Luk 16 - Ȧŋlemrȧnɛ Ȧfu

¹ kɔ pa sɔ ka aŋkarande ŋɔŋ, Uyola ulɔm ɔ yi ɔwe ba ȧbɔy. Aŋlɔm aŋ gbanthir kɔ ro rɔŋɔŋ kəpa ɔ ləsər ɛyɛt yɔŋ.

² kɔ tela kɔ, ɔ pa ro ŋɔŋ, Ko apa aŋe aŋa i təl ta ȧtȧ mu-e? Yirka ɛyɛt ɛ mi kȧmȧ mə tɔri mi amɔlɔ mati, ȧtesoma-e mə gbəli hɛ sɔ yi ȧbɔy a mi.

³ Ȧŋbɔy ɔ pa ka ȧŋmerȧ ŋɔŋ, To mə i yɔ thɔŋ-e, ma ɔmarki ɔ nɔy mapanth ma mi-e? I ba hɛ afɔsɔ tə kəgbus; i ba məlap tə kəthola.

⁴ I tȧrȧ ȧte mə i yɔ-e, kȧmȧ, bepi a wurɔ mi ka rȧbɔy-e, aŋfəm aŋ tə malanɛ mi ka ɛseth yaŋ.

⁵ Ɔwa ma ɔ tela ukin o kin ɔwe ba tə kəram ɔmarki kɔŋ-e ɔ pa ka ɔtɔtɔkɔ, Mɔlɔ mə ba kəram ɔmarki ka mi-a?

⁶ Ɔ pa, Mȧro mɔlɔ ma ɛthuntha kɛmɛ kin. Kɔ pa ro ŋɔŋ, Gbasi ȧŋreka a mu, mə yirȧ lɛmp mə gbal təgba tərəŋ tɔfɔt.

⁷ Ɔ pa ka ulɔm, Munɔ mɔlɔ mə ba kərȧm-a? kɔ pa, Pəla mɔlɔ ma ɛthuntha kɛmɛ kin. Kɔ pa ro ŋɔŋ, Gbasi ȧŋreka a mu, mə gbal təgba tanlɛ.

⁸ Ka ɔmarki kɔŋ ɔ korikori ȧŋbɔy ŋɔŋ ukənə pəkasifɛ ɔ yɔ kətemp; kotȧy-e aŋwuth ŋa ȧdȧru aŋ yi atempi kətɔŋ ka ŋaŋ pəthasi aŋwuth ŋa ȧŋmothȧ.

⁹ Ka i pa ro nu, Sekəranɛ nu rəyathki yi rayola rəkansoŋ, kȧmȧ bepi rə poŋ-e, a tə malanɛ nu ka ɛseth ya thəbana.

¹⁰ Kɛrɛ ɔwe yi ubɔthi lanɛ ka ɔthan ɔ yi ubɔthi lanɛ ka ɔgbȧthi; ɔwa kɔnɔ ɔwe yi ukənə ka ɔthan ɔ yi ukənə ka ɔgbȧthi.

¹¹ Tiyȧŋ bepi nə yi hɛ abɔthi lanɛ ka rəyola rəkansoŋ-e, kanɛ gbəli lanɛ nu ka ȧte yi tateŋ-e?

¹² Ɔwa bepi nə yi hɛ abɔthi lanɛ ka ȧte wuni lɔm ɔ ba-e, kanɛ mə sɔŋ nu ȧtȧ nu gbeŋ-e?

¹³ Abɔy o bɔy ɔ gbəli hɛ yɔna amarki ŋarəŋ, kotȧy-e tha ɔ gbɛŋa ɔkin, ɔ bɔthər ɔlɔm; thalɔm ɔ tə wopnɛ ɔkin, ɔ tə fəŋfsir ɔlɔm. Nə gbəli hɛ bȧtho Kuru yi rəyola.

¹⁴ AŋFarisi sɔ aŋ təl mȧtȧy ame bɛ; ɔwa maŋ yi afəm aŋa bɔthər akala aŋ sel kɔ.

¹⁵ kɔ pa ro ŋaŋ, Naŋ nə yema yɔ kȧmȧ afəm aŋ nənk nu alompi kɛrɛ Kuru ɔ tȧrȧ ɛmerȧ ɛ nu, kotȧy-e ȧte aŋfəm mə aŋ wop mɔ tȧy təbana tə yi təfarkɛ rodi ka Kuru.

