŋ po nənk, mɔ mə a kanɛ ŋa.

²¹ Ɔwa ma mərey tamthərɛsas mə po thas-e, ȧŋlɔkɔ aŋ bek tə kəbirons kɔ, ka a bont kɔ ŋes Yisɔs, ȧŋes aŋa ɔmaleka ɔ sɔŋ kɔ yeŋka ɔkara ɔ gbasi akor kɔŋ.

²² Ɔwa ma mȧrey ma kagbili ka ŋaŋ mə po lasər mɔlɔ ma aŋthɔ ŋa Mosis aŋ pa, aŋ kȧrȧ ɔwath ro Yerusalɛm tə kəlaŋkli kɔ ka ɔMarki,

²³ (mɔ mə a gbal ka aŋthɔ ŋa ɔMarki kəpa, Uruni o runi ɔwe kanthi ȧŋpɔru a tə bont kɔ usəm ka ɔMarki),

²⁴ dɛ yi tə kəwura sathka mɔ mə a pa ka aŋthɔ ŋa ɔMarki, təfop ŋarəŋ, thalɔm təpərəm təfɛth ŋarəŋ.

²⁵ Ɔwa, kəla, wuni ɔ yi ro Yerusalɛm, ȧŋes ŋɔŋ ŋə yi Simiyɔn; wuni ɔwe yi ulompi, ɔ nesa Kuru, ɔ kar kȧbɛfəth ka Isrɛl. Ɔwa ɔYina məsəm ɔ rensa kɔ.

²⁶ Ɔyina məsəm ɔ po tɔri kɔ kəpa ɔ ba hɛ tə kənəŋk rəfi haŋ ɔ po nənk ɔKrayst ka ɔMarki.

²⁷ Ka ɔYina məsəm ɔ kora kɔ ka ȧŋseth ŋa Kuru; ɔwa ma Yosɛf yi Merɛŋ aŋ wɔŋȧ ɔwath Yisɔsȧŋ, kȧmȧ aŋ yɔ matanɛ ma aŋthɔ-e,

²⁸ Simiyɔn ɔ gbasi ɔwath ka maloŋk mɔŋ, ɔ ruba Kuru, ɔ pa,

²⁹ ƆMariki, ka-ake ter ȧŋbɔy a mu ɔ kɔnɛ yi məthɔfəl Mɔ mə ȧrim ra mu rə pa-e.

³⁰ kotȧy-e, ɛfɔr ɛ mi ɛ po nənk kakisis ka mu.

³¹ Ȧke mə po bɛnɛnɛ roder kədi ka təbona bɛ;

³² Amotha tə kəmotha tȧbona təlɔm Yi aŋyiki ŋa aŋfəm a mu Isrɛl.

³³ Ɔwa Yosɛf-əŋ yi ɔkara ka ɔwath aŋ kabanɛ ka mȧtȧy ama a fɔf ta atɔŋ.

³⁴ Ɔwa Simiyɔn ɔ ruba ŋa, ɔ pa ka Meri ɔkara kɔŋ, Kəla, a bot ɔwath ɔwe ta kafumpɔ yi kȧyokanɛ ka agbȧthi ro Isrɛl; ɔwa ta alomar sɔ aŋa mə a pɛnsa;

³⁵ kȧmȧ ɛnanɛ ya ɛmerȧ ɛgbathi ɛ ŋaibɛ. Yao, agbathɔ aŋ tə raf kabuth ka mu sɔ.

³⁶ Ɔwa Ana, unabi ubɛra ɔ yi ri, ɔwan bɛra ka Fanuɛl, ka ȧŋbɔnshɔ ŋa Asar; ɔ po bȧk kəbak kəbana, ɔ yirȧ ka ɔwos kɔŋ təren tȧmthədɛrəŋ ka kȧfanɛ kɔŋ.

