Luk 19 - Ȧŋlemrȧnɛ Ȧfu

¹ kɔ wɔŋ ro Yɛriko, ɔ gbəkinɛ kȧpet,

² ɔwa kəla, ulaŋgba ri ɔwe a bont Sakiɔs, ɔ yi rȧbomp ka aŋthoŋkla ɛfȧk, uyola wɔŋ.

³ Ɔwa ɔ thɛns tə kənəŋk Yisɔs kȧmȧ ɔ tȧrȧ kɔ, kɛrɛ ma ɔ yi ugbut-e, ɔ gbəli hɛ salata ȧruniya rəbana.

⁴ kɔ gbukɛ rodi, ɔ gbep ŋənt asikimɔr kȧmȧ ɔ nənk kɔ, kotȧy-e ɔ tə thas ka aroŋ dati.

⁵ Ma Yisɔsȧŋ ɔ bek ka ɔdɛr wati-e, ɔ kəli rokɔm, ɔ pa ro ŋɔŋ, Sakiɔs, thor lɛmp, ȧtesoma-e i ba kəyianɛ ro seth ka mu thonɔŋ,

⁶ kɔ timɔnɛ tə kəthor, ɔ malanɛ kɔ yi məbɔnɛ.

⁷ Ma aŋfəm aŋ nənk ti-e, ŋa bɛ aŋ fɔfthənɛ aŋ pa, Ɔ po wɔŋ tə kəyianɛ rə wuni ka ɛhakɛ.

⁸ Sakiɔs ɔ təmȧ ɔ pa ka ɔMarki, Pa, i gbai ɛyɛt ɛ mi ratɔŋ tə kəsɔŋ aŋfəm amɔnɛ. Bepi i po nɔy rəka rə wuni o wuni rə yaŋfa, i ti kala kɔ amɔlɔ mati manlɛ.

⁹ Ka Yisɔsȧŋ ɔ pa ro ŋɔŋ, Thonɔŋ kakisi kə po der ka ȧŋseth aŋe, kotȧy-e kɔnɔ sɔ ɔ yi wan uruni ka Ebraham.

¹⁰ kotȧy-e ɔWan ka wuni ɔ der tə kəthɛns yi tə kəkisis ŋaŋ aŋa po dinɛ.

¹¹ Maŋ təl mȧtȧy ame-e, Yisɔs ɔ bȧr fɔf alomɔ pəkasifɛ ɔ po fat ro Yerusalɛm, kaŋ nanɛ kəpa rȧbȧy ra Kuru rə tə tɔrinɛ ɔlɛmp wati.

¹² kɔ pa, Uyola ulɔm ɔ kɔ rə athɔf abara kȧmȧ ɔ sɔthɔ rəbȧy, ɔwa tə kəkalanɛ.

¹³ kɔ tela ɛbɔy yɔŋ tɔfɔt, ɔ sɔŋ ŋa ɛpɔn tɔfɔt, ɔ pa ro ŋaŋ, Səkinɛ nu haŋ i der.

¹⁴ Kɛrɛ aŋkos ŋɔŋ adure aŋ gbɛŋa kɔ, kaŋ som usom kədarəŋ kɔŋ aŋ pa, Sə yema hɛ ɔwuni ɔwe ɔ gbəka su.

¹⁵ Ka pə re yi, ma ɔ po sɔthɔ rȧbȧy ɔ kȧlanɛ, ɔwa ɔ yamari kətela ɛbɔy aŋa ɔ po sɔŋ aŋkala kȧmȧ ɔ tȧrȧ ko məkanya aŋ sɔthɔ ka kasəkinɛ.

¹⁶ Ɔtɔtɔkɔ ɔ der kɔ pa, Pa, ȧŋpɔn a mu ŋin aŋ bȧrnɛ ɛpɔn tɔfɔt.

¹⁷ kɔ pa ro ŋɔŋ, Mə yɔ ɔfinɔ, munɔ ȧŋbɔy ufinɔ; pəkasifɛ munɔ mə yi ubɔthi lanɛ ka ɔthan-e, gbəka ka təpet tɔfɔt.

¹⁸ Ɔwa, ɔwe bekȧ ŋarəŋ ɔ der, ɔ pa, Pa, ȧŋpɔn a mu ŋin aŋ bȧrnɛ ɛpɔn tamath.

¹⁹ kɔ pa ro ŋɔŋ, Munɔ sɔ, gbəka təpet tamath.

²⁰ Ka ɔlɔm ɔ der, ɔ pa, Pa, kəli ȧŋpɔn ŋin a mu aŋa i la koth, ɔwa i bɛnɛ rə agbasa,

²¹ ȧtesoma-e i nesa mu ma mə yi wuni bȧk rəfɔr; mə gbasi ara mə te bot, mə rɔk ara mə te sak.

²² kɔ pa ro ŋɔŋ, Ɔwa ka kȧsəŋ ka mu gbeŋ i ti gbək ȧŋpa a mu, munɔ ȧŋbɔy uləs. Mə tȧrȧ kəpa i yi wuni bȧk rəfɔr, i gbasi ara i te bot, i rɔk ara i te sak.

²³ To som mən mə te sɔŋ aŋkala a mi rə ɔbɛnɛ, kȧmȧ ma i der i gbəli sɔthɔ ŋi yi kəthɛksɛ-e?