¹⁶ Ȧŋthɔ yi aŋnabi aŋ yi haŋ ka ȧŋlɔkɔ ŋa Yɔn. Kətəp ka ȧŋlɔkɔ ŋati a taməs rȧbȧy ra Kuru, ɔwa wuni o wuni ɔ wɔŋ ri rə afɔsɔ.

¹⁷ Kɛrɛ pə tha yi ȧfɔy tȧy ta ȧkuru yi ȧŋthɔf kəpoŋ pəthasi tȧy təlɔl tin ta aŋthɔ tə kədinɛ.

¹⁸ Wuni o wuni ɔwe mə ter ɔrani kɔŋ, ɔ kȧl nȧntȧ ulɔm, ɔ yɔ kərəp; ɔwa ɔwe mə nȧntȧ ukin ɔwe ɔwos kɔŋ ɔ ter-e, ɔ yɔ kərəp.

¹⁹ Ɔwa uyola ulɔm ɔ yi ri ɔwe wɔŋ ɛlopra ɛfinɔ, ɔ di ɛyɛt ɛtȧk ȧrey o rei.

²⁰ Ɔwa a bot umɔnɛ ulɔm ɔwe mə a bont Lasarus ka kadare kɔŋ, ɔ la təsam,

²¹ ɔ fela tə kəsɔthɔ ara mə fumpɔ ka aŋthebəl ŋa ɔyola; hali ɛtən aŋ der aŋ thȧməs tȧsam tɔŋ.

²² Ka pə re yi ɔwuni mɔnɛ ɔ fi, ɔwa aŋmȧleka aŋ kera kɔ ka aŋkəpət ŋa Ebraham. Ɔwa ɔyola sɔ ɔ fi, ka a maŋk kɔ.

²³ Ma ɔ yi ka anakasi ro kərəfi-e, ɔ lakthi ɛfɔr yɔŋ, kȧmȧ ɔ nənk Ebraham ɔbɔli poŋ yi Lasarus ka aŋkəpət ŋɔŋ.

²⁴ kɔ tela ɔ pa, Pa Ebraham, ba mi ȧney, som Lasarus kȧmȧ ɔ məth aŋsəl ŋɔŋ rə mȧnt, ɔ thɔfsəl ramer ra mi, kotȧy-e i nakasi ɔbana ka anant nəmara ane.

²⁵ Kɛrɛ Ebraham ɔ pa, Wan kȧmi, kala ȧmerȧ kəpa munɔ mə po sɔthɔ ɛyɛt ɛ mu ɛfinɔ ma mə yi ka ȧdȧru, ɔwa Lasarus ɔ sɔthɔ yɛt ɛləs; ka-ake mən ɔ sɔthɔ kəbɛfəth, ɔwa munɔ mə nakasi.

²⁶ Pəthas ȧte, kətɔŋ ka mu yi saŋ a po bot akaŋ abana kȧmȧ ŋaŋ aŋa yema wur nɔ tə kəfəsi ro nu aŋ gbəli hɛ; ɔwa kȧmȧ ŋaŋ ri aŋ te gbəli fəsi ro rɔsu.

²⁷ kɔ pa, Pa, ɔmari mu, som Lasarus ka ȧŋseth ŋa ɔkas kȧmi,

²⁸ ȧtesoma-e i ba awɔnt aruni tamath kȧmȧ ɔ seri ta ȧtaŋ, kȧmȧ aŋ te der ka ɔdɛr ɔbaŋ ɔwe.

²⁹ Ebraham ɔ pa ro ŋɔŋ, Aŋ ba Mosisȧŋ yi aŋnabi. Ta aŋ təlȧ ŋa.

³⁰ kɔ pa, Pa Ebraham, yi thahɔ, kɛrɛ bepi wuni kin ɔ wur ka aŋfi-e, ɔ maŋ ŋa, aŋ tə thupi.

³¹ kɔ pa ro ŋɔŋ, Bepi aŋ selɔ hɛ tə kətəla Mosisȧŋ yi aŋnabi-e, aŋ selɔ hɛ hali wuni kin ɔ yokanɛ ka aŋfi.