³⁷ Ɔ tiyȧ ubora təren təgba tanlɛ təren tanlɛ. Ɔya ɔwe ɔ gbapɛ hɛ ȧŋseth ŋa Kuru, kɛrɛ ɔ bȧtho Kuru gbɛs pali-əŋ, rə kəramnɛ yi kəwop asum.

³⁸ Ɔ wɔŋ ri ȧŋlɔkɔ ŋati gbeŋ, ɔ muti Kuru mɔmɔ, ɔ fɔf ta ɔwath ka ŋa bɛ aŋa kar ta kabani ka Yerusalɛm.

³⁹ Maŋ po yɔ mȧtȧy bɛ mɔ mə aŋthɔ ŋa Kuru aŋ pa-e, aŋ kȧlanɛ ro Kalili, ka kȧpet ka ŋaŋ ro Nasarɛth.

⁴⁰ Ɔwa ɔwath ɔ tɛŋa, kɔ bȧk mədɛr ka ɔYina, ɔ la kətemp, ka ȧŋboŋa ŋa Kuru aŋ yi kɔ.

⁴¹ Ɔwa aŋfəm ŋɔŋ aŋ la kɔ ro Yerusalɛm kəren o kəren ka amet ma kapainɛ.

⁴² Ma Yisɔsȧŋ ɔ po bȧk təren tɔfɔt tərəŋ-e, aŋ kɔ ro Yerusalɛm mɔ matanɛ ma amet mə yi.

⁴³ Maŋ po lasər marey-e, aŋ kȧlanɛ, ɔwa ɔwath Yisɔsȧŋ ɔ tiyȧ rodarəŋ ro Yerusalɛm, kɛrɛ Yosɛf yi ɔkara kɔŋ aŋ tɛ hɛ ti;

⁴⁴ kɛrɛ maŋ nanɛ ɔ yi yi ŋaŋ ka aŋyama-e, aŋ bȧsər ȧŋbiyas ȧrey ŋin, kaŋ thɛns kɔ kətɔŋ ka rȧkomra yi antaranɛ ŋaŋ.

⁴⁵ Ɔwa maŋ te nənk kɔ-e, aŋ kȧlanɛ ro Yerusalɛm tə kəthɛns kɔ.

⁴⁶ Ka pə re yi kədareŋ ka mərey məsas aŋ bəp kɔ ka ȧŋseth ŋa Kuru, ɔ yirȧ kətɔŋ ka aŋkarmɔkɔ, ɔ sua ŋa ɛləns, ɔ yifəth yifəth ŋa sɔ.

⁴⁷ Ŋa bɛ aŋa təlȧ kɔ aŋ kabanɛ ka kȧtȧrȧ kɔŋ yi ɛgbaki yɔŋ.

⁴⁸ Ɔwa maŋ nənk kɔ-e, aŋ kabanɛ; ka ɔkara kɔŋ ɔ pa ro ŋɔŋ, Wan kȧmi, to som mɔ yɔ su yaŋ-e? Kəla, ɔkas ka mu yi minɛŋ, sə thɛns mu rə asoli abana.

⁴⁹ Ɔ pa ro ŋɔŋ, To som mə nə thɛns mi-e? Nə tɛ hɛ kəpa i ba kəyɔ mapanth ma ɔKas ka mi-i?

⁵⁰ Kɛrɛ pə sɔk hɛ ŋa ta ȧte ɔ pa ro rɔŋaŋ.

⁵¹ kɔ kȧlanɛ yi ŋaŋ ro Nasarɛth, ɔwa ɔ yi usanɛ ro ŋaŋ, kɛrɛ ɔkara kɔŋ ɔ bɛnɛ mapa ame bɛ ka ȧŋmerȧ ŋɔŋ.

⁵² Ɔwa Yisɔsȧŋ ɔ bȧr sɔthɔ kətemp yi kəsaŋa. Ɔ ba kəmar tȧy ka Kuru yi ka afəm.