Luk 15 - Ȧŋlemrȧnɛ Ȧfu

¹ Ɔwa aŋthoŋkla ɛfȧk yi aŋfəm ŋa ɛhakɛ aŋ fatər kɔ kȧmȧ aŋ təlȧ kɔ.

² Kɛrɛ aŋFarisi yi aŋkarmɔkɔ aŋ fɔfəthanɛ, aŋ pa, Ɔwuni ɔwe ɔ malanɛ aŋfəm ŋa ɛhakɛ, ɔwa ɔ di yi ŋaŋ.

³ kɔ fɔf aŋlomɔ aŋe ro ŋaŋ, ɔ pa,

⁴ Wuni reke ka nu ɔwe mə ba təlɔmɛ kɛmɛ kin, ɔwa ukin ka ŋaŋ ɔ dinɛ kɔ-e, mɔ te tey tȧgba tanlɛ tɔfɔt tȧmthərɛŋanlɛ ro wula, ɔ kɔ thɛns ɔkin ɔwe dinɛ kɔ-e, haŋ ɔ fir kɔ-e?

⁵ Ɔwa ma ɔ po fir kɔ-e, ɔ gbanɛ kɔ ka ȧŋkənklȧ ŋɔŋ yi məbɔnɛ.

⁶ Ɔwa ma ɔ bek ro seth kɔŋ-e, ɔ tela aŋyathki yi aŋfatanɛ ŋɔŋ rɔkin, ɔ pa ro ŋaŋ, Ba nu məbɔnɛ yi minɛŋ, ȧtesoma-e i po fir kalɔmɛ kȧmi ɔwe dinɛ.

⁷ I kanɛ nu məbɔnɛ mə tə yi ro riyana ta ɔwuni kin uləs ɔwe thupi pəthasi afəm alompi təgba tanlɛ tɔfɔt tȧmthərɛŋanlɛ aŋa te ba kəthupi.

⁸ Thalɔm wuni bom ureke ɔwe ba akala ȧferȧ tɔfɔt-e, bepi ŋin aŋ dinɛ kɔ-e, mɔ te moth kəmulɛ, ɔ gbəl ȧŋseth, ɔ thɛns thɛns finɔ haŋ ɔ fir ŋi-e?

⁹ Ɔwa ma ɔ po fir ŋi-e, ɔ tela aŋyathki yi aŋfatanɛ ŋɔŋ rɔkin, ɔ pa, Ba nu məbɔnɛ yi minɛŋ ȧtesoma-e i po fir aŋkala aŋa dinɛ mi.

¹⁰ I kanɛ nu, ya pə yi sɔ-e, məbɔnɛ mə tə yi ka kȧbəprȧnɛ ka aŋmȧleka ŋa Kuru ta ɔwuni kin ɔwe thupi.

¹¹ kɔ pa, Ulaŋgba ulɔm ɔ ba awuth aruni ŋarəŋ;

¹² ka ɔfɛth ɔ pa ka ɔkas kɔŋ, Pa, sɔŋ mi ɛyɛt ɛ mi ɛyɛ i ba tə kəsɔthɔ. Ɔwa ɔ yerəs ŋa ɛyɛt yɔŋ.

¹³ Kədarəŋ ka mərey məthan-e, ɔwan uruni ufɛth ɔ thoŋkla ɛyɛt yɔŋ bɛ-e, ɔ kɔnɛ ȧbiyas rə athɔf abɔli, kɔ ləsər ɛyɛt yɔŋ rə kəyɔ ɔləs.

¹⁴ Ma ɔ po ləsər aŋkala ŋɔŋ bɛ-e, dor rəbana rə wɔŋ ka ȧŋthɔf ŋati, ka amɔnɛ mə təp kəwop kɔ.

¹⁵ kɔ kɔ panthnɛ ka udure ukin ka ȧŋthɔf ŋati, kɔ somra kɔ ka atɔr tɔŋ tə kəwɔnthər təsɔp.

¹⁶ kɔ fela tə kəlasər akor kɔŋ yi ɛwula ɛyɛ tasɔp mə aŋ di; ɔwa wuni o wuni ɔ yer hɛ kɔ.