²⁴ kɔ pa ro ŋaŋ aŋa təmȧ rayɛr, Nɔi kɔ nu ȧŋpɔn ŋin, ɔwa sɔŋ ŋi ka ɔwɔŋ ɔwe ba ɛpɔn tɔfɔt.

²⁵ Aŋ pa, Pa, ɔ ba ɛpɔn tɔfɔt.

²⁶ Ɔ wosa ŋa ɔ pa, I kanɛ nu, wuni o wuni ɔwe ba-e, a tə bȧr sɔŋ kɔ; kɛrɛ kɔnɔ ɔwe te ba-e a tə nɔy kɔ hali ara ɔ ba.

²⁷ Kɛrɛ aŋtheranɛ a mi aŋa te yema kȧmȧ i gbəka ŋa, kȧrȧ ŋa nɔ, nə dif ŋa rodi kȧmi.

²⁸ Ma ɔ po fɔf ȧte, ɔ təmȧ kədi tə kəkɔ ro Yerusalɛm.

²⁹ Ka pə re yi ma ɔ fat ro Bɛthfeki yi ro Bɛthani-e, ka kateŋ a bont Ɔlif, ɔ som akarande ŋarəŋ

³⁰ ɔ pa, Kɔnɛ nu ka kagbɔm ȧke lomanɛ nu. Bepi nə wɔŋ ri-e, nə tə bəp asofali ufɛth ukotər, ɔwe wuni o wuni ɔ te tha sa rensa. Səli kɔ nu, nə kȧrȧ kɔ anɔ.

³¹ Bepi wuni o wuni ɔ yif nu, kɔyɛŋ nə səli kɔ-e, ya mə nə pa, ƆMariki ɔ yema kɔ.

³² Ɔwa ŋaŋ aŋa ɔ som aŋ kɔnɛ, aŋ bəp ti mɔ mə ɔ kanɛ ŋa.

³³ Ɔwa maŋ səli aŋsofali ufɛth-e, aŋfəm aŋa ba kɔ aŋ yif ŋa, kɔyɛŋ mə nə səli aŋsofali ufɛth-e?

³⁴ kaŋ pa, ƆMariki ɔ yema kɔ.

³⁵ kaŋ kȧrȧ kɔ ka Yisɔs; aŋ bot ȧsuma taŋ rokɔm ka aŋsofali ufɛth kaŋ deŋ Yisɔsȧŋ rokɔm.

³⁶ Ɔwa ma ɔ bɔ kɔ-e, aŋ rɛns ȧsuma taŋ ro roŋ.

³⁷ Ma ɔ fat ro Yerusalɛm-e, ro aroŋ ara thor ka kateŋ ka Ɔlif-e, ȧruniya bɛ ra aŋkarande ŋɔŋ aŋ təp kəyɔ məbɔnɛ yi kəthɔkəs Kuru rə rim rəbana salata mȧyɔs məkabanɛ ama aŋ po nənk.

³⁸ kaŋ pa, Ubȧy uruba wɔŋ ɔwe mə der ka ȧŋes ŋa ɔMarki; məthɔfəl ro riyana, ɔwa yiki rokɔm kɔm.

³⁹ AŋFarisi alɔm kətɔŋ ka ȧruniya aŋ pa ro ŋɔŋ, Karmɔkɔ, ŋal aŋkarande a mu.

⁴⁰ kɔ lasi ɔ pa ro ŋaŋ, I kanɛ nu, bepi aŋe aŋ taŋk-e, masar gbeŋ mə tə lak dim.

⁴¹ Ɔwa ma ɔ fat ɔ nənk kȧpet, ɔ bokər ki, ɔ pa,

⁴² O munɔ, bepi mə po tȧrȧ naŋ ka ȧŋrey aŋe, mȧtȧy ama yi ta mathɔfəl ma mu! Kɛrɛ ka-ake a maŋk ma ka ɛfɔr ɛ mu.

⁴³ Ȧtesoma-e mȧrey mə tə derər mu, ma aŋtheranɛ a mu aŋ tə gbətɔr kȧpet ȧkunk abana kȧmȧ roŋ o roŋ rə gbəli hɛ yi tə kəwur.

⁴⁴ Aŋ tə napanɛ mu ro thɔf yi aŋwuth a mu rokor ka mu. Aŋ tey hɛ ȧsar ŋin rokɔm ka alɔm pəkasifɛ mə tɛ hɛ ȧŋlɔkɔ ŋa aŋkori a mu.

⁴⁵ kɔ wɔŋ ka ȧŋseth ŋa Kuru ɔ təp kəbȧl aŋa thila.

⁴⁶ kɔ pa ro ŋaŋ, A po gbal kəpa, Ȧŋseth a mi aŋ yi aseth ŋa kəramnɛ, kɛrɛ naŋ nə po səki ŋi kəyaŋka ka akey.

⁴⁷ Ɔwa ɔ thəksa ȧrey o rei ka ȧŋseth ŋa Kuru, kɛrɛ aŋfode abana yi aŋkarmɔkɔ ŋa aŋthɔ, yi aŋkərbomp ka aŋfəm aŋ thɛns tə kədif kɔ,

⁴⁸ kɛrɛ aŋ gbəli hɛ fir ȧte aŋ gbəli yɔ, ȧtesoma-e aŋfəm bɛ aŋ gbapsa kɔ, aŋ sua kɔ ɛləns.