¹⁷ Ma ɔ kȧl sɔthɔ amera-e, ɔ pa, To ɛbɔy ɛyamɔ ya ɔkas kȧmi aŋ yi kəgbath bɛ, aŋ ba təbo təbeki haŋ tə kətiyanɛ, ɔwa minɛŋ i dinɛ nɔ yi dorȧŋ!

¹⁸ I ti yokanɛ, i ti kȧl ka ɔkas kȧmi, i ti pa ro ŋɔŋ, Pa, i po yɔ ahakɛ ka ȧriyana yi rodi ka mu.

¹⁹ I bek hɛ a bont mi uwan ka mu. Yɔ mi mɔ ukin ka ɛbɔy ɛ mu ɛyamɔ.

²⁰ kɔ yokanɛ, ɔ der ka ɔkas kɔŋ, kɛrɛ ma ɔ yi ras ɔbɔli poŋ-e, ɔkas kɔŋ ɔ nənk kɔ, ɔwa ȧney aŋ wop kɔ, ɔ gbukɛ, kɔ fumpər kɔ ro lim, ɔ muməl kɔ.

²¹ Ka ɔwan ɔ pa ro ŋɔŋ, Pa, i po yɔ ahakɛ ka ȧriyana, yi rodi ka mu, i bek hɛ sɔ a bont mi uwan ka mu.

²² Kɛrɛ ɔkas ɔ pa ka ɛbɔy yɔŋ, Kara aruma ara tha thesa lɛmp, wɔns kɔ ri. Sur kɔ asu, ɔwa wɔns kɔ ɛkɔftha;

²³ ɔwa kȧrȧ ɔna ufɛth uboi, fai kɔ nu. Maŋ di nu, ɔwa sə yɔ məbɔnɛ!

²⁴ Ȧtesoma-e ɔwan kȧmi uruni ɔwe ɔ sa po fi, kɛrɛ ɔ kȧl yi ukəli sɔ; ɔ sa dinɛ kɛrɛ a fir kɔ. Kaŋ təp kəyasanɛ.

²⁵ Ɔwa ɔwan kɔŋ uruni ɔbaki ɔ yi ro kɔr. Ma ɔ der-e, ɔ fatər ro seth, ɔ təl a fer, ɔwa a thɔmɔ.

²⁶ kɔ tela ukin ka ɛbɔy ro ŋɔŋ, ɔ yif to som mȧtȧy ame mə yi.

²⁷ Ȧŋbɔy ɔ pa ro ŋɔŋ, Ɔwɔnt mu ɔ der, ɔwa ɔkas ka mu ɔ po fai ɔna ufɛth uboi pəkasifɛ ɔ po malanɛ kɔ ukəli yi uyeŋki mədɛr.

²⁸ kɔ bansȧ ɔ selɔ hɛ wɔŋ, kɛrɛ ɔkas kɔŋ ɔ wur, ɔ thɔnthɔ kɔ.

²⁹ Kɛrɛ ɔ lasi ɔ pa ka ɔkas kɔŋ, Kəla, təren tǝgbȧthi i po yɔna mu, ɔwa i tha ləsər hɛ aŋyamari a mu; kɛrɛ haŋ thonɔŋ mə sɔŋ hɛ mi uwir ufɛth kȧmȧ i yɔ məbɔnɛ yi aŋyathki a mi.

³⁰ Kɛrɛ ma ɔwan ka mu ɔwe ɔ der-e, ɔwe po ləsər ɛyɛt ɛ mu ka afəm abom arəpi-e, mə po fayȧ kɔ ɔna ufɛth uboi.

³¹ kɔ pa ro ŋɔŋ, Wan kȧmi, munɔ mə yi yi minɛŋ thəbana, ɔwa ɛyɛt bɛ ɛyɛ i ba, munɔ ba yi.

³² Pə yi ɔlompi tə kəyɔ met yi kəsel məbɔnɛ, ȧtesoma-e ɔwɔnt mu ɔwe ɔ sa po fi, kɛrɛ ɔ kȧl yi ukəli, ɔ sa dinɛ, kɛrɛ a fir kɔ.